பருப்பு இல்லை... பாமாயில் இல்லை... வெறுப்பேற்றும் அநியாய விலைக் கடைகள்!

விலைவாசி விண்ணை முட்டும் நிலையில் சாமானியர்களின் ஓரே புகழிடம் நியாய விலைக் கடைகள்தான். ஆனால், கடந்த சில வாரங்களாக தமிழகம் முழுவதும் பல்வேறு ரேசன் கடைகளில் மண்ணெண்ணெய் இல்லை, பருப்பு இல்லை, பாமாயில் இல்லை என்றே குரல்கள் கேட்கின்றன. என்ன நடக்கிறது ரேசன் கடைகளில்?இதுகுறித்து தகவல்களை அறிய தமிழகத்தின் பின்தங்கிய மாவட்டமாகக் கருதப்படும் தர்மபுரி மாவட்டத்தில் ஒரு விசிட் அடித்தோம். கொளகம்பட்டி கூட்டுறவு சங்கத்திற்கு உட்பட்ட நாச்சினாம்பட்டி ரேஷன் கடைக்கு வந்திருந்த ராமி என்பவர், “நாங்க விவசாயக் கூலி வேலை செய்யறோம். அதுல கிடைக்கற கொஞ்சநஞ்ச கூலியைவைச்சு, குடும்பப் பசியை போக்கணும்னா, ரேஷன்ல கொடுக்குற அரிசி, துவரம் பருப்பு, சர்க்கரை, சமையல் எண்ணெய், மண்ணெண்ணெய், கோதுமை இதையெல்லாம்தான் வாங்கியாகணும். ஆனா, அதை வாங்கறதுக்குள்ளேதான் போதும் போதும்னு ஆயிடுது. ஒவ்வொரு மாசமும் மொத வாரத்துலயே வந்து வாங்கிடணும். அது தப்பிச்சுன்னா, அப்புறம் அந்தப் பொருள் கிடைக்குமா, கிடைக்காதான்னு சொல்ல முடியாது.மொத வாரத்துல வந்தாலும்கூட க்யூவுல நின்னுகிட்டே போகும்போது திடீர்ன்னு சில பொருளுங்க தீர்ந்துடுச்சுன்னு சொல்லிடுவாங்க. வெளியில விலைவாசி அதிகம்கறதால எங்களுக்குக் கட்டுப்படியாகவே ஆகாது. இதோ இந்த மாசம் வந்தேன்... பாமாயில், துவரம் பருப்பு தவிர எல்லாம் வாங்கிட்டேன். அது ரெண்டும் எப்ப வரும்னு தெரியாது. கடைக்காரர் அடுத்த வாரம் வந்து பாருங்கன்னு சொல்றார். ஒரு நாள் கூலிய விட்டுட்டு இதுக்காக வரணும். அப்பவும் வருமான்னு தெரியாது!” என்றார், கவலையுடன்..அரூர் அருகே உள்ளே சங்கலிவாடியைச் சேர்ந்த மனோகரன் என்பவர், “குடும்பத்துல நானும், மனைவியும்தான். எங்களுக்கு 12 கிலோ அரிசி, 1 லிட்டர் பாமாயில், ஒரு கிலோ சர்க்கரை, துவரம் பருப்பு, ஒரு கிலோ கோதுமை கொடுக்கணும். அரிசி, சர்க்கரை ரெகுலரா கிடைக்குது. ஒரு சிலிண்டர் பயன்படுத்துறதால, ஒரு லிட்டர் சீமெண்ணெய் கொடுக்கணும். இதுவரை வாங்குனதே இல்லை. ரேஷன் கடைக்காரரைக் கேட்டா, ‘வெச்சிக்கிட்டா வஞ்சனை பண்றோம்’னு சொல்றார். இந்த மாசம் சங்கிலிவாடி ரேஷன்லயும் மோப்ரிப்பட்டி ரேஷன்லயும் பருப்பு, பாமாயில் வரல. விசாரிச்சா, மாவட்டம் முழுக்க இதே நிலைதான்னு சொல்றாங்க” என்று அங்கலாய்த்துக்கொண்டார்.பொதுமக்களின் குற்றச்சாட்டுகள் குறித்து, நாச்சினாம்பட்டி ரேஷன் கடை விற்பனையாளர் ரமேஷிடம் பேசினோம். “பச்சரிசி, புழுங்கல் அரிசி, சர்க்கரை, கோதுமை இதை எல்லா அட்டைகளுக்கும் போட்டுட்டேன். பாமாயில், துவரம் பருப்பு மட்டும் இன்னும் வரலை. நுகர்வோர் பெரும்பாலும் சர்க்கரை, துவரம் பருப்பு, பாமாயில், கோதுமையை வாங்காம இருக்கமாட்டாங்க.சுத்துவட்டாரப்பகுதியில வசிக்கற கூலி வேலைக்குச் செல்லும் மக்கள், ரேஷன்ல விலை மலிவுங்கறதால எல்லாப்பொருளையும் வாங்கிப் பயன்படுத்துறாங்க. முந்தியெல்லாம் மாசம் பொறந்தா ஒண்ணாம் தேதிலேர்ந்து பத்தாம் தேதிக்குள்ள எல்லா ரேஷன் பொருட்களும் கடைகளுக்கு வந்து இறங்கிடும். ஆனா, இப்போ சில மாசமா சில பொருட்கள் வர்றது தாமதமாகுது. இதோ இந்த மாசம், அரிசி, சர்க்கரை, கோதுமை, புழுங்கல் அரிசி எல்லாம் வந்துடுச்சு. ஆனா, பாமாயிலும், துவரம் பருப்பும் வரலை. மக்கள் தினமும் வந்து வார்த்தைகளால கொத்தி எடுக்குறாங்க. அதுவும் சிலர், “நீங்க பொருளை வச்சிக்கிட்டே போடமாட்டேங்கறீங்களா?னு திட்டுறாங்க. என்னத்த சொல்ல?” என்றார் சலிப்பாக..மோப்பிரிப்பட்டி ரேஷன் கடை விற்பனையாளர் சுகதேவ்விடம் பேசினோம்... “ரேஷன் கடை ஊழியர்கள் மேல பலருக்கும் தப்பான அபிப்ராயம் இருக்கு. ஆனா, உண்மை என்னன்னு தெரிஞ்சா அதிர்ந்துடுவீங்க. 50 கிலோ அரிசி மூட்டைல, 45 முதல் 48 கிலோ வரைதான் அரிசி இருக்கும். இப்படி எல்லாப் பொருளுமே எடை குறைவாக இருக்கும். இதை நாங்க எப்படி சரிசெய்யறது? மக்களுக்கும் பதில் சொல்லமுடியாம, அதிகாரிகளுக்கும் பதில் சொல்ல முடியாம நாங்க மத்தளம் மாதிரி ரெண்டு பக்கமும் மாட்டிக்கிட்டு விழிக்கிறோம்” என்றார் வேதனையுடன்.இதுகுறித்து பாலக்கோடு வட்ட வழங்கல் அலுவலர் பழனியிடம் பேசினோம்... “தமிழகம் முழுவதும் பாமாயில், துவரம் பருப்பு பற்றாக்குறை இருக்கு. ரேஷன் பொருட்கள் கொள்முதலை பர்சேஸ் டீம்தான் செய்யவேண்டும். சப்ளையர்ஸ் லெவலில் டிலே செய்கிறார்கள். பொருட்கள் குடோனுக்கு வந்ததும், ரேஷன் கடைகளுக்கு சப்ளை செய்துவிடுவோம்”என்று கூறி முடித்துக்கொண்டார்.மாவட்ட வழங்கல் அலுவலர் ஜெயக்குமாரிடம் கேட்டதற்கு, “கவர்மென்ட்ல டெண்டர் பத்தாம் தேதிக்கு மேல போடுறதால பாமாயில், துவரம் பருப்பு வரதுல டிலே ஆகுது. கூடிய விரைவுல இதை சரிசெய்துடுவோம்!” என்றார். இதே விளக்கத்தையே கூறும் தமிழ்நாடு நுகர்பொருள் வாணிபக் கழக மண்டல மேலாளர் ராஜேந்திரன், “நம்ம மாவட்டம், சின்ன மாவட்டம்தான். ஏற்கெனவே 50 சதவிகித பாமாயில், துவரம் பருப்பு கொடுத்தாச்சு. மிச்சத்தையும் சீக்கிரம் குடுத்துடுவோம்!” என்று கூறி முடித்துக்கொண்டார். ஏழைங்க வயித்துல அடிக்காதீங்க ஆபிசர்ஸ்! -பொய்கை.கோ.கிருஷ்ணா

பருப்பு இல்லை... பாமாயில் இல்லை... வெறுப்பேற்றும் அநியாய விலைக் கடைகள்!

Related Stories