பாழாய்போகும் பழங்குடியின கிராமங்கள்! நிதியை மாற்றி சதி செய்யும் அரசு!

பழங்குடியினர் கிராமத்துக்கு சாலை வசதி இல்லாததால், பாம்பு கடித்த குழந்தையை தூக்கிக்கொண்டு ஓடியும் காப்பாற்ற முடியாத அவலத்தில் இருக்கிறது தமிழ்நாடு. இந்த லட்சணத்தில் பழங்குடியினருக்காக ஒதுக்கப்பட்ட நிதியை வனத்துறைக்கும் ஊரக வளர்ச்சித் துறைக்கும் தாரை வார்த்திருக்கிறது தமிழக அரசு!தகவல் அறியும் சட்டம் மூலம் இந்த அவலத்தை தோலுரித்திருக்கிறார் சமூக ஆர்வலர் கார்த்திக். “தமிழகத்தில் ஆதிதிராவிடர் மற்றும் பழங்குடியினர் நலத்துறை செயல்பட்டு வந்த நிலையில், 2018ம் ஆண்டு முதல் பழங்குடியினர் நலத்துறைக்கென தனித்துறையாக தமிழ்நாடு பழங்குடியினரகம் உருவாக்கப்பட்டது. தொடர்ந்து பழங்குடியினர் நலனுக்காகச் செயல்பட்டு வந்த ஆன்றோ மன்ற செயல்பாடுகள் மாற்றி அமைக்கப்பட்டு புதிய அரசாணை வெளியிடப்பட்டது..இதற்கு தலைவராக ஆதிதிராவிடர் நலத்துறை அமைச்சர் இருக்கிறார். தவிர பழங்குடியினர் நலனை கவனிப்பதற்காக எம்.எல்.ஏ.க்கள் உள்ளிட்ட 20 பேர் கொண்ட நிபுணர் குழுவும் உள்ளது. ஆனால், 2021ம் ஆண்டு முதல் ஆன்றோ மன்றம் செயல்படவே இல்லை, ஒரு கூட்டம்கூட போடவில்லை. இதனால் பழங்குடியின மக்களுக்கான எந்த பணியும் நிறைவேற்றப்படவில்லை. பணிகள் நடைபெறவில்லை என்பதால், கடந்த மூன்று ஆண்டுகளில் 265 கோடி ரூபாய் நிதியையும் பயன்படுத்த முடியாமல், அரசு கஜானாவுக்கே திருப்பி அனுப்பப்பட்டிருக்கிறது. தமிழக அரசு அதை வனத்துறை மற்றும் ஊரக வளர்ச்சித் துறைகளுக்கு பகிர்ந்தளித்துவிட்டது. இந்தத் தகவலை ஆர்.டி.ஐ. மூலம் பெற்றுள்ளேன்.தமிழகத்தில் ஏராளமான பழங்குடியினர் கிராமங்கள் அடிப்படை வசதிகள் இல்லாமல் இருக்கின்றன. சமீபத்தில்கூட வேலூர் மாவட்டத்தில் பழங்குடியின சிறுமி பாம்பு கடித்து உயிருக்குப் போராடிய நிலையில், சாலை வசதி இல்லாததால் அவனது பெற்றோர் தோளில் சுமந்து வந்த செய்தி பத்திரிகைகளில் சமீபத்தில் வெளியானது. அந்த சிறுமி இறந்துவிட்டாள்..கொடைக்கானல், பொள்ளாச்சி, நீலகிரி உள்ளிட்ட இடங்களில் உள்ள பழங்குடியினர் கிராமங்கள் வளர்ச்சி அடையாமல் இருக்கின்றன. கொடைக்கானல், கோம்பை கிராம மக்கள், மழைக் காலங்களில் மெயின் ரோட்டுக்கு வருவதற்குள் அட்டைப்பூச்சிகள் காலை அப்பி ரத்தம் உறிஞ்சும் கொடுமை இன்னமும் தொடர்கிறது. பழங்குடியினருக்கான துறையை மட்டும் தனியாக அமைத்தால் போதாது; பழங்குடியினருக்கு தனி அமைச்சகம் வேண்டும். அப்போதுதான் அவர்களுக்கான நலத்திட்டங்கள் முழுமையாக சென்றடையும்” என்றார்.ஆதிதிராவிடர் நலத்துறை அமைச்சர் கயல்விழி செல்வராஜிடம் பேசினோம்... “ஆன்றோ மன்றம் உறுப்பினர்கள் தேர்வுக்கான போலீஸ் அறிக்கை பெறுவதில் தாமதம் ஏற்பட்டுள்ளது. பழங்குடியினர் கிராமங்களுக்கு சாலை வசதி ஏற்படுத்துவதில் வனத்துறை சட்டம் இடையூறாக இருப்பதால் அதை மாற்றி அமைப்பதற்காக சட்டமன்றத்தில் புதிய சட்டச்திருத்தம் கொண்டுவர முயற்சி நடந்து கொண்டிருக்கிறது. ஊரக வளர்ச்சி மற்றும் வனத்துறை பகுதிகளில் பழங்குடியினர் கிராமங்கள் வருவதால் அதன் வளர்ச்சிப் பணிகளுக்காக நிதியை மாற்றியிருக்கிறார்கள். இனிவரும் காலங்களில் பழங்குடியினர் நிதி வேறு துறைகளுக்கு மாற்றம் செய்யமுடியாதபடி சட்டத்திருத்தம் மேற்கொள்ள இருக்கிறோம்” என்றார்.இன்னும் ஒரு உயிர் போவதற்குள் அதை செய்யுங்க மேடம்!