பதவி, பறிப்பு, பரிசு, பின்னணியில் உதய்!

தன் காலத்துக்குப் பிறகு மகன் ஸ்டாலின் அரசியலில் எந்தத் தடுமாற்றத்தையும் அடையக் கூடாது என்பதற்காக, கருணாநிதி விதவிதமான வியூகங்கள் வகுத்து ஸ்டாலினுக்கு பூப்பாதை போட்டுக் கொடுத்தார். அப்படித்தான் ஸ்டாலினும் தன் மகன் உதயநிதிக்கு மகுடம் சூட்ட ஏதுவாக பாதுகாப்பு வளையம் அமைக்கிறார்; அமைச்சரவை மாற்றங்களும் கூட அதையொட்டியே நடக்கின்றன என்பதுதான் அறிவாலய வட்டாரத்தில் எழுந்துள்ள கணகணப்பு கலந்த முணுமுணுப்பு! நாசரின் அமைச்சர் பதவி பிடுங்கப்பட்டது தொடங்கி, அமைச்சரவை மாற்றம் வரை தி.மு.க. மூத்த தலைவர் ஒருவரிடம் பேசினோம். “ தி.மு.க தலைவராக கருணாநிதி பொறுப்பேற்ற பின்னர் ஆட்சி அமைந்தபோது தனக்கென ஒரு ஆதரவு அமைச்சர்கள் கூட்டத்தை உருவாக்கிக்கொண்டார். அந்த பட்டியலில் இடம் பெற்றவர்கள்தான் அன்பழகன், நாஞ்சில் மனோகரன், அன்பில் தர்மலிங்கம், பொன்.முத்துராமலிங்கம், சாதிக்பாட்சா போன்றவர்கள்..இந்த பட்டியலின் தொடர்ச்சியாக வீரபாண்டி ஆறுமுகம், பி.டி.ஆர்., பெரியசாமி ஆகியோரும் கருணாநிதியின் விசுவாசியாக இருந்தாலும், தவறு என்று வந்தால் கருணாநிதியிடம் தட்டிக் கேட்க தயங்காதவர்கள். தனது நீண்டகால நட்பு வட்டமான இவர்கள் எதிர்காலத்தில் ஸ்டாலின் தலைமைப் பொறுப்புக்கு வரும்போது அவரிடம் ஆதிக்கம் செலுத்தக்கூடாது. அவ்வாறு செயல்பட்டால் அது ஸ்டாலினின் தனித்தன்மைக்கு ஆபத்தாகிவிடும் என்று ராஜதந்திரத்தோடு முடிவெடுத்துதான் பொன்முடி, கே.என்.நேரு, அன்பில் பொய்யாமொழி போன்றவர்களுக்கு கட்சியில் முக்கிய பொறுப்பு கொடுத்து ஸ்டாலினுக்கு ஆதரவு வட்டத்தை உருவாக்கி கொடுத்தார் கருணாநிதி.தந்தை மகனுக்காற்றும்...தனது தந்தை தனக்கு உருவாக்கிக் கொடுத்த அதே பாதுகாப்பு வளையத்தை மகன் உதயநிதிக்கு உருவாக்கத் தொடங்கியிருக்கிறார் ஸ்டாலின். தற்போது அமைச்சர்களின் செயல்பாடுகளைப் பொறுத்தே அமைச்சரவை மாற்றங்கள் நடைபெற்றாலும், அதையும் உதயநிதியை மனதில் வைத்தே ஸ்டாலின் வியூகம் வகுக்கிறார். அப்படி நடந்ததுதான் சமீபத்தில் நடந்த பதவி மாற்றங்கள், பதவி பறிப்புகள் மற்றும் திடீர் பரிசாக புது அமைச்சர் பதவி... எல்லாமே..அமைச்சரவை மாற்றம் குறித்து ஒரு மாதத்துக்கு மேலாகவே கிசுகிசுக்கப்பட்டாலும், அதற்கான அறிகுறி கடந்த வாரமே தெரிந்துவிட்டது. அதாவது, மே 23-ம் தேதி வெளிநாடு பயணம் மேற்கொள்கிறார் முதல்வர். இதற்காக அவருடன் பயணிக்கும் அமைச்சர்கள் மற்றும் அதிகாரிகள் பட்டியலை தயாரித்து முன்னதாகவே மத்திய உள்துறை மற்றும் சம்பந்தப்பட்ட நாடுகளின் தூதரகங்களுக்கு அனுப்ப வேண்டும். அப்படி தமிழக அரசு தயாரித்த பட்டியலில் டி.ஆர்.பி.ராஜாவின் பெயர் இடம்பெற்றிருந்தது. அப்போதே ராஜாவுக்கான பதவி உறுதி செய்யப்பட்டுவிட்டது.தொடர்ந்தே, மே 7-ம் தேதி ஞாயிற்றுக்கிழமை இரவு முதல்வர் இல்லத்துக்கு அமைச்சர்கள் சிலர் அழைக்கப்பட்டு, மறுநாள் கண்டிப்பாக சென்னையில் இருக்குமாறு உத்தரவிடப்பட்டது. மே 8-ம் தேதி மாலை 3 மணியளவில் முதல்வர் வீட்டில் தொடங்கியது கூட்டம். சில சில அமைச்சர்களை தனித்தனியே அழைத்தார் முதல்வர். அதில் முதல் ஆளாக அமைச்சர் நாசர் அவரின் மகன் ஆஸிம் ராஜாவுடன் ஆஜரானார். அப்போது, இருவர் மீதும் உளவுத்துறை கொடுத்த ரிப்போர்ட்டை குறிப்பிட்டு சில விளக்கங்களை கேட்ட முதல்வர், ஆஸிம் ராஜாவை அனுப்பி விட்டு, நாசரிடம் ’என் நெருங்கிய நண்பர் நீங்கள். எனக்கு மனமே இல்லாமல்தான் சில கடினமான முடிவுகளை எடுக்க வேண்டியிருக்கிறது’ என்று பேசி அனுப்பினார். அப்போதே நாசரின் பதவி பறிப்பு உறுதியாகிவிட்டது..நாசரைப் பொறுத்தவரை அவர் மீதான முதல்வரின் அதிருப்தி மிகப் பெரியது. முந்தைய அ.தி.மு.க ஆட்சியில் மிக மோசமான செயல்பாடுகளால் கடுமையாக விமர்சிக்கப்பட்டவர் பால்வளத்துறை அமைச்சர் ராஜேந்திரபாலாஜி. அவ்வளவு மோசமான நிலையிலும் ஆவின் பால் கொள்முதல் 44 லட்சம் லிட்டராக இருந்தது. அதுதான் தற்போது 23 லட்சம் லிட்டராக கிட்டத்தட்ட பாதிக்கு பாதி குறைந்துவிட்டது. தவிர, பால் கொள்முதல் தொடங்கி முகவர்களிடம் சப்ளை செய்வதுவரை கமிஷன் அடித்தார்கள். ஆவின் தவித்து ஆவடி சுற்றுவட்டார பகுதிகளில் நடக்கும் அனைத்து விவகாரங்களிலும் நாசரின் மகன் ஆஸிம்ராஜா மூக்கை நுழைத்ததால்தான் அவர் கட்சியை விட்டே கட்டம் கட்டப்பட்டார். இப்போது நாசரின் பதவியும் பறிபோயிருக்கிறது.மாற்றங்கள் என்ன?நாசரை வழியனுப்பிய பிறகு மனோ தங்கராஜ், தங்கம் தென்னரசு உள்ளிட்டோரை அழைத்து அமைச்சரவை மாற்றம் தொடர்பாக முதல்வர் ஆலோசனை நடத்தினார். அதன்படி தகவல் தொழில்நுட்பத்துறை அமைச்சராக இருக்கும் மனோ தங்கராஜ், பால்வளத்துறை அமைச்சராக நியமிக்கப்படவிருக்கிறார். தொழில்துறை அமைச்சராக இருக்கும் தங்கம்தென்னரசு நிதித்துறை அமைச்சராக நியமிக்கப்படவிருக்கிறார். அவர் வசம் இருக்கும் தொழில்துறை டி.ஆர்.பி ராஜாவுக்கு அளிக்கப்படவிருக்கிறது. அதேபோல பி.டி.ஆரிடம் இருந்து நிதித்துறை தங்கம் தென்னரசுக்கு அளிக்கப்படவிருக்கிறது. பி.டி.ஆருக்கு ஐ.டி துறை ஒதுக்கப்படவிருக்கிறது..பொதுக்கூட்டத்தை புறக்கணித்த நாசர்!மே 9-ம் தேதி இரவு 8 மணியளவில் அமைச்சர் பதவியிலிருந்து நாசர் நீக்கப்பட்டதாக அறிவிப்பு வெளியானது. அப்போது சென்னையில் தி.மு.க சாதனை விளக்க பொதுக்கூட்டத்தில் பேசிக்கொண்டிருந்தார் நாசர். அடுத்ததாக அவர் திருவேற்காடு பொதுக்கூட்டத்தில் பேச வேண்டும். ஆனால், பதவி பறிப்பால் அப்செட் ஆனவர், கூட்டத்தை புறக்கணித்து நேராக வீட்டுக்குச் சென்றுவிட்டார்.தற்போது வன்னியர் சமூகத்தைச் சேர்ந்த 21 எம்.எல்.ஏ-க்களில் மூவருக்கு மட்டுமே அமைச்சர் பதவி வழங்கப்பட்டுள்ளது. ஆனால், முக்குலத்தோர் சமுகத்தைச் சேர்ந்த 13 எம்.எல்.ஏ-க்களில் ஏற்கெனவே ஐ.பெரியசாமி, தங்கம் தென்னரசு, பி.மூர்த்தி, அன்பில் மகேஷ் பொய்யாமொழி என 4 பேர் அமைச்சராக இருந்தநிலையில், அவர்களோடு ஐந்தாவதாக டி.ஆர்.பி. ராஜாவும் இணைந்துள்ளதால் அமைச்சரவையில் முக்குலத்தோர் பெரும்பான்மை பெற்றிருக்கிறார்கள். இது வன்னியர் உட்பட பிற சமூக எம்.எல்.ஏ-க்களிடம் முணுமுணுப்பை ஏற்படுத்தியிருக்கிறதுஅதேபோல, இஸ்லாமிய சமுதாயத்தில் இருந்து மஸ்தான், நாசர் ஆகிய இருவர் மட்டுமே அமைச்சர்களாக இருந்த நிலையில், தற்போது நாசர் பதவி பறிக்கப்பட்டதால் சிறுபான்மை சமூகத்தின் பிரதிநிதித்துவம் குறைந்துவிட்டது. இதுவும் இஸ்லாமியர்கள் மத்தியில் அதிருப்தியை ஏற்படுத்தியுள்ளது..ஜென் மனநிலையில் நேரு...இதற்கிடையே நகராட்சி நிர்வாகத்துறையான அமைச்சர் கே.என்.நேருவின் இலாகா மாற்றப்பட்டு, அந்த இலாகா மா.சுப்ரமணிக்கு வழங்கப்படும் என்கிற தகவல் பரவியது. இதைக் கேள்விப்பட்டு கடும் மன உளைச்சல் அடைந்த நேரு, ’இப்ப மட்டும் என் துறையில என்ன வாழுதாம்... என்ன வேணும்னாலும் செஞ்சிக்கிட்டும். நான் யார்கிட்டயும் எதையும் கேட்கிற மூடுல இல்லை’ என்று ஜென் மனநிலைக்குப் போய்விட்டாராம்.சரண்டர் துரைஇதேபோல மூத்த அமைச்சர் துரைமுருகனுக்கு தற்போது இருக்கும் இலாகாவை மாற்றி சட்டம் ஒதுக்கப்படும் என்று தகவல் பரவியது. இதனால் பதறிப்போனவர் உடனடியாக முதல்வரிடம் சென்று, ‘தலைவரே, அந்த துறையை கொடுத்தா ஜெயில்ல காய்கறி வாங்குற டெண்டரை மட்டும்தான் விட முடியும்...’ என்று புலம்பியிருக்கிறார். ’அண்ணே உங்களுக்கு எதுவும் பிரச்னை இல்லை’ என்று சிரித்தபடியே முதல்வர் சொன்ன பிறகே துரைமுருகன் நிம்மதி பெருமூச்சு விட்டார்.துண்டுபோட்ட பெண் எம்.எல்.ஏ-க்கள்!நாசரின் பதவி பறிக்கப்படும் என தகவல் பரவியபோதே, ஆதிதிராவிடர் நலத்துறை அமைச்சராக இருக்கும் கயல்விழி செல்வராஜின் பதவியும் பறிக்கப்படும் என தகவல்கள் கசிந்தன. இதையடுத்து பெண் எம்.எல்.ஏ-க்களிடம் சிலரிடம் பரபரப்பு தொற்றிக்கொண்டது. கயல்விழியின் பதவியைப் பிடிக்க தென் மாவட்டத்தின் ’மொழி’ எம்.எல்.ஏ-வும் சென்னை புறநகரின் ’லட்சுமி’கரமான எம்.எல்.ஏ-வும் பலவழிகளில் வெயிட்டாக மூவ் செய்தார்கள். ஆனால், எதுவும் எடுபடவில்லை.தப்பிய எ. வ.வேலு - செந்தில்பாலாஜிஇப்போது மீண்டும் அமைச்சர் உதயநிதி ஸ்டாலின் கதைக்கு வருவோம். புது அமைச்சராக தற்போது அறிவிக்கப்பட்டுள்ள டி.ஆர்.பி.ராஜா, உதயநிதியின் தீவிர ஆதரவாளர். ஏற்கெனவே அவரது அதிதீவிர ஆதரவாளரும் நெருங்கிய நண்பருமான அன்பில் மகேஸ் பொய்யாமொழி அமைச்சராக இருக்கிறார். இதுபோக அவரது உள்வட்டத்தில் இருக்கிறார் அமைச்சர் செந்தில்பாலாஜி.தற்போதைய அமைச்சரவை மாற்றத்தில் செந்தில்பாலாஜியிடம் இருக்கும் இரண்டு வலுவான துறைகளில் ஒன்றை பறித்துவிட வேண்டும் என்று சீனியர்கள் பலரும் காய்நகர்த்திவந்தார்கள். ஆனால், அதற்கு தடைபோட்டுவிட்டாராம் உதயநிதி. அதேபோல எ.வ.வேலுவிடம் வலுவான இரண்டு துறைகள் இருக்கின்றன. அவற்றில் ஒன்றையும் பறித்துவிட வேண்டும் என்கிற சிலரது ஆலோசனையும் கட் செய்துள்ளது சித்தரஞ்சன் சாலை மேலிடம். இவையெல்லாமே விரைவில் துணை முதல்வராக பதவியேற்க இருக்கும் உதயநிதிக்கான பாதுகாப்பு வளையமே” என்று விரிவாக சொல்லி முடித்தார் அந்த மூத்த தலைவர்!அப்படியே வாய்த்துடுக்கு அமைச்சர்கள் சிலரையும் கவனித்திருக்கலாம் என்பதே மக்கள் வாய்ஸ்! படங்கள் : செந்தில்நாதன்

பதவி, பறிப்பு, பரிசு, பின்னணியில் உதய்!

Related Stories