பழைய இரும்பு சாமானத்துக்கு பேரிச்சம் பழம்... காக்கிகள் களவாடிய 360 வாகனங்கள்!

“பழைய இரும்பு சாமானத்துக்கு பேரிச்சம் பழம்... பேரிச்சம் பழம்... பழைய இரும்பு சாமானத்துக்கு பேரிச்சம் பழம்... பேரிச்சம் பழம்...” - தேனாம்பேட்டை காவல் நிலைய கட்டுப்பாட்டில் வைக்கப்பட்டிருந்த அந்த டூ வீலர்களை பார்க்கும்போதெல்லாம் இப்படியோர் அசரீரி போலீஸார் காதில் கேட்டிருக்கும்போல. ஒருநாள் இரவு மொத்த வாகனங்களையும் திருடி விற்றுவிட்டார்கள்... தங்களது கிரிமினல் மூளையை 360 டிகிரியிலும் யோசித்து போலீஸார் விற்ற வண்டிகளின் எண்ணிக்கையும் அதே 360 தான்! விபத்து, விதிமீறல், திருட்டு உள்ளிட்ட சம்பவங்களில் பறிமுதல் டூ வீலர்களை போலீஸார் சம்பந்தப்பட்ட காவல் நிலையங்களில் போட்டு வைப்பது வழக்கம். அவை வெயிலிலும், மழையிலும் துருப்பிடித்து, டயர், சீட்டு, இன்ஜின் என பாகங்கள் ஒவ்வொன்றாக திருடப்பட்டு எலும்புக்கூடாக காட்சியளிக்கும். அப்படிதான் சென்னை தேனாம்பேட்டை காவல் நிலையத்தில் நிறுத்தி வைக்கப்பட்டிருந்த 360 பைக்குகள் திடீரென மாயமாகி போயிருக்கின்றன. இதுபற்றி விசாரித்தபோது, இரவோடு இரவாக அந்த பைக்குகள் விற்கப்பட்டதாக தகவல் கசிய, விவகாரம் சென்னை போலீஸ் கமிஷனர் வரை சென்றிருக்கிறது..இதுகுறித்து நேர்மையான போலீஸார் சிலரிடம் பேசினோம்... “கடந்த 2020, 2021 ஆகிய இரு ஆண்டுகளில் கொரோனா பேரிடரால் 144 தடை உத்தரவு பிறப்பிக்கப்பட்டிருந்தது. அப்போது தடை உத்தரவை மீறி பயணம் செய்த வாகனங்களை போலீஸார் பறிமுதல் செய்தனர். இதில் தேனாம்பேட்டையில் மட்டும் நான்காயிரம் வாகனங்கள் பறிமுதல் செய்யப்பட்டு, போலீஸ் ஸ்டேஷனுக்கு பின்புறம் இருக்கும் காமராஜர் அரங்க மைதானத்தில் நிறுத்தி வைக்கப்பட்டிருந்தன. இவற்றில் 3,640 பேர் அபராதத் தொகையை செலுத்திவிட்டு, வாகனங்களை எடுத்துச் சென்றனர். மீதமிருந்த 360 வாகனங்களுக்கு யாரும் உரிமை கோரி வரவில்லை. தொடர்ந்து சம்பந்தப்பட்டவர்களுக்கு போலீஸ் தரப்பில் இருந்து கடிதம் எழுதியும் பதில் இல்லை. இதுகுறித்து போலீஸார் விசாரித்தபோது கொரோனாவில் பாதிக்கப்பட்ட பலர் இறந்துவிட்டதால் வாகனங்களை உரிமை கோர வரவில்லை என்பதும், பலர் ஆர்.சி. புக், இன்சூரன்ஸ் இல்லாததால் தங்கள் வாகனங்களைக் கேட்டு வரவில்லை என்பதும் தெரிய வந்தது..இதற்குப் பிறகுதான் போலீஸாரின் குறுக்கு புத்தி வேலை செய்ய ஆரம்பித்தது. இரவோடு இரவாக காமராஜர் அரங்க மைதானத்தில் நிறுத்தி வைக்கப்பட்டிருந்த வாகனங்களை, ராஜரத்தினம் ஸ்டேடியத்துக்கு மாற்றுவதாக உயரதிகாரிகளுக்கு சம்பந்தப்பட்ட போலீஸார் தகவல் தெரிவித்தனர். ஆனால், இரண்டு ஆட்டோ மற்றும் 36 டூ வீலர்கள் மட்டுமே ராஜரத்தினம் ஸ்டேடியத்துக்கு மாற்றப்பட்டன. மற்ற வாகனங்கள் அனைத்தும் புதுப்பேட்டைக்கு கொண்டு செல்லப்பட்டு 20 லட்சம் ரூபாய்க்கு விற்கப்பட்டுவிட்டன.காதும், காதும் வைத்தாற்போல் இந்தச் சம்பவம் நடந்துமுடிந்துவிட்டாலும் பணத்தை பங்கு பிரிப்பதில் சம்பந்தப்பட்ட போலீஸாருக்கு இடையே சண்டை வந்துவிட்டது. வாகனங்கள் பறிமுதல் செய்யப்பட்டபோது விசாரணை அதிகாரிகளாக இருந்த சில எஸ்.ஐ-க்களுக்கு பங்கு செல்லவில்லை. அவர்கள் கேட்டு கேட்டு சலித்துப் போய்விட்டார்கள். இதன் பிறகுதான் விஷயம் மெதுவாக வெளியே கசியத் தொடங்கியது. ஒருகட்டத்தில் உளவுப்பிரிவு காவலர் ஒருவர் இந்த விவகாரத்தை மேலிடத்துக்குச் கொண்டுச் சென்றார்.இதையடுத்து சம்பந்தப்பட்ட போலீஸாரிடம் துணைக் கமிஷனர் ஒருவர் விசாரணை நடத்தினார். இன்னொரு பக்கம் போலீஸாரிடம் இருந்து வாகனங்களை வாங்கிய புதுப்பேட்டை வியாபாரிகளிடம் விசாரணை நடக்கிறது” என்றார்கள்..இதுகுறித்து தேனாம்பேட்டை இன்ஸ்பெக்டர் முரளியிடம் கேட்டோம்... “நீங்கள் சொல்வதுபோல் எதுவும் நடக்கவில்லை”என்று சுருக்கமாக முடித்துக்கொண்டார். அவரிடம் விசாரணை நடத்தியதாக கூறப்படும் துணை கமிஷனர் அருண் கபிலனிடம் கேட்டோம். “தேனாம்பேட்டை காவல் நிலையத்தில் நிறுத்தி வைக்கப்பட்டிருந்த வாகனங்கள் இடம் மாற்றப்பட்டது மற்றும் விற்பனை செய்யப்பட்டதாகக் கூறப்படுவது குறித்த விசாரணை நிலுவையில் இருக்கிறது. எதையும் வெளியில் சொல்ல முடியாது” என்றார்.ஓய்வுபெற்ற போலீஸ் அதிகாரி கருணாநிதியோ, “சென்னை நகரம் முழுவதும் உள்ள அனைத்து காவல் நிலையங்களிலும் குற்ற வழக்குகளில் கைப்பற்றப்பட்ட கார், ஆட்டோ, டூ வீலர் என அனைத்து வாகனங்களையும் ஒவ்வோர் ஆண்டும் அல்லது ஆறு மாதத்துக்கு ஒரு முறை ஏலம் விடவேண்டும். இல்லையென்றால் எத்தனை வண்டிகள் பறிமுதல் செய்யப்பட்டு சம்பந்தப்பட்ட காவல்நிலையங்களில் நிறுத்தி வைக்கப்பட்டிருக்கின்றன என்ற விவரத்தை அதிகாரிகள் துல்லியமாக வைத்திருக்க வேண்டும். இந்த விதியை தமிழ்நாடு முழுவதும் கடைப்பிடிக்க வேண்டும். இதுதவிர சி.சி.டி.வி. வைக்கப்பட்டிருந்தால் இதுபோன்ற திருட்டை தடுக்கலாம்” என்றார்.. இதுகுறித்து சென்னை போலீஸ் கமிஷனர் சங்கர் ஜிவாலிடம் கேட்டபோது, “தேனாம்பேட்டை காவல் நிலையத்தில் இருந்த வாகனங்கள் ராஜரத்தினம் ஸ்டேடியத்துக்கு மாற்றப்பட்ட விவகாரம் குறித்து விசாரணை நடந்துவருகிறது. இந்தச் சம்பவத்தில் வாகனங்கள் விற்கப்பட்டதாகவும் சொல்லப்படுகிறது. ஆனால், இது உறுதிப்படுத்தப்படவில்லை. விசாரணையின் முடிவில் உண்மை தெரியும். அப்படி யாராவது பொதுமக்கள் வாகனத்தை விற்றிருந்தால் அவர்கள் மீது சட்டப்படியாகவும், துறைரீதியாகவும் கடும் நடவடிக்கை எடுக்கப்படும்” என்றார் உறுதியாகஅதையும்தான் பார்ப்போம் கமிஷனர் சார்...- கணேஷ்குமார்

பழைய இரும்பு சாமானத்துக்கு பேரிச்சம் பழம்... காக்கிகள் களவாடிய 360 வாகனங்கள்!

Related Stories