வெட்டிப் பேச்சு...தூக்கம் போச்சு கொட்டி தீர்த்த ஸ்டாலின்..!

‘மெத்தக் கூத்தாடி கூத்தாடி போட்டு உடைத்தாண்டி...’ என்பது கடுவெளி சித்தர் வாக்கு. அப்படிதான் பத்தாண்டுகள் வனவாசத்துக்கு பிறகு கடுமையாக உழைத்து ஆட்சியைப் பிடித்து, அதைக் காப்பாற்ற போராடிவருகிறார் முதல்வர் ஸ்டாலின். ஆனால், மூத்த அமைச்சர்கள் விடும் ’லூஸ் டாக்’ விவகாரங்கள், ஆட்சியின் பேஸ்மென்ட்டையே அசைத்துப் பார்ப்பதுதான் அறிவாலயத்தை அலறச் செய்யும் ஹாட் டாபிக்! தி.மு.க ஆட்சிக்கு வந்த நாளிலிருந்தே தி.மு.க அமைச்சர்கள் ஒருவர் மாற்றி ஒருவர் எதையாவது ஏடாகூடமாகப் பேசி சர்ச்சையில் சிக்கிகொள்வதையை வாடிக்கையாகக் கொண்டிருக்கிறார்கள். அதனால் தான் கடந்த 2022, அக்டோபர் மாதம் தி.மு.க பொதுக்குழு கூட்டத்தில் பேசிய முதல்வர் ஸ்டாலின், ’பொது இடங்களில் சிலர் நடந்து கொண்டதன் மூலம் தி.மு.க பழிக்கு ஆளானது. நீங்கள் கண்ணியமாக நடந்துகொள்ளுங்கள்; கண்ணியமான சொற்களை பயன்படுத்துங்கள்.நமது கவனத்தை திசை திருப்புவதுதான் எதிரிகளின் ஒரே நோக்கம். என்னை துன்பப்படுத்துவதுபோல மூத்த நிர்வாகிகள், அமைச்சர்கள் சூழல்களை உருவாக்கினால் நான் என்ன செய்வது? என் முகத்தைப் பார்த்தாலே தெரியும். கட்சினர் சிலரது செயலால் தூக்கமின்றி தவிக்கிறேன். என்னை தூங்கவிடாமல் செய்கிறார்கள். துன்பப்படுத்துவதுபோல் அமைச்சர்களோ, நிர்வாகிகளோ நடந்து கொண்டால் நான் என்னதான் செய்வது?’ என்று தனது ஆதங்கத்தைக் கொட்டித் தீர்த்தார்..அதன் பிறகும்கூட அமைச்சர்கள் சிலர் தங்களது பொறுப்பை உணர்ந்ததாகத் தெரியவில்லை. இரண்டு ஆண்டுகளைப் பூர்த்தி செய்த தி.மு.க. அரசு, தற்போது தனது தனது மூன்றாவது ஆண்டை தொடங்குகிறது. ‘திராவிட மாடல் ஆட்சி’ என ஸ்டாலின் மேடைக்கு மேடை பேசி வந்தாலும், தமிழக அமைச்சர்கள் துரைமுருகன், பொன்முடி, கே. என் .நேரு, கே .கே. எஸ்.எஸ் .ஆர் ராமச்சந்திரன், நாசர் உள்ளிட்டோரின் பேச்சு மற்றும் நடவடிக்கைகளால் தி.மு.க. அரசு மீது மக்கள் அதிருப்தியில் இருக்கிறார்கள். இந்த நிலையில் நிதியமைச்சர் பி.டி.ஆர். பழனிவேல் தியாகராஜன் பேசியதாக வெளியிடப்பட்டுள்ள ஆடியோ சமூக வலைதளங்களில் வைரலாகி கடும் சலசலப்பை ஏற்படுத்தியது. இந்த சர்ச்சையே இன்னும் ஓயாத நிலையில், சில தினங்களுக்கு முன்பு வேலூரில் நடைபெற்ற நிகழ்ச்சி ஒன்றில் பேசிய மூத்த அமைச்சர் துரைமுருகன், “குடும்பத்தைக் காப்பாத்த குடும்பத் தலைவிக்கு ஆயிரம் ரூபாய் தரவிருக்கிறோம். கல்லூரியில் படிக்கும் பெண்ணின் செலவுக்கும் ஆயிரம் ரூபாய் கொடுத்து வருகிறோம். அம்மாவிடம் பணம் கேட்காதே. கல்லூரி மாணவிகளுக்கு கொடுக்கும் ஆயிரம் ரூபாயில் பசங்களோட சினிமா பாரு, போன் வைத்துக்கொண்டு நைசா பேசு... என்ன வேணும்னாலும் செய்...’’ என்று பேசியிருப்பது, சமூகவலைதளங்களில் வைரலாகி பெரும் சர்ச்சையை ஏற்படுத்தியுள்ளது..குடும்ப பெண்களுக்கு உரிமை தொகை ஆயிரம் ரூபாய் தராமல் ஏமாற்றுவதாக எதிர்கட்சிகள் தொடர்ந்து குற்றச்சாட்டுகளை வைத்துவந்த நிலையில், கடும் நிதிச்சுமைகளுக்கு இடையில், செப்டம்பர் 15-ம் தேதி முதல் இந்தத் திட்டத்தை முதல்வர் ஸ்டாலின் தொடங்கி வைக்கவுள்ளார். இந்தநிலையில் துரைமுருகனின் இந்த பொறுப்பற்ற பேச்சு முதல்வர் ஸ்டாலினை மேலும் உஷ்ணமாக்கியுள்ளது.ஏற்கெனவே மகளிருக்கான இலவச பேருந்து திட்டத்தை ’ஓசி பஸ்’ என்று பேசி சர்ச்சை கிளப்பியிருந்த உயர் கல்விதுறை அமைச்சர் பொன்முடி, அதோடு தனது சர்ச்சை பேச்சை நிறுத்திக்கொள்ளவில்லை. கடந்த மார்ச் மாதம் விழுப்புரம் மாவட்டம், அருங்குறிக்கை கிராமத்தில் நடந்த அரசு பள்ளி கட்டிட திறப்பு விழாவில் பேசும்போது, அங்கிருந்த பெண்கள் அவரிடம் அடிப்படை வசதிகளைப் பற்றி கேள்வி எழுப்பினர். இதில் ஆத்திரம் அடைந்தவர், ’இந்த அருங்குறிக்கை கிராமத்தில் அப்படியே எனக்கு ஒட்டு போட்டு கிழி கிழின்னு கிழிச்சிட்டீங்க... கேட்க வந்துட்டீங்க... உட்காருங்க... நான் எப்ப வந்தாலும் இந்த கிராமத்துல இப்படித்தான் கத்துவீங்கன்னு எனக்கு தெரியும்’என ஆவேசமாக பாய்ந்தார்..இந்த சர்ச்சை அடங்குவதற்குள் மே 1-ம் தேதி விழுப்புரத்தில் நடைபெற்ற கிராமசபை கூட்டத்தில் கலந்துகொண்டார் பொன்முடி. அப்போதும் பெண்மணி ஒருவர் அமைச்சரிடம் கேள்வி எழுப்ப...“ எவ இவ... சொல்றத முதல்ல கேளு... “ என அந்த பெண்ணை அநகாகரீமாக பேசிய வீடியோ சமூகவலைதளங்களில் பரவி கடும் சர்ச்சை ஏற்பட்டது. இப்படி சீனியர் அமைச்சர்களே பொதுவெளியில் பொறுப்பில்லாமல் பேசி தி.மு.க அரசுக்கு அவப்பெயரை ஏற்படுத்தி தருவதாக தொடர்ந்து உளவுத்துறை முதல்வர் ஸ்டாலினுக்கு நோட் வைத்த நிலையில், மே 2-ம் தேதி தமிழக அமைச்சரவை கூட்டத்தில் அமைச்சர்களின் அடாவடி பேச்சு தொடர்பாக விவாதிக்கப்பட்டிருக்கிறது. அமைச்சரவை கூட்டத்தில் என்ன நடந்தது என்று அமைச்சர் ஒருவரிடம் கேட்டோம்... “காலை 11 மணிக்கு தொடங்கிய கூட்டம் நண்பகல் 12 மணி வரை நடைபெற்றது. இந்த கூட்டத்தில் ஐந்து தொழில் நிறுவனங்கள் தமிழகத்தில் தொழில் தொடங்க ஒப்புதல் அளிக்கப்பட்டுள்ளது. கருணாநிதி நூற்றாண்டு விழா உள்ளிட்ட விஷயங்கள் சுமார் 40 நிமிடங்கள் ஆலோசிக்கப்பட்டது. அதற்கு பிறகு அதிகாரிகள் அனைவரையும் அமைச்சரவை கூட்ட அரங்கில் இருந்து அனுப்பி விட்டு, அமைச்சர்கள் மத்தியில் முதல்வர் ஸ்டாலின் மனம் திறந்து பேசினார். அப்போது, ‘எவ்வளவோ சிரமங்களுக்கு இடையேதான் குடும்பத் தலைவிகளுக்கு உரிமை தொகை வழங்கும் வழங்கும் திட்டத்தை செயல்படுத்தவிருக்கிறோம்’ என்றவர் திடீரென அமைச்சர் துரைமுருகன் பக்கம் திரும்பி, ’அப்படி இருக்கும்போது அண்ணா நீங்கள் இப்படி பேசுவது சரியா?’ என்று கேட்டார். மேலும் தொடர்ந்தவர், ‘சட்டமன்றத்தில் கேலி, கிண்டலாக பேசுவதைப் பொறுத்துக்கொள்ளலாம்.சட்டசபையை பொறுத்தவரை, சர்ச்சைக்குரியவை அவை குறிப்பில் இருந்து நீக்கப்படுவதால் பத்திரிகைகள், சமூகவலைதளங்களில் அந்த செய்திகள் வருவதில்லை. ஆனால், பொதுதளங்களில் நீங்களே இப்படி பேசுவது சரியா? என்னை ஏன் மீண்டும் மீண்டும் தர்மசங்கடத்திற்கு ஆளாக்குகிறீர்கள்?அதே போல, உயர்கல்வி துறை அமைச்சர் பொன்முடி வாய் அடங்குவதே கிடையாது. ஓசி பஸ் தொடர்பாக பேசியபோதே கொஞ்சம் அமைதியாக இருங்க என்று அறிவுறுத்தினேன். ஆனால், திரும்ப திரும்ப இப்படி பேசிக்கொண்டே இருந்தால் என்ன அர்த்தம் ? கொஞ்சம்கூட அமைதியாக இருக்க மாட்டீங்களா, லேடீஸை இப்படிதான் பேசுவீர்களா? சீனியர் அமைச்சர்கள் நீங்கள் பேசும் வீடியோக்களை சமூகவலைதளங்களில் எத்தனை லட்சம் பேர் பார்க்கிறார்கள் என உளவுத்துறை ரிப்போர்ட் கொடுத்திருக்கிறது . அதை பார்க்கும்போதே எனக்கு தூக்கம் போய்விடுகிறது. கொஞ்சம் என்னை நிம்மதியா இருக்க விடுங்க. அப்படி உங்கள் வாயைக் கட்டுப்படுத்த முடியவில்லையென்றால், பொதுநிகழ்ச்சிகளில் கலந்து கொள்ளாமல் இருந்துவிடுங்கள்.நம்மை சுற்றி என்ன நடக்கிறது என்பது இங்கு இருக்கும் அமைச்சர்கள் அனைவருக்கும் தெரியும். அப்படியிருந்தும் புரிந்துகொள்ளாமல் நடந்துகொண்டால் என்ன செய்வது? விமர்சனத்திற்கு உள்ளாகும் வகையில் பேசுவதை மூத்த அமைச்சர்கள் கண்டிப்பாக தவிர்க்க வேண்டும். நீங்கள் பேசும் வெட்டி பேச்சால், என்னுடைய தூக்கம் போச்சு...’ என மனம் நொந்து பேசினார் முதல்வர்.இதைத் தொடந்து பி.டி.ஆருக்கு தொழில்துறையும், தங்கம் தென்னரசுக்கு நிதித்துறையும் இலாகா மாற்றம் செய்வது, வேறு சில அமைச்சர்களின் இலாகாக்களை மாற்றம் செய்வது, டி.ஆர்.பி ராஜா, தமிழரசி உள்பட சில புதுமுகங்கள் அமைச்சரவையில் கொண்டு வருவது போன்ற விஷயங்களும் விவாதிக்கப்பட்டன. ஆனால், பி.டி.ஆர். பழனிவேல் தியாகராஜன் இலாகாவை மாற்றினால், எதிர்கட்சிகளின் குற்றச்சாட்டு உண்மையாகி விடும். எனவே, அமைச்சரவை மாற்றத்தை ஸ்டாலினின் வெளிநாட்டு பயணத்திற்குப் பிறகு பார்த்துகொள்ளலாம் தள்ளிவைக்கப்பட்டுள்ளது.கூட்டம் முடிந்த பிறகு ஸ்டாலின் அழைப்பின் பேரில் துரைமுருகன் உள்ளிட்ட மூத்த அமைச்சர்கள் சிலர் அவரைச் சென்று சந்தித்தார்கள். அப்போது அநேகமாக அவர்கள் முதல்வரிடம் மன்னிப்பு கேட்டிருக்கலாம் அல்லது ஸ்டாலின் அவர்களை கொஞ்சம் கூல் செய்திருக்கலாம் என்று தெரிகிறது. அதனால்தான் திரும்பி வரும்போது முகமலர்ச்சியுடன் அவர்கள் வந்தார்கள்...” என்றார் விரிவாக. இந்த விவகாரம் குறித்து மீன்வளத்துறை அமைச்சர் அனிதா ராதாகிருஷ்ணனிடம் பேசினோம். ”அமைச்சரவை கூட்டத்தில் சில துறைகள் சார்ந்த விஷயங்கள் குறித்து முதல்வர் ஸ்டாலின் ஆலோசனை நடத்தினார். அமைச்சர்களுக்கு துறைரீதீயாக சில அறிவுரைகள் வழங்கினார். மற்றபடி சீனியர் அமைச்சர்களை முதல்வர் ஸ்டாலின் கண்டித்தாக சொல்வது எல்லாம் வதந்தி” என்றார் சுருக்கமாக.தி.மு.க அரசின் மூன்றாம் ஆண்டு தொடக்கம் முத்தாய்ப்பாக மலர வேண்டும் என்று ஆசைபடுகிறார் முதல்வர். அதற்கு அவர் ஆசைப்பட்டால் மட்டும் போதாது; மூத்த அமைச்சர்களும் மனம் வைக்க வேண்டும்!

வெட்டிப் பேச்சு...தூக்கம் போச்சு கொட்டி தீர்த்த ஸ்டாலின்..!

Related Stories