வக்ஃபு வாரியத்துக்கு மூடுவிழா? பா.ஜ.க. அதிரடி பிளான்!

ரம்ஜானுக்கு சொன்ன வாழ்த்தின் நேயம் இன்னும் மறக்கக்கூட இல்லை. அதற்குள் வக்ஃபு வாரியத்தைக் கலைக்க வேண்டும் என்று குரல் எழுப்பி, திரியைக் கிள்ளியிருக்கிறார்கள் சிலர். போதாக்குறைக்கு வக்ஃபு கமிட்டியில் மத்திய அரசு சீர்த்திருத்தங்களை மேற்கொள்ளப் போகிறது என்ற தகவலும் சேர்ந்துகொள்ள தகிக்கிறது இஸ்லாமியர் சமூகம்!இதுகுறித்து டெல்லியைச் சேர்ந்த பா.ஜ.க-வின் மூத்த புள்ளி ஒருவரிடம் பேசினோம். “வஃக்பு சொத்துகளைப் பராமரிக்க வேண்டிய முறைகள், அதை நிர்வகிக்கும் கமிட்டி ஆகியவற்றை வரையறுக்க 1954ம் ஆண்டு ‘வக்ஃபு வாரியச் சட்டம்’ கொண்டுவரப்பட்டது. அந்த சட்டத்தின் கீழ் நாடு முழுவதும் செயல்படும் வக்ஃபு வாரியங்களின் மொத்த சொத்து மதிப்பு சுமார் 1.2 லட்சம் கோடி ரூபாய். இதை முறையாக நிர்வகித்தால், ஆண்டுக்கு பல ஆயிரம் கோடி ரூபாய் வருவாய் அரசுக்குக் கிடைக்கும். .வஃக்பு சட்டத்தின்கீழ் ஒவ்வொரு மாநிலத்திலும் அறக்கட்டளைகள் நியமிக்கப்பட்டு, சொத்துகள் பராமரிக்கப்படுகின்றன. ஆனால், அந்த அறக்கட்டளைகள் ஒருசில குடும்பங்கள் மற்றும் அரசியல்வாதிகளின் கட்டுப்பாட்டில் இருக்கின்றன. அவற்றில் ஏராளமான முறைகேடுகள் நடக்கின்றன. 2012ம் ஆண்டு கர்நாடக மாநில வக்ஃபு வாரியத்தில் 20,000 கோடி ரூபாய் மதிப்பிலான சொத்துகளில் பெரும் ஊழல் நடந்தது. வக்ஃபு வாரிய உறுப்பினர்களே சொத்துகளை மார்கெட் விலையைவிடக் குறைந்த விலைக்கு விற்று, ஊழல் செய்தார்கள். இப்படி ஒவ்வொரு மாநிலத்திலும் வக்ஃபு சொத்துகள் கைவிட்டுப் போகின்றன. இதனால் ஏழை, எளிய இஸ்லாமியக் குடும்பங்களுக்கு எந்த நன்மையும் கிடைப்பதில்லை..எனவேதான் வக்ஃபு சொத்துகள் நேரடியாக அரசின் கட்டுப்பாட்டில் கொண்டுவரப்படவேண்டும் என்கிறது பா.ஜ.க. 2004 - 2014 ஆண்டு காங்கிரஸ் ஆட்சிக் காலத்தில் வக்ஃபுக்கு கூடுதல் அதிகாரங்கள் தரப்பட்டன. அதன்படி, வக்ஃபு ஓர் இடத்தை தனக்குச் சொந்தமானது என்று சொல்லிவிட்டால், அந்த இடம் உடனே வக்ஃபுக்குச் சொந்தமானதாகக் கருதப்பட்டுவிடும். அதை மீட்பது கடினம். இதைப் பயன்படுத்தி நாடு முழுவதும் ஏராளமான சொத்துகள், வக்ஃபுக்கு சொந்தமானவை என்று சட்டவிரோதமாக அறிவிக்கப்பட்டுள்ளது.தமிழகத்திலும் ஆற்காடு பகுதியில் 57 ஏக்கர் விவசாய நிலத்தை திடீரென்று வக்ஃபு நிலம் என்று அறிவித்தார்கள். திருச்சி அருகே திருச்செந்துறை என்ற கிராமத்தையும் அங்குள்ள சிவன் கோயிலையும் வக்ஃபுக்குச் சொந்தமானதாகப் பதிவு செய்து மோசடி நடந்திருக்கிறது. கோபிசெட்டிப்பாளையம் அருகே உள்ள விவசாய நிலங்களை வக்ஃபு நிலம் என்று அறிவித்துள்ளார்கள்.. உத்தரப்பிரதேசத்தில் ராமர் கோயில் நிலத்தையும், வக்ஃபு நிலம் என்று சொல்லித்தான் தொடக்கத்தில் ஏமாற்றப் பார்த்தார்கள். மொத்தத்தில் வக்ஃபு வாரியங்கள் நில அபகரிப்பு மையங்களாக மாறிவருகின்றன. இது தடுக்கப்பட வேண்டும். அதோடு ஏற்கெனவே முறைகேடாக ஆக்ரமிக்கப்பட்ட நிலங்களையும் மீட்க வேண்டும். இதுதான் மத்திய அரசின் நோக்கம்” என்றவர் சற்று இடைவெளி விட்டு தொடர்ந்தார்...“இதையடுத்துதான் 2022-ல் பா.ஜ.க.வின் முன்னாள் செய்தித் தொடர்பாளரும் வழக்கறிஞருமான அஸ்வினி உபாத்யாய், வக்ஃபு வாரியச் சட்டத்தை நீக்கக் கோரி உச்ச நீதிமன்றத்தில் வழக்குத் தொடர்ந்தார். தொடர்ந்து ராஜ்ய சபாவில் வக்ஃபு சட்டத்திற்கு எதிரான மசோதா தாக்கல் செய்யவும் பா.ஜ.க. முயற்சி மேற்கொண்டது. இதுதான் தற்போது வேகமெடுத்துள்ளது.அதாவது, நாடு முழுவதும் உள்ள வக்ஃபு சொத்துகளை நிர்வகிக்க, இந்து சமய அறநிலையத் துறை சட்டத்தைப் போலவே வலிமையான சட்டத்தைக் கொண்டுவருவது, வக்ஃபு வாரியங்களைக் கலைத்துவிட்டு, புதிய துறையை உருவாக்குவது, அதில் இஸ்லாமிய மத குருமார்களுக்கு உதவியாக அரசு அதிகாரிகளை நியமிப்பது, வக்ஃபு சொத்துகளை பராமரிப்பதில் அரசாங்கத்தின் பங்கை அதிகரிப்பது உள்ளிட்ட விஷயங்கள் நடைமுறைப்படுத்துவது குறித்து பரிசீலித்துவருகிறது மத்திய அரசு” என்றார் உறுதியாக..இதுகுறித்து மத்திய சிறுபான்மை நலத்துறை இணையமைச்சர் ஜான் பர்லாவிடம் பேசினோம்... “தற்போது மத்திய அரசு மைனாரிட்டிகளின் நலன் சார்ந்த விஷயங்களையே செய்துவருகிறது. வக்ஃபு வாரியப் பிரச்னை தொடர்பாக இப்போது நாங்கள் எந்த முடிவும் எடுக்கவில்லை”என்றார் சுருக்கமாக. தொடர்ந்து பா.ஜ.க.வின் சிறுபான்மைப் பிரிவு தேசியச் செயலாளர் வேலூர் இப்ராஹிமிடம் பேசினோம். ”ஒரு சட்டம் நடைமுறைக்கு வந்தால்தான் அதன் சாதக பாதகங்களைப் பற்றிப் பேச முடியும். யூகங்களின் அடிப்படையில் கருத்துக் கூற முடியாது. பா.ஜ.க. எப்போதுமே சிறுபான்மையினர் நலனுக்காகவே செயல்படும் கட்சி” என்றார் சிம்பிளாக.வக்ஃபு மீது வைக்கப்படும் குற்றச்சாட்டுகள் குறித்து தமிழ்நாடு வக்ஃபு வாரியத் தலைவர் அப்துல் ரஹ்மானிடம் கேட்டோம். ‘ ‘வக்ஃபு வாரியச் சட்டம் 1995ல், வக்ஃபு சொத்துகள் எப்படி நிர்வகிக்கப்பட வேண்டும், வக்ஃபு வாரியம் எப்படிச் செயல்பட வேண்டும் என்று தெளிவாக உள்ளது. இதன்படியே வக்ஃபு வாரியங்கள் செயல்பட்டு வருகின்றன. ஒருசில மாநிலங்களில் முறைகேடுகள் நடந்திருப்பது உண்மைதான். அந்தத் தவறுகளை, தற்போது இருக்கும் சட்டத்தைப் பயன்படுத்தியே சரிசெய்ய முடியும். அதை விடுத்து, அந்தச் சட்டத்தையே மாற்றவேண்டிய அவசியம் இல்லை. தமிழகத்தில் ஆக்கிரமிப்பில் உள்ள வக்ஃபு சொத்துகளை மீட்க நாங்கள் போராடி வருகிறோம். இதனால், பாதிக்கப்பட்ட ஆக்கிரமிப்பாளர்களே இப்படி தவறான விஷயங்களைப் பரப்புகிறார்கள்”என்றார் ஆதங்கதுடன்.சட்டங்கள் சங்கடங்கள் ஆகாமல் இருந்தால் சரிதான்!-அபிநவ்

வக்ஃபு வாரியத்துக்கு மூடுவிழா? பா.ஜ.க. அதிரடி பிளான்!

Related Stories