சின்னக்கவுண்டர் அண்ணாமலை... வானதி அக்கா வேற லெவல்...

கொங்குவில் பந்தாடப்படும் பா.ஜ.ககண்ணாடி மாளிகைக்கு வெளியே இருந்து கல் எறிந்தால் மட்டுமல்ல, உள்ளே இருந்து கல் எறிந்தாலும் விரிசல் விடத்தான் செய்யும். அப்படித்தான் உட்கட்சிப் பூசலால் ஓப்பனாகவே தெறித்துக் கொண்டிருக்கிறது கொங்கு மண்டல பா.ஜ.க.கோவை தெற்குத் தொகுதியின் பா.ஜ.க. எம்.எல்.ஏ-வான உறுப்பினரான வானதி சீனிவாசன், சமீபத்தில் தனது தொகுதியில் இலவச நீர் மோர் பந்தலைத் தொடங்கி வைத்தார். அப்போது கட்டப்பட்ட பேனரில் பிரதமர் மோடி, வானதி ஆகியோர் படங்கள் மட்டுமே பெரிதாக பளிச்சிட, மாநிலத் தலைவரான அண்ணாமலையின் போட்டோவோ பெயரோ மிஸ்ஸிங். இது அண்ணாமலையின் ஆதரவாளர்களை ரொம்பவே சீண்டியிருக்கிறது. டென்ஷன் ஆனவர்கள், “மாநிலத் தலைவரின் புகைப்படம் இல்லாமல் எம்.எல்.ஏ. இப்படியொரு பந்தலைத் திறந்திருப்பது சரிதானா? மகளிரணி நிகழ்வில் வானதியின் புகைப்படம் இல்லாமல் பேனர் வைத்தால் சும்மா விடுவாரா? இவர் தொடங்கி வைத்திருக்கும் கலாசாரத்தை இனி ஆளாளுக்குத் தொடர்ந்தால் கட்சி எப்படிக் கட்டுப்பாட்டோடு இருக்கும், எப்படி வளரும்? ஒட்டுமொத்தமாவே கோவையில தலைவருக்கு எதிரான சூழல் போகிறது. இது சரியில்லை” என்று கொளுத்திப் போட்டனர்.வானதியின் ஆதரவாளர்களோ, “அக்கா தேசிய மகளிரணித் தலைவர் என்பதை மனதில் வைத்துக்கொண்டு விமர்சனம் செய்யுங்கள். லோக்கலில் இப்படி கோஷ்டி அரசியல் செய்யும் லெவலில் இல்லை அவர். அவர் லெவலே வேற!” என்று பதிலுக்கு தாக்க, இந்த வார்த்தை போர் அக்கப்போராக தொடர்கிறது..அப்படியானால் கோவையில் மாநிலத் தலைவருக்குத் தனி அணி, அவருக்கு எதிராக ஓர் அணி என இருக்கிறதா? என்று கோவை மாவட்ட பா.ஜ.க-வினரைக் கேட்டோம்... “கோவையில் மட்டுமல்ல, திருப்பூர், ஈரோடுன்னு கொங்கு மண்டலம் முழுக்கவே இதே நிலைதான். கொங்கு மண்டலத்துல பல காலமா எங்க இயக்கத்துல கோலோச்சிட்டிருக்கற நபர்களுக்கு, திடுதிப்புன்னு அண்ணாமலையின் அரசியல் எழுச்சி பிடிக்கலை.சொல்லப்போனா சமுதாயரீதியாவே அவரை எடை போடுறாங்க. ஓப்பனாவே சொல்றோம்... கொங்கு மண்டலத்துல கவுண்டர் சமுதாயம்தான் ஆதிக்க சாதி. பெரிய கட்சிகள் எல்லாத்துலயும் பார்த்தீங்கன்னா, அந்த சமுதாயத்தைச் சேர்ந்த புள்ளிகள்தான் இங்கே அதிகாரத்தை கையில வெச்சிருக்காங்க. எங்க கட்சியிலயும் ஒருசிலர் கவுண்டர்கள்தான். இவங்களுக்கு, அதே சமுதாயத்தைச் சேர்ந்தவரா இருந்தாலும்கூட இளம் வயசுக்காரரான அண்ணாமலை திடுதிப்புன்னு மேலேறி வந்து நிற்கறதை ஏத்துக்க முடியலை.அதோட விளைவுதான் இந்த கோஷ்டி அரசியல். எடப்பாடியாருக்கே அண்ணாமலை மேலே ஏன் கோபம்? பெரிய கவுண்டரான தனக்கு உத்தரவு போடும், தன்னோட அரசியலை தீர்மானிக்கும் நபரா ஒரு சின்னக் கவுண்டராக அண்ணாமலை வந்து நிற்குறாரே என்கிற ஈகோ சிக்கல்தான்..அண்ணாமலையை எதிர்க்கற கொங்கு மண்டல அ.தி.மு.க. புள்ளிகளை எடுத்துப் பாருங்க, எல்லாருமே அவரைவிட வயசுல பெரியவங்களான கவுண்டர்கள்தான். இதே ஈகோதான் எங்க கட்சியினர் சிலபேர்கிட்டயும் இருக்குது. கோவையிலயும் ஒட்டுமொத்த கட்சியும் அவருக்கு அடங்கி நிற்கிறாங்கன்னு சொல்ல முடியாது. மாநிலப் பொருளாளரான எஸ்.ஆர்.சேகர் மாதிரி கவுண்டர் அல்லாத சமுதாய நபர்களும், மாநில துணைப் பொதுச்செயலாளரான முருகானந்தம் மாதிரியான இளம் வயசு கவுண்டர் சமுதாயத்தினரும் தான் அண்ணாமலைக்குப் பக்கபலமா நிற்கிறாங்க.மற்றவங்க கோஷ்டி அரசியல்தான் பண்றாங்க. இந்த முரண்பாடுகள் கொங்கு மண்டலத்தில் கட்சியை பலவீனப்படுத்துதே ஒழிய, வளர்ச்சிக்கு வழி வகுக்குறதில்லை. நாடாளுமன்றத் தேர்தல்ல கொங்கு மண்டலத்துல கணிசமான தொகுதியில போட்டியிடவும், வெற்றி பெறவும் கட்சித் தலைமை ஸ்கெட்ச் போட்டிருக்குது. ஆனால் இவ்ளோ உட்கட்சிப் பூசல்கள் இருந்தால் கட்சி எப்படி விளங்கும்?” என்றார்கள்.எஸ்.ஆர்.சேகரோ, ”நீங்க சொல்ற மாதிரி தமிழக பா.ஜ.க.வில் பூசல், அதிலும் கோவையில் விரிசல் என்பதையெல்லாம் ஏத்துக்கவே மாட்டேன். இளம் தலைமையைப் பார்த்து மாற்றுக் கட்சிக்காரர்களுக்குக்கூட ஒருவித ஏக்கம், சின்னப் பொறாமை இருப்பதுதான் உண்மை. கட்சி நலன்னு வர்றப்ப அடைமழையில் சிக்கிய காகிதம்போல அது அடிச்சுட்டுப் போயிடும். ஆக, கோவை பா.ஜ.க. ஒற்றுமையாகத்தான் இருக்கிறது. அதோடு, தமிழகத்தில் பா.ஜ.க-வை ஆட்சியில் அமர்த்தும் திறன் அண்ணாமலைக்கு இருக்கிறது என்று முழுமையா நம்புவதால்தான் நான் அவருக்குத் தோள் கொடுக்கிறேன்” என்றார்.கோஷ்டி அரசியல் குறித்து வானதி சீனிவாசனிடம் பேசினோம். “அந்த நீர் மோர் பந்தலை ஏற்பாடு செய்து நடத்துறது, ரெண்டு என்.ஜி.ஓ.க்கள். அவங்க வைக்கும் போர்டுல போய் நான் என்ன உத்தரவுகளைப் போட்டு, உள் அரசியல் பண்ணிட முடியும், சொல்லுங்க. இல்லாத ஒன்றை இருக்குதுன்னு சொல்லி விமர்சனம் பண்றதுக்கும் ஒரு அளவில்லையா?” என்றார், ஆதங்கமாக.இறுதியாக தமிழக பா.ஜ.க. தலைவர் அண்ணாமலையிடம் கேட்டபோது,“கர்நாடக தேர்தல் பணிகளில் முழு மூச்சாக இருக்கிறேண்ணா. இங்கே எங்கள் இயக்கத்தின் ஆட்சியைத் தக்கவைக்க வேண்டும் என்பது மட்டுமே என் கண்ணுக்குத் தெரிகிற ஒரே இலக்கு. அதே வேளையில், தமிழக பா.ஜ.க.வில் எனக்கு எதிரான கோஷ்டிகள் இருக்கிறது என்று மீடியா சிண்டு முடிதல்களை நான் நம்ப மாட்டேன். என் பணி, தேசியத் தலைமைக்கு முழு விசுவாசமாக இருந்து கட்சியை வளர்ப்பது மட்டுமே. அதை நான் தெளிவாகச் செய்கிறேன்” என்றார்.ஊருக்கே தெரிஞ்ச சண்டைய உருட்டால மறைக்க முடியாதுங்கண்ணா! - எஸ்.ஷக்தி

சின்னக்கவுண்டர் அண்ணாமலை... வானதி அக்கா வேற லெவல்...

Related Stories