சாதியா, கெளரவமா? பட்டியல் சமூகத்தில் ’உள்ளே வெளியே’ ஆட்டம்!?

சாதியையும் அரசியலையும் பிரிக்கவே முடியாது. அப்படிதான் ஏராளமான அரசு சலுகைகளைப் பெற வாய்ப்பு இருந்தும் தேவேந்திர குல வேளாள சமூகத்தின் பெரும்புள்ளிகள் சிலர் இரு பிரிவாக பிரிந்து ‘சலுகை வேண்டாம்’ என்றும் ‘சலுகை வேண்டும்’ என்று மோதிக்கொள்கிறார்கள். இடையே மாட்டிக்கொண்டு தவிக்கிறார்கள் அப்பாவி மக்கள்!இதுகுறித்து நம்மிடம் பேசினார் தமிழக தேவேந்திர குல வேளாளர் நல சங்கத்தின் நிறுவனர், தலைவர் ராஜேந்திரன்… ” எங்களுக்கு சலுகை முக்கியமல்ல. கௌரவம்தான் முக்கியம். எங்களை எல்லோரும் கீழத்தெரு, எஸ்.சி தெரு, பள்ளத்தெரு என்று சொல்லிக் கொண்டிருந்த காலம் மாறி 'நான் நரேந்திரன், நீங்க தேவேந்திரன்' என்று சொல்லக்கூடிய ஒரு பிரதமர் வாழும் காலத்தில், எங்களுடைய பட்டியல் சமூக வெளியேற்றம் குறித்து அவரிடம் கேட்கிறோம்.பிற்படுத்தப்பட்டோர் நிலையில் இருந்த எங்கள் சமூகத்தை, பெரியாரும் ராஜாஜியும் பட்டியலினத்தில் சேர்த்து விட்டார்கள். அப்போதே எங்கள் சமூக சங்கத்தின் தலைவர் சீனிவாசன் பிள்ளை 'நாங்கள் இந்தப் பட்டியலில் இருந்து வெளியே போக வேண்டும்' என்று கேட்டிருக்கிறார். ஆனால், பலனில்லை. பலகட்டக் கோரிக்கைகளுக்குப் பிறகு மத்திய அரசு கடந்த 21.08.2021 அன்று எங்களை 'எஸ்.சி பட்டியலில் இருந்து வெளியேற்ற வேண்டும்' என்று உத்தரவிட்டது. ஆனால் அதை நடைமுறைப்படுத்தாமல் வைத்திருக்கிறார் ஸ்டாலின். உழவுத் தொழில் செய்யும் நாங்கள் எப்படி தீண்டத்தகாதவர்கள் ஆகிட முடியும் ?" என்றார்..அகில இந்திய மக்கள் மறுமலர்ச்சி கழகத்தின் நிறுவனர், தலைவரான பொன். முருகேசனோ, “ஜான்பாண்டியன், கிருஷ்ணசாமி, ராஜேந்திரன் ஆகியோர் கலப்புத் திருமணம் செய்துகொண்டு வசதியாக வாழ்க்கை நடத்துபவர்கள். அவர்களுக்கு சலுகைகள் தேவைப்படாது. அவர்கள் அப்படிப் பேசலாம். தாங்கள் என்ன சொன்னாலும் கேட்கும் ஒரு கூட்டத்தை வைத்துக்கொண்டு ஒட்டுமொத்த பட்டியல் சமூக மக்களின் குரலாக இவர்கள் காட்டிக் கொண்டிருக்கிறார்கள். தமிழ்நாட்டில் காலூன்ற முடியாத பா.ஜ.க.,இவர்களைக் கையில் போட்டுக்கொண்டு அரசியல் செய்கிறது. இவர்களின் பேச்சை நம்பி பட்டியல் வெளியேறினால் அது தேவேந்திர குல சந்ததிக்கு பெரும் பின்னடைவாக போய்விடும் ”என்றார்..பள்ளர் சமூக பாதுகாப்புக் கூட்டமைப்பு பொதுச்செயலாளர் சுசில்ராஜ்குமார், “ஏழு சாதி பிரிவுகளை ஒன்றாக்கி தேவேந்திர குல வேளாளர் என்று அறிவித்து அதை அப்படியே பட்டியலில் இருந்து வெளியே எடுப்பதுதான் பா.ஜ.க-வின் திட்டம். அப்படி நடந்துவிட்டால் இந்த மக்கள் நடுத்தெருவில்தான் நிற்க வேண்டும். எங்களை வெளியேற்றம் செய்யச் சொல்லும் பா.ஜ.க-வின் சீனிவாசன் ரெட்டியார் மாநாட்டில் கலந்துகொண்டு 'ரெட்டியார்களுக்கு இட ஒதுக்கீடு வேண்டும்' என்று இரட்டை வேடம் போடுகிறார். எல்லாம் ஓட்டு அரசியல்தான்" என்றார். தலைவர்களை விடுத்து அந்தச் சமூக மக்களின் கருத்து கேட்டு முடிவெடுப்பது அவசியம்!- ஷானு

சாதியா, கெளரவமா? பட்டியல் சமூகத்தில் ’உள்ளே வெளியே’ ஆட்டம்!?

Related Stories