உதயநிதி மீது வழக்கு... ஆளுநரிடம் அனுமதிகோரும் சு.சுவாமி

’சட்டென்று மாறுது வானிலை’ என ஹம்மிங் செய்தபடியே ஆசிரமத்துக்குள் அடியெடுத்து வைத்த வம்பானந்தாவிடம், “உண்மைதான் சுவாமி, சென்னை கிளைமேட்டை நம்பவே முடியலை” என்றபடியே கொறிப்பதற்கு கொஞ்சம் மிக்ஸருடன் சுக்குமல்லி காபியைக் கொடுத்தார், சிஷ்யை.“நான் ஹம்மிங் செய்த காரணமே வேறு. எரிமலை ஏரியாவில் ஏற்பட்ட திடீர் வானிலை மாற்றத்தைக் கூற வந்தேன்” -சிஷ்யையை நக்கலாகப் பார்த்துவிட்டு செய்திக்குள் நுழைந்தார், வம்பு.``நடிகை விஜயலட்சுமி தொடர்பான பாலியல் புகார் விவகாரம் கொஞ்சமும் சூடு ஆறாமல் போய்க்கொண்டிருக்க, வெளியில் உதாராக பேசினாலும் உள்ளுக்குள் சற்று நடுக்கத்துடன்தான் நாம் தமிழர் தம்பிகள் இருந்துள்ளனர். இந்த விவகாரத்தில், தங்களுக்குத் தெரிந்த யாரோதான் கள்ள ஆட்டம் ஆடுவதாக எண்ணி ரூட் பிடித்துப் போனால் கருஞ்சட்டைத் தமிழர் ஒருவர் தென்பட்டிருக்கிறார். இதில், நாம் தமிழர் நிர்வாகிகளுக்கு பேரதிர்ச்சி.இதைத் தொடர்ந்து அவரிடம் சமாதானம் பேசியபோது, ‘உங்களை அரசியல்ரீதியாக அண்ணன் விமர்சித்திருக்கலாம். இது அவரின் தனிப்பட்ட வாழ்க்கை’ என சொல்ல, அவரோ, ‘உங்கள் சொந்த விவகாரங்களை பொதுவெளியில் கொண்டு வந்து குளிர்காய்பவன் நான் அல்ல’ என வெண்மீசையை முறுக்கியபடியே விளக்கம் கொடுத்திருக்கிறார்.கூடவே, ‘போலீஸ் விசாரணையை தாண்டி உங்கள் மீது எந்த நடவடிக்கையும் எடுக்கப்படாது’ என சொல்லவே கடும் வெயிலுக்கு நடுவே ஆலங்கட்டி மழை பெய்ததுபோல உச்சிகுளிர்ந்துபோய் திரும்பி வந்தார்களாம், தம்பிகள்.இதற்குப் பிரதிபலனாக, `இனி தனிப்பட்ட முறையில் ஸ்டாலின் மற்றும் உதயநிதியை விமர்சிக்கக்கூடாது' என்ற மூடுக்கு வந்திருக்கிறதாம், நாம் தமிழர் முகாம். கூடவே, `கொஞ்ச காலத்துக்கு உடன்பிறப்புகளை சீண்டாமல் உலா வந்தால்போதும்' என ஓலை அனுப்பாத குறையாக பேசிவருவதாகவும் தகவல்”.“இப்படியும் ஒரு ட்விஸ்ட்டா... அடுத்த செய்திக்கு வாங்க சுவாமி” ”சிவகங்கை மாவட்ட காங்கிரஸ் தலைவராக இருந்தவர் சத்தியமூர்த்தி. கட்சியில் மிகப்பெரிய சீனியர். இவருக்கும் லோக்கல் எம்.பி., கார்த்தி சிதம்பரத்துக்கும் ஒத்துப்போகவில்லை. இதனால் சிவகங்கையில் இருக்கும் கார்த்தியின் வீடு மற்றும் அலுவலகம் செல்வதை தவிர்த்து வந்தார், சத்யமூர்த்தி. இதனால் இவர் மீது ஏக கடுப்பில் இருந்தார் கார்த்தி.ஆனால் சத்யமூர்த்தியோ, அடுத்தகட்ட தலைவர்களை அனுசரித்து அரசியல் நடத்திவந்தார். இந்நிலையில் அவர் தலைமையில் நடந்த நிகழ்ச்சிக்கு மாஜி அமைச்சர் சுதர்சன நாச்சியப்பனின் மகனை அழைத்திருந்தார். இது கார்த்தியை மேலும் கொதிக்க வைக்க, தனது தந்தை மூலம் காய்களை நகர்த்தினார், கார்த்தி.இதன் விளைவாக, சத்தியமூர்த்தியை கட்சிப் பதவியில் இருந்தே நீக்கிவிட்டு, அவருக்கு பதிலாக சஞ்சய் காந்தியை மாவட்ட தலைவராக நியமிக்கப்பட்டார். தமிழக காங்கிரஸ் கமிட்டி தலைவர் அழகிரியின் ஒப்புதல் இல்லாமலே இதைச் செய்திருக்கிறார்கள். இதனால் சிதம்பரத்தின் மீது கோபத்தில் இருக்கிறார் அழகிரி. அதேவேகத்தில் கட்சியின் பிற அணிகளில் இருக்கும் சிதம்பரத்தின் ஆதரவாளர்களுக்கு கல்தா கொடுக்கவும் அவர் திட்டமிட்டு வருகிறாராம்”.“கோஷ்டி சண்டையையும் காங்கிரஸையும் எப்போதுமே பிரிக்க முடியாதுபோல. ஆற்காடு சுரேஷ் கொலை வழக்கு சூடு பிடித்திருக்கிறதே?””சென்னையின் வி.ஐ.பி தாதா ஆற்காடு சுரேஷ் கொலை வழக்கு தொடர்பாக அ.தி.மு.க நிர்வாகி ஜான் கென்னடி மற்றும் வட்ட செயலாளர் சுதாகர் பிரசாத் ஆகிய இருவரை போலீஸார் கைது செய்தனர். இவர்கள் இருவரும் தென்சென்னையில் அ.தி.மு.க.வின் முக்கிய புள்ளிக்கு மிக நெருக்கமானவர்களாம். இவர்களைக் கட்சியில் இருந்து நீக்கி உத்தரவிட்டுள்ளார், எடப்பாடி பழனிசாமி.இதற்கு நடுவே, இருவரையும் போலீஸ் பிடியில் இருந்து காப்பாற்றுவதாகக் கூறி ஒரு பெரும்தொகையை கறந்திருக்கிறார், அந்தப் புள்ளி. இது போலீஸின் கவனத்துக்கு வரவே, அந்தப் புள்ளியையும் விசாரணை வளையத்துக்குள் கொண்டுவந்து நிறுத்தவும் போலீஸ் முடிவு செய்துள்ளதாம்”“சனாதனம்தான் இப்போதைய ட்ரெண்டிங் டாபிக் போல?”``ஆமாம். அமைச்சர் உதயநிதியின் பேச்சு தேசிய அளவில் பெரும் விவாதத்தை கிளப்பியுள்ளது. உதயநிதியின் பேச்சுக்கு பல்வேறு மாநில பா.ஜ.க. தலைவர்கள் கடும் கண்டனங்களை பதிவு செய்து வருகின்றனர். கூடவே, உதயநிதிக்கு எதிராக வழக்கு தொடுக்க அனுமதி கேட்டு, ஆளுநர் ஆர்.என்.ரவிக்குக் கடிதம் எழுதியிருக்கிறார், பா.ஜ.க. மாநில செயலாளர் அஸ்வத்தாமன்..இதேவரிசையில், அமைச்சர் உதயநிதி மீது வழக்குப்பதிவு செய்ய அனுமதி கோரி தமிழக ஆளுநருக்கு சுப்ரமணியன் சுவாமியும் கடிதம் எழுதியிருக்கிறார். அதில், `உதயநிதியின் பேச்சு இந்திய தண்டனைச் சட்டம் பிரிவு 153ஏ, 153பி, 295ஏ, 298, 505 ஆகியவற்றின்கீழ் தண்டனைக்குரியது. உதயநிதிக்கு எதிராக கிரிமினல் வழக்கு தொடர திட்டமிட்டுள்ளேன். பிரிவு 196-ன்படி உங்களின் அனுமதி தேவை' எனக் குறிப்பிட்டுள்ளார்.``ஓஹோ.."``உதயநிதி மீது நடவடிக்கை எடுக்க அனுமதிகோரி வரும் கடிதங்கள் தொடர்பாக ஆளுநர் ஆர்.என்.ரவியும் சட்டவல்லுநர்களிடம் ஆலோசித்து வருகிறார். அவர்களின் கருத்துகளை பெற்ற பிறகே அடுத்த அதிரடிக்கு ஆளுநர் மாளிகை தயாராகுமாம்”.“ஆளுநருக்கும் வெயிட்டாக ஒரு கன்டென்ட் கிடைத்துவிட்டதுபோல”``அதேபோல, அரசுக்கும் ஆளுநருக்கும் இடையில் மோதல் வலுத்துவருகிறது. `துணைவேந்தர் தேடுதல் குழுவில் பல்கலைக்கழக மானியக்குழுவின் பிரதிநிதியை சேர்க்க வேண்டும்' என ஆளுநர் நிபந்தனை விதித்திருந்தார். இதற்கு உயர்கல்வித்துறை அனுப்பிய கடிதத்தில், ‘துணைவேந்தர் நியமனத்தில் யு.ஜி.சி விதிகளை மட்டும் பின்பற்றினால் போதும். உறுப்பினரை சேர்க்கவேண்டிய கட்டாயம் இல்லை' என சுட்டிக் காட்டியது.இதனை ஏற்க மறுத்து, யு.ஜி.சி சார்பில் உறுப்பினரை ஆளுநர் ஆர்.என்.ரவி நியமித்துள்ளார். கூடவே, துணைவேந்தர் தேடுதல் குழுவில் வழக்கத்துக்கு மாறாக நான்கு பேரை நியமித்து ஆளுநர் உத்தரவிட்டுள்ளார். கல்வியியல் பல்கலைக்கழகத்தின் துணைவேந்தர் தேடுதல் குழுவில் யு.ஜி.சி தரப்பில் சுஷ்மா யாதவா நியமிக்கப்பட்டுள்ளார். இது, அரசின் கோபத்தை அதிகரிக்கச் செய்துள்ளது"`` ஆளுநரும் அவ்வளவு எளிதில் ஓயமாட்டார் போல"``ஆமாம்... அடுத்து சென்னை ஓமந்தூரர் தோட்டத்தில் அமைந்துள்ள பன்னோக்கு மருத்துவமனை வளாகத்தில் இருந்த ஓட்டலும் தற்போது காலி செய்யப்பட்டுவிட்டது. இந்த ஓட்டலில்தான் சிகிச்சை பெற்று வருபவர்கள், அவர்களை கவனித்து கொள்ளும் நபர்கள் எனப் பலரும் பயன்பெற்று வந்தனர்..இந்த ஓட்டல் மூடப்பட்டுவிட்டதால் நீண்டதூரம் சென்று உணவு வாங்க வேண்டிய நிலைக்கு நோயாளிகளும் அவர்களின் உறவினர்களும் தள்ளப்பட்டுள்ளனர். எம்.எல்.ஏ விடுதியில் உள்ள உணவின் தரமும் விலையும் திருப்தியாக இல்லாததால், பொதுமக்களிடைய ஏக புலம்பல்கள். தவிர, எம்.எல்.ஏ. விடுதியின் பக்கவாட்டில் அமைந்திருக்கும் கடைகளில் டிபன், சாப்பாடு போன்றவற்றை விற்பனை செய்யக்கூடாது என்றும் உத்தரவு வந்துள்ளதாம். `குறிப்பிட்ட ஓட்டல் மட்டுமே பயனடைவதற்கான ஏற்பாடு இது' எனப் புகார் கிளம்பியுள்ளது.” ஆதாயம் இல்லாமல் எதுவுமே நடக்காதுபோல. சரி.. சுவாமி. பா.ஜ.க.செய்திகள் இருக்கிறதா?”``பாலியல் குற்றச்சாட்டில் சிக்கித் தத்தளித்து வருகிறது, திருவள்ளூர் கிழக்கு மாவட்ட பா.ஜ.க தலைவராக இருந்தவர் செந்தில்குமார். சில தினங்களுக்கு முன்பு ஸ்பா வைக்க முயற்சி செய்த ஒரு பெண்ணிடம் பணம்கேட்டு தகராறு செய்துள்ளார். பிறகு அந்தப் பெண்ணிடம் பாலியல் அத்துமீறல் செய்ததாகவும் புகார் எழுந்தது. இதுதொடர்பான ஆடியோவும் வெளியாகி பா.ஜ.க.வுக்கு சங்கடத்தை ஏற்படுத்தியது. இதைத்தொடர்ந்து, கட்சியில் இருந்து தற்காலிகமாக நீக்கப்பட்டார், செந்தில்குமார்.`அங்கு புதிய தலைவரை நியமிக்கலாம்' என்று முயற்சித்தபோது யாருமே முன்வரவில்லை. செந்தில்குமாரை பகைத்துக்கொள்ள விரும்பாததே இதற்குக் காரணமாம். வேறுவழியில்லாமல் மாநிலத் துணைத்தலைவர் சக்கரவர்த்தியையே தற்காலிக மாவட்டத்தலைவராக நியமித்துள்ளனர்”.``திருப்பூரில் பட்டாசு சத்தம் கேட்க வாய்ப்புள்ளதாக கூறுகிறார்களே?"``பல்லடத்தில் ஒரே குடும்பத்தைச் சேர்ந்த நான்கு பேர் படுகொலை செய்யப்பட்ட விவகாரத்தை முன்வைத்து, `சட்டம்-ஒழுங்கு சரியில்லை' என எதிர்க்கட்சிகள் விமர்சிக்கின்றன. தமிழக காவல்துறையும் இந்தச் சம்பவத்தை கறையாக பார்க்கிறது. `இந்தக் களங்கத்தைத் துடைக்க, ஒரு என்கவுன்டர் நடத்தினால் என்ன?' எனத் தீவிரமாக ஆலோசிக்கப்பட்டதாம். வாக்குவங்கி விவகாரமாகவும் இது மாறியதால், விரைவில் பட்டாசு வெடிக்கலாம்" என்றபடியே, புல்லட்டை நோக்கிப் புறப்பட்டார், வம்பு.---பாக்ஸ்...செங்கோலை ரசித்த உதயநிதி!`தூத்துக்குடியில் உதயநிதி பங்கேற்ற கூட்டத்துக்குப் போதிய ஏற்பாடுகளைச் செய்யவில்லை' என மா.செ.க்களான அனிதா ராதாகிருஷ்ணன் மீதும் கீதா ஜீவன் மீதும் உடன்பிறப்புகள் ஒருபுறம் குமுறிக் கொண்டிருக்க, மறுபுறம் ஆளுயுர செங்கோல், 100 அடி உயரக் கொடிக்கம்பம் திறப்பு என இளைஞரணி மாநில துணைச் செயலாளர் ஜோயல், அதிரடி காட்டியிருக்கிறார். அதிலும், ஆளுயுர செங்கோலில் உதயசூரியன் படம் பொறிக்கப்பட்டிருந்ததை ரொம்பவே ரசித்திருக்கிறார், உதயநிதி. - சுவாமி வம்பானந்தா