சாதிப்பெயரைச் சொல்லி திட்டி... மின்கம்பத்தில் வைத்து கட்டி... பட்டியல் சமூக மாணவருக்கு நேர்ந்த பயங்கரம்!

இந்த சம்பவம் உங்கள் மனதை பாதிக்கலாம்... இப்படிக்கூட கொடுமைகள் நடக்குமா என்று தோன்றலாம். ஆனால், குடிநீரில் விஷம் கலக்கும் வக்கிர ஆசாமிகள் உலவும் நாட்டில் எதுவும் நடக்கலாம் என்பதே நிதர்சனம்!சிவகங்கை மாவட்டம், கொல்லங்குடி அருகே இருக்கிறது விட்டனேரி கிராமம். இங்கே பட்டியல் சமூகத்தினர், மறவர் என இரு சமூக மக்கள் ஒரே தெருவில் தனித்தனியாக வசிக்கிறார்கள். இந்த கிராமத்தைச் சேர்ந்த முருகேசன்- விசாலாட்சி தம்பதியர், சீர்திருத்த திருமணம் செய்துகொண்டு சமூக சேவையில் ஈடுபட்டு வருகிறார்கள். இதுவே அந்த கிராமத்தில் உள்ளவர்களுக்கு எரிச்சலை ஏற்படுத்தியிருந்தது.இவர்களுக்கு இரண்டு மகன்கள். பட்டப் படிப்பு படித்து வரும் மூத்த மகன், ராகுலசங்கிருதியாயன். சம்பவத்தன்று அவனை அந்த ஊரைச் சேர்ந்த இளைஞர்கள் சிலர் அழைத்தார்கள். சரக்கு வாங்கித் தரச்சொன்னார்கள். முறையான அனுமதி இல்லாத பார் அது என்பதால், தயங்கியவனை அடித்துத் துவைத்து படுகாயப்படுத்தி அனுப்பியிருக்கிறார்கள். வேறு வழியின்றிச் சென்றவன், அங்கே வாங்கிய சரக்கிற்குத் தர கையில் பணம் இல்லாததால், ஆன்லைன் பரிமாற்றத்தில் தருவதாகச் சொல்ல, அவர்கள் மேலும் காண்டாகி, அவனைக் கட்டிவைத்து உதைத்திருக்கிறார்கள்!இதையடுத்து, போலீஸில் புகார் தந்துவிட்டு, ஊர் திரும்பியவனை தேவர் படத்தைக் கிழித்ததாக சொல்லி போலீஸில் புகார் கொடுத்திருக்கிறார்கள். இதையடுத்து மிரண்டுபோன அவனின் குடும்பம் ஊருக்கும் போலீஸுக்கும் பயந்து தலைமறைவாகிவிட்டது..இப்படியொரு தகவல் நமக்கு வரவே அந்தக் குடும்பத்தினரை தேடிக் கண்டுபிடித்து பேசினோம்... ஆனால், அவர்களில் ஒருவர்கூட நம்மிடம் பேசும் மனநிலையில் இல்லை. பிரமை பிடித்ததுபோல இருந்தார்கள். அவர்கள் சார்பாக நம்மிடம் பேசினார் சமூக நீதி அறக்கட்டளை இயக்குநர் ஆறுமுகம்... “பட்டியல் சமூக மக்கள் இன்னும் அடிமையாக இருக்கவேண்டும். நாகரிக உடை அணியக்கூடாது, கார், பைக் ஓட்டக்கூடாது என்று நினைக்கிறார்கள் ஆதிக்க சாதியினர். இந்த சம்பவமும் அப்படித்தான் நடந்திருக்கிறது. திருவாடனையில் உள்ள அரசு கலைக் கல்லூரியில் படித்து வருகிறார் ராகுல சங்கிருதியான். தான் உண்டு தன் படிப்பு உண்டு என இருப்பார் அவர் என்பது ஊருக்கே தெரியும். இவரின் அம்மா விசாலாட்சி, தன் மற்றொரு மகனின் படிப்புக்காக கோவையில் தங்கியிருக்கிறார். ஏப்ரல் 12ம் தேதி ஊருக்கு வெளியே இருக்கும் டாஸ்மாக் கடையின் அனுமதியற்ற பாரில் மது வாங்கித் தரச்சொல்லி எதிர்வீட்டில் வசிக்கும் விக்கி என்பவர் கட்டாயப்படுத்தியிருக்கிறார். இவரோ, ‘கையில் பணம் இல்லை, கூகுள்பே பண்ணுகிறேன்’ என்று சொல்லியிருக்கிறார்.ஏற்கெனவே போதையில் இருந்த, விக்கி, தினேஷ், கருவா உள்ளிட்ட ஐந்து பேர் ராகுலசங்கிருதியாயனை சாதியைச் சொல்லி திட்டி அடித்திருக்கிறார்கள். ஊருக்குள் இவன் பைக்ல வருவதும், போவதும் ஏற்கெனவே அவர்களுக்கு இவன் மீது வெறியை ஏற்படுத்தியிருக்கிறது.. ‘படிக்கிற திமிருல பேசறியா? நீங்க படிச்சு வந்தாலும் இங்கே நாங்க வெச்சதுதான் சட்டமும்’என்று சொல்லி அடித்துவிட்டு, ஊருக்கு வெளியே இருக்கும் குளியல்தொட்டியில் முக்கி எடுத்திருக்கிறார்கள். தொடர்ந்து அவனை மின்கம்பத்தில் கட்டிவைத்தும் அடித்திருக்கிறார்கள். சாகும் நிலையில் இருந்தவனை நல்ல உள்ளங்கள் சிலர்தான் ஆம்புலன்ஸ்ல ஏத்தி, சிவகங்கை அரசு மருத்துவக் கல்லூரி மருத்துவமனைக்கு அனுப்பியிருக்கிறார்கள்.கொல்லங்குடியில சட்டவிரோதமா டாஸ்மாக் பார் நடத்தும் தி.மு.க. பிரமுகர் அசோக், தாக்குதல் நடத்தியவர்களில் ஒருவரான தினேஷ் ஆகியோர் மருத்துவமனைக்கே சென்று, “உயிர்மேல ஆசை இருந்தா புகாரை வாபஸ் வாங்கிடு”என்று அவனை மிரட்டியிருக்கிறார்கள். இதில் சம்பந்தப்பட்ட ஐந்து பேருக்கு பதில் மூன்று பேர் மீது மட்டும் வழக்கு பதிவு செய்திருக்கிறது காளையார்கோவில் போலீஸ்..அதேசமயம், ராகுலசங்கிருதியாயன் மீது ஊரில் இருக்கும் தேவர் படத்தை கிழித்ததாக பொய்ப்புகாரை வாங்கியிருக்கிறது போலீஸ். இதையெல்லாம் கேள்விப்பட்ட டி.எஸ்.பி. சிபிசாய் சவுந்தர்யன் சம்பந்தப்பட்ட போலீஸாரை அழைத்து கண்டித்துள்ளார். ஆனாலும் தீர்வு ஏற்படவில்லை” என்றார் சோகமாக!இவ்வழக்கின் விசாரணை அதிகாரியான சிவகங்கை டி.எஸ்.பி. சிபிசாய் சவுந்தர்யனிடம் இதுகுறித்து கேட்டபோது, “நான் திரும்பவும் அழைக்கிறேன்” என்றதுடன் நழுவினார்..விட்டனேரி ஊராட்சி மன்றத்தலைவர் வரதராஜன், “இதுபோன்ற சம்பவம் எங்கள் ஊரில் நடந்ததே இல்லை. இது ஒரு விபத்து. இனிமேல் இதுபோன்ற சம்பவம் எதுவும் நடக்காது. பாதிக்கப்பட்ட ராகுலசங்கிருதியாயன் மனநலம் பாதிக்கப்பட்டவன். இது அவன் குடும்பத்துக்கும் ஊர்மக்களுக்கும் நன்றாகவே தெரியும். அவன் மது அருந்துவதற்காக டாஸ்மாக் பாரில் முகம் தெரியாதவரிடம், ’பணம் கூகுள்பே மூலம் போடுறேன். சரக்கு வாங்கிக்கொடுங்க’என்று தகராறு செய்திருக்கிறான். இருவருக்கும் இடையே அடிதடி நடந்திருக்கிறது. ஆனாலும், மின்கம்பத்தில் கட்டி வைத்து அடித்தது தவறு என்று இளைஞர்களை சத்தம் போட்டிருக்கிறோம்..அவனும் மருத்துவ சிகிச்சை முடிந்து ஊருக்குள் வந்து தேவர் படத்தை கிழித்து பிரச்னை செய்திருக்கிறான். அதைக்கூட நாங்கள் பெரிதுபடுத்தவில்லை. போலீஸ் எதிர்த்தரப்பினர் மீது பி.சி.ஆர். வழக்குப் போட்டுள்ளது. ஊருக்குள் இருக்கும் இளைஞர்கள் போலீஸுக்கு பயந்து வெளியில்தான் இருக்கிறார்கள். எங்கள் ஊர் சாதிப்பிரச்னை இருக்கும் ஊர் கிடையாது. எல்லோரும் ஒற்றுமையாக வாழ்ந்து வருகிறோம்” என்றார். சாதிகள் இருக்குதடி பாப்பா! - பாலா

சாதிப்பெயரைச் சொல்லி திட்டி... மின்கம்பத்தில் வைத்து கட்டி... பட்டியல் சமூக மாணவருக்கு நேர்ந்த பயங்கரம்!

Related Stories