பற்றியெரியும் மணிப்பூர்- பா.ஜ.க. காரணமா?

இந்து-கிறிஸ்துவர்கள் மோதலால், பற்றி எரிகிறது மணிப்பூர். உயிரைக் கையில் பிடித்துக்கொண்டு ஓடுகிறார்கள் மக்கள். தாக்குதலில் படுகாயம் அடைந்த பா.ஜ.க. எம்.எல்.ஏ., அவசர சிகிச்சைப் பிரிவில் அனுமதிக்கப்பட்டிருக்கிறார். கலவரத்தை அடக்க ராணுவம் களமிறக்கப்பட்டிருக்கிறது. என்னதான் நடக்கிறது மணிப்பூரில்? ஏன் இந்தக் கலவரம்?போராட்டங்களுக்கு சலிக்காத மாநிலம், மணிப்பூர். சிறப்பு ராணுவ சட்டத்தை எதிர்த்து ஐரோம் ஷர்மிளா, 16 ஆண்டுகள் நடத்திய பட்டினி போராட்டம் தலைப்புச் செய்திகளில் இடம்பெற்றது. தங்ஜம் மனோரமா என்ற இளம் பெண் ராணுவத்தால் சீரழிக்கப்பட்டு கொலை செய்யப்பட்டபோது மணிப்பூர் பெண்கள் நடத்திய நிர்வாணப் போராட்டம் உலக நாடுகளை திரும்பிப் பார்க்க வைத்தது. சிலகாலம் அமைதியாக இருந்த மணிப்பூர், இப்போது மீண்டும் பற்றியெரிகிறது. .இது குறித்து மணிப்பூர் தலைநகர் இம்பாலில் உள்ள மூத்த பத்திரிகையாளர் ஒருவரிடம் பேசினோம். “மணிப்பூரில் வசிக்கும் மூன்று கோடிப் பேரில் மெய்தி இன மக்களே மெஜாரிட்டி. பட்டியல் மற்றும் ஓ.பி.சி. பிரிவில் இருக்கும் இவர்கள் அனைவருமே இந்துக்கள். குக்கி என்கிற பழங்குடி மக்கள் 90 சதவிகித மலைப் பகுதிகளில் வசிக்கிறார்கள். பழங்குடியினர் பட்டியலில் இருக்கும் அவர்கள் அனைவரும் கிறிஸ்தவர்கள். கடந்தாண்டு நடந்த சட்டமன்றத் தேர்தலில் பா.ஜ.க., பழங்குடியின மக்கள் கட்சிகளான குக்கி மக்கள் கூட்டணி, நாகா மக்கள் முன்னணி ஆகிய இரு கட்சிகளுடன் கூட்டணி அமைத்து வெற்றிபெற்று ஆட்சி அமைத்தது. மேலும், தேர்தல் பிரசாரத்தில் பா.ஜ.க., ‘மெய்தி இன மக்களை பழங்குடியினர் பட்டியலில் சேர்ப்போம்’என்றும் உறுதிமொழி கொடுத்திருந்தது. அந்த உறுதி மொழிதான் தற்போது பிரச்னைக்கு வழிவகுத்துள்ளது..ஏனென்றால், நிலப்பரப்பில் வாழும் மெய்தி இன மக்கள் மலையில் இடம் வாங்க முடியாது, வீடு கட்ட முடியாது. ஆனால், மலையில் வசிக்கும் பழங்குடி மக்கள் காட்டிலும், நாட்டிலும் இடம் வாங்கலாம், வீடு கட்டிக்கொள்ளலாம் என்பது மணிப்பூரின் சட்டம். மெய்தி இனத்தையும் பழங்குடிகள் என்று அறிவித்துவிட்டால் இந்துக்கள் மலையில் குடியேறி விடுவார்கள் என்கிற அச்சம், குக்கி இன மக்களுக்கு ஏற்பட்டிருக்கிறது. தற்போது ஓராண்டு ஆட்சி கடந்த நிலையில், மெய்தி இன மக்களுக்குக் கொடுத்த உறுதிமொழியை நிறைவேற்ற ஆளும் பா.ஜ.க. காய்நகர்த்தி வருகிறது.இதன் தொடர்ச்சியாக பழங்குடிகள் கட்டியிருந்த மூன்று தேவாலயங்களை ஆக்கிரமிப்பு கட்டிடம் என்று சொல்லி புல்டோசர் மூலம் இடித்துத் தள்ளியது. ஆயுதக் குழுக்களுடன் நடைபெற்ற பேச்சுவார்த்தையையும் ரத்து செய்தது. இதனால் டென்ஷனான குக்கி இன மக்கள், பா.ஜ.க. அரசுக்கு எதிராக போராடத் தொடங்கினார்கள். கடந்த மே 3ம் தேதி மெய்தி இன மக்களை பழங்குடியினர் பட்டியலில் சேர்க்கக் கூடாது என்கிற ஒற்றை வரி கோரிக்கையை வலியுறுத்தி குக்கி இன மக்கள் ‘பழங்குடியினர் ஒற்றுமைப் பேரணி’ ஒன்றை 10 மாவட்டங்களில் நடத்தினர்.இதையடுத்து, சுராசந்தர் மாவட்டத்தில் நடந்த இந்த ஒற்றுமைப் பேரணியில் குவிந்திருந்த குக்கி இன மக்கள் மீது, திடீர்த் தாக்குதலைத் தொடுத்திருக்கிறார்கள், மெய்தி இன மக்கள். இது இந்து - கிறிஸ்தவ மதக்கலவரமாக மாறி துப்பாக்கிகள் வெடித்திருக்கின்றன. வீடுகள், தேவாலயங்கள், மால்கள், கடைகள் தீக்கிரையாகியிருக்கின்றன. 11 பேர் பலியாகி இருக்கிறார்கள் என்று அரசு அறிவித்தாலும் இந்த எண்ணிக்கை அதிகம் இருக்கும் என்று கருதப்படுகிறது. .மறுநாளான மே 4ம் தேதியும் கலவரம் தொடர்ந்திருக்கிறது. அன்று இந்தப் பிரச்னை தொடர்பாக முதல்வர் பைரன் சிங்கை சந்தித்துவிட்டுத் திரும்பிய பா.ஜ.க. எம்.எல்.ஏ. ஷங்ஜாகின் வால்டேயும் அவரின் உதவியாளரும் பயங்கரமாகத் தாக்கப்பட்டிருக்கிறார்கள். இதில் படுகாயம் அடைந்த அவர், மருத்துவமனை ஐ.சி.யூ.வில் இருக்கிறார். தொடர்ந்து மாஜி அமைச்சர்களின் வீடுகளும் தாக்கப்பட்டிருக்கின்றன. கூட்டு பலாதகாரம் நடைபெற்றதாக சமூக ஊடகங்களில் செய்தி பரவவே, டென்ஷனான அரசு இன்டர்நெட் சேவையைத் தடை செய்தது.கர்நாடகாவில் பிரசாரம் மேற்கொள்ளவிருந்த உள்துறை அமைச்சர் அமித் ஷா, அதை ரத்து செய்துவிட்டு டெல்லியிலேயே முகாமிட்டு கலவரத்தை முடிவுக்குக் கொண்டுவர முயற்சித்தார். அதற்காக ராணுவம், அஸ்ஸாம் ரைஃபிள் ஃபோர்ஸ், ரேபிட் ஆக்ஷன் ஃபோர்ஸ், சி.ஆர்.பி.எஃப்., பி.எஸ்.எஃப். உள்ளிட்ட 7,000 ராணுவத்தினர் மணிப்பூருக்கு அனுப்பப்பட்டனர். ஆயுதக் குழுக்கள் தவிர, மியான்மரிலிருந்தும் தீவிரவாதிகள் உள்ளே வந்து தாக்குதலைத் தொடுத்திருப்பதாய் சந்தேகப்படுகிறது, இந்திய ராணுவம்” என்றார்.வாக்குறுதிகளை அள்ளிவீசினால் இப்படிதான். விரைவில் மணிப்பூரில் இயல்பு நிலை திரும்பட்டும்!.பாக்ஸ்தமிழர்களுக்கு ஆபத்து..!மணிப்பூர் - மியான்மர் எல்லையில் உள்ள முர்ரே நகரில் மூவாயிரம் தமிழர்கள் வசிக்கிறார்கள். மினி தமிழ்நாடு போல் இருக்கும் அங்கே அங்காள பரமேஸ்வரி, முனீஸ்வரன் கோயில்கள் கட்டப்பட்டுள்ளன. தமிழர்களையும் குக்கி பழங்குடியினருக்குப் பிடிக்காது. அதனால், அவர்கள் மீதும் தாக்குதல் நடத்தப்பட்டிருக்கிறது. 40 வீடுகள் கொளுத்தப்பட்டிருப்பதாய்ச் சொல்கிறார்கள். அதனால்தான், தமிழக அரசு மீட்புப் படையை மணிப்பூருக்கு அனுப்ப வேண்டும் என்று சொல்லியிருக்கிறார் நாம் தமிழர் கட்சியின் சீமான்.-அ.துரைசாமி

பற்றியெரியும் மணிப்பூர்- பா.ஜ.க. காரணமா?

Related Stories