தம்பி… எண்ண விடாத கம்பி! அசோக்கிடம் கதறும் உறவுகள்…

`அடிமேல் அடி அடித்தால் அம்மியும் நகரும்’ என்பார்கள். ஆனால், அமலாக்கத்துறையின் அடுத்தடுத்த சம்மன்களால் அடிவிழுந்தும் சற்றும் அசராமல் போக்கு காட்டிக்கொண்டிருக்கிறார், செந்தில் பாலாஜியின் தம்பி அசோக். `அண்ணனை காப்பாற்ற வா’ என உறவுகள் தூதுவிடத் தொடங்கியிருப்பதுதான் கரூர் சுற்றுவட்டாரத்தின் கதறல் அப்டேட்!செந்தில் பாலாஜியின் நெருங்கிய உறவினரும் அவரின் குலதெய்வக் கோயில் பங்காளியுமான ஒருவரிடம் பேசினோம். அவர் கூறிய தகவல்கள் இங்கே அப்படியே!“அண்ணன் செந்தில் பாலாஜிக்கு கல்யாணம் ஆகறதுக்கு முன்னாலயே, உறவுக்காரப் பெண்ணான நிர்மலாவை, அசோக் கல்யாணம் செய்து கொண்டார். அதன்பிறகு தன் குடும்பத்தோட ராமகிருஷ்ணாபுரத்துல இருக்கற கரூர் ஜவுளி ஏற்றுமதியாளர் சங்கத் தலைவர் மெட்ரோ கோபால் வீட்டில் பல ஆண்டுகாலமா வாடகைக்கு குடியிருந்தார்.அண்ணன் செந்தில் பாலாஜி அமைச்சரான பிறகுதான் அசோக் சொந்தவீடு கட்டத் தீர்மானித்தார். அதுக்காக, இடம் பார்க்கும்படி கரூர்ல இருக்கற ஜுவல்லரி ஓனர் ஒருத்தர்கிட்டே சொன்னார். அவரும், தனியார் வங்கி இயக்குநர்கள்ல ஒருத்தரான ரமேஷ்பாபுவின் மனைவி அனுராதா பேர்ல இருந்த இடத்தை அசோக்கிட்ட காட்டினார். அந்த இடம், அசோக்குக்கு ரொம்பவே பிடிச்சுடுச்சு.உடனே இடத்தை வாங்கி அசோக்கின் மாமியார் லட்சுமி பெயர்ல பத்திரப்பதிவு செஞ்சார். அப்புறம் அந்த இடத்தை தன் மகளும் அசோக்கின் மனைவியுமான நிர்மலாவுக்கு தானமா கொடுத்துட்டாங்க. அதுக்கப்புறம் அந்த இடத்துல நிர்மலா வீடு கட்டத் தொடங்கினாங்க.ரொம்ப காஸ்ட்லியான அந்தப் பகுதியில குறைஞ்சது 30 கோடி ரூபாய்க்குப் போகக்கூடிய இடத்தை வெறும் 10 லட்ச ரூபாய்க்குப் பத்திரப் பதிவு செஞ்சிருக்காங்க. தவிர, பஞ்சாயத்து அனுமதி இல்லாமலே வீட்டையும் கட்டத் தொடங்கியிருக்காங்க. இதையெல்லாம் அ.தி.மு.க.காரங்க கண்டுபிடிச்சுட்டாங்க.அசோக் கட்டற வீடு இருக்கற ஆண்டாங்கோயில் பகுதியில, முன்னாள் அமைச்சர் எம்.ஆர்.விஜயபாஸ்கரின் தம்பி சேகரின் மனைவி சாந்திதான், பஞ்சாயத்துத் தலைவரா இருக்காங்க. விஷயம், அவங்க காதுக்குப் போனதும்தான் பிரச்னை ஆரம்பிச்சிருக்கு.கடந்த மே மாசம் 26ம் தேதி வருமான வரித்துறை அதிகாரிகள் இந்த வீட்டுக்கு வந்தப்பதான் இதோட பிரமாண்டமே வெளியில தெரிஞ்சுது. சுத்துவட்டாரத்துல உள்ளவங்களுக்கே தெரியாதபடி தகர மறைப்புபோட்டு கட்டிகிட்டு இருந்த பங்களாவைப் பார்த்து எல்லாரும் பிரமிச்சுப் போயிட்டாங்க.அதுக்கப்புறம் செந்தில் பாலாஜியை கைது பண்ணி, அவருக்கு நெஞ்சுவலி வந்து, ஆஸ்பத்திரியில் அனுமதிக்கப்பட்டிருந்த சமயத்துல, ரத்தபந்த உறவுகள் எல்லாம் அசோக்கிட்டே பேசினோம். அவர்கிட்ட, `அமலாக்கத்துறை விசாரணைக்கு ஆஜரானா அண்ணனை காப்பாத்தலாம்னு சொன்னோம். ஆனா அசோக், ‘நான் வெளியில இருந்தாலாவது அண்ணனைக் காப்பாத்த முடியும். நானும் உள்ளே போயிட்டா ரெண்டு பேரையும் யாரு காப்பாத்துவா?’ அப்படின்னு கேட்டார்.அதோட, ‘ஆறு மாசத்துக்கு முன்னால நெஞ்சுவலி வந்து, கோயமுத்தூர் ஆஸ்பத்திரியில நான் ஸ்டன்ட் வெச்சுகிட்டு வந்தது உங்க எல்லாருக்குமே தெரியும்தானே... நான் எப்படி உள்ளே போகமுடியும்?’னு கேட்டு எங்க எல்லாரோட வாயையும் அடைச்சுட்டாரு” என்றவர், செந்தில் பாலாஜியை அமலாக்கத் துறையின் பிடியில் இருந்து விடுவிக்க என்னென்ன முயற்சிகள் எடுக்கப்படுகின்றன என்பதையும் பட்டியலிட்டார்.“செந்தில் பாலாஜிக்கு ஆப்ரேஷன் முடிஞ்சு, புழல் சிறையில அனுமதிக்கப்பட்ட நேரத்துல, சீக்கிரமே ஜாமின் கிடைச்சுடும்னுதான் எல்லாரும் நினைச்சோம். அதனாலதான், கடந்த 8-ம் தேதி அவரை அமலாக்கத்துறை கஸ்டடியில எடுத்தப்பகூட அமைதியா இருந்தோம். ஆனா, 9-ம் தேதி கரூருக்கு வந்த அமலாக்கத்துறை அதிகாரிகள், அசோக்கின் மனைவி நிர்மலாவை நேர்ல ஆஜராகச் சொல்லி நோட்டீஸ் ஒட்டினதும்தான் விஷயம் ரொம்ப சீரியஸ்னு புரிஞ்சுது. நிலைமை இந்த அளவுக்கு வந்த பிறகும் அசோக் தலைமறைவா அமைதி காத்துகிட்டு இருக்கறது சரியில்லைன்னு நினைச்சோம். அசோக்கை தொடர்புகொள்ளக் கூடிய ஒரே நபரான கான்ட்ராக்டர் ஒருத்தரை செந்தில் பாலாஜியின் நெருங்கிய உறவினர் சந்திச்சுப் பேசினார்.அந்த நபரோட வீடு, அலுவலகம், பண்ணை வீடுன்னு எல்லா இடத்துலயும் அமலாக்கத்துறை நான்கு தடவை சோதனை நடத்துச்சு. கடந்த 10 நாளைக்கு முன்பு அரவக்குறிச்சி பேரூராட்சியில ஒருத்தரோட ஊழல் சம்பந்தமா, ஒரு எம்.எல்.ஏ.கிட்ட பைசல் செய்ய வந்தார். அந்தப் பஞ்சாயத்தை 10 நிமிஷத்துல முடிச்சுட்டுத் திரும்பிட்டார். இதை அவர் அசோக்கின் உத்தரவுப்படிதான் செஞ்சதா, கட்சிக்காரங்க சொல்றாங்க.அவர்கிட்ட போய், ‘அசோக் எங்கே இருக்கார்னு மட்டுமாவது சொல்லுங்க… நாங்க அவர்கிட்டே போய் அழுது புலம்பியாவது ஆஜராகச் சொல்றோம். இப்போ நிர்மலாவே ஆஜராகவேண்டிய அளவுக்கு நிலைமை வந்திடுச்சு’ன்னு சொன்னோம். அதுக்கு அவர், ‘நானே ரெண்டு மாசத்துல நாலு ரெய்டை சந்திச்சுட்டேன், நான் யார்கிட்டேபோய்ச் சொல்ல?’ன்னு புலம்பினார்.அசோக் கட்டுற வீட்டுக்குக் கட்டுமானப் பொருள்களை சப்ளை செஞ்ச நிறுவனத்தோட வடமாநில உரிமையாளரையும் அமலாக்கத்துறை அதிகாரிகள் உலுக்கிட்டாங்க. அதனால, கட்டுமானப்பணியில ஈடுபட்ட கொத்தனார், சித்தாள்கூட பயந்துகிட்டு இருக்காங்க. கரூர்ல இப்போதைக்கு யாரும் செந்தில் பாலாஜி பெயரையோ, அசோக் பெயரையோ சொல்றதுக்குக்கூட தயங்கறாங்க.அசோக், உடனடியா வெளியில வந்து அமலாக்கத்துறைகிட்டே ஆஜராகணும். அப்படிச் செய்தால்தான் செந்தில் பாலாஜியை காப்பாத்த முடியும்கிற அளவுக்கு கடுமையான நெருக்கடி. அதனாலதான் அசோக்குக்கு தூதுமேல தூது அனுப்பிகிட்டு இருக்காங்க. ஆனா, எதுவும் நடக்கற மாதிரி தெரியலை” என்றார் விரக்தியான குரலில்.செந்தில் பாலாஜியின் பெற்றோரிடம் இதுகுறித்துப் பேச, கடும் முயற்சி எடுத்தோம். அவர்கள் யாரும் நம்மிடம் பேசத் தயாராக இல்லை.அசோக் ஆஜரானால் மட்டுமே விடை தெரியும்! - கரூர் அரவிந்த்