விபத்தில் சிக்கியவர்களுக்கு இலவசம்! அசத்தும் ஆட்டோக்காரர்!

சென்னையின் நெரிசலான பகுதி. அங்கே திடீரென்று நடந்த சாலை விபத்தில் கணவர் அடிபட்டுக் கிடக்க, செய்வதறியாது அருகே நின்று கதறிக்கொண்டிருந்தார், அவர் மனைவி. உதவிக்கு யாரும் நெருங்காத சூழலில் அங்கே ‘சர்’ என்று வந்து நின்றது ஓர் ஆட்டோ. அதிலிருந்து இறங்கிய டிரைவர், “அழுவாதம்மா, ஒண்ணும் ஆகாது. பக்கத்துல இருக்கற ஆஸ்பத்திரியில நானே கொண்டுபோய் சேர்த்துடறேன்..!” என்றவர் அவர்களை ஏற்றிக்கொண்டு பறந்தார். அந்த ஆட்டோவின் பின்னால் பளபளத்தது ‘விபத்துக்கு இலவசம்!’ மனிதாபிமானம் நிறைந்த அவரது செயலைப் பார்த்து, ஆட்டோவைப் பின்தொடர்ந்தோம். அருகே உள்ள மருத்துவமனையில் அடிபட்டவரைச் சேர்த்துவிட்டு வந்தவர் டீக்கடை ஒன்றில் டீ குடித்துக்கொண்டிருந்தார். மெதுவாக அவரிடம் பேச்சுக் கொடுத்தோம்... “என் பேரு சிங்காரம்ங்க. சென்னை பெசன்ட் நகர்ல இருக்கேன். ஆரம்பத்துல டீக்கடை வைச்சிருந்தேன். கார்ப்பரேஷன், போலீஸ்னு எல்லாருக்கும் மாமூல் கொடுத்துக் கட்டுப்படியாகலை. அதனால ஆட்டோவை வாங்கி ஓட்டிகிட்டிருக்கேன். ஒரு நாள் ஆட்டோ ஓட்டிகிட்டு இருந்தப்போ, வழியில விபத்துல ஒருத்தர் அடிபட்டுக் கிடக்கறதைப் பார்த்தேன். ஆம்புலன்ஸுக்கு தகவல் சொல்லிட்டதா சிலர் பேசிக்கிட்டிருந்தாங்க. கொஞ்ச நேரம் நின்னுப் பார்த்தேன். ஆம்புலன்ஸ் வருது வருதுன்னாங்களே தவிர வந்தபாடு இல்லை... ரோட்டுல அடிப்பட்டு கிடக்குறவரு ரத்த வெள்ளத்துல முனகுறாரு. நான் டாக்டருங்க சொல்ற ‘கோல்டன் ஹவர்’ பத்தி கேள்விப்பட்டிருக்கேன். குறிப்பிட்ட நேரத்துக்குள்ள விபத்துல அடிப்பட்டிருக்குறவரை மருத்துவமனைக்குக் கொண்டு போகலைன்னா செத்துடுவாங்க.என்னால விபத்து நடந்த இடத்தைக் கடந்துபோக முடியலை. சட்டுன்னு துணிஞ்சு இறங்கி, அவரை தூக்கி ஆட்டோவுல போட்டுக்கிட்டு ஆஸ்பத்திரிக்குக் கொண்டுபோனேன். சரியான நேரத்துக்குப் போனதால, அவர் உயிர் பிழைச்சுட்டார். அப்போதான், இப்படியொரு வாசகத்தை ஆட்டோவுல எழுதணும்கற எண்ணமே வந்துச்சு. எங்க சங்கத்தைச் சேர்ந்த மத்த ஆட்டோக்காரங்களும் இந்த உதவியைச் செய்தாங்க. ஆனா, பொருளாதார நெருக்கடியால, பலரால தொடர முடியலை. எந்த ஆட்டோக்காரராவது, இப்படி உதவினது தெரியவந்தா, அவருக்கு அந்தப் போக்குவரத்துக் கட்டணத்தோட ஊக்கத்தொகையா 500 ரூபாயும் கொடுத்துப் பாராட்டறோம்!” சொன்னவர் வார்த்தைகளில் மனித நேயம் நிறைந்திருந்தது..இதுகுறித்து, தமிழ்நாடு அரசு போக்குவரத்துத்துறை கமிஷனர் நிர்மல்ராஜ் ஐ.ஏ.எஸ்ஸிடம் கேட்டபோது,“விபத்துக்குள்ளானவர்களைக் காப்பாற்றுகிறவர்கள் மீது பொய் வழக்கு போடுவதோ, சாட்சிக்கென்று அலையவைப்பதோ கூடாது என்று சட்டமே உள்ளது. மேலும், மாவட்ட ஆட்சியர்கள் பரிந்துரை செய்தால் ஒன்றிய அரசின் நிதியிலிருந்து 5,000 ரூபாய் பரிசாக வழங்கப்படும். தமிழ்நாடு அரசும் 5,000 ரூபாய் பரிசுத்தொகை வழங்க சட்டப்பேரவையில் அறிவித்துள்ளது. அதற்கான, உத்தரவு வந்ததும் அதுவும் வழங்கப்படும்” என்றார். சிங்காரம் போன்றவர்களால்தான் சென்னை, சிங்காரச் சென்னையாகிறது! -மனோசௌந்தர்

விபத்தில் சிக்கியவர்களுக்கு இலவசம்! அசத்தும் ஆட்டோக்காரர்!

Related Stories