74 பினாமிகளுக்கு சீட் கொடுத்தார் அண்ணாமலை! சசிகாந்த் சரவெடி...

கர்நாடக சட்டமன்றத் தேர்தலில் பா.ஜ.க-வை மண்ணைக் கவ்வ வைத்ததில் முக்கியப் பங்கு வகித்தவர்களில் ஒருவர் சசிகாந்த் செந்தில். முன்னாள் ஐ.ஏ.எஸ். அதிகாரி. கர்நாடக காங்கிரஸின் வார் ரூம் தலைவர். பச்சைத் தமிழரும்கூட. “யார் இந்த சசிகாந்த் ?” என்று கூகுளில் பெரும் கூட்டமே அவரைத் தேடிக்கொண்டிருந்த போது நாம் அவரை நேரில் சந்தித்தோம்! கர்நாடகா சட்டமன்ற தேர்தல் அனுபவங்களைச் சொல்லுங்கள்? “கர்நாடகத்தில் நான் அதிகாரியாக இருந்தபோது மூன்று மாவட்டங்களின் தேர்தலை நடத்தியிருக்கிறேன். 10 தொகுதிகளில் தேர்தல் பார்வையாளராகவும் இருந்திருக்கிறேன். தற்போது அரசியல் கட்சி சார்பாக தேர்தலை சந்தித்தது புது அனுபவம். கர்நாடக சட்டமன்றத் தேர்தல் நிலவரத்தை பொறுத்தவரை பா.ஜ.க., காங்கிரஸ் ஆகிய இரு கட்சிகளுமே சமபலத்தில்தான் இருந்தன. கடந்த எட்டு மாதங்களாக பல்வேறு வியூகங்களை வகுத்து வெற்றியை வசப்படுத்தினோம். இந்தத் தேர்தல் எனக்கு புதிய பாடத்தை கற்றுக்கொடுத்திருக்கிறது.” பா.ஜ.க. வார் ரூமை தோற்கடித்தது எப்படி?“வார் ரூம் செயல்பாடுகளில் பா.ஜ.க. ஸ்ட்ராங்க் என்பது பொய். கர்நாடக தேர்தல் களத்தில் இறங்கி வேலை செய்யும்போது ஓர் உண்மை தெரியவந்தது... மதத்தை வைத்து, சாதியை வைத்து வெற்றி பெற்றுவிடலாம், மோடியைக் காட்டி ஓட்டு வாங்கிவிடலாம் என்று பா.ஜ.க., செயல்பட்டதே தவிர, மக்களுக்காக செய்த திட்டங்கள் பற்றி பேச அவர்களிடம் எதுவும் இல்லை.”சரி, பா.ஜ.க தோல்விக்கு என்ன காரணம்?“40 சதவிகித கமிஷன் கவர்மென்ட் என்கிற எங்களது கோஷத்திற்கு எதிராக பா.ஜ.க ஏதாவது செய்யும் என்று எதிர்பார்த்தோம், ஆனால் பா.ஜ.க-வால் இந்த விஷயத்தில் எந்த பதிலும் சொல்லமுடியவில்லை. விலைவாசி உயர்வு, அடிப்படை வாழ்வாதாரம் குறித்து மக்களிடம் கேள்வி எழுந்தபோது, அதற்கு பதில் சொல்லாமல் ‘அனுமனை காங்கிரஸ் அவமதித்துவிட்டது’ என்று மதவாதத்தைப் பிடித்துத் தொங்கினார்கள். ‘காங்கிரஸ் கட்சியினர் என்னை 91 முறை திட்டினார்கள்’ என்று நீலிக்கண்ணீர் வடித்தார் மோடி. இதையெல்லாம் மக்கள் ரசிக்கவில்லை. இவை எல்லாம்தான் தோல்விக்குக் காரணங்கள்.”.கர்நாடக தேர்தலில் அண்ணாமலை செயல்பாடு குறித்து?“கர்நாடக மாநிலத்தின் தனித்துவத்தை அழிக்கும் செயலைதான் அண்ணாமலை செய்தார். 70-க்கும் மேற்பட்ட புதுமுக வேட்பாளர்களை களம் இறக்கியிருப்பதாக அண்ணாமலை சொன்னது சுத்தப் பொய். அரசியல்வாதியின் மகன், மருமகன், அக்கா, மனைவி என உறவினர்களைத்தான் வேட்பாளராக பா.ஜ.க அறிவித்தது. உதாரணத்திற்கு மாதேபுரா தொகுதியில் நீண்டகாலமாக இருக்கும் பா.ஜ.க எம்.எல்.ஏ மீது மக்களுக்குக் கடும் அதிருப்தி. அவருக்கு அங்கு சீட் கொடுத்தால் பா.ஜ.க தோற்றுவிடும். இதனால், அவரின் மனைவிக்கு சீட் கொடுத்தனர். அது எப்படி புதுமுகமாகும். இதேபோன்று புதுமுகம் என்று சொல்லிக்கொண்டு 74 பினாமிகளுக்கு அண்ணாமலை சீட் கொடுத்தது எங்களுக்கு சாதகமாகிவிட்டது.” மோடி பிரசாரம்கூட பா.ஜ.க.விற்கு கை கொடுக்காதது ஏன்? “பொதுவாகவே மோடியின் செல்வாக்கு குறைந்திருப்பதைதான் கர்நாடகா தேர்தல் முடிவு காட்டுகிறது. தேர்தல் நெருங்கும் கடைசி வாரத்தில் மெட்ரோ ரயில் திட்டத்தை மோடி திறந்து வைத்தார். அந்த ரயில் நிலையத்தின் ஒரு பகுதியில் டிராக்கே இல்லை. அதேபோல பெங்களூரு, மைசூர் நெடுஞ்சாலைப் பணிகள் மற்றும் பெங்களூர் இரண்டாவது விமான நிலையப் பணிகள் இவை எல்லாம் நிறைவடையாத நிலையிலேயே மோடி திறந்து வைத்தார். இதை எல்லாம் மக்கள் விரும்பவில்லை.”தேர்தலில் எது மாதிரியான வியூகங்களை வகுத்தீர்கள்?“காங்கிரஸ் வார் ரூம் சேர்மனாக என்னை ராகுல் காந்தி நியமித்தபோதே, பா.ஜ.க அரசுக்கு மக்கள் மத்தியில் இருக்கும் வெறுப்புகளை பட்டியில் போட ஆரம்பித்தோம். அதில் கடந்த சட்டமன்றத் தேர்தலின் போது 106 வாக்குறுதிகளை பா.ஜ.க அளித்திருந்தது. அதில் நான்கு தவிர எதையும் நிறைவேற்றவில்லை. இதையே பிரசார வியூகமாக்கினோம். ‘உங்களிடம் பதில் இருக்கிறாதா?’ என்று கடந்த சட்டமன்றத் தேர்தலில் கொடுத்த வாக்குறுதிகளைப் பற்றி, ஒவ்வொரு நாளும் ஒவ்வொரு கேள்வியை பா.ஜ.க-விடம் கேட்டோம். அவர்களால் எந்த பதிலையும் சொல்லமுடியவில்லை.”நாடாளுமன்றத் தேர்தலிலும் காங்கிரஸ் வெற்றி தொடருமா?“கர்நாடகாவில் வென்றதால் நாடாளுமன்றத் தேர்தலிலும் காங்கிரஸ் வெல்லும் என்று சொல்ல முடியாது. அதற்கான தேர்தல் களத்தை காங்கிரஸ் வடிவமைத்துகொள்ள வேண்டும். ராகுலை மக்களை விரும்பத் தொடங்கிவிட்டார்கள். 2024 நாடாளுமன்றத் தேர்தலில் பா.ஜ.க-விற்கு காங்கிரஸ் டஃப் பைட் கொடுக்கும்.”தமிழக காங்கிரஸ் பற்றி உங்கள் கருத்து...“தமிழக காங்கிரஸ் நிலைமை சரியில்லை என்பதை ஏற்றுக்கொண்டுதான் ஆக வேண்டும். இந்நிலைமாறவேண்டும், மாறும் என்ற நம்பிக்கை உள்ளது. தமிழக அரசியல் களத்தில் வெற்றிடம் உள்ளது. காமராஜர் ஆட்சி இன்னும் தமிழக மக்கள் மனதில் உள்ளது. அது திரும்ப வருவதற்கான வாய்ப்பும் உள்ளது. காங்கிரஸ் தலைவர்கள், தொண்டர்கள் ஒன்று சேர்ந்து உழைத்தால் அது சாத்தியமாகும்.” - ரய்யான் பாபு படங்கள்: செந்தில்நாதன்

74 பினாமிகளுக்கு சீட் கொடுத்தார் அண்ணாமலை! சசிகாந்த் சரவெடி...

Related Stories