மயக்கவியல் மாணவியை மயக்கினாரா பேராசிரியர்? மதுரை அவலம்...

மருத்துவக் கல்லூரி மயக்கவியல் துறை மாணவிக்கு பாலியல் தொல்லை கொடுத்த புகாரில் துணைப் பேராசிரியர் ஒருவர் சஸ்பெண்ட் செய்யப்பட்ட சம்பவம் கல்வித்துறைக்கு இன்னொரு கரும்புள்ளி.மதுரை அரசு ராஜாஜி மருத்துவக் கல்லூரி மருத்துவமனையின் மயக்கவியல் துறை துணைப்பேராசிரியராக இருப்பவர் செய்யது தாகீர் உசேன். இவர் மயக்கவியல்துறையில் மாணவி ஒருவருக்கு பாலியல் தொல்லை கொடுப்பதாக மாணவிகள் உட்பட அங்குள்ள துணை பேராசிரியர்களும் புகார் கொடுத்திருக்கிறார்கள்.இதுகுறித்து விசாகா கமிட்டியினர் நடத்திய விசாரணையில் இரண்டு உதவி பேராசிரியர்கள், ஒரு நர்ஸ், இரண்டு முதுநிலை மாணவிகள் உட்பட 23 பேர் உசேனுக்கு எதிராக எழுத்துப் பூர்வமாகத் தங்கள் புகார்களை அளித்தனர். அதில், உசேன் மாணவிகளை பாலியல் ரீதியாக அணுகுவது, தகாத இடங்களில் தொடுவது, இரட்டை அர்த்தத்தில் உரையாடுவது போன்ற செயல்களில் ஈடுபட்டதாக தெரிவித்துள்ளனர். இதையடுத்து உசேன் சஸ்பெண்ட் செய்யப்பட்டுள்ளார்.ஆனால், தன் மீதான குற்றச்சாட்டுகளை மறுக்கும் உசேன், “அரசு மருத்துவர்களுக்கான சட்டப்போராட்டக் குழுவின் மாநில பொதுச்செயலாளராக இருக்கிறேன். மருத்துவத்துறையில் நடைபெறும் முறைகேடுகளை தொடர்ந்து அம்பலப்படுத்தி வருகிறேன். பதவி உயர்வு மற்றும் இடமாறுதல் தொடர்பான நடவடிக்கைகளில் முறைகேடுகள் நடந்திருக்கின்றன. முறைகேடுகளில் ஈடுபட்டுள்ள அதிகாரிகள் பற்றியும் புகார் அளித்துள்ளேன். அதே நேரம் மதுரை அரசு ராஜாஜி மருத்துவமனையில் நான் சார்ந்திருக்கும் மயக்கவியல் துறையில் பணியாற்றி வரும் ஆறு உதவி பேராசிரியர்கள் மற்றும் துறைத்தலைவர் கல்யாணசுந்தரம் உட்பட முறைகேடாக பதவி வகித்து வருகிறார்கள். இதை எல்லாம் தட்டிக் கேட்டதால்தான் மூன்றாம் ஆண்டு படிக்கும் மாணவிகளை மிரட்டி என் மீது பாலியல் புகார் கொடுக்க வைத்திருக்கிறார்கள். தனிப்பட்ட முறையில் ஒரு மாணவி புகார் கொடுத்ததாக சொல்கிறார்கள். அந்த புகாரில் நாள், இடம், நேரம் எதுவுமே குறிப்பிடப்படவில்லை. இவை எல்லாம் சுகாதாரத்துறை உயரதிகாரிகள் நடத்தும் நாடகம். மதுரையில் குறிப்பிட்ட சாதியை சார்ந்த மருத்துவர்கள் என்ன செய்தாலும் அவர்களை காப்பாற்றுகிறது நிர்வாகம். என் மீதான நடவடிக்கையை சட்டப்படி எதிர்க்கொள்வேன் “ என்றார் ஆவேசத்தோடு..ராஜாஜி அரசு மருத்துவமனை டீன் ரத்தினவேலோ,” உசேன் மீது மாணவிகள் உள்ளிட்ட 23 பேர் பாலியல் புகார் கொடுத்தது உண்மை. மற்றபடி பழிவாங்கும் நடவடிக்கை என்பதெல்லாம் சமாளிப்பு” என்றார்.அதேசமயம் வேண்டாதவர்களை பாலியல் குற்றச்சாட்டில் வீழ்த்துவது என்பது அடிக்கடி நிகழ ஆரம்பித்துள்ளது. இதற்கு முன்பு ரேடியாலஜி மருத்துவர் ஒருவர் பாலியல் குற்றச்சாட்டு சுமத்தப்பட்டு நீதிமன்றம் மூலம் நிரபராதி என்று நிருபிக்கப்பட்டார். அவரும் உசேன் போலவே சுகாதாரத்துறையில் நடக்கும் ஊழல்களுக்கு எதிராக செயல்பட்டவர் என்பது குறிப்பிடத்தக்கது. தேவை நேர்மையான நடவடிக்கை!-பாலா

மயக்கவியல் மாணவியை மயக்கினாரா பேராசிரியர்? மதுரை அவலம்...

Related Stories