அமெரிக்க பயணம்...சாதித்தது மோடியா, பைடனா?

- என் சத்திய மூர்த்தி, கொள்கை மற்றும் அரசியல் ஆய்வாளர் பிரதமர் மோடியின் அமெரிக்க பயணம் குறித்து பல்வேறு கருத்துக்கள் பரபரக்கின்றன. அவரது பயணம் வெற்றியா, தோல்வியா, வெற்றிகரமான தோல்வியா, தோல்விகரமான வெற்றியா என்றெல்லாம் சர்ச்சைகள் கொடிகட்டி பறக்கின்றன. மோடியின் ஆதரவாளர்களோ, அமெரிக்க நாடாளுமன்ற இரு அவைகளின் கூட்டுக் கூட்டத்தில் மோடி உரையாற்றியதையே பெருமையாக கருதுகிறார்கள். உண்மையைச் சொல்ல வேண்டும் என்றால், அமெரிக்கா தனக்கே உரிய வியாபார சாதுர்யத்துடன் மோடியைக் குஷிப்படுத்தி, தனக்கு வேண்டியதை சாதித்துக்கொண்டது, அவ்வளவுதான்!.இந்தியாவைபோலவே, அமெரிக்காவிலும் அடுத்த ஆண்டு தேர்தல் நடக்கவிருக்கிறது. அதில் தற்போதைய அதிபர் ஜோ பைடன் மீண்டும் போட்டியிடுகிறார். பைடனின் வெற்றிக்குத் தேவை பொருளாதார வளர்ச்சி, அதையொட்டிய அதிக வேலைவாய்ப்புகள். அதை மோடியின் பயணத்தின்போது கையெழுத்திடப்பட்ட ஒப்பந்தங்கள் உறுதி செய்துள்ளன. அமெரிக்காவின் ஜெனரல் எலெக்ட்ரிக் நிறுவனத்தின் போர் விமான என்ஜின்களை பெங்களூருவில் உள்ள நமது பொதுத்துறை நிறுவனமான இந்துஸ்தான் ஏரோநாட்டிக்கல் நிறுவனம் தயாரிக்கவிருப்பது உண்மையிலேயே முக்கியமான செய்திதான். ஏனெனில் இதுவரை, அமெரிக்க நிறுவனங்கள் இந்தியா உள்ளிட்ட பிற நாடுகளுக்கு, தங்களது தொழில்நுட்பத்தை விற்று, அதை உள்நாட்டிலேயே தயாரிக்க அனுமதித்தில்லை. பாதுகாப்பு காரணங்களால் இந்த ஏற்பாடு. விமர்சகர்கள் கூறுவதுபோல், இது குறித்த இருதரப்பு ஒப்பந்தந்த்தில், இந்த தொழில்நுட்பப் பரிமாற்றம் எத்தனை ஆண்டுகளுக்குள் முன்னெடுக்கப்படும் என்பது குறிப்பிடப்படவில்லை. அமெரிக்காவுடனான இதுபோன்ற ஒப்பந்தத்தில் இது ஒரு முக்கியமான விஷயம். காரணம், வியாபார விஷயங்கள் இரு நாடுகளின் தொழில் நிறுவனங்களுக்கு இடையேயான விவகாரம்தான் என்றாலும், அந்த நாட்டின் அதிபரும் நாடாளுமன்றமும் நினைத்தால், ஏராளமான நிபந்தனைகளை இந்தியா மீது திணித்து, அவற்றை நாம் ஏற்காத பட்சத்தில் ஒப்பந்தத்தை ரத்தும் செய்யலாம். உக்ரைன் போர் காரணமாக இந்தியா, சீனா உள்ளிட்ட பல்வேறு நாடுகளுக்கும் விலையை குறைத்து பெட்ரோலிய பொருள்களை ஏற்றுமதி செய்துவருகிறது ரஷ்யா. ரஷ்யா மீது அமெரிக்காவும் அதன் நேச நாடுகளும் பொருளாதார தடைகளை விதித்துள்ளன. அந்தத் தடைகளை மீறி, ரஷ்யாவுடன் பொருளாதார அல்லது அரசியல் உறவு வைத்துக்கொள்ளும் பிற நாடுகளுக்கும் அந்தத் தடை பொருந்தும்..இத்தகைய தடைகளை அரசியல் காரணங்களுக்காக அமெரிக்கா நம் மீது திணிக்கவில்லை. ஒருவேளை அமெரிக்கா நம்மை எதிரியாக கருதினால், நாம் ரஷ்யாவோடு மேலும் நெருங்கிவிடுவோம் என்ற பயம் அவர்களுக்கு இருக்கிறது. தவிர ராணுவ தளவாட உற்பத்தியும் விற்பனையும் அமெரிக்காவில் வேலைவாய்ப்பு மற்றும் பொருளாதாரத்திற்கு மிகவும் முக்கியமானவை. ராணுவ தளவாடங்களின் ஏற்றுமதி படுத்துவிட்டால், அந்தந்த தொகுதி நாடாளுமன்ற உறுப்பினர்களும் ஆளும் கட்சியும் அடுத்த தேர்தலை மறந்துவிடலாம். அடுத்த வருடம் நவம்பர் மாத தேர்தலில் புதிய வேலைவாய்ப்புகள் இல்லையென்றால், அல்லது தனியார் ஆயுத தொழிற்சாலைகளில் ஆள்குறைப்பு செயல்படுத்தப்பட்டால், தேர்தலில் அதிபர் பைடனின் ஜனநாயகக் கட்சி படுதோல்வியைத் தழுவும். இதை தவிர்ப்பதற்கு, அவர்களுக்கு தேவை, தங்களது நாடு தயாரிக்கும் ராணுவ தளவாடங்களை வாங்குவதற்கு பிற நாடுகள் முன் வரவேண்டும். கூடவே அந்த செய்தி உலகம் முழுவதும் பேசப்படவேண்டும். இதற்குதான், பிரதமர் மோடியை அமெரிக்க நாடாளுமன்றத்தின் இரு அவைகளிலும் உரையாற்ற அழைத்திருக்கிறார் பைடன். கூடவே இந்தியா தங்களுக்கு நெருக்கமான நாடு என்று ரஷ்யா போன்ற அமெரிக்காவின் எதிரி நாடுகளை நம்ப வைத்ததுபோலவும் ஆயிற்று. பொதுவாக ராணுவ தளவாடங்களின் உண்மையான விலையை இரண்டு நாடுகளுமே மக்களிடமே அறிவிக்காது. இதனால்தான், ‘இந்தியா வாங்கும் ஆளில்லாத போர் விமானத்தின் விலை ஆயிரம் கோடி டாலருக்கும் அதிகம். இது அநியாய விலை’ என்று சமூக வலைதளங்களில் பலரும் பதறுகிறார்கள். ரஃபேல் போர் விவகாரத்தைபோலவே இதன் பின்னணியிலும் யாரோ பலன் அடைந்துள்ளார்கள் என்றும் சந்தேக ரேகை பரவுவதை காண முடிகிறது. நாடாளுமன்றத் தேர்தல் நெருங்கும்போது, இந்த விவகாரம் தீப்பிடிக்கலாம். இன்னொரு பக்கம் சிறுபான்மையினர் விவகாரத்திலும் சர்ச்சை எழுந்துள்ளது. மோடியின் ஆதரவாளர்கள் என்னதான் மறுத்தாலும், மோடியின் ஆட்சியில் சிறுபான்மையினருக்கு பாதுகாப்பு இல்லை என்கிற எண்ணம் மேலை நாடுகளில் பெரிதாக வேர் பிடித்துவிட்டது. போதாததற்கு மணிப்பூர் பிரச்னையும் அவ்வப்போதைய முஸ்லீம்கள் மீதான தாக்குதல்கள் குறித்தெல்லாம், அமெரிக்காவின் முலைமுடுக்கெல்லாம் தகவல் பரவி இருக்கிறது. இந்த செய்திகளின் பின்னால் நம்மால் மறக்கப்பட்ட குஜராத் கலவரமும் நிழலாடுகிறது. இதன் காரணமாகவே, அதிபர் பைடனின் ஜனநாயகக் கட்சியை சேர்ந்த 70 நாடாளுமன்ற உறுப்பினர்கள், மோடி காலத்திய அத்துமீறல்கள் குறித்து தங்களது தலைவருக்கு கடிதம் எழுதினார்கள். இந்த பின்னணியில், அந்த நாட்டு நாடாளுமன்ற உறுப்பினர்களை தாஜா செய்வது, நாடாளுமன்றத் தேர்தலுக்கு முன்னர் மோடி தலைமைக்கு அவசியமாகிறது. இல்லையென்றால், தேர்தல் நேரத்தில் அமெரிக்கா ஏதாவது எக்குதப்பான விஷயங்களைப் போட்டு உடைக்கலாம், அது பா.ஜ.க-வின் வெற்றியை பாதிக்கலாம். இப்படியான சூழலில்தான் மோடி அமெரிக்க பயணத்தின் க்ளைமாக்ஸ் காட்சியாக இரு தலைவர்களின் பத்திரிகையாளர் சந்திப்பில் சிறுபான்மையினர் பாதுகாப்பு குறித்து மோடியிடம் கேள்வி கேட்ட இந்திய வம்சாவழி பெண் பத்திரிகையாளர் ஒருவரை பா.ஜ.க. ஆதரவு சமூக ஊடகர்கள் துரத்தி துரத்தி வறுத்தெடுத்துவிட்டனர். ஆனால், இதை அமெரிக்க அரசு ரசிக்கவில்லை என்பதை அதிபர் பைடனின் செய்தி தொடர்பாளர் தெளிவுப்படுத்திவிட்டார். இது மோடி ரசிகர்களுக்கு உவப்பானதாக இருக்க முடியாது. ஆனால், உண்மையை எப்போதுமே மாற்றவும் முடியாது!