மண்சோறு, மட்டன் பிரியாணி... மனசு நெறஞ்ச எடப்பாடி! பழனிசாமியின் பர்த்டே கொண்டாட்டங்கள்!

ரத்தத்தின் ரத்தங்களை உற்சாக மூடுக்கு மாற்றியிருக்கிறது, அ.தி.மு.க பொதுச்செயலாளர் எடப்பாடி பழனிசாமியின் பர்த் டே பார்ட்டி. சென்னை கல்கத்தா காளியம்மன் கோயிலில் இந்த பிறந்தநாளில் மண் சோறு சாப்பிட்டிருக்கும் கட்சி நிர்வாகிகள், அடுத்த பிறந்தநாளில் அலகுக் குத்தவும் அங்கப்பிரதட்சணம் செய்யவும் தயாராகிவருகிறார்கள் என்பதுதான் உளவுத்துறை சேகரித்திருக்கும் படுரகசிய தகவல்... மைக் ஒன்... ஓவர், ஓவர்!அ.தி.மு.க நிறுவனர் எம்.ஜி.ஆர். மறைந்ததும் கட்சி ‘ஜா அணி’ ‘ஜெ அணி’ என இரண்டாகப் பிளவுபட்டது. 1989 சட்டசபைத் தேர்தலில் ஜெ., அணி வெற்றிபெற்று ஜா அணி மண்ணைக் கவ்வியது. காட்சிகள் மாறின. கட்சி ஜெயலலிதா கைகளுக்குள் வந்தது. அதன் பிறகு டயரில் விழுந்து கும்பிட்டது தொடங்கி விமானத்தைப் பார்த்து சிக்னலில் போக்குவரத்தை நிறுத்தியது வரை அனைத்தையும் நாடறியும். கூடவே ஜெ பிறந்தநாளில் அலகு குத்துவது, அங்கப்பிரதட்சணம், அடிப்பிரதட்சணம் என டிசைன் டிசைனாக செய்து தலைமையைக் குஷிப்படுத்தினார்கள். இப்போது அண்ணார் எடப்பாடியின் முறை...இதுபற்றி நம்மிடம் பேசிய தலைமைக் கழக நிர்வாகி ஒருவர், “முன் எப்போதும் இல்லாத வகையில் அ.தி.மு.க., நிர்வாகிகள் பலர் எடப்பாடியின் காலில் சாஷ்டாங்கமாக விழத் தொடங்கியிருக்கிறார்கள். எடப்பாடி முதல்வர் ஆன புதிதில், அவரிடம் விறைப்பாக நின்ற கட்சியின் இரண்டாம் கட்டத் தலைவர்கள் கூட இப்போது அவர் முன்பாக குனிந்து பவ்யம் காட்டுகிறார்கள்..எடப்பாடி முதல்வராக இருந்தபோதும்கூட தனது பிறந்தநாளை காதும் காதும் வைத்தபடிதான் கொண்டாடினார். சீனியர் அமைச்சர் ஒருவர், அவரது பிறந்தநாளுக்கு கேக் வாங்கி வந்து வாழ்த்துச் சொன்னபோதே பதறிய எடப்பாடி, ‘இதெல்லாம் வேணாம்யா. தலைவர், அம்மாவின் பிறந்தநாளை தவிர பிறரது பிறந்த நாளை கொண்டாடுவதில் எனக்கு உடன்பாடு இல்லை’ என்று மறுத்தார்.ஆனால், இப்போது நிலைமை தலைகீழ். கட்சி இனி எடப்பாடியின் கைவிட்டுப் போக வாய்ப்பே இல்லை என்பது உறுதியாகி விட்டதால், எடப்பாடியை குளிர்விக்கும் முயற்சிகளில் கட்சி நிர்வாகிகள் களமிறங்கிவிட்டனர். அதனால்தான், கட்சியில் இருந்து எந்த அறிவிப்பும் வராத நிலையிலேயே மே 12ம் தேதி எடப்பாடியின் 69 வது பிறந்தநாள் கொண்டாட்டங்கள் களை கட்டத் தொடங்கின. முன்னதாக, சென்னையில் தனது பிறந்த நாளைக் கொண்டாடலாமா என்று ஜோதிடர்களிடம் ஆலோசனை செய்தார் எடப்பாடி. சென்னையைவிட சேலமே பெட்டர் என்று கட்டங்கள் சொன்னதால், பிறந்தநாளன்று சேலத்திலேயே தங்கிவிட்டார் எடப்பாடி..மே 12 அன்று சேலம் சூரமங்கலத்தில் உள்ள வீட்டில் காலை 7 மணி முதல் கட்சி நிர்வாகிகளிடம் வாழ்த்துகளைப் பெற்றார் எடப்பாடி. 20 கிலோ எடை கொண்ட ஸ்பெஷல் கேக் ஆர்டர் செய்யப்பட்டு, வாய் நிறைய சிரிப்புடன் அதை வெட்டினார். மாஜி அமைச்சர்கள் வேலுமணி, தங்கமணி, அக்ரி கிருஷ்ணமூர்த்தி, உதயகுமார் உட்பட கட்சி நிர்வாகிகள் வரிசையில் நின்று வாழ்த்துகளை தெரிவித்து ஆசீர்வாதம் பெற்றனர். அதேசமயம், ஜெ பாணியிலான கெடுபிடிகளுக்கும் குறைவில்லை. எடப்பாடியைச் சுற்றி 15 பவுன்ஸர்கள் பாதுகாப்பு வளையமிட்டிருந்தார்கள். கட்சி நிர்வாகிகள் கூட ஐ.டி கார்டை காட்டிய பிறகே அனுமதிக்கப்பட்டனர். இன்னொரு பக்கம் சென்னையிலும் எடப்பாடி பிறந்தநாள் விழா கோலாகலமாக தொடங்கியிருந்தது. மாஜி கவுன்சிலர் ராயபுரம் மனோ ஆயிரம் பேருக்கு மட்டன் பிரியாணி வழங்கி ஏரியாவையே கமகமக்க செய்தார். ’இதைவிட ஸ்பெஷல் அயிட்டம் ஒண்ணு இருக்கு...’ ரீதியில் மேற்கு மாம்பழம் கல்கத்தா காளி பாரி கோயிலில் மாஜி அமைச்சர் வளர்மதி தலைமையிலான கட்சி நிர்வாகிகள் ‘மண்சோறு’ சாப்பிட்டு நெஞ்சம் விம்ம விசுவாசத்தைக் காட்டினார்கள்.இதையெல்லாம் கேள்விபட்டு நெகிழ்ச்சியில் தொண்டை அடைத்துக்கொள்ள எடப்பாடி அன்று மாலையே சேலத்தில் இருந்து கிளம்பி சென்னை வந்து நிர்வாகிகளை கட்டி அணைத்து அரவணைத்தார். பிறகு மே 13ம் தேதியும் தொடர்ந்து எடப்பாடிக்கு வாழ்த்து தெரிவிக்கும் படலம். அன்றைய தினம் காலை முதல் இரவு எடப்பாடியின் வீட்டில் குவிந்து வாழ்த்து மழை பொழிந்தனர் தொண்டர்கள்!பன்னீரின் திருச்சி மாநாடு மற்றும் தினகரனுடன் சந்திப்பு ஆகியவற்றுக்கு பதிலடி கொடுக்கவே தனது பிறந்தநாளை விமர்சையாக கொண்டாடியிருக்கிறார் எடப்பாடி. அதனாலேயே கட்சித் தரப்பில் இருந்து எந்த அதிகாரப்பூர்வ அறிவிப்பும் வராத நிலையில் நிர்வாகிகள் பணத்தை இறைத்து பிரமாண்ட ‘ஷோ’காட்டியிருக்கிறார்கள்” என்று சொல்லி முடித்தார் விரிவாக!நம்மிடம் பேசிய மாஜி அமைச்சர் நத்தம் விஸ்வநாதன், “தமிழகத்தில் மிகப்பெரிய கட்சியின் தலைவர் எடப்பாடி. தொண்டர்களின் தலைவர். அவரது பிறந்த நாளை மிக எளிமையாகவும், மக்களுக்கு பயன் அளிக்கும் வகையிலும் கொண்டாடி இருக்கிறோம். இந்தக் கொண்டாட்டத்துக்கு உள்நோக்கம் கற்பிக்க கூடாது” மாறாத சிரிப்புடன்.லாலா லாலல லாலா... பழனிவேல், கணேஷ்படங்கள்: ம.செந்தில்நாதன்

மண்சோறு, மட்டன் பிரியாணி... மனசு நெறஞ்ச எடப்பாடி! பழனிசாமியின் பர்த்டே கொண்டாட்டங்கள்!

Related Stories