அக்யூஸ்ட் உங்கள் அருகில்!

நீண்ட நாள் கழித்து கதிரை மீண்டும் இங்கே சந்திக்கிறீர்கள். இந்தத் தொடருக்கு அச்சாரமிட்டதே கதிர்தான். சந்தனின் உடனிருந்து அவன் செய்த அத்தனை மோசடிகளுக்கும் மெளன சாட்சியாக இருந்தவர் கதிர். சந்தர்ப்ப சூழலால் பல நேரங்களில் சந்தனுக்கு உடந்தையாகவும் இருந்திருக்கிறார். இன்று அந்தக் குற்ற உணர்வே ஒவ்வொரு நிமிடமும் கதிரை உயிரோடு கொல்கிறது. ஒருவன் எப்போது தர்மத்தையும் கர்ம வினையையும் நம்பத் தொடங்குகிறானோ அப்போதே அவன் செயல்பாடுகளை சுயபரிசோதனை செய்துக்கொள்ளத் தொடங்குகிறான். அப்படிதான் கதிரும் ஒருகட்டத்தில் சந்தனின் சகவாசத்தை நிறுத்திவிட்டு, தான் செய்த தவறுகளை சுயபரிசோதனை செய்துப் பார்த்தார். அத்தனையும் கேடுகெட்ட செயல்கள். கதிர் இத்தனை ஆண்டுகளாக சம்பாதித்தவை அத்தனையுமே சாபம். அதனாலேயே சந்தனிடம் இருந்து விலகத் தொடங்கினார் கதிர்.ஆனால், செய்த காரியங்களுக்கான வினையை அனுபவித்துதானே தீர வேண்டும். கதிர் வழியாக சந்தனிடம் முதலீடு செய்தவர்கள் எல்லாம் கதிருக்கு அழுத்தம் தர தொடங்கினார்கள். செளகார்பேட்டையிலும் சென்னை சுற்றுவட்டாரத்திலும் ஜெயின் சமூகத்தினர் மத்தியில் கதிருக்கு நல்ல பெயர் இருந்தது. கதிர் சொல்லுக்காக கடந்த சட்டசபைத் தேர்தலில் எம்.எல்.ஏ ஒருவருக்கு கணிசமான ஓட்டுகளை அந்த சமூகம் போட்டு, அவரை அமைச்சராகவும் ஆக்கியிருக்கிறது. சந்தனின் சகவாசத்தால் அந்த செல்வாக்கு அப்படியே சரியத் தொடங்கியது. தவிர குற்றவுணர்வும் அவரை அலைக்கழிக்கவே… தனது தவறுகளை ஒப்புதல் வாக்குமூலமாக்கியே இந்த தொடருடன் ஒரு கதை பாத்திரமாகவே பயணித்தார். இந்த தொடருக்கு பிறகு தமிழகத்தில் செயல்பட்டு வந்த ஹிஜாவு, ஆருத்ரா, ஐ.எஃப்.எஸ் உள்ளிட்ட அனைத்து மோசடி நிதி நிறுவனங்களும் இழுத்து மூடப்பட்டுள்ளன. திரும்பவும் புதிதாக எந்த மோசடி நிறுவனமும் முளைக்கவில்லை. அப்படி முளைத்துவிடாமல் கண்காணித்து மக்களையும் ஏமாறவிடாமல் பாதுகாப்பது ஒரு பத்திரிகையாக குமுதம் ரிப்போர்ட்டரின் சமூகக் கடமை. எல்லாம் சரி… இந்த தொடரின் நாயகன் சந்தன் என்ன ஆனான்? சந்தன் வருவானா என்பதே இப்போது அனைவரின் முன் நிற்கும் கேள்வி!.இந்த தொடர் பரபரப்பில் உச்சம் தொட்ட நேரம்.. நேரடியாகவும் மறைமுகமாகவும் சந்தனுக்கு ஏகப்பட்ட அழுத்தங்கள் நேரிட்டன. சந்தனின் உறவுகளும் நட்புகளும் அவனை தொடர்புகொண்டு, ‘உன்னை எப்படி எல்லாம் நினைத்திருந்தோம்… ஆனால் நீ எப்படிப்பட்ட மோசடிப் பேர்வழி என்பதை குமுதம் ரிப்போர்ட்டர் இதழ் தோலுரித்து காட்டியிருக்கிறது” என்றவர்கள் அவனுடன் தங்கள் உறவை துண்டித்துக்கொண்டார்கள். சந்தனுடன் வணிகத் தொடர்பு வைத்திருந்த பல நேர்மையான நிறுவனங்களும் அவனுடனான வணிகத் தொடர்புகளை அறுத்து வீசின.எல்லாவற்றுக்கும் மேலாக ஆர்.எம்.பி. இன்ஃபோடெக் என்கிற மோசடி நிறுவனத்தை தொடங்கி, சந்தன் தமிழகம் உட்பட பல்வேறு மாநிலங்களில் மோசடி செய்தான். அவன் மீது மத்திய அமலாக்கத்துறையின் வழக்கு நிலுவையில் இருக்கிறது. அவனது சொத்துக்களை அமலாக்கத்துறை முடக்கி இருக்கிறது. இந்தநிலையில்தான் சந்தன் மற்றுமொரு நிதி நிறுவனத்தை தொடங்கி மீண்டும் தமிழகம் உட்பட பல்வேறு மாநிலங்களில் கிளை பரப்பி கொள்ளையடிக்கத் திட்டமிட்டான். அதைத்தான் ‘360 டிகிரி 420 அக்யூஸ்ட் உங்கள் அருகில்’ தொடர் வெற்றிகரமாக நிறுத்தியிருக்கிறது. அந்த நிறுவனம் குறித்து ரிப்போர்ட்டர் இதழின் நிருபர்கள் குழு பொருளாதார குற்றப் பிரிவு தலைமையிடம் எடுத்து கூறியதன் அடிப்படையில் அவர்களும் சந்தனின் செயல்பாடுகளை தீவிரமாக கண்காணிப்பதாகக் கூறினார்கள். அதன்படி சந்தனின் அலுவலகம் உள்ளிட்ட இடங்களுக்கு சென்று ஆய்வும் செய்தார்கள். ஆனால், தொடர் வெளியாகி அம்பலப்பட்டதால் சுதாரித்தக்கொண்ட சந்தன் தமிழகத்தில் தனது புதிய நிறுவனத்தின் செயல்பாடுகளை ஆரம்பிக்கவே இல்லை. தவிர, தமிழகத்தில் அந்த நிறுவனத்தின் கிளைகளை தொடங்க இருக்கும் திட்டத்தையும் நிறுத்திவிட்டான். இதுவும் நமது தொடரின் வெற்றியாகவே பார்க்கிறோம்.சந்தன் மீது வழக்குகள் இருக்கின்றன. அவற்றை அவன் சட்டப்படி சந்தித்துக்கொள்ளட்டும். ஆனால், இனியும் சந்தன் போன்ற ஆட்கள் தமிழகத்தில் காலுன்ற நினைத்தால், அதை முளையிலேயே கிள்ளி, மக்களை காக்கும் மிகப் பெரிய சமூக பொறுப்பு குமுதம் ரிப்போர்ட்டர் இதழுக்கு மட்டுமல்ல… அத்தனை பத்திரிகைகளுக்குமே உண்டு. அதை ரிப்போர்ட்டர் ஒருபோதும் கைவிடாது. இப்போதைக்கு சந்தன் தனது மோசடி செயல்பாடுகளை தமிழகத்தில் நிறுத்திக்கொண்டிருக்கிறான். அதனாலேயே இந்தத் தொடரும் தற்காலிகமாக நிறைவடைகிறது. ஆனால், ரிப்போர்ட்டர் இதழின் கண்காணிப்பு ஒருபோதும் நின்றுவிடாது. தமிழகத்தில் சந்தன் தனது மோசடி வேலைகளை எப்போது தொடங்கினாலும் அதை ரிப்போர்ட்டர் ஒருபோதும் அனுமதிக்காது. (நிறைவடைகிறது).பாக்ஸ்நிதி தொடர்பான கட்டுரைகளை எழுதிவரும் பத்திரிகையாளர் நீரை மகேந்திரனிடம் கேட்டதிலிருந்து இங்கே…மோசடிகள் VS முதலீடுகள்மோசடித் திட்டங்களில் ஏமாற வேண்டாம் என பல வகைகளிலும் விழிப்புணர்வு செய்யப்பட்டும், மக்கள் திரும்பத் திரும்ப எப்படி மோசடி கும்பல்களில் பணத்தை இழக்கின்றனர் என்பது ஆச்சர்யம்தான். ஈமு கோழி வளர்த்து, முட்டையை எங்களிடம் விற்பனை செய்யுங்கள் என பல கோடி சுருட்டியது ஒரு கும்பல். அதில் ஏமாற்றப்பட்ட முதலீட்டாளர்கள், பணத்தை திரும்பப் பெற்றுத்தரக் கோரி காவல்துறைக்கு அலைந்து கொண்டிருக்கும்போதே, முயல் வளர்த்தால் முடி வாங்கிக் கொள்கிறோம், ஆடுபட்டி அமைத்து லாபம் பார்க்கலாம் என வித விதமாக வித்தை நடக்கிறது. அதையும் நம்பி பத்துபேர் பணத்தைக் கொட்டுவது தொடர்கதையாகிறது. கையில் பணம் இருந்தால், அதை முறையான வழியில் பெருக்க வேண்டும். அதற்கு நமக்குத் தெரிந்த தொழிலைச் செய்யலாம் அல்லது பாதுகாப்பான முதலீடுகளில், உத்தரவாதமான வட்டியில் சேமிப்பதோ, முதலீடு செய்வதோதான் சரியாக இருக்கும். அதைபுரிந்துகொள்ளாமல் அதிக வட்டிக்கு ஆசைப்பட்டால், முதலை வாயில் சிக்கிய கதையாக நமது முதலீடு திரும்பி வராது.சரி, பாதுகாப்பான முதலீடுகள் என எவற்றைச் சொல்லலாம் ? அதை எப்படி நம்புவது ?வங்கிச் சேமிப்பு, அஞ்சலகச் சேமிப்பு, வைப்பு நிதித் திட்டங்கள் என நிலையான வட்டி அளிக்கும் திட்டங்கள் ஒரு வகையான முதலீட்டு வகை. அதேபோல, உத்தரவாதமான வருமானத்தை அளிக்கும் மியூச்சுவல் ஃபண்ட் திட்டங்களும் முதலீட்டுக்கு தேர்வு செய்யலாம். இவற்றுக்கு ரிசர்வ் வங்கி, பங்குச் சந்தை கட்டுப்பாட்டுப்பாட்டு வாரியான செபி ஆகியவற்றின் பாதுகாப்பும் கிடைக்கும்.தங்கத்தில் முதலீடு செய்ய ஆசைப்பட்டால், ஆருத்ரா போன்ற மோசடி நிறுவனங்களில் முதலீடு செய்து ஏமாறுவதைவிட, தங்கமாக வாங்கி சேமிக்கலாம். அல்லது அரசு அவ்வப்போது வெளியிடும் தங்கப் பத்திரங்களில் முதலீடு செய்யலாம். தங்கத்தின் அப்போதைய விலைக்கு அதை மாற்றிக் கொள்ளமுடியும்.ஏலச்சீட்டுகளை எந்த அளவுக்கு நம்பலாம் ?மியூச்சுவல் ஃபண்ட் திட்டங்கள் குறித்து பெரிய அனுபவம் இல்லாத பலரும் தேர்ந்தெடுக்கும் முதலீட்டு திட்டங்களில் முக்கியமானதாக இருப்பது ஏலச்சீட்டு, தங்க நகைச் சீட்டும் தான்.ஏலச்சீட்டை ஆர்.பி.ஐ. விதிகளின்படி பதிவு செய்வது அவசியம். ஆனால், சில நிறுவனங்கள் மட்டுமே இதை செய்கின்றன. பல இடங்களில் தனிநபர்களே ஏலச்சீட்டை நடத்தி வருகின்றனர். பதிவு செய்யாமல் ஏலச்சீட்டு நடத்துபவர்களே அதிகம் ஏமாற்றுபவர்களாக இருக்கின்றனர். எனவே நம்பிக்கை அடிப்படையில் தனிநபர்களை அணுக வேண்டும்.அரசின் பதிவு பெற்ற ஏலச்சீட்டு நிறுவனங்கள் நடத்தும் ஓவ்வொரு சீட்டுக்கும் டெபாசிட் வைப்பது அவசியம். அப்போதுதான் ஏலச்சீட்டு நடத்துபவர்கள் பணத்தை திரும்ப செலுத்த முடியவில்லை என்றாலும், இந்த டெபாசிட்டு சீட்டு போட்டவர்களை காப்பாற்ற உதவும். அதாவது ஒரு ஏலச்சீட்டு நிறுவனம் ரூ.1,00,000 மதிப்புள்ள சீட்டு நடத்துகிறது எனில் அந்த மதிப்புக்கு டெபாசிட் செய்ய வேண்டும். இப்படி ஒவ்வொரு சீட்டு டெபாசிட் அவசியம். ஆனால் தனிநபர்கள் ஏலச்சீட்டை நடத்தி மோசடி செயல்களில் ஈடுபடும் போது, சீட்டு போட்டவர்களின் நிலைமை மோசமானதாக மாறும்.எனவே ஏலச்சீட்டு முறையில் பாதுகாப்பு, சீட்டு நடத்துபவர்கள் மீதான நம்பிக்கை மிகவும் அவசியம். அதாவது பதிவு பெற்ற ஏலச்சீட்டு நிறுவனத்தில் சீட்டு சேருவதாக இருந்தாலும் சரி, வேறு நபரிடம் ஏலச்சீட்டு சேருவதாக இருந்தாலும் சரி அந்த நிறுவனம் அல்லது அந்த நபர் அவர்களின் செயல்பாடுகள் குறித்து விசாரிக்க வேண்டும்.இதற்கு முன்பு நடத்திய ஏலச்சீட்டுகளில் முதலீட்டாளர்களுக்கு பணத்தை எவ்வாறு செக்ட்டில் செய்தார்கள், குறித்த நேரத்தில் பணத்தை கொடுத்தார்களா, மிகவும் காலம் தாழ்த்தி கொடுத்தார்களா என்பதை விசாரிக்க வேண்டும். இதில் ஏதாவது சிக்கல் இருந்தால் அந்த சீட்டு நிறுவனம் அல்லது அந்த நபரை தவிர்ப்பது நல்லது.

அக்யூஸ்ட் உங்கள் அருகில்!

Related Stories