நித்யா பாலியல் படுகொலை குற்றவாளிகளை தப்பவிட்டதா போலீஸ்..? பற்றியெரியும் கிராமம்...

நாமக்கல் மாவட்டம் கரப்பாளையம் கிராமத்தில் இரண்டு மாதங்களுக்கு முன்பு நித்யா என்கிற பட்டதாரி பெண்ணை மர்ம நபர்கள் சிலர் பாலியல் வன்கொடுமை செய்து, கொடூரமாக கொலை செய்தார்கள். இதில் உண்மைக் குற்றவாளிகளைக் கைது செய்ய வலியுறுத்தி நடைபெறும் தீவைப்பு, பெட்ரோல் குண்டுவீச்சு சம்பவங்களால் பற்றியெரிகிறது கிராமம்!நாமக்கல் மாவட்டம் ஜேடர்பாளையம் அருகிலுள்ளது கரப்பாளையம் கிராமம். அங்கு விவசாயப் பணிகளோடு ஆடுகள் வளர்த்து பிழைப்பை நடத்திவந்தார்கள், விவேகானந்தனும் அவர் மனைவி நித்யாவும். கடந்த மார்ச் 11ம் தேதி ஆடு மேய்க்கச் சென்ற இடத்தில் நித்யா பாலியல் பலாத்காரம் செய்து கொடூரமாக கொலை செய்யப்பட்டார். 27 வயதான பட்டதாரி பெண்ணான நித்யாவின் கொலை, அந்தப் பகுதியில் பெரும் அதிர்ச்சியை ஏற்படுத்தியது.அருகில் இருக்கும் வெல்ல ஆலையில் பணிபுரிந்த வடமாநில இளைஞர்கள் சிலர்தான் நித்யாவின் கொலைக்குக் காரணம் என்று அப்போதே நித்யாவின் உறவினர்கள் கொந்தளித்தார்கள். விசாரணைக்கு வந்த போலீஸ், அந்த ஆலையில் பணிபுரிந்த ஊட்டியைச் சேர்ந்த 17 வயது சிறுவன்தான் இந்தக் கொலைக்குக் காரணம் என்று அவனைக் கைது செய்து சிறையில் அடைத்தது. ஆனால், உண்மைக் கொலையாளிகளை போலீஸார் தப்பவிட்டதாக நித்யாவின் உறவினர்கள் போராட்டம் நடத்தினார்கள். அவர்களில் ஒன்பது பேரைக் கைது செய்தது போலீஸ். இதையடுத்தே அந்த ஊரில் வன்முறைகள் தொடர்கின்றன. இதுகுறித்து ஊருக்குள் விசாரித்தோம்...“நித்யா வேட்டுவ கவுண்டர் சமூகத்தைச் சேர்ந்தவர். அங்கே இருக்கும் பெரும்பாலான வெல்ல ஆலைகள், கொங்கு வேளாள கவுண்டர்களுடையவை. சந்தேகத்துக்கு உரிய வடமாநில தொழிலாளர்கள் பணி செய்த ஆலையும் கொங்கு வேளாள கவுண்டருக்குச் சொந்தமானதுதான். நித்யா கொலையால், இரு சமூகத்தினருக்கும் மோதல் ஏற்பட்டு ஆலைகள், டிராக்டர்கள் தீவைத்துக் கொளுத்தப்பட்டன. வேட்டுவ கவுண்டரான முன்னாள் ஊராட்சித் தலைவர் வீட்டில் வெடிகுண்டு வீசினார்கள். தொடர்ந்து ஊருக்குள் போலீஸார் குவிக்கப்பட்டு நிலைமையை இயல்பாக்கினார்கள்..கொஞ்ச நாட்கள்தான்... மறுபடியும் கடந்த மே 12ம் தேதி வேட்டுவ கவுண்டர் நடத்தும் பள்ளி வேன் தீவைத்து எரிக்கப்பட, மறுநாளே பள்ளாபாளையம் ஏரியில் விஷம் கலந்து மீன்கள் செத்து மிதந்தன. இதன் தொடர்ச்சியாக ஆலையில் இருக்கும் குடிசைகள் மீது மர்ம நபர்கள் பெட்ரோல் குண்டு வீசினார்கள். இதில் குடிசையில் உறங்கிக்கொண்டிருந்த வட மாநிலத்தினர் நான்கு பேர் உடலில் தீப்பற்றி படுகாயம் அடைந்தார்கள். நிலைமை இன்னும் சீராகவில்லை” என்றார் படபடப்பாக!தொடர்ந்து நித்யாவின் கணவர் விவேகானந்தனிடம் பேசினோம். “என் மனைவி கொல்லப்பட்டபோது அந்த ஸ்பாட் பக்கம் வடமாநிலத்து ஆளுங்க ரெண்டு பேரு போனதா பெரியவர் ஒருத்தர் சொன்னாரு. அதை போலீஸ் கண்டுக்கவே இல்லை. அது மட்டுமில்ல... அன்னைக்கு வடமாநிலத்து ஆளுங்க யார் மேல எல்லாம் சந்தேகப்பட்டமோ அவங்களை எல்லாம் ரயில் ஏத்தி அனுப்பிட்டாங்க. ஒரு அநியாயக் கொலையில உண்மைக் குற்றவாளிகளைக் கண்டுபிடிங்கனு போராடுறது தப்பா? அதுக்காக எங்க இளைஞர்கள் மேல கேஸ் போட்டிருக்கிறது நியாயமா? ரெண்டு பெண் குழந்தைகளுக்குத் தாயான என் மனைவிய கொடூரமா கெடுத்து கொலை செஞ்சிருக்காங்க... என் பொண்ணுங்க அம்மாவைக் கேட்டு அழுறத ஒரு தரம் பாருங்க. என் நிலைமை புரியும்” என்று தழுதழுத்தார்..இந்த விவகாரத்தின் உள்விவரங்கள் அறிந்த சிலரோ, “கவுண்டர்கள் நடத்தற பெரும்பான்மையான ஆலையில பணி செய்யறவங்க உ.பி., பீகார் ஆளுங்கதான். ரெண்டு மாசத்துக்கு முன்னாடி திருப்பூர்ல வடமாநித்தவர் தாக்கப்படுறதா வதந்தி எழுந்து, பெரிய பிரச்னை ஆச்சு... அந்த நேரம் பார்த்து நித்யாவை கெடுத்து, கொலை பண்ணியிருக்கானுங்க. அப்பப் போய் வடமாநிலத்து ஆளுங்க மேல கையை வெச்சா பிரச்னையாகிடும்னு கேஸை போலீஸே திசை திருப்பிடுச்சி. போலீஸ் ஆரம்பத்துல் விசாரித்த நாலு வட மாநில ஆசாமிங்க இப்ப இல்லை... எஸ்கேப் ஆயிட்டானுங்கஇந்த ஏரியாவுல வடமாநிலத்து ஆளுங்க எப்பவுமே கஞ்சா போதையில திரியறாங்க. அப்படி இருந்த சமயத்திலதான் நித்யாவை இப்படி செஞ்சிருக்கானுங்க. தி.மு.க. ஒன்றியம்தான் சாதி ரீதியா சப்போர்ட் செஞ்சு விஷயத்தை அமுக்கறார். லோக்கல் அ.தி.மு.க. எம்.எல்.ஏ-வும் கவுண்டர்ங்கிறதால கண்டுக்கல” என்றார்கள்.பரமத்தி வேலூர் தொகுதி அ.தி.மு.க. எம்.எல்.ஏ. சேகரிடம் பேசினோம். “குற்றவாளியை போலீஸ்தாங்க கண்டுபிடிக்கணும்”என்று ஒரே வரியில் முடித்துக்கொண்டார். அப்பகுதி தி.மு.க. ஒன்றியச் செயலாளர் சண்முகத்திடம் கேட்டோம். “பாதிக்கப்பட்ட குடும்பத்து உறுப்பினர்கள் தி.மு.க. கிளை பொறுப்பில இருக்கிறாங்க. அவங்களுக்குத்தான் நான் சப்போர்ட் பண்ணுவேன். ஆலைக்காரங்க சிலர் எனக்கு சொந்தம்னாலும், கட்சி நபர்கள்தான் முக்கியம். படிச்ச பெண்ணான நித்யாவுக்கு நடந்தது பெரிய கொடூரம்!” என்றார்.நாமக்கல் எஸ்.பி. கலைச்செல்வனோ, “போலீஸ் மேல குற்றச்சாட்டு சொல்றதை ஏத்துக்க முடியாது. மத்தபடி தீவைப்பு சம்பவங்களை விசாரிச்சிக்கிட்டு இருக்கோம்” என்றார் சுருக்கமாக.இதற்கிடையே ஜேடர்பாளையம் இன்ஸ்பெக்டரை டிரான்ஸ்ஃபர் செய்துவிட்டு, வழக்கை சி.பி.சி.ஐ.டி.க்கு மாற்றியிருக்கிறது தமிழக அரசு.உண்மை வெளிச்சத்துக்கு வரட்டும்!- கே.பழனிவேல்

நித்யா பாலியல் படுகொலை குற்றவாளிகளை தப்பவிட்டதா போலீஸ்..? பற்றியெரியும் கிராமம்...

Related Stories