400 மீனவ கிராமங்கள் மிஸ்ஸிங்… கேள்விக்குறியாகும் ஃபிஸ்ஸிங்!

`சிட்டிசன்' படத்தையும் அத்திப்பட்டி என்ற கிராமத்தையும் அவ்வளவு எளிதில் மறந்துவிட முடியாது. வரைபடத்தில் இருந்தே நீக்கப்பட்ட தனது கிராமத்துக்காக அஜித் போராடுவதுபோல, நிஜத்திலும் மிஸ்ஸான 400 மீனவ கிராமங்களைக் மீட்க, போராட்டத்தில் குதித்துள்ளனர், நாகை மீனவர்கள்.தமிழக கடல் எல்லையில் மீன்பிடிக்கச் செல்லும் மீனவர்கள் சற்று எல்லை தாண்டினால்கூட சிறைபிடிக்கப்படுவதும் துப்பாக்கிச் சூட்டுக்கு உயிரிழப்பதும் தொடர்கதையாகி வருகிறது. இந்த அவலமே முடிவுக்கு வராத நிலையில் அடுத்த அதிர்ச்சிக்கு வித்திட்டுள்ளது, மத்திய அரசு.மத்திய சுற்றுச்சூழல் வனம் மற்றும் பருவநிலை மாற்றத் துறை வெளியிட்ட கடலோர திட்ட வரைவு மற்றும் நிலப்பயன்பாட்டு வரைபடங்களால் ஏகக் கொந்தளிப்பு. காரணம், இதில் பல மீனவ கிராமங்கள் மிஸ்ஸாகி இருப்பதுதான்..``என்னதான் பிரச்னை?'' என நாகை மாவட்ட மீனவர்களிடம் பேசினோம். “கடந்த காலங்களில் வரைபடம் தமிழில் இருந்தது. இப்போது ஆங்கிலத்தில் மட்டுமே உள்ளது. கடற்கரை மேலாண்மை வரைவுத்திட்ட பிரிவு 6(3) விதிப்படி கடற்கரை மண்டல மேலாண்மைக் குழுவில் மூன்று மீனவர்கள் இருக்க வேண்டும். ஆனால், கடலோர மாவட்ட மீனவர்கள் குழு இல்லாமல் வரைபடம் தயாரிக்கப்பட்டுள்ளது.இந்த வரைபடத்தை திரும்பப் பெறவேண்டும் என்று கோரிக்கை விடுத்துவருகிறோம். காரணம், தமிழகத்தில் 606 மீனவ கிராமங்கள் இருப்பதாக மீன்வளத்துறை அதிகாரிகள் குறிப்பிட்டுள்ளனர். ஆனால், இந்த வரைபடத்தில் சுமார் நானூறுக்கும் மேற்பட்ட கிராமங்களைக் காணவில்லை. குறிப்பாக, மீனவர் குடியிருப்புப் பகுதிகள், கடற்கரையோர மீன்பிடி வலைகள் உலர்த்தும் பகுதி, மீன்பிடிப் பகுதிகள், கோயில்கள், விளையாட்டு மைதானங்கள் ஆகியவை வேண்டுமென்றே தவிர்க்கப்பட்டிருக்கிறது.அதேவேளை மத்திய, மாநில அரசின் ஆளுமைக்குட்பட்ட பகுதிகள் தெளிவாக குறிப்பிடப்பட்டிருக்கிறது. குறிப்பாக, பாம்பன் மற்றும் அதனைச் சுற்றியுள்ள மீனவ கிராமங்கள் முழுவதும் கப்பல் போக்குவரத்துத் துறை எல்லைக்குள் இருப்பதுபோன்று வரைபடம் வரையப்பட்டுள்ளது. கடலில் உள்ள மீன்பிடிப் பகுதிகள் மறைக்கப்பட்டு கப்பல்துறை கட்டுப்பாட்டுப் பகுதியாக குறிப்பிடப்பட்டுள்ளது. ஆனால், தனுஷ்கோடி முதல் கோடியக்கரை வரையிலான பாக். ஜலசந்தியை ஒட்டிய பகுதிகளில் வெறும் 50 மீட்டர் மட்டுமே வரையறை பகுதியாக காட்டப்பட்டுள்ளது. இதனால் எங்களது மீன்பிடி தொழில் கடுமையாக பாதிக்கப்படுகிறது'' என்கின்றனர், கொதிப்புடன்..“இந்த வரைபடத்தில் தமிழ்நாட்டின் 14 கடற்கரை மாவட்டங்களுக்கான 117 உத்தேச வரைபடங்களை தயாரித்துள்ளனர். இந்த வரைபடங்களில் நிறைய குறைபாடுகள் உள்ளன. உயரலை மற்றும் தாழ்வலைக் கோடுகள் தவறாக குறிப்பிடப்பட்டுள்ளது. மீனவ கிராமங்கள் மற்றும் அதன் பொதுச்சொத்துகளின் விவரங்கள் சரியாக பதியப்படவில்லை'' எனக் குறிப்பிடும், சி.பி.எம் கட்சியின் மாநில செயலாளர் கே.பாலகிருஷ்ணன்,``வரைபடம் தொடர்பான மாற்றுக் கருத்துகளை தெரிவிக்க நவம்பர் மாதம்வரை காலக்கெடு விதிக்கப்பட்டுள்ளது. இந்தத் திட்டவரைவோடு நேரடியாக தொடர்புள்ள மீனவர்கள், கடற்கரைவாழ் மக்களின் கருத்தைப் பெறாமல் வரைபடங்களை இறுதி செய்வது நியாயமற்றது. இந்த வரைபடங்களை ஆராய்ந்து களசூழலோடு சரிபார்ப்பது இத்தொழில்நுட்பம் அறிந்த வல்லுநர்களுக்கு மட்டுமே சாத்தியம். எனவே, இன்னும் இரண்டு மாதங்களுக்கு இந்த காலக்கெடுவை நீட்டிக்க வேண்டும்'' என்கிறார்.இந்திய தேசிய மீனவர் சங்கத் தலைவர் நாகை ராஜேந்திர நாட்டார் நம்மிடம், “சுனாமிக்குப் பின்னர் மீனவர்களை மேடான பகுதிக்குக் கொண்டுசென்று கடற்கரையிலிருந்து வெகுதூரத்தில் வீடு கட்டிக்கொடுத்து தங்கவைத்தனர். இதுவே சர்வதேச முதலாளிகளின் நலனுக்காக கடலையும் கடல் சார்ந்த பகுதிகளையும் ஏதோ ஒருவகையில் கூறுபோட்டு விற்கும் இயற்கைக்கு எதிரான செயல்போலத்தான் தோன்றியது..கடலுக்குள் எரிவாயு, எண்ணெய், மீத்தேன் எடுக்க ஏற்கெனவே அனுமதி கொடுத்தாகிவிட்டது. இதனால், கடலைச் சார்ந்து இருக்கும் மீனவர்களின் நிலை கேள்விக்குறியாகிக் கொண்டிருக்கிறது. நாகை மாவட்டத்தில் அக்கரைப்பேட்டை, நம்பியார் நகர் என கடலோரங்களில் உள்ள பல மீனவ கிராமங்களை வரைபடத்திலிருந்து நீக்கியிருக்கின்றனர்.மலைவாழ் மற்றும் காடுகளில் வசிக்கும் மக்களுக்கான பாதுகாப்பு நிலைப்பாட்டில் எப்படி அரசு அக்கறை எடுத்து செயல்படுகிறதோ, அதேபோல், கடலோடிகளுக்கு சொந்தமான கடலும் கடல் சார்ந்த நிலமும் பாதுகாக்கப்படவேண்டும். இது அந்த மக்களின் பாரம்பரிய நிலம்.ஏற்கெனவே `சாகர்மாலா’ என்று துறைமுகம் கட்டும் ஒரு திட்டத்தைக் கொண்டுவந்து ஏரியாவைப் பிரித்து மீனவர்களுக்கிடையே உள்ள ஒற்றுமையைக் குலைத்தனர். சுதந்திரத்துக்குப் பின்னர் நமக்கு கடற்கரையிலிருந்து 52 நாட்டிகல் மைல் கடல் நமக்கு சொந்தமாக இருந்தது. அது தற்போது வெறும் 12 நாட்டிகல் மைலாக சுருங்கிவிட்டது. அவ்வப்போது அரசுகள் ஏதேனும் செய்ய முடிவெடுத்தால், பூர்வகுடி மக்களின் தலையில்தான் கை வைக்கிறார்கள்.மூன்று தலைமுறையாக வாழ்ந்துவரும் மீனவர்களின் வீடுகளுக்கு இதுவரை பட்டா என்பதே இல்லை. பாரம்பரியமாக தமது வாழ்விடமாகவும் மீன்பிடித்தல் தொடர்பான நடவடிக்கைகளுக்கும் பயன்படுத்திவரும் இந்த நிலங்களைக் கைப்பற்றி பெரிய தொழில் நிறுவனங்களுக்குத் தாரைவார்க்கும் நோக்கத்தில் விதிமுறைகளில் தொடர்ந்து மாற்றம் செய்து வருகின்றனர். இதனை கண்டித்து விரைவில் போராட்டங்களையும் நடத்தவுள்ளோம்'' என்றார்..மீனவர்களின் புகார்கள் குறித்து தமிழக சட்டத்துறை அமைச்சர் ரகுபதியிடம் கேட்டோம். “மீனவர்களின் குறைகளை நிவர்த்தி செய்ய ராமநாதபுரம், தங்கச்சிமடத்தில் முதல்வர் தலைமையில் மிகப்பெரிய அளவில் மாநாடு ஒன்று நடத்தப்படவுள்ளது. இந்த மாநாட்டில் அரசியல் எதுவும் பேசப்படமாட்டாது'' என்றவர்,``மத்திய அரசின் கடலோர ஒழுங்குமுறை வரைபடத்தில் 400க்கும் மேற்பட்ட கிராமங்கள் காணாமல் போயிருப்பது அதிர்ச்சியையும் ஆச்சர்யத்தையும் ஏற்படுத்தியிருக்கிறது. இந்த கிராமங்களை மீண்டும் வரைபடத்தில் சேர்க்க மத்திய அரசுக்கு அழுத்தம் கொடுத்து உரிய நடவடிக்கை எடுக்கப்படும்'' என்றார் உறுதியான குரலில்.பூர்வகுடிகளால்தான் இந்த நிலம் பண்பட்டது என்பதை அரசுகள் உணர்ந்தால் போதும். - ஆர்.விவேக் ஆனந்தன்