தமிழில் 36 ஆயிரம் பேர் தோல்வி! பல் இளிக்கும் பள்ளிக் கல்வித்துறை...

பல்வேறு சோதனைகளை கடந்துவரும் தமிழ் மொழிக்கு இப்போது மற்றுமொரு சோதனை. நடந்துமுடிந்த பத்தாம் வகுப்பு பொதுத் தேர்வில் 36 ஆயிரம் மாணவர்கள் தாய்மொழி வழிக்கல்வியான தமிழ் பாடத்தில் தோல்வி அடைந்திருக்கிறார்கள். இது தமிழ் படித்த மாணவர்களின் தோல்வியல்ல, தமிழக கல்வித்துறையின் தோல்வி என்பதுதான் நிஜம்!என்ன ஆயிற்று தமிழ் மாணவர்களுக்கு? உயர்நிலைப் பள்ளி தமிழாசிரியர் ஒருவரிடம் பேசினோம். “கடந்த கல்வியாண்டான 2022ம் ஆண்டில் இதைவிட அதிகமாக 10-ம் வகுப்பு பொதுத் தேர்வின் தமிழ்ப் பாடத்தில் 47 ஆயிரம் பேர் தோல்வி அடைந்தனர். இதில், ஒரே ஒரு மாணவி மட்டும் தமிழில் நூற்றுக்கு நூறு மதிப்பெண் எடுத்திருந்தார். அதேபோன்று கடந்த ஆண்டு 12-ம் வகுப்பு பொதுத்தேர்வில் தமிழ்ப் பாடத்தில் 26 ஆயிரம் மாணவர்கள் தோல்வி அடைந்தார்கள். 32 ஆயிரம் மாணவர்கள் தமிழ்த் தேர்வை எழுதவே இல்லை. தற்போது நடப்பு கல்வியாண்டில் 12-ம் வகுப்பு பொதுத்தேர்வில் 50 ஆயிரம் மாணவர்கள், தமிழ்த் தேர்வு எழுதவே இல்லை. இரு மாணவிகள் தமிழில் நூற்றுக்கு நூறு வாங்கியிருப்பது மட்டுமே ஆறுதல்..அதேபோன்று, இந்தாண்டு பத்தாம் வகுப்பு பொதுத் தேர்வில் தமிழில் ஒருவர்கூட, நூற்றுக்கு நூறு மதிப்பெண் எடுக்கவில்லை. மாறாக, 36 ஆயிரம் பேர், தமிழ்ப் பாடத்தில் தோல்வி அடைந்துள்ளனர். இது, பெற்றோர்கள் மத்தியில் மட்டுமல்லாமல் தமிழறிஞர்கள், தமிழ் ஆசிரியர்கள் மத்தியிலும் அதிர்ச்சியை ஏற்படுத்தியுள்ளது. பிற பாடங்களில் கூடுதல் கவனம் செலுத்திப் படிக்கும் மாணவர்கள் பலர் தமிழ்தானே என அலட்சியமாக கடைசி நேரத்தில் படிக்கின்றனர். பிளஸ் 2 மாணவர்கள்கூட எழுத்துப்பிழை, சந்திப் பிழைகளுடன் எழுதுகின்றனர். இனியும் காலம் தாழ்த்தாமல் தமிழக அரசு சிறப்பு கவனம் செலுத்தி, வரும் பொதுத்தேர்வுகளில் தமிழ் மொழிப் பாடத்தில் மாணவர்கள் தோல்வி அடைவதைத் தடுக்க நடவடிக்கை எடுக்க வேண்டும்” என்றார்..இது குறித்து பள்ளிக் கல்வித்துறை அதிகாரிகளிடம் பேசினோம். “தமிழகத்தில் அரசு, மாநகராட்சி மேல்நிலைப் பள்ளி, அரசு உதவி பெறும் பள்ளிகளில் தமிழ் ஆசிரியர் பணியிடங்கள் ஆயிரக்கணக்கில் காலியாக உள்ளன. உதாரணத்துக்கு திருப்பூர் மாவட்டத்தில் மாநகராட்சி மற்றும் அரசு மேல்நிலைப் பள்ளிகள் 74 உள்ளன. இவற்றில், 15 முதல் 22 தமிழ் ஆசிரியர் பணியிடங்கள் நிரப்பப்படவில்லை.அதிக மாணவர்கள் படிக்கும் பள்ளியில் ஓரிரு தமிழ் ஆசிரியர்களை மட்டும் வைத்துக்கொண்டு குறித்த நேரத்தில் தமிழ்ப் பாடங்களை நடத்த முடிவதில்லை. சில பள்ளிகளில், தற்காலிக ஆசிரியர்களை நியமித்து சமாளிக்கின்றனர். தமிழ்ப் பாடத்துக்கென முதுநிலை ஆசிரியர்களை தாமதமின்றி நியமனம் செய்தால், வரும் கல்வியாண்டிலாவது தமிழில் தேர்ச்சி சதவிகிதம் சரியாமல் இருக்கும்” என்றார்.அரசு பள்ளியின் தலைமை ஆசிரியர் ஒருவரோ, “கொரோனா காலகட்டத்திற்குப் பிறகு பல பெற்றோர்கள் தங்களது வாழ்வாதாரத்தை இழந்து, தனியார் பள்ளிகளில் படித்த தங்களது பிள்ளைகளை அரசுப் பள்ளிகளில் அதிகளவில் சேர்த்தனர். நடப்புக் கல்வியாண்டு வரை அரசுப் பள்ளிகளில் சேரும் மாணவர்களின் எண்ணிக்கை அதிகரித்து வருகிறது. ஆங்கில வழியில் படித்த இந்த மாணவர்கள் அரசுப் பள்ளிகளில் தமிழ் வழிக் கல்வியைப் படிக்கும்போது மிகுந்த சிரமத்திற்கு ஆளாகின்றனர். 10ம் வகுப்பு பொதுத்தேர்வில் தமிழ் மொழிப் பாடத்தில் அதிகளவு மாணவர்கள் தோல்வியைத் தழுவியதற்கு இதுவும் ஒரு முக்கியக் காரணம்”என்றார்.தனியார் மற்றும் மெட்ரிக் பள்ளிகள் துறை இயக்குநர் நாகராஜ முருகனிடம் பேசினோம். “கடந்த கல்வியாண்டில் 10-ம் வகுப்பு பொதுத்தேர்வில் தமிழ் மொழிப் பாடத்தில் தோல்வியடைந்தவர்களின் எண்ணிக்கையை ஒப்பிடுகையில், நடப்பு ஆண்டு தோல்வி அடைந்தவர்களின் எண்ணிக்கை வெகுவாகக் குறைந்துள்ளது.. இது, அரசு மேற்கொண்ட நடவடிக்கைக்குக் கிடைத்த பலன். வரும் ஜூன் மாதம் தொடங்க உள்ள 2023 - 24ம் கல்வி ஆண்டில், ஒன்பதாம் வகுப்பு வரையிலும் 2024 - 25ம் கல்வி ஆண்டில் 10ம் வகுப்பு வரையிலும் தமிழ்ப் பாடத்தைக் கட்டாயமாக்கியுள்ளோம். மாநிலப் பாடத்திட்ட பள்ளிகள் மட்டுமன்றி, தமிழகத்தில் செயல்படும் சி.பி.எஸ்.இ., ஐ.சி.எஸ்.இ. உள்ளிட்ட அனைத்து பள்ளிகளிலும், 2024 - 25ம் கல்வி ஆண்டில் 10ம் வகுப்பு வரை தமிழ் கட்டாயப் பாடமாக பயிற்றுவிக்கப்பட வேண்டுமென உத்தரவிடப்பட்டுள்ளது.இந்த மாணவர்கள், பொதுத் தேர்வில் தமிழ்த் தேர்வினை எழுத வேண்டியது கட்டாயம். அனைத்து தனியார் பள்ளிகளும் தகுதியான தமிழ் ஆசிரியர்களை நியமித்து, மாணவர்களுக்கு தமிழ்ப் பாடத்தைக் கட்டாயம் கற்றுத் தர வேண்டும். இதனை மாவட்ட கல்வி அதிகாரிகள் கண்காணித்து தொடர்ந்து அறிக்கை அளிக்க வேண்டும் என்றும் உத்தரவிடப்பட்டுள்ளது. இதனால், வரும் கல்வியாண்டில் தமிழில் தோல்வி என்பதே இருக்காது!” என்றார், நம்பிக்கையுடன்.தமிழ் எங்கள் உயிருக்கு நேர் என்று சொன்னால் மட்டும் போதாது, உயிரைக் காப்பாற்றவும் வேண்டும்!

தமிழில் 36 ஆயிரம் பேர் தோல்வி! பல் இளிக்கும் பள்ளிக் கல்வித்துறை...

Related Stories