26. உளவுக்கு 1000 கண்கள்

ஒசாமா பின்லேடன், சவுதி அரேபிய பல்கலைக்கழகத்தில் படித்தபோது, பேராசிரியர் அப்துல்லாஹ் யூசுஃப் அஸ்ஸம் அவர்களின் பேச்சால் ஈர்க்கப்பட்டார். அவரது பேச்சின் தாக்கம், உலகமெங்கும் துன்பப்படும் இஸ்லாமியர்களுக்கு ஆதரவு தரவேண்டும் என்ற எண்ணத்தை பின்லேடனுக்குள் தூண்டியது. 1980ஆம் ஆண்டு இஸ்லாமிய ஆப்கான் முஜாஹிதின், அன்றைய ஆளும் அரசையும் அதற்குத் துணையாக இருந்த சோவியத் யூனியனையும் எதிர்த்தது. இதுபோல பல விடுதலை இனக் குழுக்களும் எதிர்த்தன. அவர்களை எல்லாம் ஒன்றிணைத்தவை, கம்யூனிஸ்ட் எதிர்ப்பும் இஸ்லாமிய ஆதரவுக் கொள்கையும்தான். இவர்களுக்கு ஆதரவாக அமெரிக்கா, சீனா, பிரிட்டிஷ், பாகிஸ்தான், சவுதி அரேபியா உள்ளிட்ட நாடுகள் பின்புலமாக இருந்தன. அஸ்ஸம், பாகிஸ்தானில் உள்ள இஸ்லாமிய பன்னாட்டுப் பல்கலைக்கழகத்தில் 1981ஆம் ஆண்டு பேராசிரியராகப் பணியில் சேர்ந்தார். போர்ப் பயிற்சி முகாம் ஒன்றை அவர் நிறுவினார். மத்தியக் கிழக்கு நாடுகள், ஐரோப்பிய, அமெரிக்க நாடுகளுக்குச் சென்று ஆதரவு திரட்டினார். அமெரிக்காவிலும் ஒரு கிளையைத் தொடங்கினார். பாகிஸ்தானைத் தவிர்த்து அமெரிக்காவில் மட்டுமே கிளை உண்டு. ஆப்கான் விடுதலைக்காக 35,000 பேர் மற்ற நாடுகளில் இருந்து வந்தார்கள். போர்ப் பயிற்சி, ஆட்களைத் திரட்டுவது என்று பின்லேடன் தன் பங்கிற்குச் செய்தார். பொருட்கள், ஆட்கள் எல்லாம் சேரச்சேர சொந்த நாடும் ஆதரித்தது. உதவிக்கு பெரிய பெரிய நாடுகள் வந்தன. ஒருவகையில் இது மறைமுகமாக ரஷ்யாவுக்கும் அமெரிக்காவிற்குமான போர் என்றே சொல்லலாம்..பயங்கரவாதிகளுக்கு பாகிஸ்தான் மண்ணில் போர்ப் பயிற்சி தரப்பட்டது. சீனாவும் தன் பங்கிற்கு அள்ளி வழங்கியது. 34 நாடுகள்கொண்ட இஸ்லாமியக் கூட்டமைப்பு, ‘சோவியத் யூனியன், ஆப்கானிஸ்தானை விட்டு வெளியேற வேண்டும்’ என்று கூட்டறிக்கை விட்டது. அமெரிக்காவின் சி.ஐ.ஏ., ஆப்கான் தீவிரவாதிகளை அணுகி போர்ப் பயிற்சி செய்ய ஆயுதங்களை வழங்க, பாகிஸ்தான் மிகச் சிறப்பாக உதவியது. அந்த உதவி மட்டும் இல்லையென்றால், சோவியத் யூனியனுக்கு இந்த அளவுக்குக் குடைச்சல் கொடுக்க முடியாது. இந்த பிராக்ஸி (proxy) சண்டையில் சோவியத் யூனியனின் பெரும் செல்வம் கரைந்து கொண்டே இருந்தது. 1989ம் ஆண்டு பாகிஸ்தான் பெஷாவர் நகரில் அஸ்ஸம் படுகொலை செய்யப்பட்டார். அவரது கொலை தொடர்பாகப் பல யூகங்கள் எழுந்தன. அவற்றுள் ஒன்று, இஸ்லாமிய இனக் குழு இதைச் செய்திருக்கும் என்பது. அந்த நாடு செய்தது, இந்த நாடு செய்தது என்றெல்லாமும் எக்கச்சக்க வதந்திகள் பரவின. அஸ்ஸமின் மருமகன், எகிப்திய ஜிகாத் தான் இதைச் செய்தது என்று குற்றம் சாட்டினார். இன்று வரை அஸ்ஸம் கொலைக்கு யாரும் பொறுப்பேற்கவில்லை. அஸ்ஸம் இறந்த பிறகு அவரது இடம் வெற்றிடமாகவே இருந்தது. அதனை நிரப்ப, பின்லேடன் பொறுப்பெற்றார். அந்த இடத்திற்கு வந்ததும், அமைப்பினை வழிநடத்தியதில் பெரும்பங்கு வகித்தார். 1995ம் ஆண்டு சவுதி தேசியக் காவலர்களுக்கான அமெரிக்கப் பயிற்சி நிலையத்தில் ஐந்து அமெரிக்கர்களும் இரண்டு இந்தியர்களும் குண்டு வெடிப்பில் இறந்தார்கள். அமெரிக்காவுக்கும் சவுதிக்கும் மிகுந்த அதிர்ச்சி ஏற்படுத்திய சம்பவம் இது. 1996ம் ஆண்டு மீண்டும் ஒரு தாக்குதல். 19 அமெரிக்கர்கள் பலி. இவை எல்லாம் பின்லடேனின் தூண்டுதலால் அல்லது அவரின் ஆதரவாளர்கள் செய்தவை என்று அமெரிக்கர்கள் நம்பினார்கள். மேலும் சில நிகழ்வுகளை வெளியில் தெரியாமல் அனைவரும் பார்த்துக்கொண்டார்கள் என்றும் நம்பினார்கள். செப்டம்பர் 11ம் தேதி நடந்த தாக்குதலில் 19 பேரில் பதினைந்து பேர் சவுதி அரபியர்கள். அல் கொய்தாவில் சிலர் சவுதியிலும் இந்தக் கிளர்ச்சியைத் தொடங்க வேண்டும் என்று விரும்பினார்கள். சவுதி அரசர்கள், பின் லேடனின் உதவியை நிராகரித்து அவரின் எதிரிகளுக்கு உதவி செய்தனர். அமெரிக்கத் தாக்குதலுக்கு சில மாதங்களுக்கு முன் தன் தாயாரை அழைத்துப் பேசினார், பின்லேடன். அப்போது அவர், “ இனிமேல் உன்னுடன் அதிகம் பேச முடியாது... நான் இப்போது முக்கியமான பணி ஒன்றில் ஈடுபட்டிருக்கிறேன்!” என்றார். செப்டம்பரில் அமெரிக்காவில் நடந்த தாக்குதலையடுத்து, பின்லேடன் ஆப்கானிஸ்தானில் இருப்பதாகத் தகவல் கிடைக்கவே, அக்டோபர் மாதம் ஆப்கானிஸ் தான் மீது படையெடுத்தது அமெரிக்கா. அங்கு இருந்த தாலிபான் அரசைக் கவிழ்த்தது. அமெரிக்காவை யாரும் அச்சுறுத்த முடியாது என்று உலகத்திற்கு மறைமுகமாகச் சொன்ன செய்தி அது..எப்போதும் பிஸியாகவே இருக்கும் ஜோதிடர் அவர். அவரது அலுவலகத்தின் முன் அறையில், பெரிய பெரிய சாமி படங்கள் பெரிய மாலைகளோடு காட்சியளித்தன. தன்னைப் பார்க்கவரும் ஒருவருக்கு அதிகபட்சம் அரைமணிநேரம்தான் ஒதுக்குவார் ஜோதிடர். பணமாக யாரிடமும் வாங்க மாட்டார். பணக்கார்களிடம் ஏஜென்சி வாங்கி மற்றொருவருக்கு மாற்றிக் கொடுப்பது, அதிகாரிகளிடம் ஃபைலில் கையெழுத்து வாங்குவது, ஆட்சியாளர்களிடம் உத்தரவு என்று அமைதியாகக் காரியம் சாதிப்பார். பணமாகக் கேட்டால் அவர்களுக்குக் கொடுக்க மனசு வராது. இந்த மாதிரி உதவி கேட்டால் அவர்களுக்கும் மகிழ்ச்சி; ஜோதிடருக்கும் லாபம். அன்றைய தினம் அந்த ஜோதிடரின் அலுவலக வரவேற்பு அறையில், அந்த இளம் இயக்குநரும், நடிகையும் அமர்ந்திருந்தார்கள். “எங்க கல்யாணத்துக்கு ஒரு நல்ல தேதி குறிச்சுக் கொடுக்கணும்!” என்று குழைவாகக் கேட்டார்கள். இருவரின் ஜாதகமும் அவருக்கு முன்பே தெரியும் என்பதால், பஞ்சாங்கத்தை எடுத்து அவர் புரட்டத்தொடங்கியபோது, அவரின் உதவியாளர் வந்து செல்போனை அவரிடம் கொடுத்தார். “இப்போ என்னய்யா அவசரம், யார் போன்ல?” சிடுசிடுத்தர் ஜோதிடர். லைனில் இருப்பவர் யார் என்று மெல்லிய குரலில் பவ்யமாகச் சொன்னார், உதவியாளர். அதைக்கேட்டதும் ஜோதிடரிடம் அதிர்ச்சி. ஆனாலும் அதை முகத்தில் காட்டிக்கொள்ளாமல், உதவியாளரிடமிருந்து செல்லை வாங்கி, காதில் பொருத்தினார். பிறகு "அப்படியா, எதற்கும் கேட்டுப் பார்க்கிறேன்... இரவு சொல்கிறேன்" என்று சொல்லிவிட்டு, காலை செய்தார். பிறகு, "இதோ பாருங்க, உங்க ரெண்டு பேருக்குமே இப்போ நேரம் சரியா இல்லை. அதனால கொஞ்சம் காத்திருக்கணும்." " ஓ... கொஞ்சம்னா, எவ்வளவு நாள்?" "இன்னும் மூன்று வருஷம்..!” "என்னது இன்னும் மூணு வருஷமா? " ஒரு சேர அதிர்ந்தார்கள் இருவரும்! "ஏற்கெனவே பலரிடம் இருந்து வேற மாதிரி நிறைய தொந்தரவுகள். எப்படி எப்படியோ தப்பிக்க வேண்டியிருக்கிறது. திருமணம் செய்துகொண்டால் நிம்மதியாக இருக்கலாம் என்று நினைத்தால்... இப்படிச் சொல்றீங்களே!” நடிகையின் வார்த்தைகளில் ஏக்கமும் கவலையும் எதிரொலித்தது. அதோடு, ‘கடந்த காலத்தில் கைகூடாமல் போன காதல்களைப் போல இயக்குநருடனான இந்த உறவும் ஆகிவிடாமல் இருக்கவேண்டுமே!’ என்ற அச்சமும் நடிகையின் மனதுக்குள் எட்டிப்பார்த்தது..ஜோதிடருக்கும் அது புரிந்தது. "நான் என்ன செய்யட்டும்... கட்டம் அப்படி இருக்கு. அதனாலதான் காத்திருக்கச் சொல்றேன். இருந்தாலும் உங்க அவசரம் புரியுது. அதனால, குரு பெயர்ச்சி முடிஞ்சதும் வாங்க. பிரசன்னம் போட்டுப் பார்த்து, சீக்கிரம் கல்யாணம் செய்துக்க வேற வழி இருக்கா, பரிகாரம் என்னன்னு எல்லாம் சொல்லறேன்" என்றார். “அப்படின்னா..!” என்று அவர்கள் தயங்க. “புரியுது... புரியுது... நீங்க ரெண்டுபேரும் இப்போ இருக்கற மாதிரியே சேர்ந்து இருக்கலாமான்னு கேட்க நினைக்கறீங்க. அதானே, அப்படியே சேர்ந்து இருக்கலாம். ஒண்ணும் பிரச்னை இல்லை... அந்த விஷயத்துல மட்டும் கொஞ்சம் கேர்ஃபுல்லா இருந்துக்குங்க. அவ்வளவுதான்!” சொன்ன ஜோதிடர் தன் படபடப்பைக் காட்டிக்கொள்ளாமல் அவர்களை அவசர அவசரமாக வழியனுப்பினார். அந்த ஜோதிடரைத் தேடி வருபவர்களில் பெரும்பாலோர் பிரபலங்கள்தான். என்றாலும் நடிகர், நடிகைக்கு ஜோதிடம் சொல்வதில் கொஞ்சம் கூடுதல் பப்ளிசிட்டி கிடைக்கும் அவருக்கு. அதனாலேயே நடிகருக்கோ நடிகைக்கோ நேரம் தரும் அதே சமயத்தில், பிரபலங்கள் யாருக்காவதும் நேரம் தந்து, அந்த நேரத்தில் வரச் சொல்வார். இவர் வரும்போது அவர்கள் திடீரென்று வந்துவிட்டதாகச் சொல்லி பிரபலத்தைக் கொஞ்சம் காத்திருக்க வைப்பார். இது தனக்கு அந்தஸ்தை அதிகரிக்கச் செய்வதற்காக அவர் கடைபிடிக்கும் உத்தி. ஆனால், அன்றைய தினம் அவர், சற்றே மாறுபட்ட மனநிலையில் இருந்ததால், நடிகையையும் இயக்குநரையும் வேகவேகமாகப் பேசி வெளியே அனுப்பினார். அவர்கள் வாசல்கதவு திறந்து வெளியேறிய மறு விநாடி, தன் செல்போனை எடுத்தார். அமைச்சர் ஒருவரின் பர்சனல் நம்பருக்கு டயல் செய்தார். (பார்வை விரியும்) - நந்தன் மாசிலாமணி