உளவுக்கு 1000 கண்கள்

அமெரிக்காவின் வாஷிங்டன் நகரில் உள்ள சீனத் தூதரகத்தின் தலைமைத் தூதர், தன் சகாக்களுடன் ஆலோசனை நடத்திக்கொண்டிருந்தார்… “அமெரிக்காவின் வெள்ளை மாளிகைக்கு ஐந்து முக்கியமான அமைச்சர்கள் இன்று சென்றுள்ளனர்” தகவலைக் கேட்டதும், தாடையை அழுந்தத் தடவி சில நிமிடம் யோசித்தார், தூதர்.பிறகு, “ அவர்கள் அப்படிக் கூடுகிறார்கள் என்றால், ஏதேனும் அவரச விஷயமாக இருக்கலாம். அது என்ன விஷயம் என்பதை, அங்கே உள்ள நம் உளவு ஆட்களிடம் சொல்லி தகவல் சேகரிக்கச் சொல்லுங்கள்." கட்டளையிடும் குரலில் சொன்னார், தூதர். “ எஸ் ஸார்... உடனே சொல்லிவிடுகிறேன்” அதிகாரி ஒருவர் சொல்ல, "நம்முடைய பொருளாதார விஷயம் பற்றியதாக இருக்குமா அல்லது மனித உரிமை மீறல் என்று எதாவது இருக்குமா என்றும் விசாரிக்கச் சொல்லுங்கள்” தூதர் சொல்ல, “ சார், நியூயார்க் டைம்ஸில் நமக்கு வேண்டியவர்கள் இருக்கிறார்கள் அவர்களிடம் கேட்கலாமா?" என்றார், முதல் நிலை அலுவலர்." சரி, அங்கும் கேட்டுப் பாருங்கள்... எதற்கும் ரஷ்ய தூதரகத்திலும் விசாரித்துப் பார்க்கலாம். அதேசமயம், அவர்களிடம் எதையும் வெளிப்படையாகக் கேட்க கூடாது. சம்பந்தமே இல்லாத கேள்விகளைக் கேட்டு, அவர்களாகவே விஷயத்தைச் சொல்லும் வகையில் உரையாடவேண்டும்" தூதர் சொல்ல, ‘சரி’ என்பதாகத் தலையாட்டினார்கள் அலுவலர்கள்.நியூயார்க் டைம்ஸ். உலக அளவில் பிரபலமான நாளிதழ். 1851ஆம் ஆண்டு தொடங்கப்பட்டது. அன்று முதல் இன்று வரை அதில் வெளியாகும் எந்த ஒரு செய்தியும் மிக மிக கவனமாகத் தேர்ந்தெடுக்கப்பட்டதாக இருக்கும். ஆதாரத்தோடு, ஆணித்தரமாக அதில் வெளியாகும் செய்திகள் பல சமயங்களில் ஆட்சியாளர்களையே நடுங்கச் செய்திருக்கின்றன.உதாரணமாக, 2016ம் ஆண்டு ஹிலாரி கிளின்டன் அதிபர் தேர்தலில் நின்றர். அப்போது ஹிலாரி அமைச்சராக இருந்தபோது, அமைச்சருக்குரிய அதிகாரப்பூர்வமான மின்னஞ்சலை பயன்படுத்தாமல், தன்னுடைய தனிப்பட்ட மின்னஞ்சலை பயன்படுத்தினார் என்பதை ஆதாரத்துடன் வெளியிட்டு, அவர்மீது குற்றம் சாட்டியது நியூயார்க் டைம்ஸ்.ஹிலாரியின் தனிப்பட்ட மின்னஞ்சலில் இருந்த ஆயிரக்கணக்கான மின்னஞ்சல்களில், ரகசியம் எனக் குறிப்பிட்ட 65 கோப்புகள், மிகவும் உயர் ரகசியம் எனக் குறிபிடப்பட்ட 22 கோப்புகளும் இருந்தன. நியூயார்க் டைம்ஸ் வெளிக்கொணர்ந்த இந்த விவகாரம், உலகையே பரபரப்பாக்கியது. அமெரிக்க அதிபர் தேர்தலில் இது பெரிய பூகம்பத்தை ஏற்படுத்தியது. விளைவு, மிகக் குறைந்த ஒட்டு வித்தியாசத்தில் ஹிலாரி கிளின்டன் வெற்றியை இழந்தார்..2018ம் ஆண்டு அக்டோபர் மாதம். டொனால்ட் டிரம்ப் தன்னுடைய வருமான வரிக்கணக்கை வெளியிடாமல், சாக்கு போக்குகள் சொல்லி தட்டிக் கழித்துக்கொண்டிருந்த நேரம். டிரம்ப்பின் தொழில் நிறுவனத்தின் ஒரு லட்சம் பக்கம் கொண்ட ஆவணத்தை இருநூறு பேர் கொண்ட ஒரு குழு சரி பார்த்து, டிரம்பும் வரியும் என்ற தலைப்பில் எட்டு பக்கத்திற்கு வெளியீட்டு அதிர்வை ஏற்படுத்தியது, நியூயார்க் டைம்ஸ்.அதில் முந்தைய ஆறு ஆண்டுகளில் அவர் சேர்த்த சொத்து பட்டியல் வருமானவரி என எல்லாமும் தெளிவாக இருந்ததில், ஆடிப்போனார், டிரம்ப். காரணம், அவரிடமே சில முக்கியமான ஆவணங்கள் இல்லை. இவர்களுக்கு எப்படிக் கிடைத்தது? அந்த ரிப்போர்டிங்கிற்காக நியூயார்க் டைம்ஸுக்கு, புலிட்சர் விருது கிடைத்ததுஅவர்களுக்கு சின்ன மீன்களில் ஆர்வம் இல்லை. திமிங்கல வேட்டைதான் பிடிக்கும். உலகம் முழுக்க ஒவ்வொரு நிகழ்வையும் கவனமாக கவனித்துக்கொண்டிருக்கிறார்கள். அதில் அவர்களுக்கு என்று ஏதாவது மாட்டும். உலகம் முழுவதும் அப்பத்திரிகைக்கு செய்தியாளர்கள் இருக்கிறார்கள். ஒவ்வொரு கணமும் ஏதாவது புது செய்தியை கொடுத்துக் கொண்டே இருப்பார்கள்.அன்றைய தினம் காலையில் அப்பத்திரிகை அலுவலத்தில் ஆசிரியர் தலைமையில் சிறப்புக் கூட்டம் நடைபெற்றுக் கொண்டிருந்தது. தலைமைச் செய்தி ஆசிரியர், பேசினார். “வெள்ளை மாளிகையில் நடந்த பிரஸ் மீட் ஒன்றில் கலந்துகொள்ளச் சென்ற நமது நிருபர், அங்கே வித்தியாசமான விஷயம் ஒன்றைக் கண்டிருக்கிறார். பிரஸ் மீட் நடந்துகொண்டிருந்த சமயத்தில், வேறொரு வாசல் வழியாக, பாதுகாப்பு அமைச்சரும், வெளியுறவுத்துறை அமைச்சரும் வெள்ளை மாளிகைக்கு வந்திருக்கிறார்கள். அவர்கள் வந்ததை அநேகமாக நம் நிருபர் மட்டுமே பார்த்திருக்கிறார். ஏதேனும் முக்கியமான விஷயத்திற்காக சந்திக்க வந்திருக்கலாம். பிரஸ் மீட் முடிந்துவிட்டதால், நிருபர்களை வெளியே அனுப்பிவிட்டார்கள். எனவே வேறு வழியில் செய்தி சேகரிக்க முயற்சிக்கவும்’ என்று அவர் தகவல் அனுப்பியிருக்கிறார்!” சொன்னவர், சற்று நிறுத்தினார்." பாதுகாப்பு அமைச்சரும் வெளியுறவு அமைச்சரும் ஒன்றாகச் சென்றிருக்கிறார்கள் என்றால், ஏதாவது முக்கியமான விஷயமாக இருக்கலாம். எதற்கும் நமது ஜோசப் டீமை அனுப்பி வைத்து என்ன வென்று விசாரித்து பிறகு முழு மூச்சுடன் இறங்கலாம்" என்றார், தலைமை செய்தி ஆசிரியர்"இந்த விஷயத்தில் பிரேக்கிங் நியூஸ் நம்முடையதாக இருக்க வேண்டும். வால் ஸ்ட்ரீட் ஜேர்னல், லாஸ் ஏஞ்சல்ஸ் டைம்ஸ், வாஷிங்டன் போஸ்ட் இவற்றில் எல்லாம் வருவதற்கு முன், நம் பத்திரிகையில் வந்தாகவேண்டும். சமூக வலைதளங்கள் வந்ததும், பிரின்ட் மீடியா செத்து விட்டது என்று சொல்கிறார்கள். அதை நாம் மாற்றிக்காட்ட வேண்டும். பிரின்டிற்கு இன்னும் உயிர் இருக்கிறது என்பதை நிரூபிக்க இது நமக்கு நல்ல சந்தர்ப்பம்... ஓகே!” என்றார் எடிட்டர்.உற்சாகமாக “ஓகே!” சொன்னார்கள் எடிட்டோரியல் குழுவினரும் நிருபர்களும்..மார்ச் மாதத்தில் சிரியாவில் மிகப் பெரிய கூட்டுத் தொழில் நிறுவனத்தின் கட்டுமான விரிவாக்கத் தொடக்க விழாவிற்கு அழைப்பு வந்தது. தூதுவர், பெக்கெட்டைஅழைத்து “நீ அந்த விழாவிற்குச் செல்ல வேண்டும். பல புதிய நபர்களின் அறிமுகம் அங்கே கிடைக்கும். நம் நாட்டின் வளர்ச்சிக்கு அவர்களின் தேவை எவ்வாறு பயன்படும் என்று பார் ” என்றார்.குறித்த நாளில் பெக்கெட் அந்த விழாவுக்குச் சென்றான். அவனோடு தூதரக அலுவலர்கள் சிலரும் சென்றார்கள்.விழாவுக்கு ஏராளமான பிரமுகர்கள் வந்திருந்தார்கள். அந்தக் கூட்டத்தில் இருந்த ஒரே ஒரு பெண் மட்டும், பெக்கெட்டின் கவனத்தை வெகுவாக ஈர்த்தாள். ஏனோ அவனது பார்வை அவள் சென்ற பக்கமெல்லாம் திரும்பியது. அதை மாற்ற நினைத்தும் இயலாதவனாய், அந்தப் பெண்ணையே கூர்ந்து கவனித்தான். அவளை இதற்கு முன் எங்கேயோ பார்த்திருக்கிறோம் என்ற எண்ணம் அவனுக்குள் எழுந்தது.கொஞ்ச நேர யோசிப்பில் அந்தப் பெண், சார்டின் என்பது நினைவுக்கு வந்தது. அன்று இவன் வந்த விமானத்தில் பணிப்பெண்ணாக இருந்தவள். விமானப் பணிப்பெண் உடையில் பார்த்தவளை இன்று சாதாரண உடையில் பார்த்ததால், சட்டென்று அடையாளம் தெரியவில்லை.சிவந்த தக்காளி போலிருந்த கன்னம்தான் அவளைக் காட்டிக்கொடுத்தது.அவள் சார்டின் என்று தெரிந்ததும் ஏதோ ஒரு இன்ப உணர்வு அவனுக்குள் முகிழ்ந்தது. அதில் திளைத்திருந்தவனை மேலும் கிரங்க வைப்பதுபோல், மிக நெருக்கமாக வந்தாள் அவள்.எப்படிப் பேச்சைத் தொடங்குவது என்று விநாடிக்குள் யோசித்து, “ அன்றைக்கு ஃப்ளைட்ட பார்த்த பெண் தானே நீங்க?” என்று தொடங்கினான். “ஆமாம்...!” சொன்னவள் வதனத்தில் இளநகை புத்தது. அன்று விமானத்தில் வந்தபோது பார்த்த பிளாஸ்டிக் புன்னகைக்கும் இதற்கும் அவனுக்கு வித்தியாசம் தெரிந்தது. அதை ரசித்தபடி, “நீங்கள் இங்கு எப்படி? ” என்றான். “அந்த விமான நிறுவனத்தில்தான் நான் இன்னமும் பணிபுரிகிறேன். இங்கே என் உதவி தேவை என்று அழைத்தார்கள் அதனால் வந்திருக்கிறேன்…” சொல்லி நிறுத்தியவள், அவன் பார்வையில் தெரிந்த ஆர்வத்தைப் படித்தவளாய், “நீங்களும் இங்கே உதவி செய்யத்தான் வந்திருக்கிறீர்களா?” என்றாள், கண்களில் குறும்பு மின்ன. “இ... இல்லை... இல்லை!” அவள் மேல் பதிந்திருந்த தன் பார்வையை மீட்டுக்கொண்டு அவசர அவசரமாய்ச் சொன்னான். “ஓ... அப்படியானால், வர்த்தகம் செய்வதற்காக வந்திருக்கிறீர்களோ!” அவள் பேச்சிலும் குறும்பு துள்ளியது.அவளுக்கு என்ன பதில் சொல்வது என்று யோசிக்க, அதற்குள் அங்கு வந்த ஒருவர்,மிகுந்த மரியாதையுடன் கூப்பிட்டு, தன்னுடன் வருமாறு அழைக்க, அவர் பின்னே நடந்தான் அவன். (பார்வை விரியும்) - நந்தன் மாசிலாமணி