செல்லாக் காசான செல்வாக்கு ராஜேஷ் தாஸூக்கு 10 வருட ஜெயில்? கோதாவுக்கு தயாராகும் பெண் ஐ.பி.எஸ்

காவல்துறை அதிகாரிகள் குற்றம் செய்தால் சஸ்பெண்ட் செய்யப்படுவார்கள் அல்லது ஆயுதப்படைக்கு மாற்றப்பட்டு அடுத்த சில தினங்களில் அதே யூனிஃபார்மோடு வலம் வருவார்கள் என்ற ஆதங்கத்துக்கு முடிவுரை எழுதியிருக்கிறது ராஜேஷ் தாஸுக்கு எதிரான விழுப்புரம் நீதிமன்றத் தீர்ப்பு.சக பெண் அதிகாரிக்கு பாலியல் தொல்லை கொடுத்த இவர் மீதான வழக்கில் 3 வருட சிறை தண்டனை மற்றும் 20 ஆயிரத்து 500 ரூபாயை அபராதம் விதித்து அதிரடி உத்தரவிட்டிருக்கிறது விழுப்புரம் நீதிமன்றம். இதில் ‘ஜாமீன்’ பெற்று தற்காலிகமாக எஸ்கேப் ஆகி இருக்கிறார் ராஜேஷ் தாஸ். ஆனால் இவரால் பாதிக்கப்பட்டவர்கள் சுப்ரீம் கோர்ட் வரை வழக்கை கொண்டு சென்று ராஜேஷ் தாஸை 10 ஆண்டுகள் வரை காவலில் வைக்க காய்களை நகர்த்த துவங்கி இருக்கிறார்கள்.ராஜேஷ் தாஸை நன்கு அறிந்த மூத்த அதிகாரி ஒருவரிடம் பேசினோம்,”ஒடிசாவைச் சேர்ந்த ராஜேஷ் தாஸ் 1989ம் ஆண்டு ஐ.பி.எஸ் அதிகாரியாக காவல்துறையில் சேர்ந்தார். இவரது துவக்க காலம் முதல் இதுவரை துறைரீதியான நல்ல பெயரை வாங்கியதில்லை. முரட்டுத்தனமான செயல்கள், பெண் அதிகாரிகள் மற்றும் பெண் காவலர்களிடம் இரட்டை அர்த்த வசனங்கள் என பல தரப்பில் முகம் சுளிக்க வைத்ததுதான் இவரது சாதனை. இவரால் பாதிக்கப்பட்ட பெண் காவலர்கள் பல முறை உயர் அதிகாரிகளிடம் புகார் கொடுத்து இருக்கிறார்கள். அவர் மீது கடும் நடவடிக்கை எடுக்க வேண்டும் என்பதில் துறையும் முனைப்பு காட்டும். இறுதியில் ஒன்றும் இல்லாமல் போய்விடும். காரணம் ராஜேஷ் தாஸின் அதிகாரம், பல வழிகளில் பாய்ந்து ஓடியதுதான். திருச்சி எஸ்.பியாக ராஜேஷ் தாஸ் இருந்த நேரத்தில் அவருக்கு நெருக்கமான பெண் உறவு ‘பேட்மிண்டன்’ ஆடிக்கொண்டிருந்ததை 4 ஆயுதப்படை காவலர்கள் வேடிக்கை பார்த்த ஒரே காரணத்துக்காக அந்த 4 காவலர்களையும் இரண்டு நாட்கள் சட்ட விரோத காவலில் முழு நிர்வாணமாக வைத்து சித்ரவதை செய்தது அந்த சமயத்தில் காவல்துறை வட்டாரத்தையே கலங்கடிக்கும் செய்தியாக வலம் வந்தது.அது மட்டுமல்ல. எங்கு பணியில் சேர்ந்தாலும் அங்கு ஜாதி ரீதியாக காவலர்களை பிரித்து மோத விடுவது தான் இவரது தனி ஸ்டைல். இவர் தென் மண்டல ஐ.ஜியாக பணியாற்றியபோது குமுளி மற்றும் கூடலூர் இடையே ஏற்பட்ட சட்டம் ஒழுங்கு பிரச்னையை எளிதாக சமரசத்துக்கு கொண்டு செல்லாமல், லத்தி சார்ஜ் வரை நடத்தி பதற்றத்தை ஏற்படுத்தி இருக்கிறார்.இப்படி பல சிக்கல்கள், சர்ச்சைகள், பாலியல் புகார்களில் சிக்கினாலும் தனது பதவி மற்றும் அதிகாரத்தை பயன்படுத்தி தப்பித்துக்கொண்டே வந்தார். இந்த நிலையில்தான் 2021ல் எடப்பாடி பழனிச்சாமி முதல்வராக இருந்தபோது, சக பெண் அதிகாரியிடம் இவர் நடத்திய பாலியல் சீண்டல் சிக்கலை ஏற்படுத்த, பாதிக்கப்பட்ட பெண் அதிகாரி பல முனைகளில் புகார் கொடுத்தார். ராஜேஷ் தாஸ் தனது செல்வாக்கை பயன்படுத்தி புகாரை அமுக்க முயன்றார். ஆனால் டெல்லியில் இருந்து பெண் அதிகாரிக்கு ஆதரவு பெருகவே, ’விசாகா’ கமிட்டியில் இது தொடர்பான புகார் விசாரிக்கப்பட்டது. பிறகு வழக்கு விழுப்புரம் நீதிமன்றத்தில் இரண்டு ஆண்டுகளாக விசாரிக்கப்பட் டது. அரசு தரப்பில் 68 பேர் சாட்சியங்களாக விசாரிக்கப்பட்டனர்..வழக்கை விசாரித்த தலைமை குற்றவியல் நீதிபதி புஷ்பராணி ஜூன் 16ம் தேதி, பெண் ஐ.பி.எஸ் அதிகாரிக்கு பாலியல் தொல்லை கொடுத்த ராஜேஸ் தாஸூக்கு 3 ஆண்டுகள் சிறை தண்டனையும், 20 ஆயிரத்து 500 ரூபாய் அபராதமும் விதித்து உத்தரவிட்டார். 2வது குற்றவாளியான எஸ்.பி கண்ணனுக்கு தடுத்து நிறுத்துதல் பிரிவில் 500 ரூபாயை மட்டும் அபராதமாக விதித்து நீதிபதி உத்தரவிட்டார். ராஜேஷ்தாஸ் நீதிமன்றம் விதித்த அபராதத்தொகையை செலுத்தினார். பின்னர் தனது வக்கீல்கள் மூலம் நீதிமன்றத்தில் உடனடியாக ஜாமீன் மனுவை தாக்கல் செய்து, ஜாமீன் பெற்றுக்கொண்டார். தொடர்ந்து, வழக்கின் தீர்ப்பை எதிர்த்து சென்னை ஐகோர்ட்டில் அப்பீல் செய்யும் முடிவில் இருக்கிறார் ராஜேஷ் தாஸ்.வழக்கில் இருந்து அவர் விடுவிக்கப்பட்டால்தான் தமிழக டி.ஜி.பி ரேஸில் அவர் இடம்பெற முடியும். எனவே, மிகப்பெரிய அளவிலான வக்கீல்களை தேடும் பணியில் இறங்கி இருக்கிறார் ராஜேஷ் தாஸ். ஆனால் அவரால் பாதிக்கப்பட்டவர்களோ ஒன்று சேர்ந்து பாலியல் சீண்டல் புகார் கொடுத்த பெண் அதிகாரியை தொடர்பு கொண்டு பேசி வருகிறார்கள். வழக்கின் பிடியை தளர்த்தினால் அதிகாரிகளின் கொட்டமும், அத்து மீறலும் அதிகமாகி விடும் என அப்பெண் அதிகாரியிடம் ‘ஸ்ட்ராங்’ ஆக சொல்லி வருகிறார்கள் “என முடித்தார்.இதுகுறித்து பேசிய தமிழக முன்னாள் டி.ஜி.பி திலகவதி, “வக்கீல்களின் வாதத்திறமை, கோர்ட் செயல்படுகிற விதம் என எல்லாமே ராஜேஷ் தாஸூக்கு சாதகமாக இருக்கிறது. வழக்கு விசாரணையை இரண்டு வருடங்களுக்கு இழுத்து இருக்கிறார்கள். எனவே, பெண்களுக்கு எதிரான பாலியல் வழக்கு மற்றும் குழந்தைகளுக்கு எதிரான ’போக்ஸோ’ வழக்குகளை விசாரிக்க விரைவு நீதிமன்றம் போல சிறப்பு நீதிமன்றம் அமைக்கப்படவேண்டும். தமிழக வரலாற்றில் இது ஒரு மிக முக்கியமான வழக்கு. பாலியல் சீண்டலை தனிநபர் செய்தால் வழங்கப்படும் தண்டனையை விட, உயர் பொறுப்பில் இருப்பவர்கள் செய்யக்கூடிய பாலியல் சீண்டலுக்கு பன்மடங்கு தண்டனை வழங்கப்படவேண்டும் என்பதுதான் இந்திய அரசியல் சட்டம். இதில் தலைமை ஆசிரியர், ஜெயில் வார்டன், காவல்துறை அதிகாரிகள் உட்பட பலர் அடக்கம்.ஆனால் ராஜேஷ் தாஸூக்கு வழங்கப்பட்டிருக்கிற தண்டனையை பார்த்தால் ஜூஜூபியாக தெரிகிறது. 10 ஆயிரம் ரூபாய் அபராதம் என்பது மிக குறைவு. படிப்பினையை சொல்லித்தரக்கூடிய வழக்கின் தீர்ப்பை சொதப்பி விட்டார்கள். ஐகோர்ட்டுக்கு வழக்கு சென்றால் விசாரணை என்ற பெயரில் தீர்ப்பு இன்னும் இழுக்க கூடிய வாய்ப்பு இருக்கிறது. காலப்போக்கில் ஒரு விஷயத்தின் வீரியமும், காரமும் குறைந்துவிடும். நீதியரசர்கள் என்ன நினைக்கிறார்கள் என்பது தெரியவில்லை”என்றார் வேதனையுடன்.நிறைவாக ராஜேஷ் தாஸை தொடர்பு கொண்ட போது, ”கருத்து எதுவும் தெரிவிக்க விரும்பவில்லை” என ஒற்றை வரியில் முடித்துக்கொண்டார். -கணேஷ்குமார்