வம்பானந்தா : வசூல் வேட்டையில் பொன்னியின் செல்வன் நாயகன்!

“ரேசனில் மண்ணெய்யைக்கு தட்டுப்பாடு நிலவுகிறது... ஏழை மக்கள் அலை மோதுகிறார்கள். ஆனால், காசு போட்டால் மிஷினில் இருந்து மதுபாட்டில் வருகிறது. குடிக்க கூல் இல்லையாம்... கொப்பளிக்க பன்னீராம்...” என்றபடி வந்த வம்பானாந்தாவை கூல் செய்ய ஜில்லென்ற மோரைக் கொடுத்தார் சிஷ்யை. ஒரே மடக்கில் மோரைக் குடித்துவிட்டு செய்திகளைத் சொல்லத் தொடங்கினார் வம்பு.“கடந்த 2016 சட்டசபைத் தேர்தலில் ஒரத்தநாடு தொகுதியில் போட்டியிட்ட வைத்திலிங்கம் தோல்வியைத் தழுவ முக்கியக் காரணமாக இருந்தவர் மா.சேகர். அதற்கு பிறகு அ.ம.மு.க-வின் தஞ்சை தெற்கு மாவட்ட செயலாளராக இருந்து வந்ததோடு, கடந்த உள்ளாட்சி தேர்தலில் ஓரத்தநாடு பேரூராட்சியை அ.ம.மு.க கைப்பற்ற சேகர்தான் காரணமாக இருந்தார். தினகரனின் தீவிர விசுவாசியான சேகர், யாரும் எதிர்பாராத விதமாக சமீபத்தில் எடப்பாடியை சந்தித்து அ.தி.மு.க-வில் சேர்ந்துவிட்டார்.இதில் தினகரனை விட அதிகம் டென்ஷன் ஆகியிருப்பவர் பன்னீரின் ஒரேயொரு கூட்டாளியான வைத்திலிங்கம்தான். அதிர்ச்சி வைத்தியம் இதோடு நிற்கப்போவதில்லையாம். வைத்திலிங்கத்தின் சொந்தத் தொகுதியான ஒரத்தநாட்டில் மாபெரும் பொதுக்கூட்டம் ஒன்றை நடத்தி, சிங்கத்தின் பிடறியை அதன் குகைக்குள்ளேயே சென்று உலுக்கும் முடிவில் இருக்கிறாராம் எடப்பாடி. பன்னீரை திருச்சியில் வைத்து மாஸ் காட்டிய வைத்திலிங்கத்துக்கு, ‘நான் தான் ஒரிஜினல் பாஸ்’ என்று காட்டவே இவ்வளவு வேகமாக இறங்கியிருக்கிறார் எடப்பாடி.“அப்படியென்றால் கடைசி வரை அமித் ஷாவின் ஆசை நிறைவேறாது போலிருக்கிறது... இவர்கள் ஒன்றிணைய வாய்ப்பே இல்லை!” “கர்நாடகாவில் இருந்து ஒரு முக்கியமான நோட் டெல்லிக்குச் சென்றுள்ளது. தமிழ்நாடு பா.ஜ.க-வில் தற்போது மாநில அளவில் பொறுப்பில் இருக்கும் ஒரு பெண் நிர்வாகி மீது டெல்லிக்கு புகார் வாசிக்கப்பட்டிருக்கிறதாம். அந்த பெண் நிர்வாகியின் மகன் மற்றும் மருமகள் ஆகிய இருவருமே முதலீடு தொடர்பான விவகாரங்களில் எக்ஸ்பர்ட். இவர்கள்தான் இப்போது கர்நாடக மாநிலத்தின் கட்சி பிரமுகர்கள் பலரது கருப்பு பணத்தை டீல் செய்கிறார்கள் என்கிறார்கள்..இதுகுறித்து தமிழக பா.ஜ.க தலைவர் ஒருவருக்கு புகார் சென்றிருக்கிறது. அதை அவர் அப்படியே டெல்லிக்கு பாஸ் செய்துவிட்டாராம்.”“கனிம வளத்துறை பக்கம் கடமுடா சத்தம் கேட்கிறதே?”“ஆமாம்... திருநெல்வேலி, தென்காசி வழியாக கேரளாவுக்கு ஒரு நாளைக்கு ஆயிரம் லாரிகள் வரை ஜல்லி, கல் சப்ளையாகிக்கொண்டிருந்தது. இவற்றில் பர்மிட் மற்றும் பர்மிட் இல்லாத சட்டவிரோத லாரிகளும் அடக்கம். சில நாட்களுக்கு முன்பு அங்கிருக்கும் முக்கிய அதிகாரியை தொடர்புகொண்ட பொன்னியின் செல்வன் நாயகன் பெயர் கொண்டவர், மொத்த லாரிகளையும் நிறுத்த உத்தரவிட்டாராம்.பொன்னியின் செல்வன் நாயகன் மூத்த அமைச்சர் ஒருவரின் பினாமி என்பதால், அதிகாரியும் அப்படியே செய்துவிட்டாராம். சுமார் நான்கு நாட்கள் லாரிகள் ஸ்தம்பித்துப் போனதால் குவாரி தரப்பினர் பேச்சுவார்த்தைக்கு வந்திருக்கிறார்கள். அப்போது யூனிட் ஒன்றுக்கு 300 ரூபாய் அளித்தால், லாரிகள் நகரும் என்றிருக்கிறார் பொ.செ. நாயகன். ஒருவழியாக டீல் ஓகேவான பிறகே சக்கரங்கள் வேகமெடுத்துள்ளன. ஒரு லாரிக்கு நான்கு யூனிட்டுகள்; அதன்படி மாமூல் தொகை 1,200 ரூபாய். ஒரு லாரிக்கு 1,200 என்றால் தினசரி அந்த ரூட்டில் மட்டும் சுமார் ஆயிரம் லாரிகள் சென்றால் தொகை எவ்வளவு என்று கணக்கிட்டுக்கொள்”“அடேங்கப்பா...”“இதற்கே வாயைப் பிளந்தால் எப்படி? இந்த ஒரு ரூட் மட்டுமல்ல... ஓசூர் ரூட்டில் பெங்களூருவுக்கு தினசரி 2,000 லாரிகள் செல்கின்றன. கன்னியாகுமரி ரூட்டில் இருந்தும் கேரளாவுக்கு ஒருநாளைக்கு சுமார் ஆயிரம் லாரிகள் செல்கின்றன... மொத்தத்தையையும் சேர்த்து கணக்கிட்டால் ஒரு நாள் வசூலே கோடியை தாண்டுகிறது. ஆனால், இதுபற்றி பொ.செ. நாயகன் தனக்கு நெருக்கமான அந்த மூத்த அமைச்சருக்கே மூச்சுவிடவில்லையாம். மொத்தமாக மறைத்துவிட்டார் என்கிறார்கள்... சமீபத்தில் நடந்த ரெய்டு விவகாரத்தில் பொ.செ நாயகனுக்கும் சம்மன் அனுப்பப்பட்டிருக்கிறது. அவருக்கும் சிக்கல் ஏற்படலாம்” என்ற வம்புவிடம் கொய்யா கனி துண்டுகளை நீட்டினார் சிஷ்யை. அதை சுவைத்தபடியே அடுத்த செய்திக்கு தாவினார் வம்பு.“கர்நாடக சட்டமன்ற தேர்தலில் காங்கிரஸ் வேட்பாளர்களுக்கு ஆதரவாக பிரசாரம் செய்யும்படி கமல்ஹாசனுக்கு போனில் அழைப்பு விடுத்தாராம் ராகுல் காந்தி. மகிழ்ச்சியுடன் அந்த அழைப்பை ஏற்று சம்மதம் தெரிவித்துள்ள கமல்ஹாசனுக்கு, கர்நாடக காங்கிரஸ் தலைவர் சிவக்குமார் ஒரு கடிதம் அனுப்பியிருக்கிறார். அதில் மூன்று நாட்கள் எந்தந்த தொகுதிகளில் கமல்ஹாசன் பிரசாரம் செய்ய வேண்டும் என்பது குறித்து விளக்கமாக சொல்லப்பட்டிருக்கிறதாம்.”“ஓஹோ...””தமிழக சட்டமன்றத்தில் சட்டமுன்வடிவு பிரிவில் வேலை செய்யும் மதன்குமார் என்ற ஊழியர் தொடர்பாக தலைமை செயலகத்தில் சென்னை கலங்கரை விளக்கம் போலீசார் விசாரணை மேற்கொண்டு வருகிறார்கள். அரசு வேலை வாங்கி தருவதாக 18 லட்சத்து 40 ஆயிரம் ரூபாய் பணத்தை வசூல் செய்து ஏமாற்றி விட்டதாக வந்த புகாரின் அடிப்படையில் இந்த விசாரணை நடைபெறுகிறது. ஏற்கனவே இந்த நபர் அரசு வேலை வாங்கி தருவதாக 30 லட்ச ரூபாய் வசூல் செய்து ஏமாற்றிய விவகாரத்தில் எஃப்.ஐ.ஆர் பதிவு செய்யப்பட்டு, புழல் சிறையில் அடைக்கப்பட்டவர். அரசு ஊழியர் மீது வழக்கு பதிவு செய்யப்பட்டு, அது உறுதியாகி தண்டனை அனுபவித்தால் அரசு ஊழியராக பணியில் தொடர முடியாது. ஆனால், விதிகளை முறையாக பின்பற்றாமல் மேற்படி நபருக்காக சட்டமன்ற உயரதிகாரி ஒருவர் ஆதரவாக செயல்பட்டு வருவதாக தலைமைச் செயலக வட்டாரத்தில் குற்றச்சாட்டு எழுந்துள்ளன. “சத்தியமூர்த்தி பவன் அடுத்த ரணகளத்துக்கு தயாராகி வருகிறதாமே?”“தமிழக காங்கிரஸ் அவசர செயற்குழு கூட்டம் ஏப்ரல் 25ம் தேதி சென்னை சத்யமூர்த்தி பவனில் நடந்தது. கூட்டம் முடிந்ததும், சீனியர் எம்.எல்-ஏக்கள் பிரின்ஸ் மற்றும் ராஜ்குமார் ஆகியோர் தலைவர் கே.எஸ்.அழகிரியின் அறைக்குச் சென்றனர். ‘நாங்கள் கட்சியில் சீனியர்கள். எனவே, தமிழக சட்டசபை குழு தலைவர் பதவியை எங்களில் யாருக்காவது ஒதுக்குங்கள்’ என்று கேட்க அங்கு பெரும் வாக்குவாதம் ஏற்பட்டிருக்கிறது. இவர்களை சமாளிக்க முடியாமல் திணறிய அழகிரி, ‘முதல்ல என் பொண்ணு கல்யாணத்துக்கு வாங்க... உங்க பிரச்னையை அப்புறம் தீர்த்துவைக்குறேன்’ என்றபடி அவர்கள் இருவரையும் தனது காரில் ஏற்றிக்கொண்டு தன் மகளின் இல்லத் திருமண நிகழ்வுக்கு விரைந்தார்.இது ஒருபக்கம் என்றால், அழகிரி மகள் திருமணத்தையொட்டி கட்சியின் மாவட்ட தலைவர்கள் சிலர் கல்லா கட்டியிருக்கிறார்கள். அதில் ஒரு பகுதியை திருமணத்துக்கும் செலவு செய்திருக்கிறார்கள் என்று விமர்சனங்கள் எழுந்துள்ளன. ஆனால், இதை மறுக்கும் அழகிரியின் ஆதரவாளர்களோ, ’இது எங்கள் அண்ணன் அழகிரிக்கு எதிரானவர்கள் கிளப்பிவிடும் அவதூறு. கட்சிக்காரர்கள் சிலர் அண்ணன்மீது இருந்த அன்பினால், தானாக முன்வந்து திருமணத்துக்கு செலவு செய்திருக்கலாம். ஆனால், அவர்களைகூட அண்ணன் அன்பாகக் கடிந்துக் கொண்டார்...” என்று விளக்கம் அளிக்கிறார்கள்.. “விஜய் ரசிகர்களை சந்தித்ததில் ஏதாவது விஷேசம் உண்டா?”“நடிகர் விஜய் அரசியலுக்கு வருவது கிட்டத்தட்ட உறுதியாகி விட்டது. இந்த நிலையில்தான் சமீபத்தில் சென்னை பனையூரில் உள்ள தனது வீட்டில் திடீரென ரசிகர்களை சந்தித்தார் விஜய். இதில் விஜய் மக்கள் மன்றத்தின் சார்பில் வெற்றி பெற்ற கவுன்சிலர்களும் பங்கேற்றனர். அப்போது ரசிகர்கள் மத்தியில் பேசிய விஜய் ‘2024 நாடாளுமன்ற தேர்தலில் நமது மன்றம் போட்டியிடுவதற்கான வாய்ப்பு அதிகம் இருக்கிறது. எத்தனை தொகுதிகளில் போட்டி என்பது இன்னமும் உறுதி செய்யப்படவில்லை. எனவே அனைத்து தொகுதிகளிலும் கட்சி சாராமல் மக்களிடம் நல்ல பெயர் எடுத்திருப்பவர் குறித்து தகவலை சேகரியுங்கள். அவர்களையே நாம் வேட்பாளராக நிறுத்தலாம்’என்று அறிவுறுத்தியிருக்கிறார். விஜய்யின் இந்த ’மூவ்’ ரசிகர்களை உற்சாகத்தில் தள்ளி இருக்கிறது” என்ற வம்பு ”அமைச்சரவை பக்கம் ஒரு கண் வைக்கவும். அநேகமாக மாற்றங்கள் இருக்கலாம்” என்றபடி கிளம்பினார்.பாக்ஸ்உள்நாட்டு போர் வெடித்திருக்கும் சூடானில் சுமார் 3000 இந்தியர்கள் சிக்கியிருக்கலாம் என்று கருதப்படுகிறது. அவர்களை பத்திரமாக மீட்கும் பொறுப்பை மத்திய வெளியுறவுத் துறை இணை அமைச்சர் முரளீதரன் ஏற்றிருக்கிறார். இதற்காக, சூடான் தலைநகர் கார்தோமில் உள்ள இந்திய தூதரகம், சவுதி தலைநகர் ஜெட்டா, டெல்லி ஆகிய மூன்று இடங்களின் ஸ்பெஷல் கன்ட்ரோல் ரூம் திறக்கப்பட்டிருக்கிறது. சூடானில் ஆங்காங்கே சிக்கியிருக்கும் இந்தியர்கள் பஸ்கள் மூலம் கார்தோமிற்கு அழைத்து வரப்பட்டு, சூடான் துறைமுகத்தில் நிற்கும் இந்திய கப்பல் படைக் கப்பல் மூலம் ஜெட்டாவிற்கு பயணமாகி, அங்கிருந்து விமானப்படை விமானங்கள் மூலம் டெல்லி, மும்பை, சென்னைக்கு அழைத்து வரப்படுகிறார்கள். இதுவரை 2000 பேர் தாயகம் திரும்பியிருக்கிறார்கள். கர்நாடக தேர்தலை மனதில் வைத்தே இந்த மீட்பு நடவடிக்கைக்கு ‘ஆபரேசன் காவேரி’ என்று பெயர் சூட்டப்பட்டதாம்!

வம்பானந்தா : வசூல் வேட்டையில் பொன்னியின் செல்வன் நாயகன்!

Related Stories