வங்கிப் பணத்தில் ஆன்லைன் ரம்மி - கேஷியர் எண்ணுகிறார் கம்பி!

ஆன்லைன் சூதாட்ட அலப்பரைகளுக்கு எண்ட் கார்டே கிடையாது போலிருக்கிறது. ஒருபக்கம் ஆன்லைன் சூதாட்டத்தால் தற்கொலைகள் அதிகரிக்க... இன்னொரு பக்கம் பணத்தை எண்ண வேண்டிய வங்கி காசாளர் ஒருவர் ஆன்லைன் சூதாட்டத்துக்காக பணத்தைக் கையாடல் செய்து சிறையில் கம்பி எண்ணிக்கொண்டிருக்கிறார்.விழுப்புரம் , சிந்தாமணியில் உள்ள இந்தியன் வங்கி கிளை ஏப்ரல் 25-ம் தேதி வழக்கம்போல் வளவளாவென மந்தமாக செயல்பட்டுக்கொண்டிருந்தது. தினமும் கொட்டாவி விட்டுக்கொண்டே மேனேஜர், வங்கி ஊழியர், கேஷியர் என மூவரும் சேர்ந்தே வங்கி லாக்கரைத் திறப்பது, மூடுவது, பணம் வைப்பது போன்றவற்றை செய்வார்கள் போலிருக்கிறது.இதே பகுதியில் இருக்கும் இளங்காடு கிராமத்தை சேர்ந்த முகேஷ் என்ற இளைஞர் இங்கு கேஷியராக இருந்தார். ஞாயிற்றுகிழமை உள்ளிட்ட விடுமுறை நாட்களில் கூட சின்சியராக வங்கிக்கு ஆஜராகும் முகேஷ், சில ஊழியர்களை தனியாக வேறு கவனிப்பாராம்..ஏப்ரல் 25-ம் தேதி காலை வங்கிக்கு வந்த முகேஷ், 10.45 மணிக்கு, ‘ உடல்நிலை சரியில்லை; மருத்துவமனைக்கு போக வேண்டும்’ என்று வங்கி மேலாளர் பிரியதர்ஷினியிடம் சொல்லிவிட்டு வெளியே கிளம்பிவிட்டார். இதையடுத்து வேறொருவர் கேஷியராக நியமிக்கப்பட்டார். தற்செயலாக கணக்குகளை சரிபார்த்த அவர், 44 லட்சம் ரூபாய் அபேஸ் செய்யப்பட்டிருப்பதை அறிந்து பதறிப்போய் மேனேஜரிடம் கூறியிருக்கிறார்.உடனே அவர்கள் முகேஷுக்கு போன் செய்ய, அது ஸ்விட்ச் ஆஃப் செய்யப்பட்டிருந்தது. அருகிலிருக்கும் மருத்துவமனைகள், அவரது வீடு என்று தேடியபோதும் மனிதர் கிடைக்கவில்லை. சிட்டாக பறந்துவிட்டார். வங்கியின் சி.சி.டி.வி கேமராவை ஆய்வு செய்தபோது முகேஷ் ஒரு பையில் எதையோ எடுத்துச் செல்வது பதிவாகியிருந்தது. இதையடுத்து, அந்த சி.சி.டி.வி ஃபுட்டேஜுடன் அன்று மாலையே விழுப்புரம் தாலுகா காவல் நிலையத்தில் புகார் அளித்திருக்கிறார் வங்கி மேலாளர்.போலீஸார் முகேஷின் செல்போன் எண்ணை வைத்து டிராக் செய்தபோது, அது சென்னை திருவான்மியூர் பீச் லொகேஷனை காட்டவே, திருவான்மியூர் போலீஸாருக்கு தகவல் தெரிவிக்கப்பட்டது. உடனடியாக போலீஸார் அங்கு சென்று பார்த்தபோது பீச் ஏரியாவில் ஒரு புதரில் முகேஷின் செல்போன் கிடந்திருக்கிறது..போலீஸார் அந்த போனை எடுத்தபோது அந்த போனில் ஒரு அழைப்பு வந்திருக்கிறது. ‘பெங்களூர் பஸ் கிளம்பப்போகுது. சீக்கிரம் வாங்க’என்று டிராவல் நிறுவனம் ஒன்றிலிருந்து சொல்லியிருக்கிறார்கள். உடனே போலீஸார் அந்த பஸ்ஸில் ஏற முகேஷ் வருவான் என காத்திருந்தார்கள். ஆனால், வரவில்லை.இதற்கிடையில் அவனது சொந்த ஊரான இளங்காடு கிராமத்தில் இருக்கும் நண்பன் அருண் என்பவருடன் வேறொருவர் அலைபேசியில் இருந்து பேசியிருக்கிறான் முகேஷ். அதாவது, வங்கியில் கையாடல் செய்த பணத்துடன் பெங்களூர் செல்ல முடிவெடுத்து டிக்கெட் புக் செய்ததாகவும், அங்கு தேர்தல் பிரசாரம் சூடுபிடித்திருப்பதால் பணத்தைக் கொண்டு போக முடியாது என்பதால், தன் பயணத் திட்டத்தை பாண்டிச்சேரிக்கு மாற்றிவிட்டதாகவும் தெரிவித்திருக்கிறான் முகேஷ். உடனே அந்த நண்பர் முகேஷின் குடும்பத்திற்கு போன் செய்து விஷயத்தைச் சொல்லிவிட்டார்.போலீஸார் மீண்டும் முகேஷின் வீட்டுக்கு சென்றபோது இந்த விஷயத்தை முகேஷின் பெற்றோர் சொல்லிவிட்டார்கள். இதையடுத்தே முகேஷை பாண்டிச்சேரி செல்லும் பாதி வழியில் மடக்கியிருக்கிறது போலீஸ்..முகேஷிடம் விசாரித்ததில், இந்தப் பணத்தை கையாடல் செய்யும் முன்பே செல்போனுடன் லிங்க் ஆகாத வங்கிக் கணக்குகளில் இருந்து சுமார் 30 லட்சம் ரூபாயை கையாடல் செய்து, ஆன்லைன் ரம்மியில் கோட்டை விட்டது தெரியவந்தது. போதாததற்கு நண்பர்கள் பலரிடமும் பணத்தை கடனாக வாங்கியவன், அதற்கு மேல் கடன் வாங்க முடியாத நிலையில் பெரும் தொகையோடு எஸ்கேப் ஆகியிருக்கிறான் என்பதும் தெரியவந்துள்ளது.இவை எல்லாவற்றையும்விட அவனிடம் இருந்த மாஸ்டர் பிளானை கேட்டு போலீஸாரே ஜெர்க் ஆகிவிட்டார்கள். அதாவது, ’சிவாஜி’திரைப்படத்தில் ரஜினி, சிவாஜியாக செத்து, எம்.ஜி.ஆராக திரும்பி வாழ்க்கையை நடத்துவதுபோல தற்கொலை செய்துகொண்டதாக நாடகமாடி, முரளியாக புது வாழ்க்கை தொடங்க திட்டமிட்டிருக்கிறான் முகேஷ். முகேஷுக்கு இன்னும் திருமணம் ஆகவில்லை; பாண்டிச்சேரியில் இருந்து கோவா சென்று, அங்கு ஆங்கிலோ இந்தியன் பெண்ணை மணம் முடித்து, இந்த பணத்தில் பார் வைத்து, அம்பானி போல பெரும் தொழிலதிபர் ஆவதே முகேஷின் லட்சியமாக இருந்தது. எல்லாம் சரி... பணத்தைக் கையாடல் செய்ய தெரிந்த முகேஷுக்கு போலீஸாரிடம் தப்பிக்க வழி தெரியாததுதான் விதிவசம்.விழுப்புரம் தாலுகா காவல் நிலைய ஆய்வாளர் ஆனந்தனிடம் கேட்டோம், ”முகேஷை அவன் நண்பர்கள் மூலமும் செல்போன் டவர் லொகேஷன் மூலமும் ட்ராப் செய்து பிடித்தோம். திருட்டு உள்ளிட்ட வழக்குகள் பதிவுசெய்து கைதுசெய்து நீதிமன்றக் காவலில் சிறையில் அடைத்திருக்கிறோம். விசாரணையில் இன்னும் தகவல்கள் வரலாம். 43 லட்சத்து 89 ஆயிரத்து 500 ரூபாய் காணாமல் போன தொகையில் 3,200 ரூபாய் போக மீதித்தொகையை கைப்பற்றிவிட்டோம் என்பதுதான் ராப்பகலாக கண்விழித்து உழைத்ததற்குப் பலன்” என்றார்.கடந்த சில ஆண்டுகளாகவே தேதிய மயமாக்கப்பட்ட வங்கிகள் ஏனோதானோ என்றே செயல்பட்டுவருகின்றன. நிரந்தர ஊழியர்களை நியமிக்காமல் செக்யூரிட்டி வேலைக்கு ஆட்களை எடுப்பதுபோல அவுட் சோர்ஸிங் முறையில் ஆட்களை எடுக்கிறார்கள். குறிப்பாக, இந்தியன் வங்கியின் எந்தக் கிளையில் நுழைந்தாலும், பான்பராக் வாசனையுடன் வாழ்ந்துகெட்ட வீடு மாதிரியே தோற்றம் அளிக்கிறது. அப்படிதான் கிட்டத்தட்ட முக்கால் கோடி ரூபாய் பணம் கையாடல் செய்யப்பட்டும் அதுபற்றிய தகவலே தெரியாமல் கோட்டை விட்டிருக்கிறது விழுப்புரம் சிந்தாமணி இந்தியன் வங்கி.ஆபிஸர்களே எவனோ லவட்டிக்கொண்டு போக அது உங்கள் பணம் அல்ல; மக்கள் பணம். இனியாவது மக்கள் பணத்தை உருப்படியாக பாதுக்காக்கும் வழியைப் பாருங்கள்! பி.கோவிந்தராஜு படங்கள். ஜி.ஏ. ஷக்திராம்.

வங்கிப் பணத்தில் ஆன்லைன் ரம்மி - கேஷியர் எண்ணுகிறார் கம்பி!

Related Stories