லைட்மேன் : மாவீரனுக்கு செக்... ஜெயிலர் பக் பக்!

தயாரிப்பாளர் நிக் ஆர்ட்ஸ் சக்ரவர்த்தி தனது 56 வது வயதில் புற்றுநோயால் காலமாகியிருக்கிறார். ’97 ல் ‘ராசி’படம் மூலம் அஜித்துடன் தொடங்கிய நட்பு சரியாக 10 ஆண்டுகளுக்கு ’வரலாறு’வரை நீடித்ததும் அந்த 10 ஆண்டுகளில் இருவரும் இணைந்து ‘வாலி, ‘வில்லன்’உள்ளிட்ட 9 படங்களைக் கொடுத்ததும் தமிழ் சினிமாவின் வரலாறு. பொதுவாக, இப்படி இணைந்து பணிபுரிபவர்கள் பிரிய நேரும்போது ஒருவர் மீது ஒருவர் குற்றம், குறைகளை அள்ளிவீசுவது சகஜம். ஆனால் பிரிந்திருந்த இந்த 16 ஆண்டுகளில் அஜித் குறித்து சக்ரவர்த்தியோ, சக்ரவர்த்தி குறித்து அஜித்தோ ஒரு சிறு குறையைக்கூட பகிர்ந்துகொண்டதே இல்லை. # பிரிந்தாலும் மேன்மக்கள் மேன்மக்களே! ‘உங்களை வைத்து படம் இயக்க இரண்டு கதைகள் வைத்திருக்கிறேன்’ என்று விஷால் சொன்னதும் சும்மா ஒரு ஆறுதலுக்காகவாவது ‘நான் இருக்கிறேன். சேர்ந்து பயணிப்போம் நண்பா’என்று விஜய் அல்வா கொடுத்தது வைரல் ஆகிக்கொண்டிருக்க, அதே டயலாக்கை சிவகார்த்திகேயனை நோக்கி இயக்குனர் நெல்சன் சேவியரும் சொல்லியிருப்பது ஒரு சோக சம்பவம். சி.கா.வின் ‘மாவீரன்’ஆகஸ்ட் 11ல் வருவதாக அறிவிக்கப்பட்ட நிலையில் அதே தேதியில் ரஜினி, நெல்சன் காம்பினேஷனின் ஜெயிலரும் வரப்போவதை அறிந்த தனது நெருங்கிய நண்பனான நெல்சனுக்கு போன் போட்டு, ‘நண்பா நீங்க கொஞ்சம் தள்ளி வரக்கூடாதா?’ என்று கேட்டதற்காகத்தான் ‘சேர்ந்து பயணிப்போம் வா நண்பா’ என்று சிரித்துக்கொண்டே பதில் அளித்தாராம் சேவியர். # அடப் பாவியர்! மணிரத்னம், கமல் கூட்டணியின் மெகா பட்ஜெட் படத்துக்கு ஆழ்வார்ப்பேட்டை ஆண்டவருக்கு ஆண்டாளாகப்போவது த்ரிஷா இல்லைன்னா நயன்தாரா என்று 1264 சினிமா பத்திரிகையாளர்களும் சோடி போட்டுப் பார்த்திருந்த நிலையில், யாரும் எதிர்பாராத ட்விஸ்டாக ‘டர்ட்டி கேர்ள்’வித்யாபாலன் என்ட்ரி கொடுத்திருக்கிறார். படத்தில் வித்யாவின் கேரக்டர் குறித்து ரத்ன சுருக்கமாக அவருக்கு சொன்ன மணிரத்னம் ‘ நம்ம படம் முடியற வரைக்கும் நியூஸ் பேப்பர் படிக்கிறதை கொஞ்சம் நிறுத்தி வையுங்க’ என்று சொல்ல, உரத்துச் சிரித்தபடி ஓகே சொன்னாராம். # சரியான நியூசென்ஸ்!.விக்ரமும் கவுதம் மேனனும் முதிர்பருவத்து இளைஞர்களாக இருந்த 2017ம் ஆண்டு தொடங்கப்பட்ட படம் ‘துருவ நட்சத்திரம்’. சும்மாவே நூறு பிரச்னைகள் இருந்தநிலையில், இடையில் ரிலீஸான விக்ரமின் படங்கள் அடுத்தடுத்து தோல்வி அடைந்ததால், துருவ நட்சத்திரம் துருப்பிடிக்க ஆரம்பித்தது. இந்தப் படம் முடங்கியதாலேயே அடுத்தடுத்த படங்கள் இயக்கமுடியாமல் பார்ட் டைம் நடிகராகிப்போனார் கவுதம். இப்போது பொன்னியின் செல்வன் இரு பாகங்களும் விக்ரமின் மார்க்கெட்டை கொஞ்சம் தூக்கி நிறுத்தியிருப்பதால் துருவ நட்சத்திரத்துக்கு தூசு தட்ட ஆரம்பித்திருக்கிறார்களாம். தற்போதைய திட்டப்படி இப்படம் ஜூன் மாதம் ரிலீஸானால் 5 வருடங்களுக்கு முந்தைய ஐஸ்வர்யா ராஜேஷ், சிம்ரன், பார்த்திபன் ஆகியோரைப் பார்க்கலாம். # துருவ நட்சத்திரம் மின்னுமா?சீக்ரெட்மன்னர்கள் என்றால் சண்டை போட்டு மண்டை உடையத்தானே வேண்டும்? சோழ மன்னருக்கு முந்தைய வாரம் வந்த பாண்டிய மன்னன் ஓரளவு, தியேட்டர் வாடகைக்கு ஆபத்தில்லாமல் வசூல் செய்து வந்த நிலையில், ‘நாங்க வர்றப்ப அவங்க ஒரு தியேட்டர்லகூட இருக்கக்கூடாது’ என்று வலுக்கட்டாயமாக வழி அனுப்பி வைக்க, தெந்திசையில் ஓரிரு தியேட்டர்களில் மட்டுமே நடமாடிக்கொண்டிருக்கிறார்கள் லோ பட்ஜெட் பாண்டியர்கள். # மகுட பாண்டிகளை லகுட பாண்டிகளாக்கிய தருணம்!

லைட்மேன் : மாவீரனுக்கு செக்... ஜெயிலர் பக் பக்!

Related Stories