மோடி ஐ.பி.எல்.

எடப்பாடி ரன் அவுட் ஸ்டாலின் ஸ்டம்ப் அவுட் ஜி ஸ்கொயர் வாஷ் அவுட்கிரிக்கெட் ரசிகர்களை சீட்டின் நுனிக்குத் தள்ளி நகத்தைக் கடிக்க வைக்கும் ஐ.பி.எல். மேட்சைப் போலவே ஏப்ரல் 26, 28 ஆகிய நாட்களில் டெல்லியில் நடந்த அரசியல் மேட்ச் தமிழக அரசியலை தகிக்க வைத்துள்ளது. ஜி ஸ்கொயர் அலுவலகங்களில் ரெய்டு நடந்துக்கொண்டிருக்கும்போதே தமிழக முதல்வர் ஸ்டாலின், மத்திய நிதியமைச்சரை சந்தித்தது, இன்னொரு பக்கம் எதிர்க்கட்சித் தலைவர் எடப்பாடி பழனிசாமி, ஆளுநர் ஆர்.என்.ரவி ஆகியோர் அடுத்தடுத்து டெல்லிக்குப் படையெடுத்தது என தமிழக அரசியல் களத்தில் 20:20 மேட்சைவிட அனல் பறக்கிறது!எடப்பாடி பழனிசாமி அ.தி.மு.க.வின் பொதுச்செயலாளராக பொறுப்பேற்ற பின், முதல் முறையாக உள்துறை அமைச்சர் அமித்ஷாவை சந்திக்க ஏப்ரல் 26-ம் தேதி, கோவையிலிருந்து டெல்லி வந்தார். கூடவே கையோடு கொண்டுவந்திருந்த சேலம் மல்கோவா மாம்பழங்களை பிரதமர் மோடி, அமித் ஷா, ஜே.பி.நட்டா ஆகியோருக்கு எம்.பி. தம்பிதுரை மூலம் கொடுத்தனுப்பினார். அதன்பின்னர் இரவு டெல்லி தமிழ்நாடு இல்லத்தில் இருந்து எடப்பாடி, கே.பி.முனுசாமி, ஜெயகுமார், சி.வி.சண்முகம், தங்கமணி, வேலுமணி, சி.விஜயபாஸ்கர் ஆகியோர் அமித்ஷா இல்லத்திற்கு கிளம்பிச் சென்றார்கள்..அங்கு சென்றதும் விஜயபாஸ்கரை மட்டும் காத்திருக்கச் சொல்லிவிட்டு, மற்றவர்கள் உள்ளே சென்றனர். வழக்கமாக சந்திப்பு நேரத்தை மிகக் குறைவாகவே அ.தி.மு.க. தலைவர்களுக்கு ஒதுக்கும் அமித் ஷா, இந்த முறை சுமார் 50 நிமிடங்கள் ஒதுக்கி பேசிக்கொண்டிருந்தார் என்கிறார்கள். இந்த சந்திப்பின்போது அமித்ஷாவுடன், பா.ஜ.க தேசிய தலைவர் ஜே.பி.நட்டா, தமிழக பா.ஜ.க தலைவர் அண்ணாமலை ஆகியோரும் இருந்தனர். அங்கு பேசப்பட்ட விஷயங்கள் குறித்து நம்மிடம் பகிர்ந்துக்கொண்டார் சீனியர் பா.ஜ.க நிர்வாகி ஒருவர்...“2019-ம் ஆண்டு நாடாளுமன்றத் தேர்தலில் அ.தி.மு.க. கூட்டணியில் பா.ஜ.க-வுக்கு ஐந்து தொகுதிகள் மட்டுமே ஒதுக்கீடு செய்யப்பட்டன. இந்த முறை அதிக தொகுதிகளில் பா.ஜ.க. போட்டியிட விரும்புகிறது. ஆகவே, தி.மு.க. கூட்டணியில் காங்கிரஸுக்கு வழங்கப்படும் தொகுதியைவிட அதிக தொகுதிகள் வேண்டும். குறிப்பாக, மூன்றில் ஒரு பங்கு அளிக்க வேண்டும் என்று அமித் ஷா வலியுறுத்தினார்.அதற்கு எடப்பாடி, ‘கூட்டணிக் கட்சிகளுடன் ஆலோசனை நடத்திவிட்டு முடிவு செய்துகொள்ளலாம்’ என்று கூற, அப்போது அண்ணாமலையிடம் இருந்து ஒரு பேப்பரை வாங்கி, எடப்பாடியிடம் கொடுத்தார் அமித் ஷா. அந்த பேப்பரில் கன்னியாகுமரி, நெல்லை, தென்காசி, தூத்துக்குடி, கோவை, வேலூர், ராமநாதபுரம் உட்பட 15 தொகுதிகள் எழுதப்பட்டிருந்தன. தொடர்ந்து பேசிய அமித் ஷா, ‘பேப்பரில் எழுதப்பட்டிருக்கும் தொகுதிகளில் பா.ஜ.க. போட்டியிட விரும்புகிறது. கூட்டணி கட்சிகளுடன் பேசிவிட்டு ஜூன் மாதம் என்னை வந்து சந்தியுங்கள்’ என்று கூறியதுடன் ‘ஓ.பன்னீர்செல்வத்தை கட்சியில் மீண்டும் இணைத்துக் கொள்ளுங்கள்’ என்றார். ஆனால் எடப்பாடியோ, ‘ப்ளீஸ், பன்னீர்செல்வத்துக்கு ஆதரவாகப் பேச வேண்டாம்’ என்று கூற, பதிலுக்கு அமித் ஷா, ‘ஒருங்கிணைந்த அ.தி.மு.க-வைத்தான் பா.ஜ.க விரும்புகிறது. மற்றவை எல்லாம் ஜூன் மாதம் பேசிக் கொள்ளலாம்’ என்று கறாராகச் சொல்லி அனுப்பி வைத்துள்ளார்..இந்த சந்திப்பு முடிந்தவுடன் டெல்லி தமிழ்நாடு இல்லத்திற்குச் சென்றபோது, அங்குதான் வேறொரு பஞ்சாயத்து நடந்துள்ளது. தன்னை மட்டும் வெளியே நிற்க வைத்துவிட்டு, அமித்ஷாவை சந்திக்கப் போனது ஏன்? என விஜயபாஸ்கர் எடப்பாடியிடம் கேட்க, குட்கா வழக்கை எடப்பாடி காரணமாகக் கூற, அப்போது கொந்தளித்த விஜயபாஸ்கர், வேலுமணி மீது இருக்கும் வழக்கை சுட்டிக்காட்டி பேச... ஒருவழியாக மற்ற தலைவர்கள் விஜயபாஸ்கரை சமாதானப்படுத்துவதற்குள் போதும் போதும் என்றாகிவிட்டது” என்று சொல்லி முடித்தார்.ஸ்டாலின் விசிட் பற்றி மற்றொரு பா.ஜ.க நிர்வாகியிடம் பேசினோம்... “ஏப்ரல் 27-ம் தேதி இரவு 8.30 மணிக்கு ஏர் இந்தியா பயணிகள் விமானத்தில் டெல்லி செல்ல திட்டமிட்டு சென்னை விமான நிலையத்திற்கு சென்றார் முதல்வர் ஸ்டாலின். ஆனால், ஏர் இந்தியா விமானத்தின் இன்ஜினில் கோளாறு காரணமாக விமானம் ரத்து செய்யப்பட்டது.இதனால் மீண்டும் வீடு திரும்பிய ஸ்டாலின் மறுநாள் ஏப்ரல் 28ம் தேதி காலை 6 மணிக்கு டெல்லி புறப்பட்டுச் சென்றார். அன்று காலை 11.30 மணியளவில் ஜனாதிபதி மாளிகை சென்ற முதல்வர் ஸ்டாலின், அழைப்பிதழ் ஒன்றைக் கொடுத்தார். அது, மறைந்த தி.மு.க. தலைவரான கருணாநிதியின் நினைவாக, சென்னை கிண்டியில் ரூ.230 கோடி மதிப்பில் புதிதாக கட்டப்பட்டுள்ள பன்னோக்கு மருத்துவமனை திறப்பு விழா மற்றும் கலைஞர் நூற்றாண்டு விழா அழைப்பிதழாகும்..இந்த டெல்லி பயணத்தின் போதே பிரதமர் மோடி, உள்துறை அமைச்சர் அமித் ஷா ஆகியோரையும் சந்திக்க முதல்வர் ஸ்டாலின் நேரம் கேட்டிருக்கிறார். ஆனால், ‘ஜி ஸ்கொயர் ரெய்டு நடக்கும் நேரத்தில் சந்திப்பு நடந்தால் தேவையில்லாத சர்ச்சைகள் ஏற்படும். நிதியமைச்சர் நிர்மலா சீதாராமனை சந்தியுங்கள்’ என்று முதல்வர் ஸ்டாலினுக்கு பா.ஜ.க. தரப்பில் அறிவுறுத்தப்பட்டது.இதிலும் சிறிய மாற்றம். மத்திய நிதியமைச்சரை அவரது அலுவலகத்தில் சந்திக்காமல், டெல்லி விமான நிலையத்தில் வைத்து எதேச்சையாக சந்திப்பது போல ஏற்பாடு செய்யப்பட்டது. அதன்படி டெல்லி விமான நிலையத்தில் உள்ள வி.வி.ஐ.பி. வெயிட்டிங் அறையில் நிர்மலா சீதாராமனை முதல்வர் ஸ்டாலின் சந்தித்தார்..சுமார் 13 நிமிடங்கள் இந்த சந்திப்பு நடந்தது. அப்போது ஸ்டாலின் தரப்பில் ‘ஜி ஸ்கோயர் நிறுவனத்துக்கும் தி.மு.க-வுக்கும் எந்தத் தொடர்பும் இல்லை. அதேபோல என் குடும்ப உறுப்பினர்களுக்கும் அந்த நிறுவனத்துடன் தொடர்பு கிடையாது. இதில் தேவையில்லாமல் என் குடும்ப உறுப்பினர்களை இணைத்து தவறான தகவல் பரப்பி வருகின்றனர். ஜி ஸ்கொயர் நிறுவனம் தவறு செய்திருந்தால், சட்ட நடவடிக்கை எடுத்துக்கொள்ளுங்கள். என் குடும்ப உறுப்பினர்களை தொந்தரவு செய்ய வேண்டாம்’ என்று சொல்லப்பட்டிருக்கிறது. இதை மேலிடத்துக்கு எடுத்துச் சொல்வதாக நிர்மலா தரப்பில் கூறப்பட்டது. அதன் பிறகே ஸ்டாலின் சென்னை புறப்பட்டார்” என்றார் தெளிவாக..இதுகுறித்து தி.மு.க தரப்பில் பேசியபோது, “ஆமாம், ஜி ஸ்கொயர் நிறுவனத்துக்கும் தி.மு.க-வுக்கு எந்த தொடர்பும் இல்லை. ஆறு மாதங்களுக்கு முன்பே அந்த நிறுவனத்தின் செயல்பாடுகளில் முதல்வருக்கு அதிருப்தி ஏற்பட்டிருக்கிறது. இதனால், அந்த நிறுவனம் தொடர்புடையவர்களை அழைத்து கடுமையாக கண்டித்தவர், அங்கு பணியில் இருந்த ‘புருஷர்’ பெயர் கொண்டவரை விடுவிக்கச் சொல்லிவிட்டார். சொல்லப்போனால், ஜி ஸ்கொயர் தற்போது தி.மு.க-வுக்கு வேண்டாத சுமையாகிவிட்டது. எனவே, அதை முற்றிலுமாக கைகழுவும்படி சிலருக்கு முதல்வர் கண்டிப்பான உத்தரவு பிறப்பித்துள்ளார்” என்றார்கள். அதேசமயம், ஜி ஸ்கொயர் தரப்பிலும், “சண்முகராஜா எங்களுடைய ஆடிட்டர் கிடையாது. அவருக்கும் எங்களுக்கும் சம்பந்தமே இல்லை” என்று பதிலுக்கு தகவல் கசியவிட்டு வருகின்றனர். இதுபற்றி மேலிடம் தொடர்புடையவர்களிடம் விசாரித்தால், “சண்முகராஜா முதல்வர் குடும்பம் உறுப்பினர் ஒருவரின் ஆடிட்டர். அந்த குடும்ப உறுப்பினர்தான் ஸ்டாலினை தேசிய அளவில் கிங் மேக்கராக உருவாக்க திட்டங்கள் தீட்டி வருகிறார். அதற்கு செக் வைக்கும் வகையில் அழுத்தம் கொடுக்கவே சண்முகராஜாவிடம் விசாரணை நடத்தியிருக்கிறார்கள். ஆனால், அதெற்கெல்லாம் தி.மு.க அஞ்சாது. முதல்வர் ஸ்டாலின் முன்பைவிட தீவிரமாக தேசிய அரசியலில் கிங் மேக்கராக செயல்படுவார். சொல்லப்போனால், 2024 நாடாளுமன்றத் தேர்தலில் பிரதமர் யார் என்று தீர்மானிப்பதே ஸ்டாலின்தான்...” என்றார்கள். மொத்தத்தில் அமிஷ் ஷாவிடம் எடப்பாடியின் பாச்சா பலிக்கவில்லை. பாதியிலேயே ரன் அவுட் ஆகிவிட்டார். மோடி மற்றும் அமித் ஷாவை சந்திக்க எடுத்த ஸ்டாலினின் முயற்சிகள் பலனளிக்கவில்லை. கிரீஸைவிட்டு ஏறி அடிக்க பார்த்தவர், ஸ்டம்ப் அவுட் ஆகிவிட்டார். இன்னொரு பக்கம் ஜி ஸ்கொயரை கைகழுவி, வாஷ் அவுட் ஆக்கிவிட்டது தி.மு.க தரப்பு..சரி, இதே நாட்களில் டெல்லியில் ஆளுநருக்கு என்ன வேலை? அதுபற்றி பேசிய ராஜ்பவன் அதிகாரிகள், “டெல்லியில் அமித் ஷாவை சந்தித்த ஆளுநர் ஆர்.என்.ரவி, ’தமிழகத்தை எனக்கு பிடித்திருக்கிறது. ஆனால், அடிமட்ட லெவலுக்கு இறங்கி அரசியல் செய்யும் தமிழக அரசியல் எனக்கு பிடிக்கவில்லை. எனக்கு தேசிய பாதுகாப்பு துணை ஆலோசகர் பதவி வழங்கினால், சிறப்பாக செயல்படுவேன்’ என்று தெரிவித்திருக்கிறார். இதற்கு அமித் ஷாவிடம் இருந்து மெளனமே பதிலாக கிடைத்திருக்கிறது” என்றார்கள்.அமித் ஷா – எடப்பாடி சந்திப்பு குறித்து அ.தி.மு.க செய்தித் தொடர்பாளர் பாபு முருகவேலிடம் கேட்டோம்... “இந்த சந்திப்பில் தி.மு.க அரசின் மக்கள் விரோத செயல்கள் பற்றி புகார் அளிக்கப்பட்டது. கூட்டணிக் கட்சி என்கிற வகையில் பா.ஜ.க-வுடன் நாடாளுமன்ற தேர்தல் பற்றியும் ஆலோசிக்கப்பட்டது” என்றார்.ஸ்டாலின் – நிர்மலா சீதாராமன் சந்திப்பு பற்றி பா.ஜ.க மாநில துணைத் தலைவர் நாராயணதிருப்பதியிடம் கேட்டதற்கு, “அது யதேச்சையாக நடந்த சந்திப்பு. அதில் எந்த அரசியல் பேசியதாக தெரியவில்லை” என்றார் சுருக்கமாக! ஃபைனல் மேட்சுக்கு இன்னும் நாட்கள் இருக்கின்றன. பார்ப்போம்! பாபு, மனோ சௌந்தர் படங்கள் : ம.செந்தில்நாதன்

மோடி ஐ.பி.எல்.

Related Stories