பறிக்கப்பட்ட திருச்சபை பதவி... தாக்கப்பட்ட பிஷப் காட்பிரே! _ ஓடி ஒளியும் தி.மு.க. எம்.பி.?

-அ.துரைசாமிஅமைதியை போதிக்கும் இடமானாலும் அங்கே அரசியல் கலந்தால் அடிதடி இடம்பிடித்துவிடும் என்பதற்கு எடுத்துக்கட்டாக, நெல்லை சி.எஸ்.ஐ.திருச்சபையில் நடந்திருக்கிறது ஒரு பயங்கர கோஷ்டி மோதல். இதில் திருச்சபையின் போதகரே தாக்கப்பட்டிருப்பதும், இது தொடர்பான பஞ்சாயத்து அறிவாலயத்துக்கு வந்திருப்பதும்தான் யாரும் எதிர்பாராத திடீர் ட்விஸ்ட்.தமிழ்நாட்டில் மொத்தம் உள்ள 24 சி.எஸ்.ஐ. திருச்சபைகளில் திருநெல்வேலி திருச்சபையும் ஒன்று. இதன் கட்டுப்பாட்டில் 687 தேவாலயங்கள் உள்ளன. 101 பாஸ்ட்ரேட்டுகள், இரண்டு லட்சம் உறுப்பினர்கள் இருக்கிறார்கள். தவிர, 327 தொடக்கப் பள்ளிகள், 13 மேல்நிலைப் பள்ளிகள், ஆறு கல்லூரிகள், 3 ஆசிரியர் பயிற்சி நிறுவனங்களும் உள்ளன. இப்படிப் பழம்பெருமை மிக்க இந்தத் திருச்சபையை நிர்வகிப்பதில்தான் கிறிஸ்தவர்களிடையே அடிக்கடி கடுமையான மோதல் ஏற்பட்டு சந்தி சிரிக்கிறது..இதுகுறித்து, ஓய்வுபெற்ற திருச்சபை ஊழியர் ஒருவரிடம் கேட்டபோது, “திருநெல்வேலி திருச்சபை, கோடிகளில் புரளும் திருச்சபை. இதை நிர்வகிக்க, தேர்தல் நடத்தப்படுகிறது. முதலில் எல்லா சர்ச் உறுப்பினர்களும் சேர்ந்து 308 திருமண்டல கவுன்சில் உறுப்பினர்களைத் தேர்ந்தெடுப்பார்கள். இந்த கவுன்சில் உறுப்பினர்கள்தான் திருமண்டல லே செயலாளர், லீகல் செயலாளர் மற்றும் உறுப்பினர்களைத் தேர்வு செய்வார்கள்.கடந்த 2021ம் ஆண்டு நடைபெற்ற தேர்தலில் டி.எஸ். பட்டணம் பொடி அதிபர் ஜெயசிங், வேதநாயகம் கோஷ்டிகள் லே செயலாளர் மற்றும் லீகல் செயலாளர் பதவிக்கு மோதினர். அதில், ஜெயசிங் அணி வெற்றி பெற்று நிர்வாகத்தைக் கைப்பற்றியது. அவர்கள்தான் பிஷப்பாக பர்னபாஸை கொண்டுவந்தார்கள். ஆனால், ஆரம்பத்திலேயே பிஷப்புக்கும் லே செயலாளர் ஜெயசிங்கிற்கும் மோதல் ஏற்பட, தோல்வியடைந்த வேதநாயகம் டீம் பிஷப்பை ஆதரிக்கத் தொடங்கியது.பிஷப் தனது அதிகாரத்தைப் பயன்படுத்தி திருநெல்வேலி தி.மு.க. எம்.பி. ஞானதிரவியத்தை திருச்சபையின் கல்வி நிலவரக்குழு மற்றும் புனித ஜான்ஸ் மேல்நிலைப்பள்ளி தாளாளராய் நியமனம் செய்தார். அண்மையில் பிஷப் தலைமையில் நடைபெற்ற கல்வி நிலவரக்குழு உறுப்பினர்கள் கூட்டத்தில், மாணவிகளிடம் பாலியல் சீண்டலில் ஈடுபட்டு சஸ்பெண்டான பேராசிரியர் மற்றும் ஆசிரியர்களுக்கு பதவி உயர்வு கொடுக்கக் கோரும் தீர்மானத்தை வாசித்தனர்.அதற்கு பிஷப் எதிர்ப்புத் தெரிவிக்கவே, ‘அப்போ டயோசீஸில் என்ன ம ... ரு வேலை நடக்கு?’ என்று எம்.பி சண்டை போட்டார். இதனால் அதிரடி ஆக்ஷனில் இறங்கிய பிஷப் பர்னபாஸ், ஞானதிரவியம் எம்.பி.யை கல்வி நிலவரக்குழு மற்றும் பள்ளி தாளாளர் பதவியிலிருந்து நீக்கினார். இதனால் டென்ஷனான ஞானதிரவியம், தாளாளர் அறையை பூட்டி சாவியைக் கொண்டுபோய்விட்டார்..இதனைத் தொடர்ந்து திருச்சபையின் பொருளாளர் பதவியிலிருந்து மனோகரனை நீக்கிவிட்டு ஜே.எஸ்.எம். சபை பிஷப் காட்பிரே நோபிளை நியமனம் செய்தார் பிஷப் பர்னபாஸ். பதவியேற்கப் போன காட்பிரே நோபிள்தான் ஓட ஓட விரட்டி அடிக்கப்பட்டிருக்கிறார்” என்றார்.காட்பிரே நோபிளிடம் பேசினோம். “நெல்லை சி.எஸ்.ஐ. திருச்சபை குடிகாரனிடமும் பொடிகாரனிடமும் சிக்கித் தவிக்கிறது. திருச்சபையில் இருக்கும் ரவுடியிசம், லஞ்சம், மோசடியை ஒழிப்பேன் என்று சொல்லித்தான் பிஷப்பாய் பதவியேற்றார், பர்னபாஸ். ஆனால், லே செயலாளர் ஜெயசிங் அதற்கு ஒத்துழைக்கவில்லை. ‘லே செயலாளர் ஆவதற்கு எட்டுக் கோடி போட்டிருக்கிறேன். அதை எப்படி எடுப்பது?’ என்று சொல்லி, பிஷப்பை செயல்பட விடவில்லை.அவருக்குப் பின்னணியாய் அரசியல் பலத்துடன் ஞானதிரவியம் எம்.பி.யும் இருக்கிறார். இருவருமே இல்லீகல் ஆக்டிவிட்டி செய்ய பிஷப்பைத் தூண்டுகிறார்கள். அதற்கு உடன்படாமல், ஞானதிரவியம் எம்.பி.க்கு கொடுக்கப்பட்ட பொறுப்புகளை பிஷப் எடுத்துவிட்டதால் அவரது அடியாட்கள் திருச்சபை தலைமை அலுவலகத்தை முற்றுகையிட்டார்கள்.அவர்கள் மனநிலையை அறிந்து, ‘வாருங்கள்’ என்று பிஷப் கேட்டுக் கொண்டதற்கிணங்க நான் அங்கு போனேன். என்னை உள்ளே விடாமல் தடுத்த ரவுடிகள், என்னை அடித்து உதைத்து விரட்டிவிட்டார்கள். நெல்லை திருச்சபை கிறிஸ்தவர்கள் அனைவரும் தி.மு.க. ஆதரவாளர்கள். அதனால்தான் பாளையங்கோட்டை தொகுதி தி.மு.க.வின் கோட்டையாய் விளங்குகிறது..ஆனால், தி.மு.க. எம்.பி ஞானதிரவியம் திருச்சபைக்குள் புகுந்து குழப்பம் பண்ணுகிறார். அடியாட்களை வைத்து கிறிஸ்தவர்களை தாக்குகிறார். விரைவில் நாடாளுமன்றத் தேர்தல் வர இருக்கும் நேரத்தில் கிறிஸ்தவர்களின் கோபத்திற்கு தி.மு.க ஆளாகிவிடக்கூடாது என்று முதல்வர் ஸ்டாலினுக்கு கடிதம் எழுதியிருக்கிறேன்’’ என்றார்.இதனைத் தொடர்ந்து காட்பிரே நோபிள் பாளையங்கோட்டை போலீஸில் புகார் செய்யவே, ஞானதிரவியம் எம்.பி. உள்ளிட்ட 33 பேர் மீது ஐந்து பிரிவுகளில் வழக்குப் பதிவு செய்யப்பட்டது. ‘கட்சியின் பெயருக்கு குந்தகம் விளைவிக்கும் உங்களை கட்சியைவிட்டு ஏன் நீக்கக் கூடாது?’ என்று விளக்கம் கேட்டிருக்கிறது கட்சித் தலைமை. அவர் முன்ஜாமீனுக்காக ஓடிக் கொண்டிருக்கிறார். இதுகுறித்து ஞானதிரவியம் எம்.பி. விளக்கம் கூற முன்வராத நிலையில் அவருக்காக சண்டை போட்ட மூன்றடைப்பு வக்கீல் ஜானிடம் பேசினோம். “நான் திருச்சபையின் சொத்துப் பாதுகாப்பு அலுவலர். எனவே, சபை சொத்துகளை பாதுகாக்க வேண்டியது எனது கடமை அதனாலேயே அங்கு நின்று கொண்டிருந்தேன். காட்பிரே நோபிள் தனி சர்ச் நடத்தி வருகிறார். அவருக்கும் திருச்சபைக்கும் சம்பந்தமே இல்லை.அவரை திருச்சபை பொருளாளராய் பிஷப் நியமனம் செய்திருக்கிறார். அவர் பதவியேற்க வரும்போது பிரச்னை வரும், திருச்சபையை இழுத்துப் பூட்டிவிடலாம் என்பதே பிஷப் தரப்பின் எண்ணம். ஏனென்றால் அடுத்த ஆண்டு நடைபெற வேண்டிய திருச்சபை தேர்தலை அவர்கள் முன்கூட்டியே நடத்தத் துடிக்கிறார்கள். நான் ஞானதிரவியத்தின் ஆள் இல்லை. மூன்றடைப்பு அ.தி.மு.க கிளைச் செயலாளராய் இருக்கிறேன்’’ என்றார்.இந்த விஷயம் தென்மண்டல ஐ.ஜி. அஸ்ராகர்க்கிடம் போகவே, அவர் ‘ஞானதிரவியம் எம்.பி. உள்ளிட்ட 33 பேரையும் தூக்குங்கள்’என்று உத்தரவிட்டிருப்பதால் என்ன செய்வதென்று தெரியாமல் விழிபிதுங்கி நிற்கிறது எம்.பி. தரப்பு.சர்ச்சில் இவ்வளவு சர்ச்சைகளா? கர்த்தர் அனைத்தையும் கவனித்துக்கொண்டுதான் இருக்கிறார் மக்கா.