நிதிஷுன் நிழல் யுத்தம்!

மத்தியில் ஆளும் பாரதிய ஜனதா ஆட்சியை எப்படியாவது அடுத்த ஆண்டு நாடாளுமன்ற தேர்தலில் தோற்கடித்து விடவேண்டும் என்று பீஹார் முதலமைச்சர் நிதிஷ்குமார் கங்கணம் கட்டிக்கொண்டு வேலை செய்கிறார். அதே சமயம், எதிரணியின்உள்ளேயே தன்னை யாரும் சுயநலவாதி என்று முத்திரை குத்திவிடக்கூடாது என்பதிலும் கவனமாக உள்ளார். அதனால்தான் 72 வயதாகும் நிதிஷ், தனக்கு பிரதமர் பதவி தேவையில்லை என்று அவ்வப்போது நினைவூட்டி வருகிறார்.பிரதமர் பதவிக்கு இல்லையென்றால், நிதிஷுன் இந்த முயற்சிக்கு காரணம்தான் என்ன? ஒன்றல்ல... மூன்று காரணங்களைக் கூறலாம். ஓன்று, உடனிருக்கும் ராஷ்டிரிய ஜனதா தள துணை முதல்வர் தேஜஸ்வி யாதவ்விற்கு, தனது முதல்வர் ஆசைகளை மூட்டைகட்டி வைத்துவிட்டதை நிரூபிப்பது. இரண்டு, பிற எதிர்கட்சி தலைவர்களை சந்திப்பதற்கு தேஜஸ்வி யாதவையும் அழைத்து சென்று, அவருக்கு அரசியல் குருவாக தொடர்வது.இந்திரா காந்தியின் அவசர நிலை காலத்தில் லல்லு பிரசாத் யாதவோடு, ஜெயபிரகாஷ் நாரயாணோடு இணைந்து செயலாற்றிய மாணவர் தலைவர் என்ற முறையில் நிதிஷுன் ஜனநாயக உணர்வும் ஒரு காரணம். இதற்கு அப்பால், பிரதமர் நரேந்திர மோடியை எதிர்த்து ஒரு நிழல் யுத்தத்தை நிதிஷ் துவங்கியுள்ளார் என்பதும் உண்மை. இதன் காரணம், பலரும் அறியாதது.கடந்த 2004 நாடாளுமன்ற தேர்தல் காலகட்டத்தில், அப்போது மத்தியில் ஆட்சி செய்து கொண்டிருந்து பா.ஜ.க. தலைமையிலான தேசிய ஜனநாயக கூட்டணிக்குள் எதிர்காலம் குறித்த சில முடிவுகள் எட்டப்பட்டன. முதலாவது, 2004 மற்றும் 2009 நாடாளுமன்ற தேர்தல்களில் பாரதிய ஜனதா தலைவர் அத்வானி, கூட்டணியின் பிரதமர் வேட்பாளராக முன்னிறுத்தப்படுவார். அப்போது அவர்களுடைய கணக்கு, வாஜ்பாயிக்கு பின்னர் அத்வானியே 2004 தேர்தலில் பிரதமர் ஆவார் என்பது. அது நடைபெறவில்லை என்பது வேறு விஷயம்..பா.ஜ.க. கூட்டணியின் 2010 துவங்கிய இரண்டாவது தசாம் சத்திற்கான பிரதமர் தேர்வு குறித்து 2004-ம் ஆண்டு எடுக்கப்பட்ட முடிவில்தான் நிதிஷுன் மனவருத்தத்திற்கான காரணம் புதைந்துள்ளது. அதாவது, 2014-ம் ஆண்டு தேர்தலில், பாரதிய ஜனதாவிற்கு அறுதி பெரும்பான்மை பெற்றால், அப்போதைய குஜராத் முதல்வர் மோடி பிரதமராவார். இல்லையென்றால், கூட்டணி சார்பில் 2004-ல் பீஹார் முதல்வாரக இருந்த நிதிஷ் 2014-ல் பிரதமராக தேர்ந்தெடுக்கப்படுவார்.ஆனால், 2004 மற்றும் 2009 தேர்தல்களில் காங்கிரஸ் கூட்டணி தொடர்ந்து வெற்றிபெற்று, மத்தியில் மன்மோகன் சிங் தலைமையில் அரசு அமைத்தது. அத்வானியின் பிரதமர் கனவு நனவாகவில்லை. என்றாலும், 2-ஜி, தலைநகர் டெல்லியில் ‘நிர்பயா’கற்பழிப்பு, கொலை போன்ற விவகாரங்களை கையில் எடுத்து, பாரதிய ஜனதா அரசியலில் மீண்டும் முன்னிலை பெற்றது. இவை தவிர, எண்ணிக்கையில் குறிப்பிடதக்க புதிய தலைமுறை வாக்காளர்களை குறி வைத்தும்,அந்த கட்சி தனது அரசியல் பிரசாரங்களை 2010-11 துவக்கம் மேற்கொண்டது.இந்த பின்னணியில், 2002 குஜராத் கலவர காலத்தில் தனது முதலமைச்சர் பதவியை காப்பாற்றிய அத்வானியை எதிர்த்து, மோடி தேசிய களத்தில் இறங்கினார். எப்போது அவருக்கென்று ஒதுக்கப்பட்ட இரண்டு நாடாளுமன்ற தேர்தல்களில் அத்வானியால் பிரதமர் பதவியை பிடிக்க முடியவில்லையோ, அப்போதே அவர் தனது வாய்ப்பு களை இழந்து விட்டார் என்று மோடி ஆதரவாளர்கள், பா.ஜ.க உள்வீட்டு விவாதங்களில் வாதிட்டதாக கேள்வி.அந்த வகையில், 2014 தேர்தலில் பிரதமருக்கான போட்டி, மோடி, நிதிஷ் ஆகிய இருவருக்கும் இடையில் தான். ஆனால், பா.ஜ.க. தனியாக வெற்றி பெறமுடியாது என்று தப்பு கணக்கு போட்ட நிதிஷ் வாளாவிருந்துவிட்டார். அவர் தனது தூக்கத்தில் இருந்து கலைந்து தேசிய அளவில் களநிலையை ஆராய்ந்து பார்த்தபோது, மோடி, மைல் கணக்கில் அவரை முந்தி பிரதமர் ரேஸில் இருந்தார். அதனால்தானோ என்னவோ, அந்த தேர்தலுக்கான பிரசாரத்திற்கு மோடி பீஹார் வந்தபோது, நிதிஷ் அவரை குஜராத் கலவரங்களோடு இணைத்து பிரசாரம் செய்தார். பின்னர் கூட்டணியில் இருந்தும் விலகினார்.இடைகாலத்தில், மோடி அரசு தனது எதிர்கட்சிகளின் மாநில அரசுகளை கலைக்கும் போக்கில் இருந்து தன்னை காப்பாற்றிக்கொள்ள, பாரதிய ஜனதாவுடன் மீண்டும் கூட்டணி சேர்ந்தார் நிதிஷ். அதனால், தனது ஐக்கிய ஜனதா தள கட்சியில் வாக்குவங்கியே சிதைந்துள்ளது என்பதை கண்டறிந்தபோது, பாஜக-வை கழற்றி விட்டுவிட்டு, லல்லு யாதவின் ராஷ்டிரிய ஜனதா தளத்துடன் கை கோப்பது, காலத்தின் கட்டாயம் ஆனது.நிதிஷுன் முயற்சியில் ஒரு விதத்தில் தன்னை ‘ஏமாற்றிய’(?) மோடியை தோற்கடிக்க வேண்டும் என்ற சுயநலம் இருந்தாலும், மூத்த அரசியல்வாதி சரத் பவார் கூட செய்ய முடியாத காரியத்தை அவர் செய்து முடித்துள்ளார். அவ்வாறுதான், 2014 பிரதமர் பதவிக்கு குறிவைத்த மேற்கு வங்காள முதல்வர் மம்தா பானர்ஜி, தெலங்கானவின் சந்திரசேகர ராவ் மற்றும் டெல்லயின் அரவிந்த் கெஜ்ரிவால் ஆகியோரை அவர்கள் வெறுக்கும் காங்கிரஸுடனான கூட்டணிக்கு தயார் என்ற நிலைக்கு தயார் செய்துள்ளார். இதற்கு ராகுல் காந்தியின் தகுதி இழப்பும் ஒரு காரணம்.இதற்கு அப்பால், நிதிஷுன் முதல் படி வெற்றியே, அனைத்து எதிர்கட்சிகளும் தொகுதிக்கு ஒரு வேட்பாளர் என்று ஏதாவது ஒரு விதத்தில் உறுதி செய்வதில்தான் துவங்கும். அதுவரையிலாவது, பா.ஜ.க. எதிரணியினருக்கு, கைக்கு எட்டினது வாய்க்கு எட்டாத நிலைமையே. நிதிஷுக்கும் தான்! என்.சத்திய மூர்த்தி, கொள்கை மற்றும் அரசியல் ஆய்வாளர்.

நிதிஷுன் நிழல் யுத்தம்!

Related Stories