சூடாகும் சூடான்! பின்னணியில் ரஷ்யாவின் தங்க வேட்டை...

ஒட்டு மொத்த உலகையும் சூடாக்கி இருக்கிறது சூடான் ராணுவக் கலவரம். இதை வெறுமனே உள்நாட்டுப்போர் என்று புறந்தள்ளிவிட முடியவில்லை. காரணம், ராணுவத்தின் ஒரு பிரிவினர் கையில் சிக்கியிருப்பதாகக் கூறப்படும் பயோ வெப்பன்ஸ்! சூடானின் அதிபர் கம் ராணுவத் தளபதியாக இருப்பவர் அப்துல் ஃபாத்தா அல்-புஹான். துணை அதிபர் மற்றும் துணை ராணுவப் படையின் தளபதியாக இருப்பவர் முகமது ஹம்தான் டாங்லா என்கிற ஹெமதி. அதிபர் புர்ஹானின் கட்டுப்பாட்டில் சுமார் ஒரு லட்சம் ராணுவ வீரர்களும், துணை அதிபர் ஹெமதியின் கட்டுப்பாட்டில் 90 ஆயிரம் துணை ராணுவ வீரர்களும் இருக்கிறார்கள். இவர்கள் இடையே இடையே எழுந்த ஈகோ தான் இன்று சூடானை சுடுகாடக்கி கொண்டுள்ளது..சூடானின் பக்கத்து நாடான எகிப்தில் உள்ள சர்வதேச ஊடகச் செய்தியாளர் ஒருவரிடம் பேசினோம்... “ஏப்ரல் 15 அன்று அதிகாலை திடீரென தலைநகர் கார்தோமில் வான்வெளி போர் விமானங்களைப் பார்த்து மக்கள் அதிர்ச்சி அடைந்தனர். அவர்கள் சுதாரிப்பதற்குள் போர் விமானங்கள் சரமாரியாக குண்டு மழை பொழிந்தன. இன்னொரு பக்கம் பீரங்கித் தாக்குதலும் நடைபெற்றது. இவை துணை அதிபர் ராணுவத்தின் தாக்குதல் என்று தெரியவந்ததும், அதிபரின் ராணுவம் பதிலடி கொடுக்கத் ஆரம்பித்தது.இதில் ஏராளமான கட்டுமானங்கள் தரைமட்டமாகின. ஒரு வாரத்தில் 500க்கும் மேற்பட்டோர் பலியாகிவிட்டார்கள். 5000க்கும் அதிகமானோர் படுகாயம் அடைந்தனர். இதையடுத்து, தலைநகர் கார்தோம், தர்பூர், நியாமி, கப் கபியா, ஜனைனா உள்ளிட்ட நகரங்கள் துணை ராணுவத்தின் கட்டுப்பாட்டிற்கு வந்தன. மக்கள் குடிநீரின்றி தவிக்கிறார்கள். உணவுக்கு கடும் தட்டுப்பாடு நிலவுகிறது. லட்சக்கணக்கானவர்கள் அண்டை நாடுகளான தெற்கு சூடான், சாத் ஆகிய நாடுகளில் தஞ்சம் அடைந்து வருகிறார்கள். அமெரிக்கா, ஐக்கிய அரபு எமிரேட்ஸ் நாடுகள் தங்கள் தூதரகங்களை மூடிவிட்டன” என்றவர் இந்த திடீர் மோதலுக்கான காரணத்தையும் விவரித்தார்.... “சூடானின் அசைக்க முடியாத சர்வாதிகாரியாக இருந்தவர், ஓமர் அல் பஷீர். 1989ல் அரியணை ஏறிய அவரை 30 ஆண்டுகள் யாராலும் அசைக்க முடியவில்லை. ஆனால், 2019ம் ஆண்டு புர்ஹானும், ஹெமதியும் இணைந்து மக்கள் புரட்சி நடத்தி பஷீரை விரட்டிவிட்டனர்.பின்னர் ராணுவமும் கிளர்ச்சியாளர்களும் சேர்ந்து ஆட்சி அமைத்தனர். 2023ம் ஆண்டு பொதுத் தேர்தல் நடத்தி ஆட்சி அதிகாரத்தை மக்கள் பிரதிநிதிகளிடம் ஒப்படைப்பது எனத் தீர்மானிக்கப்பட்டது. இந்த ஆண்டு பொதுத் தேர்தல் நடத்தப்பட வேண்டும். அதற்கு முதல் கட்டமாக நாட்டின் அதிகாரபூர்வ ராணுவத்துடன் துணை ராணுவத்தை இணைக்க வேண்டும் என்கிற கோரிக்கை எழுந்தது. இதுதான் பிரச்னைக்கு பிள்ளையார் சுழி. ‘ராணுவத்துடன் துணை ராணுவத்தை இணைத்துவிட்டால், எனக்கு என்ன பதவி?’என்று ஹெமதி கேட்க, அதற்கு புர்ஹானிடம் பதில் இல்லை. இன்னொரு பக்கம் ரஷ்யாவும் பிரச்னையை தூண்டிவிட்டிருக்கிறது. 30 ஆண்டுகள் அதிபராக இருந்த ஓமர் அல் பஷீர், அமெரிக்க ஆதரவாளர். ஆப்பிரிக்க நாடுகளின் தங்க வளங்களை அவர் மூலம் கொள்ளையடித்தது அமெரிக்கா. அவர் பதவியை விட்டு விரட்டப்பட்டு புர்ஹானும், ஹெமதியும் ஆட்சிப் பொறுப்பிற்கு வந்த பின்னர், ரஷ்யா ஹெமதியை கட்டுப்பாட்டில் எடுத்தது..சூடானின் 850 கிலோமீட்டர் நீள செங்கடல் கடற்கரை மீது ரஷ்யாவுக்கு ஒரு கண். அதைத் தன் கட்டுப்பாட்டில் கொண்டு வந்தால் ஆப்பிரிக்க நாடுகளில் அமெரிக்காவிற்கு இருக்கும் ஆதிக்கத்தை உடைக்கலாம் என்று கணக்குப்போட்டது. இதற்கு ஹெமதியும் ஓகே சொல்லிவிட்டார். தற்போது ரஷ்யா, செங்கடலில் போர்க்கப்பல் கட்டும் தளத்தைத் தொடங்கியிருக்கிறது.தவிர, சூடான் தங்க வளம் மிக்க நாடு. இங்கு சுமார் 40 ஆயிரம் தங்கச் சுரங்கங்கள், 60 தங்க சுத்திகரிப்பு நிலையங்கள் இருக்கின்றன. தெற்கு சூடான் பிரிந்தபோது எண்ணெய் வளம் அந்நாட்டுடன் சென்றுவிட, தற்போது தங்கம்தான் சூடானின் பிரதான வருமானம். கடந்த 2022ம் ஆண்டில் மட்டும் சூடான் 41.8 டன் தங்கத்தை வெளிநாடுகளுக்கு ஏற்றுமதி செய்திருக்கிறது. அதன் இந்திய மதிப்பு 20,511 கோடி ரூபாய்.இந்தத் தங்கச் சுரங்கங்கள் அனைத்துமே சூடானின் துணை ராணுவத் தளபதி ஹெமதியின் கட்டுப்பாட்டில் இருக்கின்றன. தங்கச் சுரங்கங்களில் முதலீடு செய்திருப்பது ரஷ்யாவின் வேக்னர் தனியார் ராணுவப் படைத் தலைவர் எவ் ஜெனி பிரிகோசிம். இவர் ரஷ்ய ராணுவத்திற்கு மிகவும் நெருக்கமானவர். கடந்த இரண்டு மாதங்களுக்கு முன்பு அவர் சூடானுக்கு வந்து ஹெமதியை சந்தித்திருக்கிறார். அதன்பிறகு ஹெமதி ரஷ்யா சென்று அதிபர் புதினையும் சந்தித்திருக்கிறார்..இந்நிலையில்தான் சண்டை வெடித்துள்ளது. அதிபர் புர்ஹானை வீழ்த்திவிட்டு ஹெமதியை அதிபராக்குவதே அதிபர் புதினின் திட்டம். அப்போதுதான் சூடானின் தங்கச் சுரங்கத்தில் ஏகபோக உரிமையைப் பெற முடியும் என்பதாலேயே ஹெமதியை அதிபராக்க ரஷ்யா முயல்கிறது”என்றார்.இதனிடையே சூடானில் திடீர் திருப்பமாய், அங்கு பயாலஜிக்கல் வார் வெடிக்கலாம் என்று உலக சுகாதார அமைப்பு எச்சரித்திருக்கிறது. இதுகுறித்து சூடானில் உள்ள உலக சுகாதார அமைப்பின் பிரதிநிதி நிமா சயீத் அபிட் கூறுகையில், “சூடான் தலைநகர் கார்தோமில் உள்ள பயாலஜிக்கல் லேபை துணை ராணுவம் கைப்பற்றி இருக்கிறது. இங்கு போலியோ மற்றும் அம்மை நோய் பற்றிய ஆய்விற்காக வைரஸ்கள் சேமித்து வைக்கப்பட்டிருக்கின்றன. இந்த ஆய்வகத்தில் தாக்குதல் நடைபெற்றால் மனிதப் பேரழிவு ஏற்படும். துணை ராணுவம் இந்த வைரஸ்களைக்கொண்டு பயாலஜிக்கல் வார் நடத்தவும் வாய்ப்பிருக்கிறது” என்று கூறியிருக்கிறார். விரைவில் அமைதி திரும்பட்டும்! - அ.துரைசாமி

சூடாகும் சூடான்! பின்னணியில் ரஷ்யாவின் தங்க வேட்டை...

Related Stories