ரூ.1 கோடியை திரும்ப செலுத்தத் தேவையில்லை- ஐகோர்ட்டில் நடிகர் சிலம்பரசன் பதில்

கொரோனா குமார் படத்தில் நடப்பதற்கான ஒப்பந்தத்தின் படி ஒரு ஆண்டுக்குள் படப்பிடிப்பை தொடங்கவில்லை என்றால் முன்பணத்தை திரும்ப தர வேண்டிய அவசியமில்லை என நடிகர் சிலம்பரசன் தரப்பில் சென்னை உயர்நீதிமன்றத்தில் தெரிவிக்கப்பட்டது.

வேல்ஸ் ஃபிலிம்ஸ் இண்டர்நேஷ்னல் நிறுவனம் சென்னை உயர்நீதிமன்றத்தில் தாக்கல் செய்த மனுவில், தங்களது நிறுவனத்தின் தயாரிப்பதற்காக திட்டமிட்டபட்டிருந்த "கொரோனா குமார்" என்ற படத்தில் நடிப்பதாக நடிகர் சிலம்பரசனை ஒப்பந்தம் செய்ததாக கூறப்பட்டுள்ளது.

இந்த படத்தில் நடிப்பதற்காக சிலம்பரசனுக்கு மொத்தம் ஒன்பதரை கோடி ரூபாய் சம்பளமாக பேசப்பட்ட நிலையில், முன்பணமாக நான்கரை கோடி ரூபாயை கடந்த 2021ம் ஆண்டு அளித்ததாக தெரிவிக்கப்பட்டுள்ளது.ஆனால் பணத்தை பெற்றுக்கொண்டு படப்பிடிப்பிற்கு வரவில்லை எனவும் குற்றம்சாட்டப்பட்டுள்ளது.

எனவே, கொரோனா குமார் படத்தை முடித்து கொடுக்காமல் மற்ற படங்களில் நடிக்க தடை விதிக்க வேண்டுமென கோரிக்கை விடுக்கப்பட்டிருந்தது.

இந்த மனு நீதிபதி அப்துல் குத்தூஸ் முன்பு விசாரணைக்கு வந்த போது, இந்த விவகாரம் தொடர்பாக நடிகர் சிலம்பரசன் மற்றும் வேல்ஸ் நிறுவனம் இடையே போடப்பட்ட ஒப்பந்தம் சமர்பிக்கப்பட்டது. அதில் ஒரு கோடி ரூபாய் மட்டுமே சிலம்பரசனுக்கு வழங்கப்பட்டதாக குறிப்பிடப்பட்டிருந்தது.

வேல்ஸ் நிறுவனம் சார்பில், சிலம்பரசனுக்கு நான்கரை கோடி ரூபாய் கொடுத்ததாகவும் அதற்கான வரவு செலவு விவரங்களையும் தாக்கல் செய்ததோடு, குறிப்பிட்ட தொகை ரொக்கமாக அளிக்கப்பட்டதாகவும் தெரிவிக்கப்பட்டது.

இதனை ஏற்க மறுத்த நீதிபதி ஒப்பந்தத்தில் உள்ளபடி, ஒரு கோடி ரூபாய்க்கான உத்தரவாதத்தை செலுத்த சிலம்பரசனுக்கு நீதிபதி உத்தரவிட்டிருந்தார்.

இந்நிலையில் வழக்கு அப்துல் குத்தூஸ் முன்பு இன்று மீண்டும் விசாரணைக்கு வந்தபோது நடிகர் சிம்பு தரப்பில், திரைப்பட ஒப்பந்தத்தின் படி படத்தை குறிப்பிட்ட ஒரு ஆண்டுக்குள் தொடங்காவிட்டால், முன்பணத்தை திருப்பி தர வேண்டிய அவசியமில்லை. அதனால், ஒப்பந்தத்தை மீறியதாக வேல்ஸ் நிறுவனம் தொடர்ந்த வழக்கை ரத்து செய்ய வேண்டும் என தெரிவிக்கப்பட்டது.

இதையடுத்து வழக்கை விசாரித்த நீதிபதி, அக்டோபர் 6ம் தேதி வேல்ஸ் நிறுவனம் பதிலளிக்க உத்தரவிட்டு விசாரணையை ஒத்திவைத்தார்.