நெல்லை: சித்த மருத்துவத்தில் இத்தனை குறிப்புகளா?- டிஜிட்டல் மயமாகும் ஓலைச்சுவடிகள்

சித்த மருத்துவக் குறிப்புகள் அடங்கிய ஓலைச் சுவடிகளை டிஜிட்டல் மயமாக்கும் பணிகளை நெல்லை சித்த மருத்துவக் கல்லூரி தொடங்கி இருக்கிறது. 

சித்த மருத்துவம் மிகவும் புகழ் பெற்றது.  டெங்கு,  சிக்கன்குனியா, கொரோனாவைக் கட்டுப்படுத்தியதில் அலோபதியை விட சித்த மருத்துவம்தான் விஞ்சி நின்றது. அந்தக் கால சித்தர்கள் சித்த மருத்துவ குறிப்புகளை ஓலைச்சுவடியில் குறித்து வைத்திருந்தார்கள். போகி போன்ற பண்டிகையின் போது அந்த ஓலைச்சுவடிகளை மக்கள் எரித்து விட்டதால் பல மருத்துவ குறிப்புகள் நம்மிடம் இல்லை. எனவே மக்களிடம் இருக்கும் ஓலைச்சுவடிகளை வாங்கி அதை டிஜிட்டல் மயமாக்கி விட்டு அவர்களிடமே திரும்ப ஒப்படைக்கும் திட்டம் ஒன்றை நெல்லை சித்த மருத்துவக் கல்லூரி தொடங்கியிருக்கிறது. 

இதன் தலைவராக பேராசிரியர் மருத்துவர் சுபாஷ் சந்திரபோஸ் இருக்கிறார். இது குறித்து மருத்துவர் சுபாஷ் சந்திரபோஸ் நம்மிடம் கூறுகையில், ''நெல்லை அரசு சித்த மருத்துவக் கல்லூரியும், தமிழ்நாடு தொல்லியல் சார்ந்த ஓலைச்சுவடிகள் பாதுகாப்பு குழுமமும் இணைந்து ஓலைச்சுவடிகளைப் பாதுகாக்க புது முயற்சியை எடுத்து வருகிறோம். ஓலைச்சுவடிகளில் பல வகை உண்டு. ஜோதிடம், மாந்திரீகம், கிராம தேவதைகள் கதை, சுடலை, இசக்கி வரலாறு, ராமாயணம், மகாபாரதம், தமிழ் இலக்கியம் மற்றும் எழுத்துக்கள், யானை வைத்தியம், கணிதக் குறிப்பு போன்றவற்றை நம் முன்னோர் ஓலைச்சுவடிகளில் எழுதி வைத்திருக்கிறார்கள். 

பெரும்பாலான ஓலைச்சுவடிகள் சித்த மருத்துவ குறிப்புகளை அடக்கியது ஆகும். காய்ச்சல் பற்றிப் பல சுவடிகள் உள்ளன. 27 நட்சத்திரங்களில் என்னென்ன நட்சத்திரக்காரர்களுக்குக் காய்ச்சல் மருந்து என்று கூட எழுதப்பட்டிருக்கிறது. எனவே ஓலைச்சுவடிகளைப் பாதுகாத்து வைத்திருப்பவர்கள் சித்த மருத்துவக் கல்லூரியில் அமைக்கப்பட்டுள்ள தனி அரங்கத்திற்குக் கொண்டு வரலாம். அதனை நாங்கள் ஆவணப்படுத்துகிறோம். பின்னர் அவை கெட்டுப் போகாமல் இருக்க நவீன தைலம் தடவி மேம்படுத்தி உரியவர்களிடையே ஒப்படைத்து விடுகிறோம். தவிர, ஓலைச்சுவடியில் உள்ள விபரங்கள் டிஜிட்டல் மயமாக்கப்பட்டு அதை சி.டி வடிவில் சம்பந்தப்பட்டவர்களிடம் ஒப்படைப்போம்’’ என்றார்.