மதுரை மாவட்டம் செல்லம்பட்டி ஊராட்சி ஒன்றியத்திற்கு உட்பட்ட கோவிலாங்குளம் ஊராட்சியின் ஊராட்சி மன்ற தலைவராக ஜெயந்தி என்பவர் பதவி வகித்து வருகிறார்.
இந்த நிலையில் கோவிலாங்குளம் ஊராட்சி பகுதிகளில் நடக்கும் 100 நாட்கள் வேலை திட்டம், சாலை அமைத்தல் போன்ற அரசு திட்டப் பணிகளில் முறைகேடுகள் நடைபெறுவதாக குற்றச்சாட்டு எழுந்துள்ளது.
மேலும் நிதி ஒதுக்கீட்டில் பாரபட்சம், ஊராட்சி மன்ற கூட்டம் முறைகேடாக நடத்துவது, விளை நிலங்களை வீட்டு மனைகளாக மாற்ற லஞ்சம் உள்ளிட்ட பல்வேறு குற்றச்சாட்டுகள் எழுந்துள்ளன.
இந்நிலையில் இந்த முறைகேடுகள் குறித்தும், முறைகேட்டில் ஈடுபடும் ஊராட்சி செயலாளரை தகுதி நீக்கம் செய்ய வேண்டும் என்று சிலர் வார்டு கவுன்சிலர்கள் மன்ற கூட்டத்தில் பேசியதாக கூறப்படுகிறது.
இந்நிலையில் ஊராட்சி மன்ற தலைவரின் கணவரும், தி.மு.க செல்லம்பட்டி ஒன்றிய செயலாளரும், மாவட்ட ஊராட்சி ஒன்றிய குழு துணைத் தலைவராகவும் உள்ள முத்துராமன் தங்களை மிரட்டுவதாக கூறி 1வது வார்டு உறுப்பினர் தனம், 2வது வார்டு உறுப்பினர் ஜெயலட்சுமி, 3வது வார்டு உறுப்பினர் ஜெயக்கொடி, 4வது வார்டு உறுப்பினர் பஞ்சு, 9வது வார்டு உறுப்பினர் தங்கசாமி, மற்றும் 12வது வார்டு உறுப்பினர் பாண்டியராஜன் ஆகியோர் இன்று தங்களது வார்டு பதவிகளை ராஜினாமா செய்வதாக கூறி ராஜினாமா கடிதத்தை மாவட்ட ஆட்சியர் சங்கீதாவிடம் வழங்கினர்.
இதைத்தொடர்ந்து வார்டு உறுப்பினர்களின் குற்றச்சாட்டுகள் குறித்து மதுரை மாவட்ட ஊரக வளர்ச்சி கூடுதல் இயக்குனர் தலைமையில் உரிய விசாரணை நடத்த மாவட்ட ஆட்சியர் உத்தரவிட்டுள்ளார்.
இதுதொடர்பாக வார்டு உறுப்பினர்கள் செய்தியாளர்களிடம் கூறுகையில், ‘ஊராட்சி நிர்வாகத்தில் பல்வேறு முறைகேடுகள் நடைபெறுகிறது. கேள்வி எழுப்பினால் தகுதி நீக்கம் செய்வதாக கூறி ஊராட்சி மன்ற தலைவர் மிரட்டுகிறார்.
ஊராட்சி மன்ற நிர்வாகத்தில் ஊராட்சி மன்றத் தலைவரின் கணவரான தி.மு.க ஒன்றிய செயலாளர் முத்துராமன் தலையிட்டு வார்டு உறுப்பினர்களை மிரட்டி வருகிறார்’ என்றனர்.
