‘அ.தி.மு.க ஆட்சியில் நெடுஞ்சாலைத் துறையின் டெண்டர்களில் முறைகேடு’ - சி.ஏ.ஜி அறிக்கை

அ.தி.மு.க ஆட்சியில் நெடுஞ்சாலைத்துறையின் டெண்டர்களில் முறைகேடு நடந்துள்ளதாக சி.ஏ.ஜி அறிக்கையில் குறிப்பிடப்பட்டுள்ளது.

கடந்த அ.தி.மு.க ஆட்சிக் காலத்தில் தமிழக நெடுஞ்சாலைத் துறை அதிகாரிகளின் கணினிகளை பயன்படுத்தி ஒப்பந்ததாரர்கள் டெண்டர் சமர்ப்பித்து உள்ளதாக சி.ஏ.ஜி அறிக்கையில் கூறப்பட்டுள்ளது பரபரப்பை ஏற்படுத்தி உள்ளது.

தமிழக நெடுஞ்சாலை துறையின் 2016 முதல் 2021 வரையிலான செயல்பாடுகள் குறித்து சி.ஏ.ஜி எனப்படும் இந்திய கணக்காய்வு மற்றும் தணிக்கை துறை தலைவரின் அறிக்கை தமிழக சட்டப்பேரவையில் சமர்ப்பிக்கப்பட்டுள்ளது. 

அந்த அறிக்கையில் ‘ஒப்பந்ததாரர்களால் ஏலம் சமர்ப்பிக்கப்பட்ட கணினிகளின் அடையாள முகவரி மற்றும் துறை சார்ந்த பயனர்களின் அடையாள முகவரி ஆகியவற்றின் தரவுத் தளங்களை கைப்பற்றி ஆய்வு செய்யப்பட்டுள்ளது. 

 அதில் ஏலம் சமர்ப்பிக்கப்பட்ட அடையாள முகவரி மற்றும் துறை பயனர்களின் அடையாள முகவரியை ஒப்பிட்டபோது ஒப்பந்ததாரர்கள் தங்களது ஏலத்தை சமர்ப்பிக்க நெடுஞ்சாலை துறை அதிகாரிகளின் கணினிகளை பயன்படுத்தியது தெரியவந்துள்ளது. 

2019 ஆகஸ்ட் முதல் 2021 ஆகஸ்ட் வரை 214 ஒப்பந்தப் புள்ளி அறிவிப்புகளுக்கு பதில் அளிக்கும் விதமாக, 87 ஒப்பந்ததாரர்களால் துறை அதிகாரிகளின் 57 கணினிகளைப் பயன்படுத்தி 289 ஏல ஒப்பந்தங்கள் தாக்கல் செய்யப்பட்டன. இதில் 71 ஏலங்கள் எல்1 ஒப்பந்ததாரர்களுக்கு ஆதரவாக வழங்கப்பட்டன.

ஏலதாரர்கள் துறைசார்ந்த கணினிகளின் மூலம் ஏலத்தை சமர்ப்பித்ததன் மூலம் ஒப்பந்தப் புள்ளி நெறிமுறைகளை மீறியதையும், அதிகபட்ச போட்டி ஏலத்தை பெற வேண்டும் என்ற துறையின் முயற்சியும் நிறைவேறவில்லை.

கடந்த 2022 மே மாதத்தில் நடந்த கடைசி கலந்தாய்வின்போது முதன்மை செயலாளர் இதை பரிசீலனை செய்வதாக உறுதி அளித்தார். அரசு இதை ஏற்றுக்கொண்டு ஆகஸ்ட் 2022 இல் இதுபோன்ற தவறுகளை ஆய்வு செய்து இதுபோன்ற செயல்கள் மீண்டும் நிகழாதபடிக்கு நடவடிக்கை எடுக்க ஒப்பந்தப்புள்ளி அழைக்கும் அதிகாரிகளுக்கு முறையான அறிவுறுத்தல்கள் வழங்கப்பட்டதாக கூறியது’ என, அந்த அறிக்கையில் கூறப்பட்டுள்ளது.