நியாயமான முறையில் விசாரணைகள் மேற்கொள்ளப்பட்டு நீதி வழங்கப்படும் என நம்புகிறோம்.
கலாஷேத்ராவில் மாணவிகளுக்குப் பாலியல் தொல்லை அளிக்கப்பட்டுள்ளது மனவேதனை அளிக்கிறது எனப் புகார்கள் குழு உறுப்பினர் பொறுப்பில் இருந்து விலகி வழக்கறிஞர் தெரிவித்துள்ளார்.
சென்னை அடையாரில் உள்ள கலாஷேத்ரா கல்வி நிறுவனத்தில் மாணவிகளுக்குப் பாலியல் தொல்லைகள் அளிக்கப்பட்டதாக அடையாறு காவல்நிலையத்தில் புகார் அளிக்கப்பட்டது. இதுகுறித்துப் பேராசிரியர் ஹரி பத்மன் கைது செய்யப்பட்டுள்ளார்.
இந்நிலையில், நிறுவனத்தின் தற்போதைய செயல்பாடுகளால் மிகவும் வேதனையடைந்த, கல்வி நிறுவன உள் புகார்கள் குழுவின் உறுப்பினரும், வழக்கறிஞருமான அஜிதா தனது பதவியை ராஜினாமா செய்வதாக இயக்குநருக்குக் கடிதம் அனுப்பியுள்ளார்.
அதில், கலாக்ஷேத்ரா கல்வி நிறுவனத்தில் பயின்ற மாணவிகளுக்குப் பாலியல் தொல்லை அளிக்கப்பட்டதாகப் புகார் அளிக்கப்பட்டது மிகவும் மனவேதனை அளிக்கிறது.பணியிடங்களில் பெண்களுக்கு எதிரான பாலியல் துன்புறுத்தல் சட்டம், 2013ன் கீழ் அமைக்கப்பட்ட உள் புகார்கள் குழுவின் உறுப்பினராகக் கல்வி நிறுவனத்துடன் இணைந்து பணியாற்றியுள்ளேன்.
கடந்த 4 ஆண்டுகளாக இந்தச் சட்டத்தின் கீழ் ஏற்படுத்தப்பட்ட விழிப்புணர்வு நிகழ்ச்சிகள் மற்றும் விசாரணைகளை எனது அறிவுக்கும் திறனுக்கும் எட்டியவரை உள் புகார்கள் குழுவின் உறுப்பினராக இருந்து பணியாற்றினேன் என நம்புகிறேன்.
நிறுவனத்தில் தற்போதைய சூழ்நிலையும், மாணவர்கள் மற்றும் ஊழியர்களின் பெரிய அளவிலான அதிருப்தியும், இந்த நிறுவனத்தின் உள் புகார்கள் குழுவின் உறுப்பினராக நான் தொடர்ந்து இருக்க வேண்டுமா? என்று என்னை மறுபரிசீலனை செய்ய வைக்கிறது.
எனவே, கலாக்ஷேத்ரா நிறுவனத்தின் உள் புகார்கள் குழுவின் உறுப்பினராகத் தொடர்ந்து செயல்பட நான் விரும்பவில்லை. உள் புகார்கள் குழுவின் உறுப்பினர் பதவியிலிருந்து நான் ராஜினாமா செய்கிறேன்.
அனைத்துப் பாதிக்கப்பட்ட மாணவர்களும் ஏற்றுக்கொள்ளும் வகையில் நியாயமான முறையில் விசாரணைகள் மேற்கொள்ளப்பட்டு நீதி வழங்கப்படும் என நம்புவதாகவும் அதில் குறிப்பிட்டுள்ளார்.