எடப்பாடி: கார் மீது தாக்குதல் - நொடியில் தப்பிய பெங்களூரு புகழேந்தி - என்ன நடந்தது?

சேலம் மாவட்டம் எடப்பாடியில் ஓ.பன்னீர்செல்வம் ஆதரவாளர்கள் கூட்டத்தில் கொண்டு திரும்பும்போது, பெங்களூரு புகழேந்தி மீது எடப்பாடி ஆதரவாளர்கள் தாக்க முயன்ற சம்பவம் பெரும் பரபரப்பை ஏற்படுத்தியுள்ளது.

அ.தி.மு.க-வில் ஒற்றை தலைமை மோதல் வெடித்தை அடுத்து, ஓ.பி.எஸ். மற்றும் எடப்பாடி பழனிசாமிக்கு இடையே பிளவு ஏற்பட்டது.

இதனையடுத்து அ.தி.மு.க-வில் இருந்து ஓ.பன்னீர் செல்வம் அதிரடியாக நீக்கப்பட்டார். இதற்கு எதிராக ஓ.பி.எஸ். மற்றும் வைத்தியலிங்கம் உள்ளிட்டோர் சட்ட போராட்டம் நடத்தினார்.

இருந்தபோதும், எடப்பாடி பழனிசாமியிடம் செயற்குழு, பொதுக்குழு, சட்டமன்ற உறுப்பினர்கள் மற்றும் நாடாளுமன்ற உறுப்பினர்களின் ஆதரவு போன்றவை அதிகளவு இருந்த காரணத்தால் ஓ.பி.எஸ். மனு தள்ளுபடி செய்யப்பட்டது.

இந்த நிலையில், அ.தி.மு.க-வின் பெயர், கொடி, தலைமை அலுவலக முகவரி போன்றவற்றை ஓ.பன்னீர் செல்வம் பயன்படுத்தி வருகிறார். இதற்கு, அ.தி.மு.க. தரப்பில் கடும் எதிர்ப்பு தெரிவிக்கப்பட்டது. தமிழக டி.ஜி.பி. அலுவலகத்தில் முன்னாள் அமைச்சர் ஜெயக்குமார் புகார் அளித்தார்.

ஆனால், ஓ.பி.எஸ்.ஆதரவாளர் வைத்தியலிங்கமோ, 'அ.தி.மு.க கட்சியின் கொடி, பெயர், சின்னம், புரட்சித் தலைவர் எம்ஜிஆர் மாளிகையின் முகவரியை லெட்டர்பேடில் பயன்படுத்துவது யாரும் தடுக்கமுடியாது' என சவால் விடுத்தார்.

இந்த நிலையில், சேலம் மாவட்டம் எடப்பாடியில் ஓ.பன்னீர் செல்வம் ஆதரவாளர்கள் கூட்டம் நடைபெற்றது. இந்தக் கூட்டத்தில் கலந்து கொள்ள பெங்களூரு புகழேந்தி வருகை தந்தார்.

அப்போது, அ.தி.மு.க கட்சியின் கொடி, பெயர், சின்னம் ஆகியவற்றை ஓ.பி.எஸ். தரப்பினர் பயன்படுத்தி, டிஜிட்டல் பேனர், கொடி உள்ளிட்டவை கட்டியிருந்தனர். இதற்கு எடப்பாடி பழனிசாமி தரப்பினர் எதிர்ப்பு தெரிவித்தனர்.

இந்த நிலையில், அங்கு வந்த பெங்களூரு புகழேந்தியை எடப்பாடி பழனிசாமியின் ஆதரவாளர்கள் தாக்க முயன்றனர். அவர் வந்த காரை மறித்து கார் கண்ணாடியை தாக்கினர். இதில், கண்ணாடி உடையவில்லை. அதற்குள் அந்த கார் அந்த இடத்தில் இருந்து வேகமாகச் சென்றது.

ஆனாலும், எடப்பாடி ஆதரவாளர்கள் விடாமல் துரத்திச் சென்று தாக்கினர். அவர்களை காவல்துறையினர் தடுத்து அனுப்பிவைத்தனர். இதனால், எடப்பாடி பழனிசாமியின் ஆதரவாளர்களிடம் சிக்காமல் பெங்களூரு புகழேந்தி தப்பித்தார்.