கர்நாடக தேர்தல்: செல்பி மூலம் முகத்தை அடையாளம் கண்டு வாக்களிக்கும் புதிய வசதி அறிமுகம்

கர்நாடக சட்டசபை தேர்தலில் முதன்முறையாக சோதனை முறையில் முகத்தை அடையாளம் கண்டு வாக்களிக்கும் புதிய வசதி அறிமுகம் செய்யப்படுகிறது. இந்த புதிய வசதி கள்ள ஓட்டு போடுவதைத் தடுப்பதற்காக எடுக்கப்பட்ட நடவடிக்கை என தேர்தல் அதிகாரிகள் தெரிவித்துள்ளனர்.

கர்நாடக சட்டசபை தேர்தல் நாளை புதன்கிழமை ஒரே கட்டமாக நடக்கிறது. இதற்கென 58 ஆயிரத்திற்கும் மேற்பட்ட வாக்குச்சாவடிகள் அமைக்கப்பட்டுள்ளன. ஓட்டுப்பதிவு நாளை காலை 7 மணிக்கு தொடங்கும் நிலையில் இந்த தேர்தலில் முகத்தை அடையாளம் கண்டு வாக்களிக்கும் புதிய வசதியை தேர்தல் ஆணையம் அறிமுகம் செய்துள்ளது. சோதனை முறையில் இந்த புதிய வசதி செயல்படுத்தப்பட உள்ளது. இது போன்று வாக்களிக்க இருப்பது இதுவே முதல் முறை.

பெங்களூருவில் மாநில தலைமை தேர்தல் அலுவலகத்திற்கு அருகில் அரண்மனை ரோட்டில் உள்ள அரசு ராமநாராயண் செல்லாராம் கல்லூரி வாக்குச்சாவடியில் அறை எண் 2-ல் வாக்காளர்களுக்கு இந்த புதிய வசதியுடன் வாக்களிக்க தேவையான ஏற்பாடுகள் செய்யப்பட்டுள்ளன.

அந்த வாக்குச்சாவடியில் வாக்களிக்கும் வாக்காளர்கள், முதலில் தங்களின் செல்போனில் 'சுனாவனா' (தேர்தல்) செயலியை பதிவிறக்கம் செய்துகொள்ள வேண்டும். அதில் வாக்காளர் அடையாள அட்டை எண், செல்போன் எண் உள்ளிட்டவற்றை பதிவு செய்ய வேண்டும். அதன் பிறகு 'ஓ.டி.பி.' ரகசிய எண் வரும். அதனை உள்ளீடு செய்து, வாக்காளர் தன்னை செல்பி மூலம் புகைப்படம் எடுத்து அதில் பதிவேற்றம் செய்ய வேண்டும்.

அவ்வாறு செய்த பிறகு தான் அந்த வாக்காளர், வாக்குச்சாவடிக்குள் அனுமதிக்கப்படுவார். பின் வாக்குச்சாவடிக்குள் சென்று முகம் அடையாளம் காணும் ஸ்கேனர் கருவி முன்பு நிற்க வேண்டும். அந்த ஸ்கேனர் கருவி எடுத்த புகைப்படம், தேர்தல் ஆணைய விவரங்களுடன் பொருந்தினால், வாக்காளர் எந்த ஆவணத்தையும் காட்டாமல் நேரடியாக வாக்களிக்க அனுமதிக்கப்படுவார்.

இந்த வசதியால் கள்ள ஓட்டு போடுவது தடுக்கப்படுவதோடு, வாக்காளா்கள் நீண்ட வரிசையில் காத்து நிற்பதால் ஏற்படும் நேரவிரயமும் தவிர்க்கப்படும் என்று தேர்தல் ஆணைய அதிகாரிகள் கூறினர்.