கர்நாடக புதிய முதலமைச்சர் சித்தராமையா? - டி.கே. சிவகுமாருக்கு துணை முதலமைச்சர் பதவியா?

கர்நாடக சட்டமன்ற தேர்தலில் காங்கிரஸ் வெற்றி பெற்றதையடுயடுத்து முதலமைச்சர் பதவி யாருக்கு என்பதில் டி.கே சிவக்குமாருக்கும் சித்தராமையாவுக்கும் இடையே நேரடி போட்டி நிலவுகிறது. இந்நிலையில் முதல்வர் யார் என்பதில் காங்கிரஸ் முடிவுக்கு வந்து விட்டதாகவும் தகவல் வெளியாகியுள்ளன.

கர்நாடக சட்டசபை தேர்தலில் காங்கிரஸ் கட்சி 135 தொகுதிகளில் தனிப்பெரும்பான்மையுடன் வெற்றி பெற்று ஆட்சியை கைப்பற்றியுள்ளது. காங்கிரஸ் கட்சியின் இந்த வெற்றிக்கு எதிர்க்கட்சி தலைவர் சித்தராமையா மற்றும் மாநில காங்கிரஸ் தலைவர் டி.கே.சிவகுமார் இருவருமே கடுமையாக உழைத்துள்ளனர். இதனால் முதலமைச்சர் பதவிக்கு மாநில காங்கிரஸ் தலைவர் டி.கே.சிவக்குமார், சித்தராமையா ஆகியோர் இடையே கடும் போட்டி நிலவுகிறது.

இந்நிலையில், கர்நாடக புதிய முதல்வரை தேர்ந்தெடுக்கும் வகையில் ஏம்.எல்.ஏ.க்கள் தீர்மான கூட்டம் நடத்தப்பட்டு அதில் புதிய முதல்வரை தேர்ந்தெடுக்கும் அதிகாரத்தை கட்சி மேலிடத்துக்கு வழங்கி ஒரு வரி தீர்மானம் நிறைவேற்றப்பட்டது.

இதையடுத்து சித்தராமையா மற்றும் டி.கே.சிவக்குமாருடன் டெல்லியில் காங்கிரஸ் மேலிடம் பேச்சுவார்த்தை நடத்தியது.

கர்நாடக அரசியலை பொறுத்த வரையில் காங்கிரசில் டி.கே.சிவக்குமார், சித்தராமையா இருவருமே முக்கியத்துவம் வாய்ந்தவர்கள். இருவருக்குமே மக்கள் செல்வாக்கும் பெரும்பான்மை ஆதரவும் இருக்கிறது. இருவருமே பதவிக்கு போட்டியிடுவதால் யாரை ஆட்சியில் அமர வைப்பது என்று முடிவு எடுக்க முடியாமல் காங்கிரஸ் மேலிடம் திணறி வந்த நிலையில் தற்போது முதல்வர் பதவியை யாருக்கு வழங்கவேண்டும் என கட்சி மேலிடம் முடிவு எடுத்துவிட்டதாக தகவல்கள் வெளியாகியுள்ளன.

காங்கிரஸ் தலைவர் மல்லிகார்ஜூன கார்கே தலைமையில் நடத்தப்பட்ட இது தொடர்பான கூட்டத்தில் சித்தராமையாவுக்கு கர்நாடக முதலமைச்சர் பதவியும், டி.கே.சிவகுமாருக்கு துணை முதலமைச்சர் பதவியும் வழங்கப்பட உள்ளதாக முடிவெடுக்கப்பட்டது என தகவல்கள் வெளியாகியுள்ளன.

காங்கிரஸ் மேலிடம் புதிய முதல்வர் பதவியேற்பு விழாவை வருகிற 18-ந் தேதி நடத்த திட்டமிட்டு உள்ளதாக அறிவித்திருந்த நிலையில், முதலமைச்சர் மற்றும் அமைச்சர்களுக்கான பதவியேற்பு விழா பெங்களூரில் வைத்து வரும் மே 20 ஆம் தேதி நடைபெற உள்ளதாகவும் கூறப்படுகிறது.