'குழந்தைகளை பள்ளிக்கு அனுப்புங்க’ - வைரல் எஸ்.ஐ-க்கு நேரில் சர்ப்ரைஸ் கொடுத்த 'தாடி' பாலாஜி

’உங்க குழந்தைங்களை பள்ளிக்கு அனுப்பி வையுங்க’ என பள்ளி செல்லாத மாணவிகளின் வீட்டிற்கே சென்று விழிப்புணர்வு ஏற்படுத்திய சப்-இன்ஸ்பெக்டர் பரமசிவனுக்கு பாராட்டுக்கள் குவிந்து வரும் நிலையில், நடிகர் தாடி பாலாஜி நேரில் சென்று வாழ்த்து தெரிவித்துள்ளார். 

திருவள்ளூர் மாவட்டம், பென்னலூர் பேட்டை, திடீர் நகர் பகுதியைச் சேர்ந்த பழங்குடியின மக்களின் குழந்தைகள் அரசு பள்ளிக்குச் செல்லாமல் வீட்டிலேயே இருந்ததாகக் கூறப்படுகிறது. இது தொடர்பாக அரசு பள்ளி தலைமை ஆசிரியர், பென்னலூர் பேட்டை பயிற்சி உதவி காவல் ஆய்வாளர் பரமசிவனிடம் முறையிட்டுள்ளார். மாணவிகளின் வீட்டிற்கு நேரில் சென்ற பயிற்சி உதவி காவல் ஆய்வாளர் அப்பகுதி மக்களிடம், “குழந்தைகளை பள்ளிக்கு அனுப்புங்கள். அரசு பல்வேறு நலத்திட்ட உதவிகளை குழந்தைகளுக்கு செய்து வருகிறது. காலை உணவு, மதிய உணவு என அனைத்தும் பள்ளியிலேயே வழங்கப்படுகிறது. தங்களது குழந்தைகளை பள்ளிக்கு அனுப்புவதில் ஏதேனும் சிரமம் இருந்தால் நேரடியாக அருகில் உள்ள காவல் நிலையத்திற்கு வந்து என்னைத் தொடர்பு கொண்டால் குழந்தைகளின் படிப்பிற்காக எந்த உதவி வேண்டுமானாலும், யார் காலில் விழுந்தாவது செய்து தருகிறேன்’’ எனப் பேசிய வீடியோ சமூக வலைதளங்களில் வைரல் ஆனது.  இதனைத் தொடர்ந்து சம்பவம் குறித்து முதல்வர் மு.க.ஸ்டாலின் அவரது ட்விட்டர் பக்கத்தில் உதவி ஆய்வாளருக்கு வாழ்த்துக்கள் தெரிவித்திருந்தார். 

இந்நிலையில் நடிகர் தாடி பாலாஜி சமூக வலைத்தளங்களில் வீடியோ ஒன்றை பதிவிட்டு வாழ்த்துக்கள் தெரிவித்ததோடு நேரில் வந்து சந்திப்பதாகவும் தெரிவித்திருந்தார். இன்று பென்னலூர் பேட்டை காவல் நிலையத்திற்கு பயிற்சி உதவி காவல் ஆய்வாளரை நேரில் சந்தித்து மாலை மற்றும் சால்வை அணிவித்து வாழ்த்துக்களைத் தெரிவித்தார்.

இதுகுறித்து நடிகர் பாலாஜி கூறுகையில்,“விழிப்புணர்வு ஏற்படுத்தும் விஷயங்களில் எந்த நேரமும் தொடர்பு கொண்டாலும்  சமூக விழிப்புணர்வு ஏற்படுத்தும் விசயங்களில் என் பங்கு இருக்கும். காவல்துறை பல்வேறு உதவிகள் செய்து வருகிறது. விடுதலை படத்தில் சூரி நடித்திருக்கும் கதாபாத்திரம் எனக்கு பிடித்திருந்தால் அது போன்ற கதாபாத்திரத்தில் நடிக்க விரும்புகிறேன். அரசியலில் எனக்கு விருப்பம் உள்ளது. விரைவில் அரசியலுக்கு வருவதற்கு வாய்ப்புள்ளது’’ என்றார்.