எதிர்க்கட்சிகளை ஒன்றிணைக்கும் திட்டம் -மு.க. ஸ்டாலினிடம் பேசிய கார்கே

பிரதமர் நரேந்திர மோடியின் அரசுக்கு எதிராக எதிர்க்கட்சிகளை ஒருங்கிணைக்கும் நம்பிக்கையில், தற்போதைய அரசியல் நிலவரம் மற்றும் அடுத்த ஆண்டு நடைபெறவுள்ள நாடாளுமன்றத் தேர்தலுக்கு முன்னதாக வியூகம் அமைப்பது குறித்து விவாதிக்க ஒத்த எண்ணம் கொண்ட எதிர்க் கட்சித் தலைவர்களின் கூட்டத்தைக் கூட்ட காங்கிரஸ் கட்சி தயாராகி வருகிறது. 

காங்கிரஸ் தலைவர் மல்லிகார்ஜுன கார்கே, தமிழக முதல்வரும், திமுக தலைவருமான மு.க.ஸ்டாலினிடம் தொலைபேசியில் தொடர்பு கொண்டு, உத்தேச கூட்டத்தில் பங்கேற்குமாறு அழைப்பு விடுத்துள்ளதாக கூறப்படுகிறது. தமிழகத்திலும், தேசிய அளவிலும் காங்கிரஸின் முக்கிய கூட்டணிக் கட்சியாக இருக்கும் திமுக, எதிர்க்கட்சிகள் கூட்டம் நடத்தும் காங்கிரஸின் திட்டத்துக்கு ஆதரவு அளித்துள்ளது.

இருப்பினும், திரிணாமுல் காங்கிரஸ், சமாஜ்வாடி, தேசியவாத காங்கிரஸ், ராஷ்டிரிய ஜனதா தளம் மற்றும் இடதுசாரி கட்சிகள் போன்ற எதிர்க்கட்சிகளின் பதிலுக்காக காங்கிரஸ் காத்திருப்பதால், கூட்டத்திற்கான தேதி மற்றும் இடம் இன்னும் இறுதி செய்யப்படவில்லை. 2024 பொதுத் தேர்தலுக்கு முன்னதாக இந்த ஒற்றுமையை உருவாக்கி, எதிர்க்கட்சிகளின் பரந்த கூட்டணியை உருவாக்க முடியும் என காங்கிரஸ் நம்புகிறது.

பிரதமர் மோடி 2014 -ல் ஆட்சிக்கு வந்ததில் இருந்து, அவர் இந்திய அரசியலில் ஆதிக்கம் செலுத்தி, தொடர்ந்து இரண்டு பொதுத் தேர்தல்களில் எதிர்க்கட்சிகளை வீழ்த்தினார். ஆனால், பாஜக பெரும்பான்மை வாக்குகளைப் பெறவில்லை. கடந்த மாதம் காங்கிரஸ் தலைவர் ராகுல் காந்திக்கு அவதூறு குற்றச்சாட்டில் தண்டனை விதிக்கப்பட்டு, நாடாளுமன்றத்தில் இருந்து அவர் தகுதி நீக்கம் செய்யப்பட்டதை அடுத்து, பிளவுபட்ட எதிர்க்கட்சிகள் ஒன்றிணையும் என எதிர்பார்க்கப்படுகிறது. 

கடந்த 2019 நாடாளுமன்றத் தேர்தலில் 14 முக்கிய எதிர்க்கட்சிகள் தேசிய வாக்குகளில் 39 சதவீதத்தைப் பெற்றன. 542 உறுப்பினர்களைக் கொண்ட நாடாளுமன்றத்தில் 160 இடங்களை வென்றன. பா.ஜ.க மட்டுமே 38 சதவீத வாக்குகளைப் பெற்று 303 இடங்களை வென்றது.

இருப்பினும் பிரதமர் மோடி, ஒன்பது ஆண்டுகளுக்குப் பிறகும் அதிக மதிப்பீடுகளுடன் மிகவும் பிரபலமாக இருக்கிறார். இதுவரை பிளவுபட்ட எதிர்ப்பை எதிர்கொண்டு மூன்றாவது முறையாக வெற்றி பெறுவார் என்று எதிர்பார்க்கப்படுகிறது.

கடந்த மாதம், மேற்கு வங்க முதல்வரும், திரிணாமுல் காங்கிரஸ் தலைவருமான மம்தா பானர்ஜியும், 2024 தேர்தலில் பாஜகவுக்கு சவாலாக ஒன்றிணைந்த எதிர்க்கட்சிக்கு அழைப்பு விடுத்தார். தனது கட்சி தனித்து போட்டியிடும் என்று அவர் ஏற்கனவே கூறியிருந்தார்.