'என் மகன் பா.ஜ.க-வில் இணைந்தது வேதனையளிக்கிறது' - கேரள முன்னாள் முதல்வர் ஏ.கே.அந்தோணி

'’எனக்கு 82 வயது. நான் எவ்வளவு காலம் வாழ்வேன் என்று எனக்குத் தெரியாது, ஆனால் நான் எவ்வளவு காலம் வாழ்ந்தாலும் இந்திய தேசிய காங்கிரஸின் ஊழியனாகவே இறப்பேன். அனில் பாஜகவில் சேர்ந்தது மிகுந்த வேதனை அளிக்கின்றது" என காங்கிரஸ் கட்சியை சேர்ந்த கேரள முன்னாள் முதல்வர் ஏ.கே.அந்தோணி தெரிவித்துள்ளார்.

காங்கிரஸ் கட்சியின் முன்னாள் மத்திய அமைச்சரான ஏ.கே. அந்தோணியின் மகனான அனில் அந்தோணி, காங்கிரஸ் கட்சியில் இருந்து கொண்டு, எதிர்க்கட்சியான ஆளும் பா.ஜ.க.வுக்கு ஆதரவான கருத்து தெரிவித்து வந்தார். இந்நிலையில், அவர் திடீரென காங்கிரசில் இருந்து விலகும் அறிவிப்பை வெளியிட்டார். 

அவரது ட்டுவிட்டர் பதிவில், ’’காங்கிரசில் உள்ள எனது பதவியில் இருந்து விலகி உள்ளேன். பேச்சுரிமைக்காக போராடியதற்கு எதிர்ப்பு தெரிவித்து, எனது டுவிட்டை நீக்கும்படி கூறி, சகித்து கொள்ள முடியாத அளவுக்கு தொலைபேசி அழைப்புகள் வந்தன. ஆனால், அதற்கு நான் மறுத்து விட்டேன்’’எனத் தெரிவித்து உள்ளார்.

இதனை தொடர்ந்து, தனது பதவி விலகல் கடிதம் ஒன்றையும் வெளியிட்ட அவர், கேரள காங்கிரசின் ஐ.டி.பிரிவு தலைவர் பதவியில் இருந்தும் விலகினார். இதனால், அப்போதே அவர் பா.ஜ.க.வில் இணைய கூடும் என யூகங்கள் வெளிவந்தன. இந்நிலையில், அவர் பா.ஜ.க.வில் இணைந்து உள்ளார்.

அனில் அந்தோணி பா.ஜ.க.வில் இணைந்தது  ஏ.கே. அந்தோணி கூறுகையில், ‘’பா.ஜ.க.வில் சேர்வது என்ற அனிலின் முடிவு என்னை புண்படுத்தியுள்ளது. அது ஒரு மிக தவறான முடிவு. ஒற்றுமையும், மத நல்லிணக்கமும் இந்தியாவின் அடித்தளம். 2014-ம் ஆண்டுக்கு பின்னர், மோடி அரசு அதிகாரத்திற்கு வந்ததும், பன்முக தன்மை மற்றும் மதச்சார்பின்மை ஆகியவற்றை திட்டமிட்ட முறையில் நீர்த்து போக செய்து வருகின்றனர். பா.ஜ.க. சீரான தன்மையில் மட்டுமே நம்பிக்கை கொண்டுள்ளது. பன்முக தன்மையில் ஒற்றுமை என்பதே இந்தியாவின் கருத்து. அவர்கள் நாட்டின் அரசியல் சாசன மதிப்புகளை அழித்து கொண்டிருக்கின்றனர்’’ என்றும் அவர் கூறியுள்ளார்.