'உறங்கிக் கொண்டிருக்கும் தேர்வாணையமே' - ட்விட்டரில் ட்ரெண்ட் ஆன TNPSC

தமிழ்நாடு அரசுப் பணியாளர் தேர்வாணையத்தால் 2022 ஆம் ஆண்டு நடத்தப்பட்ட குரூப்- 4 முடிவுகளை 7 மாதங்கள் ஆகியும் வெளியிடப்படாமல் தாமதமாகும் நிலையில் உடனே முடிவுகளை வெளியிடக்கோரி தேர்வர்கள் சமூக வலைதளமான ட்விட்டரில் ட்ரெண்டாக்கி வருகின்றனர். 

2022 ஆம் ஆண்டு மார்ச் மாதம் 7301 காலிப்பணியிடங்களுக்கு குரூப் 4 தேர்வு அறிவிக்கப்பட்டு ஜூலை மாதம் 24 ஆம் நாள் தேர்வு நடைபெற்றது. இந்த நிலையில் அக்டோபர் மாதமே வெளியாக வேண்டிய முடிவுகள் 7 மாதங்கள் ஆகியும் வெளியிடப்படாமல் தாமதம் ஆகிக்கொண்டு இருக்கிறது. சுமார் 18 லட்சம் தேர்வர்கள் குரூப்- 4 தேர்வை எழுதிவிட்டு முடிவுகளுக்காக காத்திருக்கும் நிலையில், இம்மாதம் முடிவுகள் வெளியிடப்படும் என்று அறிவிக்கப்பட்டது. இருப்பினும் முடிவுகள் இன்னும் அறிவிக்கப்படவில்லை. 

இந்நிலையில், லட்சக்கணக்கான தேர்வர்கள் சமூக வலைத்தளமான ட்விட்டரில் குரூப் 4 தேர்வு முடிவுகளை உடனே வெளியிட வேண்டும் எனக்கோரி பதிவிட்டு வருகின்றனர். #WeWantGroup4Results என்ற  ஹேஷ்டேக்கில் ரிசல்ட் தொடர்பாக தேர்வாணையத்தை டேக் செய்து கேள்வி எழுப்பி வருகின்றனர். டிஎன்பிஎஸ்சி தொடர்பான மீம்ஸ்களும் இந்த ஹேஷ்டேக்கில் அதிகம் பகிரப்பட்டு வருகிறது. ட்விட்டரில்  #WeWantGroup4Results என்ற ஹேஷ்டேக் இப்போதுவரை ட்ரெண்டாகி கொண்டு வருகிறது.

வேலையில்லாது வறுமையில் உழன்றுகொண்டிருக்கும் தேர்வரை, இனியும் காலம்தாழ்த்தி ஏமாற்றாமல் விரைந்து வெளியிடுங்கள் என கோரிக்கை விடுத்து வருகின்றனர்.