இலங்கையிலிருந்து தமிழகம் வந்த ஈழத்தமிழர்களை அகதிகளாக அறிவித்திடுக! - அன்புமணி ராமதாஸ்

இலங்கையிலிருந்து தமிழகம் வந்த ஈழத்தமிழர்களை அகதிகளாக அறிவித்திடுக! - அன்புமணி ராமதாஸ்

உலக அகதிகள் தினத்தில் இலங்கையிலிருந்து தமிழகம் வந்த ஈழத்தமிழர்களை அகதிகளாக அறிவிக்க வேண்டும் என்று பாமக தலைவர் அன்புமணி ராமதாஸ் கூறியுள்ளார்.

இலங்கையில் கடந்த 2 மாதங்களுக்கும் மேலாக நிலவி வரும் கடுமையான பொருளாதார நெருக்கடியால் இலங்கையில் உள்ள ஈழத்தமிழர்கள் பலர் கடல் வழியாக தனுஷ்கோடியில் தஞ்சம் அடைந்து வருகின்றனர். அவ்வாறு இலங்கையிலிருந்து தமிழகம் வந்த ஈழத்தமிழர்களை அகதிகளாக அறிவிக்க இரு மாதங்களாக மாநில அரசு கடிதம் எழுதியும் மத்திய அரசு அதனை கண்டுகொள்ளாமல் சட்டவிரோதமாக குடியேறியவர்கள் என கருதி அடைத்து வைத்துள்ளனர். இந்நிலையில் உலக அகதிகள் தினத்தை முன்னிட்டு இலங்கையிலிருந்து தமிழகம் வந்த ஈழத்தமிழர்களை அகதிகளாக அறிவிக்க வேண்டும் என்று அன்புமணி ராமதாஸ் கூறியுள்ளார்.

இது தொடர்பாக அவர் வெளியிட்டுள்ள ட்விட்டர் பதிவில்”உலக அகதிகள் நாள் இன்று கொண்டாடப்படுகிறது. நாடற்றவர்களாக மாறியவர்களின் நலன்களைக் காப்பதற்காகவும், அவர்களின் துணிச்சலைப் போற்றுவதற்காகவும் தான் இந்த நாள் கொண்டாடப்படுகிறது. ஆனால், பொருளாதார நெருக்கடியால் தமிழகம் வந்த ஈழத்தமிழர்களின் நிலை? இலங்கையில் நிலவும் கடுமையான பொருளாதார நெருக்கடி காரணமாக கடந்த 3 மாதங்களில் 90 #ஈழத்தமிழர்கள் தமிழ்நாட்டுக்கு வந்துள்ளனர். ஆனால், அவர்கள் இதுவரை அகதிகளாக அறிவிக்கப்படவில்லை. சட்டவிரோதமாக குடியேறியவர்களாக கருதி அடைத்து வைக்கப்பட்டுள்ளனர்.

இலங்கையிலிருந்து தமிழ்நாட்டிற்கு வந்த ஈழத்தமிழர்களை அகதிகளாக அறிவிக்க வேண்டும் என்று தமிழக அரசு கடிதம் எழுதி இரு மாதங்களாகியும் அதன் மீது மத்திய அரசு இன்னும் எந்த முடிவும் எடுக்கவில்லை. அதனால்,  ஈழத்தமிழர்களுக்கு உதவிகள் வழங்க முடியவில்லை. இலங்கையிலிருந்து வந்த தமிழர்களின் துயரம் தீர்க்கப்பட வேண்டும். அவர்களை அகதிகளாக அறிவித்து உதவிகளை வழங்க வேண்டும். ஏற்கனவே தமிழகத்தில் உள்ள அகதிகளின் வாழ்க்கை நிலையை மேம்படுத்தவும் மத்திய, மாநில அரசுகள் நடவடிக்கை மேற்கொள்ள வேண்டும்” என்று பாமக தலைவர் அன்புமணி ராமதாஸ் பதிவிட்டுள்ளார்.

Find Us Hereஇங்கே தேடவும்