அஜித்தின் 'AK62' படத்தை இயக்குநர் மகிழ் திருமேனி இயக்கவிருப்பதாக ஒரு பக்கம் தகவல் கசிந்தது.
நடிகர் அஜித் நடிப்பில் அடுத்து உருவாகவிருக்கும் 'AK62' குறித்த எதிர்பார்ப்பு ரசிகர்கள் மத்தியில் மிகுந்துள்ளது. இந்தப் படத்தை ஏற்கனவே இயக்குநர் விக்னேஷ் சிவன் இயக்கப் போவதாக சில மாதங்களுக்கு முன்பு தகவல்கள் வெளியாகின. அதன் பின், விக்னேஷ் சிவன் - அஜித் தரப்பினர் இடையே ஏற்பட்ட கருத்து வேறுபட்டால் இந்தப் படத்திலிருந்து விக்னேஷ் சிவன் விலக்கப்பட்டார் எனவும் கோலிவுட் வட்டாரங்களில் பேசப்பட்டது.
எனினும், இதுகுறித்த எந்தவித அதிகாரப்பூர்வ அறிவிப்பும் விக்னேஷ் சிவன் தரப்பிலோ, அல்லது அஜித் தரப்பிலோ, அல்லது தயாரிப்பு நிறுவனமான லைகா நிறுவனத்தின் தரப்பிலோ வெளியிடப்படவில்லை. இந்நிலையில், அஜித்தின் 'AK62' படத்தை இயக்குநர் மகிழ் திருமேனி இயக்கவிருப்பதாக ஒரு பக்கம் தகவல் கசிந்தது. ’முன்தினம் பார்த்தேனே’ திரைப்படத்தின் மூலம் தமிழ் சினிமாவுக்கு அறிமுகமான மகிழ் திருமேனிக்கு, அந்தத் திரைப்படத்திற்கு பார்வையாளர்கள் மத்தியில் பெருமளவு வரவேற்பு கிடைக்கவில்லை.
அதற்கு பிறகு நடிகர் அருண் விஜய் நடிப்பில் அவர் இயக்கத்தில் வெளியான ’தடையறத் தாக்க’ திரைப்படம் வசூல் ரீதியாக பெருமளவு வசூல் ஈட்டவில்லையென்றாலும் விமர்சகர்கள் மத்தியில் பெரும் வரவேற்பைப் பெற்றது. பலரும் இந்தத் திரைப்படத்தை ஓர் நேர்த்தியான ஆக்ஷன் திரைப்படமென பாராட்டினர். இதற்கடுத்து சில ஆண்டுகள் கழித்து அதே அருண் விஜய் நடிப்பில் அவர் இயக்கிய ’தடம்’ திரைப்படம் விமர்சன ரீதியாகவும் சரி, வசூல் ரீதியாகவும் சரி மாபெரும் வெற்றி பெற்றது.
தற்போது 'AK 62' திரைப்படத்தை இயக்குநர் மகிழ் திருமேனி இயக்கவிருப்பதாக தகவல் வெளியான நிலையில், அதற்கான டைட்டில் புரோமோ வீடியோவை சமீபத்தில் வெளியான நடிகர் விஜய்யின் ‘லியோ’ திரைப்படத்தின் புரோமோ வீடியோ போல் வெளியிடவுள்ளதாகப் பரவலாக பேசப்படுகிறது. மேலும், இந்தத் திரைப்படம் முழுக்க, முழுக்க மகிழ் திருமேனியின் பாணியில் உருவாகும் ஒரு ஆக்ஷன் திரைப்படமாகத் தான் இருக்குமெனவும் பேசப்படுகிறது. ஏற்கனவே இயக்குநர் மகிழ் திருமேனி நடிகர் விஜய்க்கு கதை சொல்லி, உதயநிதியின் கால்ஷீட்டால் அது தள்ளிப்போனதும் குறிப்பிடத்தக்கது.
