மழைநீர் அறுவடைத்தொட்டி... ஒரு மரக்காடு... அசத்தும் சாமக்கோடாங்கி சங்கரலிங்கம்!

காடு மலைகளில் வசிக்கும் மக்கள் நாகரீகம் என்ற பெயரில் நகரங்களை நோக்கி நகர்ந்து கொண்டிருக்க… நகரத்தில் வசித்த, அரசு உயர் பதவி வகித்த ஒருவர் இரண்டையும் உதறிவிட்டு வனத்தை நோக்கிப் போயிருக்கிறார் என்றால் ஆச்சரியமாக இருக்கிறதா?அந்த ஆச்சரிய மனிதர் ஞானசூரிய பகவான்.வேலூர் மாவட்டம், நாட்றம்பள்ளி வட்டத்தில் வளைந்து, நெளிந்து செல்லும் மல்ல குண்டா மலைப்பாதையில் இருக்கும் தெக்குப்பட்டு கிராமத்தில் தற்போது வசிக்கிறார் ஞானசூரிய பகவான். அவரைச் சந்திப்பதற்காகச் சென்றோம். அவரது வீட்டிலிருந்து பார்த்தால் கண்ணுக்கெட்டிய தூரம்வரை ரம்மியமான மலைகள், மலைக்குத் தாவணி போட்ட மாதிரி பச்சைப்பசேல் மரங்கள். அதற்கு மத்தியில் இருக்கும் மலைக்கிராமம் தான் தெக்குப்பட்டு. அதில் ஒரு ஏக்கர் 41 சென்ட் நிலத்தில் ஒரு அடர் வனத்தை உருவாக்கியிருக்கிறார். அதற்கு மத்தியில் வீடு கட்டி மரங்களோடு வசித்து வருகிறார் ஞானசூரிய பகவான். கோயம்புத்தூர் வேளாண் பல்கலைக்கழகத்தில் பி.எஸ்.சி., வேளாண்மை படித்து, தமிழக அரசின் வேளாண்மைத் துறை அதிகாரியாகப் பணியாற்றியவர்..வேளாண்மையில் விவசாயிகள் இன்னும் மேம்பாடு அடைய வேண்டும் என்பதற்காக அரசுப்பணியை ராஜினாமா செய்துவிட்டு சென்னை வானொலி நிலையத்தில் வேளாண்மைப் பிரிவில் சேர்ந்தார். தினமும் இரவு ஏழரை மணிக்கு ஒலிபரப்பான ‘வீடும் வயலும்’ நிகழ்ச்சியில் மண்ணோடும் மக்களோடும் புழுதியில் புரண்டார். விவசாயிகளோடு இன்னும் நெருக்கமாக 'காற்றில்' பழகினார். அதற்காக ’சாமக்கோடங்கி சங்கரலிங்கம்’ என்ற புனைப்பெயரில் பேசினார்.1980களில் சாமக்கோடங்கியின் ஆலோசனைகளைக் கேட்டு உழவு செய்து நல்ல விளைச்சல் கண்டவர்கள் நிறைய பேர். அப்பொழுது அவரது தாகம் தீர்ந்தாலும், பசுமை மீது கொண்ட மோகம் குறையவில்லை. நாம் வெறும் ’காற்றில்’ ஆலோசனைகளைச் சொல்வதைவிட விவசாயிகளோடு ’சேற்றில்’ இறங்கி ஆலோசனைகளைச் சொன்னால் இன்னும் நிறைய பலன் கிடைக்கும் என்று வானொலி பணியையும் ராஜினாமா செய்தார். அன்று வந்தவர்தான் இந்த மலைக்கு. இன்று பல்லாயிரம் மாணவர்களுக்கு நீர் மேலாண்மை, நவீன வேளாண்மை சொல்லிக்கொடுத்து, இந்த மலையின் உயரத்திற்கு உயர்த்தியிருக்கிறார்.ஞான சூரியபகவானை சந்தித்துப் பேசினோம். நண்பர்கள் அமர்ந்து பேச வெப்பாலை மரத்தடியில் கற்பாறைகளை இருக்கைகளாகப் போட்டிருக்கிறார். நாமும் ஒரு பாறையில் அமர்ந்து கொண்டு பேசினோம்..அதென்ன மனிதர்களைவிட மரங்களின்மேல் அப்படியொரு காதல்?''அதியமான் அவ்வைக்கு பொன்னையும், பொருளையும் வாரிக் கொடுக்கவில்லை. ஒரே ஒரு நெல்லிக்கனியைத்தான் கொடுத்தான். அவ்வை மனிதர்களைப் பாடினாலும் ‘ஆத்திச்சூடி', ‘கொன்றை வேந்தன்’என்று மரங்களின் பெயர்களைத்தான் நூலின் தலைப்புகளாக வைத்தார். அத்தியும், கொன்றையும் மரங்கள். சீதையின் அசோக மரமும், புத்தரின் போதி மரமும் எனக்குள் வேர்விட்டு கிளை விட்டிருக்கின்றன. நிலப்பகுதியில் மூன்றில் ஒரு பங்கு மரங்கள் இருக்க வேண்டும். இந்தியாவில் 1947க்கு முன் 40 சதவிகிதம் இருந்த வனங்கள், இப்பொழுது 24 சதவிகிதமாகவும், தமிழகத்தில் 17 சதவிகிதமாகவும் சுருங்கிக் கிடக்கிறது. இதை நான் வருத்தத்தோடு பதிவு செய்கிறேன். காரணம் இந்தியாவின் பழையபெயர் ‘ஜம்பூத்தீபம்’. ஜம்பு நாவல் மரங்கள் நிறைந்த தீபகற்பம் என்பதால் அப்பெயர். தமிழகத்தின் பழைய பெயர் ’நாவலந்தீவு’. இதற்கு அர்த்தம் சொல்லாமலே புரிந்திருக்கும். மனிதர்கள் வளர்ச்சி என்பது மரங்கள் இல்லாமல் சாத்தியமாகாது. மழைவளமும், நீர்வளமும், ஆரோக்கியமான காற்றின் வளமும்தான் மனிதர்களை வளமுடன் வாழவைக்கும். ஏ.சியும், மின் விசிறியும் கொள்ளிக்கட்டையால் முதுகு சொறிந்து கொள்ளும் கதைதான்''.இங்கு என்ன சாகுபடி செய்கிறீர்கள்?''எங்களுக்கு ஒரு ஏக்கர் 41 சென்ட் நிலம் இருக்கிறது. இதில் பல்வேறு பழ மரங்கள் மற்றும் அயல்நாட்டு மரங்கள் இருக்கின்றன. இதில் 220 ச.மீட்டரில் 1,100 மரங்கள் நிறைந்த ஒரு சிறு காட்டை வளர்க்கிறேன். அதில் 100 வகையான மரங்கள் இருக்கின்றன. இதற்கு ’ஒரு மரக்காடு’ என்று பெயர். மாடியிலிருந்து கீழே விழும் தண்ணீரைச் சேமிக்க மூன்று ’மழைநீர் அறுவடைத்தொட்டி’கள் அமைத்திருக்கிறேன். அதன் மூலம் 70,000 லிட்டர் நீரைத் தேக்கிப் பயன்படுத்துகிறோம். அதேபோல் ஆழ்துளைக் கிணற்றுக்கு அருகில் நீர் உறிஞ்சு குழி அமைத்து, அதற்கு மறு உயிர் தந்திருக்கிறோம். எத்தனை வறட்சியிலும், அமுதசுரபி போல் தண்ணீரைச் சுரந்து கொண்டே இருக்கும்''. .இவ்வளவு சின்ன இடத்தில் இத்தனை மரங்கள் எப்படி?''நாம் இடைவெளி விட்டு நட்டு வளர்க்கின்ற மரங்களைவிட எந்தக் கட்டுப்பாடும் இல்லாமல் இயல்பாக, இயற்கையாக வளரும் காட்டு மரங்கள் ஓங்கி உயர்ந்து வளரும். காட்டு மரங்களுக்கு இடைவெளியெல்லாம் கிடையாது. மரம், செடி, கொடி…என அடர்ந்து 100 சதவிகிதம் வளரும். இந்தக்காட்டை ’மியாவாக்கி’ என்பார்கள். குறைவான இடத்தில் செயற்கை முறையில் சிறுசிறு காடுகளை உருவாக்கும் வித்தையை ஜப்பான் நாட்டைச்சார்ந்த ’மியாவாக்கி' என்ற தாவரவியலர்தான் கற்றுக்கொடுத்தார். தாவரவியல் வரலாற்றில் 40 மில்லியன் மரங்களை நட்டு யாரும் செய்யாத சாதனையை அவர் செய்திருக்கிறார். இன்னும் சொல்லப்போனால் சீனப்பெருஞ்சுவற்றையொட்டி 4 லட்சம் மரங்களை நட்டு வளர்த்துக் கொடுத்திருக்கிறார். அந்த மேலாண்மையைப் பயன்படுத்தி நமது சூழலுக்கு ஏற்ப நானும் இந்தச் சிறு வனத்தை உருவாக்கியிருக்கிறேன். ஆனால் வனத்துறை 1,000 மரங்களை நட 2.47 ஏக்கர் அதாவது ஒரு ஹெக்டர் நிலம் தேவை என்கிறது".மியாவாக்கி முறையில் வணிகரீதியான மரங்களை வளர்க்க முடியுமா?"மரங்கள் நமக்குத் தாய். இதில் கெட்ட மரம், நல்ல மரம், உயர்ந்த மரம், தாழ்ந்த மரம் என்று கிடையாது. ஒவ்வொன்றிற்கும் ஒரு சிறப்பு இருக்கிறது. இங்கு சரக்கொன்றை, சோப்புக்காய் மரம், சீயக்காய் கொடிமரம், நெட்டிலிங்கம், நாகலிங்கம், ஆச்சா, காட்டுவா மரம், தூங்குமூஞ்சி மரம், மராமரம், பவழமல்லி என்கிற பாரிஜாதம், சிங்கப்பூர் செர்ரி, செஞ்சந்தனம் உட்பட எல்லாவகை மரங்களும் இருக்கின்றன. ரணகள்ளி, நிலவேம்பு போன்ற மூலிகைச்செடிகளும் இருக்கின்றன. செம்மரமும் வளர்கிறது".வன வாழ்க்கை எப்படி இருக்கிறது?"இங்கு வீடுகள், மனிதர்கள் குறைவாக இருக்கலாம். ஆனால் மரங்கள் நிறைந்திருக்கிறதே. அதை நட்டு வளர்த்து அதனோடு பழகிப்பாருங்கள். அப்பொழுது தெரியும் அதன் அருமை. நான் ஏற்கெனவே சொன்ன மாதிரி மரங்கள் நமக்குத் தாய் மாதிரி. அள்ளி, அள்ளித் தருவதில் அவளுக்கு நிகர் அவளே! இலைகள் உதிரும்போது மனசு வலிக்கும். பூ பூக்கும் போதும், காய்கள், கனிகள் காய்த்துத் தொங்கும் போதும் பேரக்குழந்தைகளைப் பார்த்த மாதிரி மனது குதூகலிக்கும். இதோ இந்த வனத்துக்கு நடுவில் இருக்கும் பாறாங்கல் மீது உட்கார்ந்து கொண்டு பல நாவல்கள், சிறு கதைகள், பள்ளிப்பாடப் புத்தகங்கள் எழுதியிருக்கிறேன்".வானொலியில் கிராமப்புற மக்களுக்குக் குறி சொன்ன சாமக்கோடங்கி சங்கரலிங்கத்திற்கு முத்தமிழறிஞர் கலைஞர் கூட ரசிகர். முரசொலியிலும், முத்தாரம் பராசக்தி பதிலிலும், சாமக்கோடங்கியின் தமிழ் உச்சரிப்பு என்னைக் கவர்ந்திருக்கிறது என்று சொல்லியிருப்பார்.மாணவர்களுக்கு என்ன மாதிரியான பயிற்சி தருகிறீர்கள்?'' நீர் மேலாண்மை, நவீன வேளாண்மை பற்றி எளிமையான தமிழில் சொல்லித் தருகிறேன். நபார்டு வங்கி, இந்திய அரசு மற்றும் தமிழ்நாடு அரசு மற்றும் பல்வேறு தரப்பிலிருந்து மாணவர்களைப் பயிற்சிக்கு அனுப்புகிறார்கள். இந்தப் பயிற்சியின் மூலம் விவசாயத் தொழில்நுட்பத்தை நாடெங்கும் என் மாணவர்கள் கையாளுகிறார்கள். இந்த இயற்கை வள பாதுகாப்புப் பணிகளை ’பூமி’ என்னும் அறக்கட்டளைமூலம் செய்து வருகிறோம். அந்தப் பணிகளுக்குத் தான் 'பசுமை முதன்மையானவர்' விருதை அளித்திருக்கிறார்கள்.ஓடும் நீரை நடக்க வைப்போம்... நடக்கும் நீரை நிற்க வைப்போம்... நிற்கும் நீரை பூமிக்குள் இறங்க வைப்போம்... இதுவரை 41 லட்சம் கன மீட்டர் தண்ணீரைத் தேக்கும் கசிவுநீர் குட்டைகளை உருவாக்கியிருக்கிறோம். இந்தப் பணிகள்மூலம் பாலைவனத்தில் கூட வற்றாத ஜீவ நதியை ஓட வைக்க முடியும்..உங்கள் குடும்ப வாழ்க்கை?"எனக்குத் திருமணமாகி ஒரு மகன், ஒரு மகள். இருவருக்கும் திருமணமாகி விட்டது. பொதுவாக மனைவிமார்கள் நகர்ப்புறத்தில் வசிக்க ஆசைப்படுவார்கள். ஆனால் என் மனைவி இந்தக் காட்டில் எனக்கு உறுதுணையாகப் பணியாற்றிக் கொண்டிருக்கிறார். நிறைய பறவைகள், பட்டாம்பூச்சிகள், தேனீக்கள் எங்கள் தோட்டத்தைச் சுற்றிவரும். எங்கள் ஒரு மரக்காட்டிற்கு கிளிகள், மயில்கள் வந்து போகின்றன. இது வனத்திற்கு பறவைகள் தரும் சான்றிதழ். அப்பொழுது தான் வனம் சரியாக வளர்ந்திருக்கிறது என்று பொருள். எனக்குக் காடு தான் வீடு. இங்கு இல்லாத மரங்களே இல்லை'' சிரித்துக்கொண்டே சொன்னார்.சுற்றுச்சூழலால் கெட்டுப் போயிருக்கும் இந்தத் தேசத்திற்குத் தேவை, இவரைப் போன்ற காட்டு மனிதர்கள் தான்! தொடர்புக்கு : ஞான சூரியபகவான் : பெட்டிச் செய்தி நீர் மேலாண்மை என்றால் என்ன? " 'பணத்தைத் தண்ணீர் மாதிரி செலவழிக்கிறான்' என்று சொல்வார்கள். தண்ணீரைப் பணம் போல் சேமிக்க வேண்டும். ராஜஸ்தானைச் சேர்ந்த ராஜேந்தர்சிங், 100 ஆண்டுகள் தண்ணீர் ஓடாத ஆற்றின் கரைகளில் 'ஜோகாத்' என்னும் நீர் உறிஞ்சுக்குழிகளை அமைத்துத் தண்ணீரை ஓட வைத்திருக்கிறார். ஆற்றில் இரண்டு கரைகளிலும் ஒரு கன மீட்டர் குழியில் 1,000 லிட்டர் தண்ணீரைத் தேக்கும் அளவுக்கு 56,000 குழிகளை வெட்டி மழைநீரைத் தேக்கி, இப்பொழுது ஆற்றில் தண்ணீர் ஓடிக்கொண்டிருக்கிறது. தண்ணீர் ஓடாத 6 ஆறுகளை இணைத்து வறண்ட நதிக்கரைகளைச் செழிப்பாக்கியிருக்கிறார். அதே நேரத்தில் இந்தியாவிலேயே அதிக மழை பெய்யும் சிரபுஞ்சியில் தண்ணீர் சேமிப்பு இல்லாததால் 6 மாதம் தண்ணீர் பஞ்சம் ஏற்பட்டுள்ளது. இதுதான் நீர் மேலாண்மை!" பெட்டிச் செய்தி பசுமை முதன்மையாளர் இவரது சூழலியல் பணிகளைப் பாராட்டி, ‘பசுமை முதன்மையாளர்’ விருதுடன், ஒரு லட்சம் ரூபாய் ரொக்கப்பரிசை அளித்துள்ளது தமிழக அரசு. அதனைத் திருப்பத்தூர் மாவட்ட ஆட்சியர் அமர் குஷ்வாகா, ஞானசூரிய பகவானிடம் வழங்கினார். இது இயற்கை வள பாதுகாப்புப் பணிகளான தடுப்பணைகள் அமைத்தல், சிறு வனங்கள் அமைத்தல், நீர் உறிஞ்சுகுழிகள் அமைத்தல், பருவகால மாற்றப் பாதுகாப்பு குறித்த விழிப்புணர்வை ஏற்படுத்துதல், பயிற்சி அளித்தல் போன்ற பணிகளுக்காக இந்த விருது வழங்கப்பட்டுள்ளது. - அன்புவேலாயுதம்

மழைநீர் அறுவடைத்தொட்டி... ஒரு மரக்காடு... அசத்தும் சாமக்கோடாங்கி சங்கரலிங்கம்!

Related Stories