நஞ்சுக்கொடியை வெளியேற்றும் வெண்டைக்காய்

கால்நடைகள் கன்று போட்டவுடன் அதிகபட்சமாக 6 முதல் 8 மணி நேரத்திற்குள் நஞ்சுக்கொடி வெளியேறிவிடும். ஒரு சில பசுக்கள் 3 மணி நேரத்திற்குள்ளாகவே நஞ்சுக்கொடியை வெளியேற்றிவிடும். பசுக்களின் நஞ்சுக்கொடி சராசரியாக 4 அடி நீளம், 6 கிலோ எடை கொண்டதாக இருக்கிறது. நஞ்சுக்கொடியின் ஒரு முனை பசுக்களில் உள்ள 100, 120 வித்திலைகளுடன் (COTYLEDON) இணைந்து இருக்கும். மறுமுனை கன்றுக்குட்டிகளின் தொப்புளுடன் இணைந்து காணப்படும். கன்றுக்குட்டிகளின் உடல் ஆரோக்கியத்திற்கும், சரியான வளர்ச்சிக்கும் ஊட்டச்சத்துக்களை தொப்புள் மூலமாக வழங்குவது இந்த நஞ்சுக்கொடிதான்..'ஹார்மோன்' சுரப்புகன்று ஈன்ற பிறகு வித்திலைகள் உடன் இணைக்கப்பட்ட நஞ்சுக்கொடியின் ரத்த ஓட்டம் தடைபட்டு, தானாகவே சிதைந்து, பிரிந்து வெளியேறிவிடும். கர்ப்பப்பையிலிருக்கும் ஒரு முனை அடர் நீல நிறத்திலோ அல்லது சிவப்பு நிறத்திலோ இருக்கும். தொப்புளுடன் இணைந்திருக்கும் இன்னொரு முனை சாம்பல் நிறத்தில் இருக்கும்.வித்திலைகளுடன் இருக்கும் பகுதி, கன்று ஈன்ற பிறகு ரத்தம் ஓட்டம் கொஞ்சம் கொஞ்சமாகத் தடைபட்டவுடன் அதிலிருந்து விடுபட்டு நஞ்சுக்கொடி மட்டும் தானாகவே வெளியேறிவிடும். அது ஒரு வித 'ஹார்மோன்' சுரப்பு காரணமாக நிகழ்கிறது.தாய் வயிற்றில் இருக்கும் கன்றுக்குட்டிகளுக்குத் தேவையான ஆக்ஸிஜன் மற்றும் ஊட்டச்சத்துக்கள் நஞ்சுக்கொடி வழியாகவே கிடைக்கும். அத்துடன் தேவையற்ற கழிவுகள் மற்றும் கார்பன்-டை-ஆக்ஸைடையும் அகற்றி ரத்தத்தைச் சுத்தப்படுத்துகிறது.உயிர் நாடிகன்று பிறக்கும் வரை கால்நடைகளின் நஞ்சுக் கொடியும் தொப்புள் கொடியும் உயிர் நாடியாகச் செயல்பட்டு கன்றின் சீரான வளர்ச்சிக்கு உதவியாக இருக்கின்றன. கன்று ஈன்ற பிறகு அதே உறுப்பு உடலுக்குத் தேவையற்றதாக இருக்கின்ற காரணத்தால் அது பிரிந்து வெளியேறுகிறது. கன்று ஈன்ற பிறகு அதன் அளப்பறிய பணி முடிவுற்று தானாகவே வெளியேறி விடும். நஞ்சுக்கொடியைப் பொறுத்தவரை, கர்ப்பமாக உள்ள காலத்தில் மட்டுமே கன்றுகளின் உடலுக்கு உதவும் ஒரு செயற்கையான உறுப்பாகும்..கருமுட்டை, கர்ப்பப்பைக்குள் உருவாகும். அதே வேளையில், காளைகளின் விந்தணு கர்ப்பப்பையினுள் சென்று சினை பிடிக்கும். அந்த வேளையில்தான் இந்த நஞ்சுக்கொடி உருவாகிறது. கன்று பிறக்கும் வரை இந்தச் செயற்கை உறுப்பு கால்நடைகளின் கர்ப்பப்பையிலிருந்து அதன் பணியைச் சிறப்பாகச் செய்கிறது.ஊட்டச்சத்துக் குறைபாடுகர்ப்ப காலத்தில் கன்றுகளின் வளர்ச்சிக்குத் தேவையான சத்துக்களையும் ஆக்ஸிஜனையும் பெறுவது இந்த நஞ்சுக்கொடி மூலம் தான். கன்று போட்ட பிறகும் குறிப்பிட்ட நேரத்தில் நஞ்சுக்கொடி வெளியேறாததற்கு ஹார்மோன் குறைபாடு, ஊட்டச்சத்துக் குறைபாடு மற்றும் சரிவிகித தீவன வகைகளைக் கொடுக்காதது உள்ளிட்ட பல்வேறு காரணங்கள் இருக்கின்றன.இதைச் செய்யக் கூடாதுநஞ்சுக்கொடி வெளியேறாத நிலையில், வயிறு நிரம்பினால் நஞ்சுக்கொடி வெளியேறி விடும் என்று தவிடு, பருத்திக்கொட்டை, பிண்ணாக்கு போன்ற அடர் தீவனங்கள் வயிறு நிறைய கொடுப்பார்கள். அது தவறான செயல். வயிறு நிரம்புவதற்கும் கர்ப்பப்பையினுள் இருக்கும் நஞ்சுக்கொடி வெளியேறுவதற்கும் சம்பந்தமே இல்லை. அப்படிக் கொடுக்கும்பொழுது அதனை ஜீரணிக்க முடியாமல் வயிற்று வலியால் மாடு படுத்துப் படுத்து எழுந்து அவதிப்படும்.இரவு நேரங்களில் கன்று போடும்பொழுது நஞ்சு போட அதிக நேரம் எடுத்துக் கொள்ளும். கவனிக்காமல் விட்டு விட்டால் நமக்குத் தெரியாமல் அந்த நஞ்சினைப் பசுக்களே தின்று விடும் என்ற பயத்தில் பல தாய்மார்கள் இரவு முழுவதும் கண்விழித்து நஞ்சு போடும் வரை காத்துக் கொண்டிருப்பார்கள்..நிம்மதியாகத் தூங்கலாம்அப்படி தூக்கம் கெட்டுப் பார்த்துக்கொள்ள வேண்டிய அவசியமில்லை. மூக்குக் கயிற்றின் இரண்டு பக்கமும் கயிற்றினைக் கட்டி இழுத்துக் கட்டி விட்டால் நஞ்சுக்கொடி வெளியேறினாலும் அதனால் அதனைச் சாப்பிட முடியாது. பசுக்கள் படுக்கவும் எழுத்திருக்கவும் வாய்ப்பாகவும் இருக்கும். பின் பக்கமாக இருக்கும் நஞ்சுக்கொடியைத் தலையைத் திருப்பி தின்னவும் முடியாது. நிம்மதியாகத் தாய்மார்கள் தூங்கலாம்.காலையில் எழுந்து நஞ்சுக் கொடி வெளியேறியிருந்தாலும் எடுத்துச் சுத்தப்படுத்திவிட்டு, மாட்டைச் சுடுதண்ணீரில் கழுவி விடலாம். நஞ்சு போடாத நிலையில் இருந்தால் கால்நடை மருத்துவரை அழைத்து அதனை வெளியே கொண்டு வரலாம். அல்லது கீழ்க்கண்ட பாரம்பரிய சிகிச்சை முறைகளை மேற்கொண்டு நஞ்சினை வெளியேற்றலாம்.கைகளை விட்டு எடுக்கக் கூடாதுகிராமப்புறங்களில் சில பேர் நஞ்சினை எடுக்கிறேன் என்று கர்ப்பப்பையினுள் கையினை விட்டு எடுக்கிறார்கள். அது தவறான செயல். அப்படி எடுக்கும்போது, அந்த நஞ்சுக்கொடி பாதி அறுந்து போகும் அல்லது நஞ்சின் அனைத்துப் பகுதிகளையும் நீக்காமல் விட்டுப் போகும். அவர்களின் கைகளிலே இருக்கும் கிருமிகள் கர்ப்பப்பையைச் சேதப்படுத்தி சீழ் பிடிக்கச் செய்யலாம். அதன்மூலம் அந்தக் கால்நடை நிரந்தரமாகவே மலடாகும் வாய்ப்பும் உருவாகலாம். கிராமப்புறங்களில் இன்னும் சிலபேர் பசுக்களின் பிறப்புறுப்பின் பின்னே தொங்கிக் கொண்டிருக்கும், நஞ்சுக் கொடியில் கனமான கல்லினைக் கட்டித் தொங்க விடுவார்கள். அதுவும் தவறான செயல்பாடு. கல்லின் கனம் தாங்காமல் நஞ்சுக்கொடி பாதியில் அறுந்து விடும்.சரிவிகித தீவனம்நாம் மேலே குறிப்பிட்டபடி நஞ்சுக்கொடி உடனடியாக வெளியேறாததற்கு, 'ஹார்மோன்' குறைபாடு, சரிவிகித தீவன அளவுகளைக் கையாளாத தன்மை, அடர், உலர், பசுந்தீவனங்களின் கலவையைக் கொடுக்காதது போன்றவை காரணமாகும். வெறும் பசுந்தீவனங்களையே போடுவது அல்லது அடர் தீவனங்களைக் கொண்டு வயிற்றை நிரப்புவதும்தான் காரணம். கால்நடை வளர்ப்பில், தனிக்கவனம் செலுத்தினால் கண்டிப்பாகக் கன்று ஈன்ற பிறகு சில மணிகளிலேயே நஞ்சுக்கொடி வெளியேறும். கர்ப்பமான கால்நடைகள் சில சமயம் பல்வேறு காரணங்களால் தொற்று நோய்த்தாக்குதல் பெறலாம். அப்படிப்பட்ட சமயங்களில் கால்நடை மருத்துவர்களின் ஆலோசனைகளைக் கேட்டறிந்து செயல்படுவது புத்திசாலித்தனமாகும். உடனே எடுக்கக் கூடாது.அதேபோல சில பேர் கன்று போட இயலாமல் கால்நடை மருத்துவரையோ, அனுபவ ஆட்களைக் கொண்டோ கன்றுகளை வெளிக்கொண்டு வருவார்கள். அப்படிப்பட்ட சமயங்களில் நஞ்சுக்கொடியைக் கன்று போட்ட உடனேயே எடுத்துவிடக் கேட்பார்கள். வித்திலைகளிலிருந்து நஞ்சுக்கொடியைப் பிரிக்கும்போது அதிக சிரமமாக இருப்பதுடன் அதிகமான உதிரப்போக்கும் ஏற்பட்டு கால்நடைகள் மரணமுறவும் வாய்ப்புண்டு. ஆகவே கன்று போட்டவுடனே நஞ்சுக்கொடியைப் பிரித்து எடுப்பது தவறான செயல்பாடு.கால்நடை மருத்துவ அறிவு பெற்றவர்கள் அப்படிச் செய்யமாட்டார்கள். அறுவை சிகிச்சை செய்து கன்றுகளை எடுக்கும்போது மட்டும் அப்படிச் செய்வார்கள். ரத்தம் அதிகமாக வெளியேறினால் அதனை உறைய வைக்க, தக்க பாதுகாப்பு ஊசியைப் போட்டுக் காப்பார்கள். ரத்த ஓட்டம் தடைபட்டு தானாகவே நஞ்சுக்கொடி பிரிந்து விடும். அப்படி பிரியாத நிலை உருவானால் கீழ்க்கண்ட பாரம்பரிய சிகிச்சை முறைகளை மேற்கொண்டு பயன்பெறலாம்.பாரம்பரிய சிகிச்சைஎல்லா இடங்களிலும் சுலபமாகக் கிடைக்கும் வெண்டைக்காய் இதற்கு ஓர் அருமருந்து. கன்று போட்டு 2,3 மணிநேரம் கழித்து ஒரு கிலோ வெண்டைக்காயை எடுத்து இரண்டு மூன்று துண்டுகளாக வெட்டிக்கொள்ள வேண்டும். அதனுடன் 100 முதல் 200 கிராம் வரை கருப்பட்டி சேர்த்துப் பிசைந்து கொடுத்தால் நஞ்சுக்கொடி அடுத்த சில மணிகளில் வெளியேறி விடும்.100 முதல் 150 கிராம் மாங்கொட்டைப் பருப்புடன் 250 கிராம் மலைவேம்பு இலை சேர்த்து அரைத்துக்கொள்ள வேண்டும். அதனுடன் 250 கிராம் கருப்பட்டி கலந்து கொடுத்தாலும் நஞ்சு வெளியேறும்.கம்பு மற்றும் செஞ்சோளம் இரண்டையும் அரைத்து 5 லிட்டர் தண்ணீர் விட்டுக் காய்ச்ச வேண்டும். அத்துடன் பனை வெல்லம் கலந்து கொடுத்தாலும் நஞ்சு வெளியேறும். வெண்டைக்காய் 250 கிராம், எள் 250 கிராம் எடுத்து நன்றாக இடித்துக்கொள்ள வேண்டும். அதனுடன் பனை வெல்லம் அல்லது கருப்பட்டி 250 கிராம் சேர்த்துப் பிசைந்து கன்று ஈன்ற கால்நடைகளுக்குக் கொடுத்தாலும் இரண்டு, மூன்று மணி நேரத்தில் சுலபமாக நஞ்சுக்கொடி வெளியேறும்.நாம் தலைக்குத் தேய்க்கும் அரப்பு என்ற உசிலை இலைப்பொடி 50 கிராம் எடுத்துக்கொண்டு அத்துடன் எள் செடியைக் காயுடன் சேர்த்து அரைத்து பனை வெல்லம் கலந்து பிசைந்து உருண்டையாக்கி உள்ளுக்குள் கொடுக்கலாம். செலவில்லா அல்லது குறைவான செலவிலே நஞ்சுக்கொடியை வெளியேற்றும் சூட்சமத்தை நாம் இப்போது தெரிந்து கொண்டோம். இனி, இரவு நேரங்களில் கன்று ஈன்ற கால்நடைகள் நஞ்சுக்கொடி வெளியேறவில்லை எனத் துடித்துக் கொண்டிருக்காமல் இந்தப் பாரம்பரிய சிகிச்சை முறைகள் மூலம் சிக்கலை நீங்களே தீர்த்துக்கொள்ளுங்கள். மற்ற கால்நடை வளர்ப்பாளர்களுக்கும்சொல்லி உதவுங்கள்.தொடர்புக்கு : டாக்டர்.கே.வி.கோவிந்தராஜ் - 98427 04504பெட்டிச் செய்தி மூங்கில், சந்தன இலைகள் மூங்கில் இலை நான்கைந்து கைப்பிடி எடுத்து எள் சேர்த்து இடித்து கருப்பட்டி கலந்தும் கொடுக்கலாம். மஞ்சள் தூள் 50 கிராம், வசம்பு 10 கிராம், சின்ன வெங்காயம் 100 கிராம், சந்தன இலை 100 கிராம், எள் 250 கிராம் எடுத்து நன்கு இடித்துக்கொள்ள வேண்டும். அதனுடன் கருப்பட்டி கலந்து பிசைந்து உருண்டையாக்கி உள்ளுக்கு ஊட்டி விட்டாலும் நஞ்சு வெளியேறும்.பெட்டிச் செய்திஈக்கள் விரட்டும் மஞ்சள் தூள்நஞ்சுக்கொடி வெளியேறிய பிறகு, சுடுதண்ணீரில் நன்கு கழுவி விட்டு மஞ்சள் தூள், வசம்புத்தூள் இரண்டையும் கலந்து கால்நடைகளின் பிறப்புறுப்பில் பூசிவிட்டால் ஈக்கள் உட்கார்ந்து புழு வைக்காது. - டாக்டர் கே.வி. கோவிந்தராஜ்

நஞ்சுக்கொடியை வெளியேற்றும் வெண்டைக்காய்

Related Stories