நெல் 67,000... அரிசி 77,000... மாவு 1,35,000 ரூபாய் மகத்தான லாபம் கொடுக்கும் மதிப்புக்கூட்டல்!

’’வெவரம் தெரியாதவங்கதான் சொல்லுவாங்க... விவசாயத்துல மிச்சமில்லன்னு. மூலதனத்தோட மூளையையும் முதலீடா போட்டா மொத்தமா அள்ளலாம். மூன்றரை ஏக்கர் நிலத்தில் ஒரே சாகுபடியில் சுமார் 4 லட்சங்களைச் சுலபமாக எடுக்கலாம்’’ என்கிறார் தஞ்சாவூர், குறுவாடிப்பட்டி கிராமத்தைச் சேர்ந்த ஆசைத்தம்பி.’நாலு மாத உழைப்பு, நாலு லட்சம் லாபம்!’ கேட்கவே கிர்றடிக்க நாம் குறுவாடிப்பட்டிக்குச் சென்றோம். ஒருபக்கம் கடலை, இன்னொரு பக்கம் நெல், மறுபக்கம் வெங்காயம் எனப் பல பயிர்கள். அவர் பாணியில் சொன்னால் அனைத்தும் பணப்பயிர்கள். எல்லாமே பச்சை பசேல் எனப் பசுமையாய் கண்ணுக்குக் குளிர்ச்சியைத் தருகிறது. இவர் பயிரிட்டிருக்கும் அனைத்துமே மூன்றரை மாதத்தில் பலன் தரக்கூடியதாக இருக்கிறது. ஆழ்குழாய் கிணறுமூலம் தண்ணீர் பாய்ந்துகொண்டிருக்க இளைஞர் ஒருவர் பாத்திகளுக்குத் தண்ணீர் பாய்ச்சிக் கொண்டிருக்கிறார்.அவரிடம் பேசினோம். ’’ஆசைத்தம்பி எங்க அப்பா தான். எம்பேரு ஆதவன். பொறியியல் படிச்சிருக்கேன். இஞ்சினியர் படிச்ச புள்ளைக்கி இங்க என்ன வேலைனு தான் எல்லாரும் கேப்பாங்க. நான் படிச்சதே ’ஃபுட் டெக்னாலஜி’ தான். நம்ம வயக்காட்டுல என்ன பயிர் செஞ்சா அதை மதிப்புகூட்டும் பொருளா மாத்தி விவசாயத்தை லாபகர தொழிலாக்கலாம்னு யோசிப்பேன். நேரம் கெடைக்கும் போதெல்லாம் இங்க வந்துருவேன். வெளைய வச்ச நெல்லை அன்னைக்கே அறுத்து அன்னைக்கே வித்தா, ’ஈரமா இருக்கு, மூட்டைக்கி இவ்வளவு குடு’, ஏத்தி இறக்க செலவுன்னு எக்கச்சக்கமா செலவாகுது. அந்த நெல்லையே நாம அரிசியாக்கி விக்கலாம். அரிசியை மாவாக்கி இன்னும் கூடுதல் விலைக்கு விக்கலாம். இப்படி எத்தனையோ வழி இருக்க, ரொம்ப பேர் அதைப்பத்தி யோசிக்கிறதில்ல.இங்க பயிரிட்டு இருக்குற வெங்காயம், நெல், கடலை எதுக்குமே ரசாயன உரம் பயன்படுத்துறதுல்ல. எல்லாமே இயற்கையான உரங்கள் தான். அதனால செலவும் மிச்சமாகுது. லாபமும் கூடுதலா கெடைக்குது. இருக்குறத விட்டுட்டு பறக்குறதுக்கு ஏன் ஆசைப்படணும்?’’ என்றவர் தங்களது விவசாயம் பற்றிப் பேசினார்..3 மாத பயிர்கள்’’இந்த இடத்துல எங்களுக்கு மூன்றரை ஏக்கர் நிலம் இருக்கு. அதுல இரண்டு ஏக்கர்ல நெல்லு, ஒரு ஏக்கர்ல கடலை, அரை ஏக்கர்ல வெங்காயம்னு மூனு பயிர்களைப் பயிரிட்டுருக்கோம். எல்லாமே மூன்றரை மாசத்துல பலன்தரக்கூடிய பயிர்கள் தான். இதுல வெங்காயத்தை மட்டும்தான் அப்பவே விக்கணும்னு இருக்கு. மத்த ரெண்டையும் எப்ப வேணாலும், எப்படி வேண்ணாலும் விக்கலாம். என்ன கொஞ்சம் மூளையையும் செலவு பண்ணனும்’’ என்றவர் கடலைக்கான வரவு, செலவு கணக்கைச் சொல்லத் தொடங்கினார்.37 மூட்டை மகசூல்"ஒரு ஏக்கர்ல கடலை போட்டு மகசூல் எடுக்க மொத்தமா 26,250 ரூபாய் செலவாகுது. மகசூல் 37 மூட்டைக்கு கிடைச்சது. அதாவது 1,480 கிலோ. நாங்க விதை கடலையா தான் விப்போம். உடைக்காம அப்படியே கொடுத்தா ஒரு கிலோ 100 ரூபாய், உடைச்சு பருப்பாக் கொடுத்தா கிலோ 150 ரூபாய். அப்படியே கொடுத்தா 1,480 கிலோவுக்கு 1,48,000 ரூபாய் கிடைக்கும். அதுல செலவு போக 1,21,750 ரூபாய் லாபமாகக் கிடைக்கும்.கடலையை உடைச்சு பருப்பா எடுத்தா 925 கிலோ கிடைக்கும். அதை எண்ணெய் ஆட்டுனா 500 லிட்டர் எண்ணெய்யும் 400 கிலோ புண்ணாக்கும் கிடைக்கும். ஒரு லிட்டர் எண்ணெய் 300 ரூபாய். அந்த வகையில 1,50,000 ரூபாய், புண்ணாக்கு வகையில 16,000 ரூபாய். ஆக மொத்தம் 1,66,000 ரூபாய் கிடைக்கும். அதுல செலவு தொகையான 26,250 போக 1,39,750 ரூபாய் லாபமாகக் கிடைக்கும். இப்ப சொல்லுங்க ஒரு ஏக்கர்ல கடலை போட்டு ஒன்னே கால் லட்ச ரூபாய் கிடைச்சா விவசாயம் கசக்குமா என்ன?’’ என்றவர் அடுத்தடுத்த கணக்குகளையும் சொல்லத் தொடங்கினார்..மாப்பிள்ளை சம்பா"மாப்பிள்ளை சம்பா ஒரு ஏக்கர்ல சாகுபடி செய்ய 32,180 ரூபாய் செலவாகுது. 27 மூட்டை (60கிலோ மூட்டை) மகசூல் கிடைக்குது. மாப்பிள்ளை சம்பா நெல் ஒரு மூட்டை 2,500 ரூபாய்க்கு கொடுக்குறோம். அந்த வகையில 67,500 ரூபாய் கிடைக்கும். அதையே அரைச்சு அரிசியாக்கி கொடுத்தா கிலோ 75 ரூபாய். ஒரு மூட்டையை அரைச்சா 35 கிலோ அரிசி, 25 கிலோ தவிடு கிடைக்கும். அந்த வகையில அரிசி மூலமா 2,625 ரூபாய், தவிடு மூலம் 250 ஆக நெல்லை மதிப்புக்கூட்டி விற்கும்போது ஒரு மூட்டைக்கு 2,875 ரூபாய் கிடைக்கும். 27 மூட்டைக்கு 77,625 ரூபாய் கிடைக்கும். அதே அரிசியை இட்லி மாவு, கொழுக்கட்டை மாவு, தோசை மாவு, புட்டு மாவு, இடியாப்ப மாவு, முறுக்கு மாவு, அதிரச மாவுன்னு மாவு பொருளா மதிப்புக்கூட்டி விற்கலாம். ஒரு கிலோ மாவு சராசரியா 150 ரூபாய். 27 மூட்டை நெல்லை அரைச்சா 945 கிலோ அரிசி கிடைக்கும். அதை அரைச்சா 900 கிலோ மாவு மூலமா 1,35,000 ரூபாய் கிடைக்கும்..வெங்காயம் அரை ஏக்கர்ல சாகுபடி செய்ய 20,750 ரூபாய் செலவாகுது. 1,000 கிலோ மகசூல் கிடைக்கும். ஒரு கிலோ 60 ரூபாய் வீதம் 60,000 ரூபாய் கிடைக்கும். செலவு போக 39,250 ரூபாய் லாபம் கிடைக்கும்’’ என்றவர் நிறைவாக, ’’ ஒரு விவசாயி வியாபாரியா மாறும்போதுதான் முழுமையான லாபத்தை அறுவடை பண்ண முடியும். அதைத்தான் நாங்க செய்யுறோம். எல்லா விவசாயிகளும் அப்படி மாறணும்ங்கிறது தான் எங்க விருப்பம்’’ என்றவரிடம் விடைபெற்றோம்.தொடர்புக்கு : ஆசைத்தம்பி : 96983 69927பெட்டிச் செய்திவிற்பனை வில்லங்கமில்லை’’நாங்க ஊர்ல உரக்கடை வெச்சிருக்கோம். அதுனால எங்க கடைக்கு எப்பவும் ஆளுங்க வந்துட்டு போயிட்டு இருப்பாங்க. எங்க தோட்டத்துல விளையுற பொருள்களை மதிப்புக்கூட்டி அங்க வெச்சு நேரடியா விற்பனை செய்றோம். அதுனால விற்பனை எங்களுக்குப் பிரச்சனையில்ல. பொதுவா எந்த விளைபொருளா இருந்தாலும் அப்படியே கொடுக்காம மதிப்புக்கூட்டி விற்பனை செஞ்ச கூடுதல் லாபம் கிடைக்கும். அதை எங்க அனுபவத்துல உணர்ந்திருக்கோம். இப்போதைக்கு மாவு அரைக்க வெளிய ஒரு மில்லுல கொடுத்துத் தான் வாங்குறோம். சீக்கிரம் நாங்களே ’மிஷின்’ போடுறதுக்கு ஏற்பாடு செஞ்சிகிட்டு இருக்கோம்’’ என்கிறார் ஆசைத்தம்பி.பெட்டிச் செய்திஒரு ஏக்கரில் கடலை சாகுபடி செய்வதற்கான செலவு கணக்கு. (ரூபாயில்)தெழு உரம் -2000ரோட்டேட்டர் - 1500விதை (30 கிலோ * 120 ரூ) - 3600நடவு -1000முதல் களை - 1400முதல் மேல் உரம்(மண்புழு உரம் 250 கிலோ) - 25002வது மேல் உரம்,(மண்புழு உரம்,வேப்பம்பிண்ணாக்கு, கடலை பிண்ணாக்கு) -8500மண் அணைத்தல் - 1800மீன் அமிலம், பஞ்சகவ்யா தெளிப்பு - 750அறுவடை - 3200மொத்தம் - 26,250பெட்டிச் செய்திஒரு ஏக்கரில் மாப்பிள்ளை சம்பா சாகுபடி செய்வதற்கான செலவு, வரவு கணக்கு (ரூபாயில்)தக்கை பூண்டு தெளிப்பு - 480உழவு - 3200 விதை - 1800நாற்று பராமரிப்பு, பறிப்பு - 3200 நடவு - 2400முதல் களை - 1000மண்புழு உரம் - 2000வேப்பம் பிண்ணாக்கு - 1500கடலை பிண்ணாக்கு - 4000மஞ்சள் வண்ண அட்டை - 450இரண்டாம் மேல் உரம்(வேம்பு, கடலை பிண்ணாக்கு) - 5500பஞ்சகவ்யா,மீன் அமிலம் - 2000அறுவடை - 2500நெல் காய வைக்க - 2100மகசூல் (27 மூட்டை * 2500 ரூ) - 67,500 மொத்தம் - 32,130 67,500நிகர லாபம் - 35,370 - வீ. மாணிக்கவாசகம்.

நெல் 67,000... அரிசி 77,000... மாவு 1,35,000 ரூபாய் மகத்தான லாபம் கொடுக்கும் மதிப்புக்கூட்டல்!

Related Stories