பொன்னியின் செல்வன் போல இன்னொரு வாய்ப்பு கிடைக்காது! -வினோதினி வைத்தியநாதன் பெருமிதம்

-வாசுகி ராஜாநடிகை வினோதினி வைத்தியநாதன் என்பதைவிட, ரீல்ஸ் வினோதினின்னு சொன்னா தான் இப்போ எல்லாருக்கும் தெரியுது. சின்னக் கலைவாணி... சரியா சொல்லணும்னா பொம்பள விவேக், பேச்சுல அவ்வளவு நக்கல் நையாண்டி சரளமா வரும். அரசியல், சமூக அவலங்கள் என சகலத்தையும் துணிச்சலாக கிண்டி கிளறி ரீல்ஸ்களை போட்டுத்தள்ளுவதால் சோஷியல் மீடியாவில் இவருக்கு லட்சக்கணக்கான ரசிகர்கள். அண்மையில் பொன்னியின் செல்வன் படத்தில் நந்தினியின் பணிப்பெண்ணாக நடித்து ரசிகர்களின் பாராட்டு மழையில் நனைந்துகொண்டிருந்தவரை சந்தித்தோம்… .உங்க கலையுலகப் பயணத்தைத் தெரிஞ்சுக்கலாமா? “எனக்கு நடிப்பு மேலயும், நிகழ்த்துக் கலை மேலயும் ஒரு ஆர்வம் இருந்தது. அதனால 2006-லேர்ந்து ‘கூத்துப் பட்டறை’ குழுவோட முழு நேரமா இணைஞ்சிருந்தேன். அதுக்கப்புறம் சினிமா வாய்ப்புகள் எதேச்சையா வர ஆரம்பிச்சது. அப்போல்லாம் கூத்துப் பட்டறையில நடிக்கறவங்க அடுத்தகட்டமா சினிமாவுலயும் நடிப்பாங்க. அப்படி தான் எனக்கு முன்னாடியே பசுபதி, கலைராணி போன்றவங்கள்லாம் சினிமாவுக்கு வந்தாங்க. அப்புறம் குரு சோமசுந்தரம், விமல், வித்தார்த் எல்லாருமே எனக்கு சீனியர்ஸ். நிறைய படங்களுக்காக ஆடிஷன்ஸுக்கு இயக்குநர்கள் அங்க வருவாங்க. அப்படி நான் பண்ண ஒரு தனிநபர் நாடகத்தைப் பார்த்து தான் ‘எங்கேயும் எப்போதும்’ படத்துல நடிக்க வாய்ப்பு வந்தது. அதப் பார்த்து வரிசையா வந்தது.”இனி வர்ற படங்கள்ல நீங்க இல்லாத படமே இருக்காது போலிருக்கே, இப்போ எத்தனை படங்கள் பண்றீங்க?(சிரிக்கிறார்) “அப்படியெல்லாம் சொல்லிட முடியாது. எனக்கு வர்ற வாய்ப்புகளை முடிஞ்ச வரைக்கும் பயன்படுத்திக்கறேன். ரொம்ப வருஷத்துக்கு அப்புறமா ராமராஜன் நடிச்சிருக்குற ‘சாமானியன்’, பிளாக் ஷீப் மீடியா தயாரிச்சிருக்குற ‘பாபா ப்ளாக் ஷீப்‘, ஹிப் ஹாப் ஆதியோட ’பி.டி. சார்’, தோனி தயாரிச்சிருக்குற முதல் தமிழ்ப் படமான ‘ஹரிணி கல்யாணம்’, மன்சூர் அலிகான் கதை வசனம் எழுதியிருக்கிற ஒரு படம், ‘நாதமுனி’ன்னு ஒரு படம் இப்படி நான் நடிச்ச 23 படங்கள் அடுத்தடுத்து வெளியாக இருக்கு. ‘குலசாமி’ அப்புறம் இன்னும் இரண்டு படங்கள்ல நெகடிவ் கேரக்டர் பண்ணியிருக்கேன். நிறைய படங்கள்ல ஹரீஷ்கல்யாண் போல இளைய தலைமுறை நடிகர்களுக்கு அக்கா அண்ணி கேரக்டர்கள்ல பண்ணியிருக்கேன்.”.வித்தியாசமான கதாபாத்திரங்களை தேர்ந்தெடுத்து நடிக்கறீங்களா? இல்ல, வர்றது வரட்டும்னு நினைக்கிறீங்களா? “வித்யாசமான கதாபாத்திரம் வரும்னு வெயிட் பண்ணினேன்,இதுவரைக்கும் அப்படில்லாம் எதுவும் வரல. அதெல்லாம் அத்தி பூத்த மாதிரிதான் வரும். அதனால வர்ற படங்கள்ல தான் நாம வித்யாசமா பண்ண முடியுமான்னு பார்க்கணும். உதாரணத்துக்கு ‘தானா சேர்ந்த கூட்டம்’ படத்துல எனக்கு மொத்தமே ஒண்ணு ரெண்டு காட்சி, சும்மா வந்துட்டுப் போற மாதிரி தான் இருந்தது. ஆனா நான் ரொம்ப முயற்சி பண்ணி அந்த இடத்துல என்னைத் தக்க வச்சுக்கிட்டேன். டைரக்டர்கிட்ட, ‘இத நான் பண்ணவா பண்ணவா?‘ன்னு நச்சரிச்சு தான் பல விஷயங்களை நடிக்க வேண்டியதா இருந்தது. ஆனா அப்புறம் பார்த்தா அந்தப் படத்துல அது ஒரு நல்ல கதாபாத்திரமாவே வந்தும் உட்கார்ந்துடுச்சி. நான் பண்ணதையெல்லாம் பார்த்துட்டுதான் க்ளைமாக்ஸ்ல ஒரு சீன் கொடுத்தாங்க. அது இன்னைக்கு வரைக்கும் பேசப்படற ஒரு சீனா இருக்கு.”.பொன்னியின் செல்வனில் நந்தினியின் நம்பிக்கைகுரிய தாதி வாசுகியா வந்திருக்கீங்க, மணிரத்னம் இயக்கத்தில் நடிச்ச அனுபவங்கள் எப்படி இருந்தன? “அது ரொம்ப நல்ல அனுபவம். அப்படி ஒரு சரித்திரக்கதையில அவ்ளோ பெரிய நட்சத்திரப் பட்டாளங்களோட நடிக்கறவாய்ப்பு எல்லாருக்கும் கிடைக்காது, எனக்கே அப்படி ஒரு வாய்ப்பு இன்னொரு தடவை கிடைக்கறது கஷ்டம். மணி சார்கூட நான் அல்ரெடி ‘கடல்’ படத்துல நடிச்ச அனுபவம் இருக்கு.அவரோட டைரக்டோரியல் மெத்தடாலஜி எப்படீன்னு எனக்குஓரளவுக்குத் தெரியும்கிறதுனால பொன்னியின் செல்வன்ல நடிச்சது ஈஸியா இருந்தது. ஐஸ்வர்யா ராய் கூட அவ்வளவு நெருக்கமான ஒரு கதாபாத்திரத்துலயும், சரத்குமார் சார், கார்த்தின்னு பெரிய பெரிய நடிகர்கள் அத்தனை பேரோடயும் ஒரே படத்துல சேர்ந்து நடிச்சது ரொம்ப சந்தோஷமான அனுபவம்.”.உங்களுக்கு நிறைய பாராட்டுகளை வாங்கித் தந்த படம் எது? “நான் நடிச்ச நிறைய படங்கள் எனக்குப் புடிக்கும். ‘ஆண்டவன் கட்டளை’ படத்துல நடிச்சதுக்காகத் தான் ரொம்ப அதிகமா பாராட்டு வந்தது. ”நகைச்சுவையாகவும் நையாண்டியாகவும் ரீல்ஸ் போடுற ஐடியா எப்படி வந்தது? “என்னோட கூத்துப் பட்டறை காலத்துலேர்ந்தே சமூகத்தின் கண்ணாடியா எடுத்துக் காட்டற விஷயங்களைதான் நிறைய செஞ்சுகிட்டிருந்தோம். அதனால நான் புதுசா எதையும் செய்யற மாதிரி எனக்குத் தோணலை. நான் எழுதுற நாடகங்கள் எல்லாத்துலயுமே ஒரு நையாண்டி இருக்கும், நக்கல் இருக்கும்கிறது என்னோட மேடை நாடகங்கள் பார்த்தவங்க எல்லாருக்கும் தெரியும்.”எப்போலேர்ந்து நாடகங்கள் எழுதத் தொடங்கினீங்க? உங்க நாடகங்கள் பத்தி சொல்லுங்க..? “நான் என்னோட கல்லூரி நாட்கள்லேர்ந்தே குட்டி குட்டி நாடகங்கள்எழுதியிருக்கேன். அப்போல்லாம் கூத்துப் பட்டறை மாதிரியான இயக்கங்கள் இருக்குன்னே தெரியாது. நான் கூத்துப் பட்டறைக்கு வந்தப்போ அதோட நிறுவனர் நா. முத்துசாமி சார் தான் என்னோட பெரிய இன்ஸ்பிரேஷன். நாடகத்துல கிராமிய கலைகளைக் கொண்டு வரணும்னு அவர் சொல்லித்தான் என்னோட முதல் நாடகமான ‘நாடக கம்பெனி’யில தெருக்கூத்துங்கிற விஷயத்தை உள்ள கொண்டு வந்தேன். ”

பொன்னியின் செல்வன் போல இன்னொரு வாய்ப்பு கிடைக்காது! -வினோதினி வைத்தியநாதன் பெருமிதம்

Related Stories