வெயில் ஏன் இப்படி அடிக்குது? -காரணத்தைச் சொல்லும் ‘வெதர்மேன்’ பிரதீப் ஜான்

-சி. எம். ஆதவன் “ஸ்ஸ்ஸ்ஸ்… அப்பா என்னா வெயிலு..? இப்படி அடிக்குது… வெளியில தல காட்ட முடீலயே..!” என புலம்பாதவங்களே தமிழ்நாட்டில் இல்லை. அந்தளவுக்கு வெயில் வச்சு செய்யுது. பல ஊர்களிலும் வெப்பம் 100, 104, 108ன்னு போய்கிட்டே இருக்கு….“போன வருஷத்தை விட, இந்த வருஷம் வெயிலு ரொம்ப அதிகமா இருக்கே…” ன்னு ஒவ்வொரு வருஷமும் புலம்புறோம்... ‘உண்மையிலேயே வெயில் வருஷா வருஷம் கூடுகிறதா? ஏன் இவ்ளோ வெயில்?’ என்று ‘தமிழ்நாடு வெதர்மேன்’ பிரதீப் ஜானிடம் கேட்டோம். “தற்போதைய வெப்பநிலைக்கு வங்கக்கடலில் உருவான ‘மோக்கா’ புயல்தான் காரணம். இந்தப் புயலானது மே.14 அன்று, அங்கிருந்து வடகிழக்குத் திசையான வங்கதேசம் நோக்கி நகர்ந்து சென்றது. இந்தப் புயல், ஈரப்பதத்தை உறிஞ்சிக் கொண்டு சென்றதால், குளிர்ச்சித் தன்மை குறைந்தது. ஈரப்பதம் இல்லாத இடத்தில் சூரிய வெப்பத்தின் தாக்கம் வீரியமாக உணரப்படும். தவிர, மேற்கு மற்றும் வடமேற்குத் திசையில் இருந்து வறண்ட காற்று வீசியதால் இன்னும் வெப்பம் அதிகமாகி, உஷ்ணம் அதிகமாக உணரப்பட்டது. புயல் கரை கடந்த மறுநாளே சராசரியை விட, 4 டிகிரி வரை வெப்ப நிலை உயர்ந்தது. சென்னை உட்பட பல மாவட்டங்களில் 104 ஃபாரன்ஹீட்டாக வெயில் இருந்தது இதனால்தான்…” என்று விவரித்தார். புயல் வந்தால் கடுமையான மழை கொட்டும் என்ற நிலை மாறி, கடுமையான வெயில் வாட்டும் என்ற நிலை ஏற்பட்டுள்ளது. அக்னி நட்சத்திரம் முடியும் (மே.28) காலம் வரையிலும் வெயில் வாட்டுமா? என்று கேட்டோம்..“வானிலை ஆய்வைப் பொறுத்த வரையில் அக்னி நட்சத்திரம் என்ற சொல் கிடையாது. மார்ச் 1 முதல் மே 31 வரை ‘முன்பருவமழைக் காலம்’ (Pre Monsoon) ஆகும். இந்தக் காலகட்டத்தில், மே மாதத்தில் பொதுவாகவே வெயில் அதிகமாக இருக்கும். வானிலை பொதுவாக வறண்டதாக இருக்கும். வெப்பச்சலனம் காரணமாக அவ்வப்போது மழை பெய்தாலும், மழை நின்றவுடனேயே வெப்பத்தின் தாக்கம் உணரப்படும் கடற்காற்று வீச ஆரம்பித்தால், வெப்பம் சற்றுக் குறையலாம். ஆனால், தரைக்காற்று வீசும் சமயத்தில், கடற்காற்று கரைப்பகுதிக்குள் நுழைய சிரமப்படும். கடல்காற்று வீசினால் வெப்பம் தணியும்” என்றார். வெயிலின் தாக்கத்தில் இருந்து தற்காத்துக் கொள்ள வழி இருக்கிறதா? என்று கேட்டோம். “ ‘நகர்ப்புற வெப்பத்தீவு விளைவு’தான் (Urban Heat Island Effect) வெப்பம் அதிகமாக இருக்கக் காரணம். நகரங்கள் வளர்ச்சி அடையும்போது, பல்வேறு காரணங்களால் நில மேற்பரப்பின் இயல்பு மாற்றப்படுகிறது. இதனால், நகர்ப்புற வளிமண்டலம் மற்றும் அதனைச் சூழ்ந்திருக்கும் பகுதிகளில் வெப்பநிலை கூடும். அதிகமான கான்கிரீட் கட்டிடங்கள் சூரிய வெப்பத்தைப் பிரதிபலிக்கும். சாலைகள் ஓரளவுக்கு வெப்பத்தை உள்வாங்கி, அதன்பின்னர் அதனை வெளிவிடத் தொடங்கும். நேரடியாக வரும் சூரிய வெப்பத்தோடு இதுவும் சேர்ந்து கொள்வதால், வெப்பம் அதிகமாக உணரப்படும். மரங்கள் அதிகமாக வளர்ப்பதைத் தவிர, வெப்பத்தின் தாக்கத்தில் இருந்துத் தப்பிக்க வேறு வழியில்லை. வீடுகளின் மாடியில் மாடித்தோட்டம் அமைக்கலாம். பூமியை முடிந்த அளவுக்கு பசுமையாக மாற்றுவதே எதிர்காலத்தில் வெப்பத்தின் தாக்கத்தில் இருந்து தப்பிக்கும் ஒரே வழி. அதற்கான விழிப்புணர்வு மக்கள் மத்தியில் வேண்டும்” என்றார் அக்கறையுடன்.

வெயில் ஏன் இப்படி அடிக்குது? -காரணத்தைச் சொல்லும் ‘வெதர்மேன்’ பிரதீப் ஜான்

Related Stories